Yi eꞌchk cuꞌlbil kale atiteꞌt chicaws wunak
16
1 Yi chitzꞌamol yi eꞌ ángel yi eꞌchk cuꞌlbil, beneꞌn tzun wital jun yi choꞌn jiloneꞌn tzaj le amaꞌl yi wiꞌnin xanil. Itzun saj tloltz scyetz yi juk ángelaꞌtz: “Quibeneꞌnk tan kojleꞌn yi at tul yi eꞌchk cuꞌlbileꞌj squib yi eꞌ wunak yi ateꞌ wuxtxꞌotxꞌ, na yaꞌstzun chicaws stkꞌeꞌ Ryos.”2 Beneꞌn tzun yi bajx ángel tan kojleꞌn yi at tul yi lak yi cyꞌaꞌn taꞌn. Choꞌn beneꞌn kojol squibaj yi eꞌ yi cyakꞌnak amaꞌl tan toqueꞌn cyechl takꞌun yi jun taꞌk txuc, yi eꞌ ocnakeꞌ tan cꞌuꞌlajeꞌn yi teblal yi jun txucaꞌtz. Telemuleꞌn tzun eꞌchk cꞌuꞌ scyeꞌj, yi chin xoꞌwbil nin.
3 Beneꞌn tzun yi caꞌp ángel tan kojleꞌn yi at tul yi lak yi cyꞌaꞌn taꞌn. Choꞌn beneꞌn kojol wi mar. Nin oc yi mar tetz chichꞌ. I cunin yi ẍchꞌel jun yaj yi quimnakt. Tir cunin tzun yi eꞌ txuc yi ateꞌ xe mar, eꞌ baj quim len.
4 Iteꞌn nin ban yi toxiꞌn ángel. Nin ben tan kojleꞌn yi cyꞌaꞌn taꞌn, tulak eꞌchk tzanlaꞌ tu eꞌchk cꞌwaꞌ. Tircuꞌn toqueꞌn tetz chichꞌ. 5 Beneꞌn tzun wital yi jiloneꞌn yi ángel yi qꞌuicyꞌlom tetz aꞌ. Itzun taltz:
“Baꞌn mbanuꞌ Taꞌ,
yi iluꞌ teruꞌ yi chin xan nin iluꞌ,
yi iluꞌ teruꞌ yi iẍnin atuꞌ tetz cyakil tiemp.
Baꞌn mbanuꞌ yi ncuꞌ xtxumuluꞌ chicaws yi eꞌ wunak yi ateꞌ wuxtxꞌotxꞌ.
6 Na eꞌ nchibiyon yi eꞌ yi xansaꞌncheꞌt tanuꞌ.
Ej nin eꞌ nchibiyon yi eꞌ elsanl stziꞌuꞌ.
Elnak chiẍchꞌel cyaꞌn.
Chaꞌstzun te yi baꞌn atit yi jalt chichꞌ na quicꞌaj jaluꞌ, na chipaj nin cyeraꞌtz.”
7 Nchaꞌtz ben wital yi jiloneꞌn tzaj jun kale atit yi altar. Je yol iꞌeꞌj: “Jun cuꞌn yol Taꞌ, baꞌn mbanuꞌ yi ntakꞌuꞌ chicaws yi eꞌ mal wunak yi ateꞌ wuxtxꞌotxꞌ. Puntil cuꞌn tulejuꞌ yi maꞌleꞌn cyajtzaꞌkl. Quiꞌc muꞌẍ tal paltil yi xtxumuꞌnuꞌ,” chij yi junaꞌtz.
8 Itzun yi cyajiꞌn ángel, choꞌn tzun beneꞌn tan kojleꞌn yi cyꞌaꞌn taꞌn tib yi kꞌej. Jaleꞌn tzun ẍchamil yi kꞌej tan chipateꞌn cyakil wunak. 9 Eꞌ baj tzꞌeꞌ len chicyakil cuꞌn. Chin xoꞌwbil nin eꞌ ban. Poro quinin chitxꞌixpuj cyajtzaꞌkl, nin quinin eꞌ octz tan cꞌuꞌlajeꞌn Ryos. Ma na eꞌ octz tan telseꞌn kꞌej yi jun yi akꞌontzaj eꞌchk chicawsaꞌtz.
10 Beneꞌn yi toꞌiꞌn ángel tan kojleꞌn yi cyꞌaꞌn taꞌn tib yi luwar kale na cawuneꞌt yi jun taꞌk yaj yi i cunin txuc yi chin xoꞌwbil nin. Tzꞌoꞌtz nin tunin ban cyakil yi luwar yi at jakꞌ caꞌwl yi jun yajaꞌtz. Nin tan paj yi il yi ateꞌ cuꞌnt cyakil wunak, nicyꞌt nin yi cyakꞌ baj chichayul tan yi qꞌuixcꞌuj yi ateꞌ cuꞌnt. 11 Poro quinin chitxꞌixpuj cyajtzaꞌkl. Quinin eꞌ taneꞌ tan banleꞌn yi eꞌchk takleꞌn cachiꞌ, nin tan paj yi il yi ateꞌ cuꞌnt eꞌ octz tan telseꞌn kꞌej yi Ryos yi at tziꞌn tcyaꞌj.
12 Beneꞌn tzun yi kakiꞌn ángel tan kojleꞌn yi cyꞌaꞌn taꞌn tul yi aꞌ yi na biꞌaj Eufrates. Skejeꞌn tzun yi jun aꞌaꞌtz tan takꞌleꞌn amaꞌl tan quicyꞌeꞌn tzaj yi eꞌ ajcaw scyuchꞌ chisanlar yi choꞌn chisajeꞌn teleꞌn tziꞌn.
13 Beneꞌn tzun wilol yi cyeleꞌn tzaj jujun txuc le stziꞌ yi dragón, tu yi jun taꞌk yaj yi i cunin txuc taneꞌn, nin le stziꞌ yi jun yi tocsaj tib elsanl stziꞌ Ryos. Yi ox txucaꞌtz yi el tzaj le chitziꞌ, iꞌtz ox espíritu yi chin cachiꞌ nin. I cunin woꞌ quitaneꞌn. Poro eꞌ cuꞌn espíritu cwent Baybaꞌn. 14 Nintzun eꞌ octz tan banleꞌn eꞌchk milawr nin tan tocseꞌn chicꞌuꞌl yi eꞌ wiꞌtz bajxom lakak tnum yi ateꞌ beneꞌn tziꞌn wi munt. Eꞌ octz tan chimoxeꞌn tan cyoqueꞌn tan oyintziꞌ tu ketz kaRyosil yi cyaꞌl jun xcyeꞌ quen teꞌj. Ẍchoyintzink tul yi jun tiempaꞌtz, na yaꞌstzun yi tiemp yi bixbaꞌnt tan Kataj Ryos tan chixiteꞌn cuꞌn.
15 Je junt yoleꞌj yi ben wital: “I bin jaluꞌ bitwok tzaj. Nopontz ẍchixoꞌl wunak. Ej nin qui cunin tzꞌicyꞌ scyetz yil nopon. Choꞌn tzimbneꞌ chi na ban jun alkꞌom yi quiꞌc stziblal. Poro baꞌn cyeri yi eꞌ yi na chitzan tan ẍchꞌiweꞌn wupombil, yi eꞌ yi na chitzan tan qꞌuicyꞌleꞌn beꞌch cyetz. Lastum ko txꞌanlcheꞌ cuntuꞌ taneꞌn yil nopon na ko yaꞌtz ẍchitxꞌixwok tzinwutz.”
16 Yi chixcyeweꞌn yi eꞌ espíritu cwent Baybaꞌn tan tocseꞌn chicꞌuꞌl yi eꞌ bajxomaꞌtz nintzun baj chimolol quibtz le amaꞌl yi na biꞌaj Armagedóna le yol hebreo.
17 Beneꞌn tzun yi jukiꞌn ángel tan kojleꞌn yi cyꞌaꞌn taꞌn. Saj tuꞌ kojoltz tul cyekꞌekꞌ. Yi wiꞌt sajeꞌn kojol, beneꞌn tzun wital yi jiloneꞌn tzaj jun jalen tziꞌn tcyaꞌj, tul yi amaꞌl yi chin xan nin, yi amaꞌl kale atit yi cꞌolchbil Ryos. Itzun taltz: “Ja wiꞌt bnix yi wajbil.”
18 Xeꞌteꞌn nintzun ban jun chin iltz. Baj cuꞌ xlitzꞌ. Baj cuꞌ kꞌancyok, nin yucan cyakil yi wuxtxꞌotxꞌ tan jun chin coblajnob yi qui otojt na bajij jetz yi jaleꞌn yi bajx wunak wuxtxꞌotxꞌ. 19 Tan paj yi jun chin coblajnobaꞌtz je cꞌapx yi wuxtxꞌotxꞌ, nin ox cuntunin el yi chumam tnum, yi chitnumil yi eꞌ contr. Ej nin nkꞌeꞌtz ntinaꞌtz ma na nchaꞌtz cyakil eꞌchk tnum yi at beneꞌn tziꞌn wi munt, eꞌ baj cuꞌ chꞌuk. Ej nin nchaꞌtz yaꞌstzun yi ticyꞌsal Ryos yi cꞌuꞌl te yi jun tnumaꞌtz yi na biꞌaj Babilonia. Takꞌ iꞌ chicaws yi eꞌ wunakaꞌtz yi ateꞌ tul yi jun tnumaꞌtz na at swutz iꞌ yi mbi cuꞌn baj chibnol. Yi caws yi takꞌ scyetz, i cunin xcꞌalaꞌ yi at wenen tul, nin puers bajeꞌn cyaꞌn. 20 Aloꞌ nin eꞌ aj nint eꞌchk wutz. Eꞌ txꞌakx cuntunintz. Nchaꞌtz eꞌchk isla yi ateꞌ beneꞌn tziꞌn nicyꞌal mar, eꞌ sotz cuntunintz. 21 Nchaꞌtz cuꞌ jun chin wutzileꞌn cꞌub abal. Chin lmak len nin yi cꞌub yi cuꞌ. At loꞌ jun quintal jujun. Poro yi eꞌ wunak ntin eꞌ octz tan jisleꞌn Ryos, tan paj yi jun chin chicaws yi akꞌlij scyetz.