Yi cyoqueꞌn yi jun cient caꞌwnak cyaj mil tan bitz
14
1 Beneꞌn tzun wilol yi Katxꞌixwatz yi txiclij wiꞌwtz yi na biꞌaj Sión. Ej nin ateꞌ jun cient tu caꞌwnak cyaj mil wunak te iꞌ. Yi eꞌaꞌtz at len yi biꞌ Katxꞌixwatz tu yi biꞌ Kataj swutzak chiplaj. 2 Beneꞌn tzun wital jun chin bitz yi choꞌn na tzan tcyaꞌj. Chin wiꞌ nin. I cunin chi na wajcan jun chin tzanlaꞌ yi na el kojxuj wutz kotxꞌ, nka chi na nilcan jun chin kꞌancyok. Poro iꞌtz tan tu yi na chibitzin, nin tan tuꞌ yi na chitzan len tan tocseꞌn jujun chikbetz yi na biꞌaj arpa. 3 Choꞌn ateꞌ yi eꞌaꞌs tan bitz swutz yi cꞌolchbil Ryos, nin ẍchiwutz yi cyaj ẍchakum Ryos, nin ẍchiwutz yi eꞌ wiꞌ banl wiꞌ. Ej nin yi bitz yi na chitzan tan bitzeꞌn, iꞌtz jun acꞌaj bitz. Cyaꞌl nin junt yi nink tzꞌaꞌw yi jun bitz taꞌn ma na ntin yi jun cient tu caꞌwnak cyaj mil wunakaꞌtz yi lokꞌij cheꞌ ẍchixoꞌl yi eꞌ mas wunak yi ateꞌ wuxtxꞌotxꞌ. 4 Chin skoj nin cyalmaꞌ yi jun cient tu caꞌwnak cyaj mil wunakaꞌtz, na qui nchipoꞌtzaj quib scyeꞌjak xnaꞌn. Ẍchixomok yi eꞌaꞌtz te yi Katxꞌixwatz alchok tzꞌaj nint. Colpiꞌn cheꞌt ẍchixoꞌl yi eꞌ mas wunak, Ej nin eꞌ yi oy yi mas balaj swutz Ryos nin swutz yi Katxꞌixwatz. 5 Na quiꞌc nin jun tir yi jajk cyal jun laꞌjil. Chaꞌstzun te quiꞌc muꞌẍ quil.Yi xtxolbil yi cyal yi oxt ángel
6 Beneꞌn tzun wilol jun ángel yi choꞌn na xicyꞌin tcyaꞌj. Yi tarey iꞌ iꞌtz tan xtxoleꞌn yi balaj stziblal yi at sajleꞌn tunintz. Yi jun balaj stziblalaꞌtz iꞌtz scyetz cyakil jilwutz wunak. Quiꞌc na ban yi mbi jilwutz yolil na chiyol, nka mbi tnumil kale najlcheꞌt. 7 Chin wiꞌ nintzun yi jun ángelaꞌtz bantz tan yol. Ej nin je yol iꞌeꞌj: “Cyekeꞌuꞌ ẍchiꞌ Ryos, nin cyakꞌeꞌuꞌ chikꞌajsbiluꞌ tetz, na ja opon yi tiempil tan toqueꞌn iꞌ tan banleꞌn xtisyaꞌ scyeꞌj cyakil wunak. Choꞌkuꞌ tan cꞌuꞌlajeꞌn yi ketz kaRyosil, na iꞌ bnol tetz yi tcyaꞌj tu yi wuxtxꞌotxꞌ, nin iꞌ bnol tetz yi mar, tu yi eꞌchk mas aꞌ.”
8 Xomt tzaj tzun junt ángel yi tal: “¡Ja el cuꞌn swutz yi jun chin wutzileꞌn tnum yi na biꞌaj Babilonia! Ja el cuꞌn swutz yi tnumaꞌtz yi nxcyeꞌ tan poꞌtzeꞌn cyajtzaꞌkl cyakil jilwutz wunak tan chixomeꞌn te yi tetz tajtzaꞌkl yi chin juntlen nin.”
9 Wutz chicoc yi cob ángelaꞌtz, xom tzaj tzun junt. Ej nin nchaꞌtz iꞌ chin wiꞌ nin ban tan yol. Je tzun taltzeꞌj: “Cyakil yi eꞌ yi na choꞌc tan cꞌuꞌlajeꞌn yi txuc, nka tan cꞌuꞌlajeꞌn yi teblal iꞌ, tzꞌakꞌlok chicaws tan Ryos. Nchaꞌtz tzꞌakꞌlok chicaws cyakil yi eꞌ yi ja cyakꞌ amaꞌl tan toqueꞌn cyechl wutzak chiplaj nka teꞌjak chikꞌab. 10 Yi chicaws niꞌcuꞌnk yi nink ltakꞌ Ryos jun lak wenen scyetz, yi wenen cuꞌn yi quiꞌc aꞌ tul. Yaꞌstzunk chicaws sbneꞌ tan paj yi wiꞌnin na chiꞌch cꞌuꞌl Ryos scyeꞌj. Ẍchiwutz cuꞌn yi eꞌ ángel Ryos, nin swutz cuꞌn yi Katxꞌixwatz, chocopon joꞌliꞌn cyeraꞌtz tkꞌakꞌ. Ẍchitijeꞌ wiꞌnin qꞌuixcꞌuj tul yi jun kꞌakꞌaꞌtz yi azufrea cuꞌn yi na tzan kꞌaꞌkl. 11 Ej nin qui nin ltzꞌujeꞌ yi jun kꞌakꞌaꞌtz, na sbneꞌ opon tunintz, tunin ljuquin cuꞌn. Cyakil yi eꞌ yi eꞌ oc tan cꞌuꞌlajeꞌn yi jun txucaꞌtz nka yi teblal iꞌ, yi eꞌ yi cyakꞌ amaꞌl tan toqueꞌn cyechl, quiꞌc cyelbil tzaj tul yi jun chin kꞌakꞌaꞌtz. Ma na skꞌejl nin lakꞌbal ẍchitijeꞌ qꞌuixcꞌuj sbneꞌ opon tunintz.”
12 ¡Chaꞌstzun te cyakil yi eꞌ yi ateꞌ tetz tajal Ryos, tajweꞌn tan beneꞌn quikan ttxꞌotxꞌ tan mucꞌleꞌn qꞌuixcꞌuj! Tajweꞌn yi quil chitxꞌixpuj cyajtzaꞌkl tan chixomeꞌn te Cristo nin tan banleꞌn yi tajbil iꞌ.
13 Beneꞌn tzun wital jun yi choꞌn na jilon tzaj swetz tcyaꞌj: “Tzꞌib cuꞌn yi xtxolbileꞌj yi swaleꞌ tzatz: Baꞌn cyeri yi eꞌ yi ẍchiquimok sbneꞌ opon tunintz tan tuꞌ yi na kꞌukeꞌ chicꞌuꞌl te Kataj.”
Ej nin nchaꞌtz tal yi Espíritu Sant swetz: “Jun cuꞌn yol yi xtxolbileꞌj na quiꞌt chitij mas qꞌuixcꞌuj. Ej nin sjamelank yi cyakꞌun.”
Yi tponeꞌn tiempil tan jeꞌseꞌn cosech
14 Beneꞌn tzun wilol noc sbakꞌ yi chin stum nin. Ej nin cꞌolchij jun tibaj yi sbakꞌaꞌtz yi i cunin iꞌaꞌtz yi Bajx Cyꞌajol. Ateꞌn jun coron twiꞌ yi oro cuꞌn, nin cyꞌaꞌn jun jos taꞌn yi chin aꞌ nin wiꞌ. 15 Teleꞌn tzaj tzun junt ángel tcꞌuꞌl yi templo. Ej nin chin wiꞌ nin iꞌ ban tzajtz tan yol tetz yi jun yi cꞌolchij wi sbakꞌ. Itzun saj tloltz: “¡Ja wiꞌt opon yi tiempil tan jeꞌn yi cosech, na ja kꞌanax! Xconken bin yi josuꞌ tan jeꞌseꞌn yi cosechaꞌtz,” chij ángel ban tzajtz.b 16 Xconeꞌn tzun yi jos taꞌn, nin jeꞌ yi cosech yi at beneꞌn tziꞌn wi munt.
17 Teleꞌn tzaj tzun junt ángel tul yi templo yi at tziꞌn tcyaꞌj. Nchaꞌtz iꞌ, cyꞌaꞌn jun jos taꞌn yi chin aꞌ nin wiꞌ. 18 Teleꞌn tzaj tzun junt ángel xlaj yi altar. Iꞌ yi qꞌuicyꞌlom kꞌakꞌ yi at wi altar. Chin wiꞌ nin tzun ban tzaj tan yol tetz yi ángel yi cyꞌaꞌn jos taꞌn yi chin wiꞌ nin. Itzun taltz: “¡Xconken yi maꞌcluꞌ tan jeꞌseꞌn yi cosech uva, na nternin kꞌant yi loꞌbaj uva yi at beneꞌn tziꞌn wi munt! Nternin kꞌant yi jujun jutuj uva, ¡Tajweꞌn ljeꞌ!” 19 Xconeꞌn tzun yi jos tan yi ángel tan jeꞌseꞌn yi uva yi at beneꞌn tziꞌn wi munt. Nintzun ben joꞌliltz tul yi yakꞌbil uva cwent Ryos, kale ticyꞌswit Ryos cꞌuꞌl scyeꞌj, na wiꞌnin na chiꞌch cꞌuꞌl scyeꞌj. 20 Toqueꞌn tzun yakꞌpeꞌn yi uva solteꞌj len yi tnum. Poro yi tꞌaꞌal yi el tzaj iꞌtz chichꞌ cuꞌn. Chin teꞌj nin yi chichꞌ yi el tzaj, na jeponeꞌn cunin jakꞌ chikul eꞌ chej. I cunin chin tzanlaꞌ ban. Ej nin ox cient kilómetro cuꞌ jeꞌ tziꞌn.