Yi tkꞌol Ryos caws yi chin aj poꞌtzanl
17
1 Tuleꞌn tzaj tzun jun scyeri yi juk ángel sweꞌj, jun scyeri yi eꞌ yi cyꞌaꞌn jujun lak cyaꞌn. Itzun taltz swetz: “Xomen tzaj sweꞌj nin tzinchajeꞌ tzatz yi caws yi xnaꞌn yi wiꞌtz aj poꞌtzanl yi tzꞌakꞌlok, yi jun yi cꞌolchij tibaj eꞌchk mar. 2 Yaꞌstzun yi xnaꞌn yi nxcyeꞌ tan chipoꞌtzeꞌn cyakil yi eꞌ ajcaw beneꞌn tziꞌn wi munt nin ja xom chiwiꞌ-tz teꞌj. Yaꞌstzun yi xnaꞌn yi ja jeꞌ chijobil wunak yi tajtzaꞌkl iꞌ yi chin juntlen nin.”3 Itzun bantz chi tul wutzicyꞌ taneꞌn ja wil jun xtxolbil tan porer yi Espíritu Sant, nintzun oc yi ángel tan wicyꞌleꞌn nin le jun amaꞌl yi tzꞌinunin tuꞌ. Itzun bantz nin wil yi jun xnaꞌnaꞌtz. Choꞌn ateꞌn te jun txuc yi cyak teꞌj. Juk cuꞌn wiꞌ yi jun txucaꞌtz nin lajuj cuꞌn tucꞌ. Nin te yi wankil yi jun txucaꞌtz tzꞌibaꞌn cyen wiꞌnin yol yi na takꞌ chꞌon tetz Ryos. 4 Inti yi xnaꞌn, txib yubil yi beꞌch tetz. Chin bnoꞌn nin tib tan eꞌchk tal cꞌub yi wiꞌnin na litzꞌun, nin tan yi eꞌchk uwaj yi oro cuꞌn, nin tan yi eꞌchk balaj cꞌub yi nim jamel. Nin cyꞌaꞌn jun chin lak taꞌn yi oro cuꞌn. Poro yi jun lakaꞌtz nojnak tan jun wenen yi tajweꞌn tan bajeꞌn taꞌn. Yaꞌstzun caws iꞌ tan paj yi eꞌchk takleꞌn yi chin juntlen nin yi mbaj bnol, yi niꞌcuꞌn tu jopol wutzajiꞌn swutz Ryos. 5 Ej nin at jun xtxolbil yi tzꞌibaꞌn wutz plaj yi jun xnaꞌnaꞌtz yi na taj xtxꞌolcheꞌn xoꞌl. Je xtxolbileꞌj yi tzꞌibaꞌn wutz plaj iꞌ: “Wutzileꞌn Babilonia, chitxuꞌ yi eꞌ aj poꞌtzanl, yi cꞌopin quen eꞌchk yab ajtzaꞌkl le chiwiꞌ cyakil jilwutz wunak yi ateꞌ wi munt.” 6 Teleꞌn tzun intxum tetz i cunin kbarel yi jun xnaꞌnaꞌtz tan paj bajeꞌn chiẍchꞌel yi eꞌ yi baj biyol, yi eꞌ yi ateꞌ tetz tajal Ryos, yi eꞌ yi chitxol yi tajbil Cristo.
Yi wilol yi xtxolbileꞌj, wiꞌnin weleꞌn yab teꞌj. 7 Sajeꞌn tzun tlol yi ángel swetz: “¿Mbi tzuntz yi na cẍeꞌl yab te yi xtxolbileꞌj? Swaleꞌ tzatz yi mbi na ẍchaj yi jun xnaꞌnaꞌtz tu yi txuc yi ateꞌn iꞌ teꞌj. Yi jun txucaꞌtz yi juk cuꞌn wiꞌ nin lajuj cuꞌn tucꞌ. 8 At iꞌ sajleꞌn ma jaluꞌ quiꞌct, poro tzꞌitzꞌok junt tir. Txant tan teleꞌn tzaj iꞌ tjul, jetuꞌlt iꞌ wuskil. Jeꞌ ult iꞌ junt tir yi ntaxk sotz. Cyakil yi eꞌ wunak yi ateꞌ wuxtxꞌotxꞌ chelepon yab yil quilnin yil jeꞌ ul yi jun txucaꞌtz yi at sajleꞌn. Yi eꞌ yi chelepon yab, iꞌtz yi eꞌ yi qui cuꞌnak chibiꞌ tul yi planiy kale cuꞌnakit chibiꞌ yi eꞌ yi ẍchicambok te yi itzꞌajbil yi quinin bajsbeꞌn tetz, yi eꞌaꞌtz yi cuꞌnakt chibiꞌ yi ntaxk cuꞌ wuxtxꞌotxꞌ.
9 “I bin jaluꞌ na taj ajtzaꞌkl tan teleꞌn katxum tetz yi mbi na elepont yi xtxolbileꞌj: Na yi juk wiꞌ yi txuc na ẍchaj juk wutz nin iꞌtz kale na cawuneꞌt yi jun xnaꞌnaꞌtz. 10 Nchaꞌtz yi juk wiꞌ yi jun txucaꞌtz na ẍchaj juk wiꞌtz ajcaw. Oꞌix scyeri eꞌ ajcawaꞌtz ten chisotz. Yi kakiꞌn na cawun jaluꞌ, nin yi jukiꞌn txeꞌn ẍchaj tib. Nin yil tzꞌul yi jun wiꞌtz ajcawaꞌtz quil cawun tetz nim tiemp. 11 Ma yi wajxokiꞌn ajcaw, yaꞌstzun yi jun yi at sajleꞌn. Quiꞌc iꞌ jaluꞌ poro at tulbil. Niꞌcuꞌn tajtzaꞌkl scyuchꞌ yi eꞌ mas. Nin yil tzꞌel tiemp nchaꞌtz iꞌ tzꞌelk cuꞌn swutz.
12 “Ej nin yi lajuj tucꞌ yi txuc yi mawil, na ẍchaj lajuj ajcaw yi ẍchicawunk jakꞌ caꞌwl yi yaj, yi i cunin txuc tu tajtzaꞌkl. Poro yi lajuj ajcawaꞌtz muꞌẍ ntziꞌ tiemp ẍchicawunk, 13 na junit cyajtzaꞌkl sbneꞌ tan takꞌleꞌn amaꞌl tetz yi jun txucaꞌtz tan cawuꞌn squibaj. 14 Cyakil yi eꞌaꞌtz tuml yi yaj yi i cunin txuc, ẍchoyintzink tu yi Katxꞌixwatz. Poro yi eꞌ cyetz quil chixcyeꞌ, na ẍchiloꞌonk taꞌn. Xtxꞌaconk yi Katxꞌixwatz scyeꞌj yi eꞌ contraꞌtz, na mas cham iꞌ swutz alchok jilwutz ajcaw, nka alchok jilwutz rey.”
15 Nchaꞌtz tal yi ángel: “I bin jaluꞌ swaleꞌ tzatz yi mbi na elepont yi eꞌchk mar kale na cawuneꞌt yi jun xnaꞌnaꞌtz yi wiꞌtz aj poꞌtzanl. Yi eꞌchk maraꞌtz iꞌtz jun elsawutzil tetz cyakil jilwutz wunak yi ateꞌ beneꞌn tziꞌn wuxtxꞌotxꞌ. Quiꞌc na ban yi mbi jilwutz yolil na chiyol, nka yi mbi jilwutz tnum kale najlcheꞌt. Cꞌolchij yi jun xnaꞌnaꞌtz squibaj tan chicaweꞌn. 16 Ej nin yi lajuj tucꞌ yi txucaꞌtz, iꞌtz jun elsawutzil tetz lajuj ajcawaꞌtz. Ẍchiꞌchok chicꞌuꞌl te yi jun xnaꞌnaꞌtz yi wiꞌtz aj poꞌtzanl, nin scyajk coliꞌn cyaꞌn. Yil quil cyen yi jun xnaꞌnaꞌtz, chin mebaꞌ nin sbneꞌ cyen cyaꞌn, chi txꞌanl cuntuꞌ taneꞌn. Sbajk cyakil yi ẍchibel yi jun xnaꞌnaꞌtz cyaꞌn, nin yi sowril tzꞌocopon wi kꞌakꞌ. 17 Ryos lcꞌopin quen yi jun ajtzaꞌkl le chiwiꞌ, na yaꞌstzun tajbil Ryos tan xiteꞌn yi jun xnaꞌnaꞌtz. Nin nchaꞌtz Ryos cꞌopin quen le chiwiꞌ tan cyakꞌol amaꞌl tetz yi jun txucaꞌtz tan cawuneꞌn squibaj. Yaꞌstzun sbajok jalen yil tzꞌel cuꞌn te yi alijt cyen tan Ryos. 18 Ma yi jun xnaꞌnaꞌtz yi mawil, yaꞌstzun yi jun wutzileꞌn tnum yi na cawun squibaj cyakil yi eꞌ ajcaw yi ateꞌ beneꞌn tziꞌn wi munt,” stzun ángel bantz swetz.