Yi juk ángel yi scyakꞌeꞌ yi juk wiꞌtzbil chicaws wunak
15
1 Ej nintzun ben wilol junt xtxolbil yi mbajij tcyaꞌj yi chin xoꞌwbil nin. Iꞌtz juk ángel yi eꞌ akꞌol yi jukt jilwutz chicaws wunak. Yi jukt jilwutz cawsaꞌtz yaꞌstzun wiꞌtzbil chicaws wunak yi stkꞌeꞌ Ryos tzoneꞌj wuxtxꞌotxꞌ.2 Nchaꞌtz wil jun eꞌchk takleꞌn yi i cunin jun chin aꞌ yi piꞌlij. Poro nkꞌeꞌtz aꞌ, ma na i cunin spej yi yujuꞌn tib tu kꞌakꞌ taneꞌn. Nin wil yi wiꞌnin wunak txiclcheꞌ tzi jun aꞌaꞌtz. Yaꞌstzun yi eꞌ yi quinin cyakꞌ quib tan chixomeꞌn te yi tajtzaꞌkl yi jun txucaꞌtz nka tan loꞌkꞌeꞌn yi teblal iꞌ. Ej nin yaꞌstzun yi eꞌ yi quinin cyakꞌ quib tan toqueꞌn yi numbril yi biꞌ yi txuc scyeꞌj tetz cyechl. Cyꞌaꞌn len arpa cyaꞌn yi Ryos akꞌon tetz scyetz. 3 Ej nin na chitzan len tan bitzeꞌn yi bitz Moisés yi ẍchakum Ryos, nin tan bitzeꞌn yi bitz yi Katxꞌixwatz. Nin je yi bitzeꞌj:
“Taꞌ, chin cham nin iluꞌ.
Cyaꞌl nin junt tzꞌopon kꞌab tan banleꞌn yi eꞌchk takleꞌn yi mbaj bnoluꞌ.
Iluꞌ Kajcawil. Iluꞌ kaRyosil.
Chin jicyuch nin te tajtzaꞌkluꞌ.
Cyaꞌl nin jun yi niꞌcuꞌnk balajil chi taneꞌnuꞌ.
Nchaꞌtz chin cham nin iluꞌ Taꞌ,
na iluꞌ yi wiꞌtz ajcaw squib cyakil jilwutz wunak yi ateꞌ beneꞌn tziꞌn wi munt.
4 Cyaꞌl jun jaluꞌ yi quiꞌk stek ẍchiꞌuꞌ,
na chin cham nin iluꞌ.
Quiꞌc nin jun jaluꞌ yi quiꞌk takꞌ kꞌejuꞌ
na ntin iluꞌ chin tzꞌaknak cuꞌn.
Ẍchichameꞌ quib cyakil jilwutz wunak swutzuꞌ.
Nin chocopon tan cꞌuꞌlajeꞌnuꞌ,
na ja lajluchax cyakil yi eꞌchk takleꞌn balaj yi mbaj bnoluꞌ,” cheꞌch bantz.
5 Itzun bantz yi wiꞌt bajeꞌn yi xtxolbilaꞌseꞌj, beneꞌn tzun wilol yi jeꞌn jakol tib yi tcyaꞌj, nin lajluch cunin ban yi amaꞌl yi chin xan nin, yi at le caꞌl Ryos. 6 Cyeleꞌn tzaj tzun yi juk ángel yi akꞌol tetz yi juk chicaws wunak. Yi beꞌch cyetz yi juk ángelaꞌtz iꞌtz jun balaj xbuꞌk yi na biꞌaj lino. Chin skoj nin, nin chin litzꞌun nin. Nin at jujun chicꞌalbil at wutz chicꞌuꞌl yi oro cuꞌn. 7 Jun tzun scyeri yi eꞌ ẍchakum Ryos yi i cunin txuc taneꞌn, nin takꞌ jujun lak yi oro cuꞌn scyetz yi eꞌ ángelaꞌtz. Nojnak len yi juk lakaꞌtz tan chicaws wunak. Na wiꞌnin ẍchiꞌcheꞌn cꞌuꞌl Ryos scyeꞌj, yi Ryosaꞌtz yi iẍ nin at sajleꞌn tunintz nin sbneꞌ opon tunintz. 8 Ej nin tan yi pakꞌpuchal tu yi ẍchamil Ryos, sibt nin tunin ban yi amaꞌl yi wiꞌnin xanil. Ej nin quiꞌc nin rmeril bantz tan toqueꞌn jun le amaꞌlaꞌtz tan paj yi sib, jalen yil tzaj wiꞌ yi juk jilwutz caws yi at akꞌbil cyakꞌun yi juk ángelaꞌtz.