Xitok yi chumam tnum Babilonia
18
1 Itzun bantz yi bajeꞌn yi xtxolbilaꞌseꞌj nintzun wil jun ángel yi cweꞌn mul atit tcyaꞌj. Chin wiꞌtz ajcaw iꞌ. Nin tan yi pakꞌpuchal iꞌ xcyeꞌ tan xtxekeꞌn cyakil wuxtxꞌotxꞌ. 2 Nin chin wiꞌ nin ban tan yol, itzun taltz:“Yi tnum Babilonia yi wiꞌnin kꞌej, ja wiꞌt el cuꞌn swutz.
Ja oc tetz chinajbil yi eꞌ espíritu cwent Baybaꞌn.
Jaluꞌ iꞌtz jun luwar kale cyewaneꞌt quib cyakil eꞌchk jilwutz espíritu yi chin cachiꞌ nin,
scyuchꞌ cyakil yi eꞌ txuc yi chin xaꞌbil nin eꞌ.
3 Ja el cuꞌn swutz na ja cheꞌ baj poꞌtzal cyakil jilwutz wunak tan yi tetz tajtzaꞌkl yi chin cachiꞌ nin.
Ej nin yi eꞌ wiꞌtz bajxom yi ateꞌ beneꞌn tziꞌn wi munt,
ja chixom te yi tetz tajtzaꞌkl yi niꞌcuꞌn tu jopol wutzajiꞌn swutz Ryos.
Ej nin ja el cuꞌn swutz,
na ja chiriquin cyakil yi eꞌ aj cꞌayinl wuxtxꞌotxꞌ tan yi tetz tajtzaꞌkl,
na wiꞌnin na el talmaꞌ te yi eꞌchk takleꞌn balaj.”
4 Beneꞌn tzun wital junt yi choꞌn jiloneꞌn tzaj tcyaꞌj.
Itzun saj tloltz:
“Cyakil axwok yi atix te wajal,
il quenwok yi jun tnumaꞌtz,
na qui na waj xom iwiꞌ teꞌj,
bantz quil cxtzꞌaben ninwok te iꞌ, yil tzꞌul yi caws.
5 Chin juntlen nin iꞌ, na techix nin til baj juchul.
Poro na til Ryos cyakil yi mbaj bnol.
6 Chi ban iꞌ tan ibuchleꞌn, iteꞌn nin tzibneꞌ itetz teꞌj.
Oponk cuꞌn yi caws itaꞌn, chi yi caws yi takꞌnak iꞌ tzitetz.
Chi ban iꞌ tan ibuchleꞌn, nchaꞌtz tzibneꞌ itetz teꞌj.
Chi banak iꞌ tan xajleꞌn nin wenen yi chin qꞌuixcꞌuj nin scyetz eꞌ wunak,
nchaꞌtz axwok itetz xajwok nin wenen tetz yi oponk cuꞌn.
7 Chi yi nicyꞌ tzatziꞌn yi banak iꞌ, niꞌcuꞌn caws tzꞌakꞌlok.
Tzꞌakꞌlok caws, na na tocsaj tib nim.
Na je yol iꞌeꞌj yi icyꞌ tcꞌuꞌl:
‘In jun chin wiꞌtz ajcaw.
Nkꞌeꞌtz choꞌn wutaneꞌn chi taneꞌn jun xmaꞌlcaꞌn.
Quiꞌt sotz incꞌuꞌl sbneꞌ opon tunintz,’ chij iꞌ.
8 Ma jaluꞌ tan paj yi yaꞌstzun tajtzaꞌkl,
tzꞌelk cuꞌn swutz tul jun ntziꞌ kꞌej.
Tzꞌul jun chin caws iꞌ yi chin xoꞌwbil nin.
Stijeꞌ qꞌuixcꞌuj. Stijeꞌ weꞌj. Stzꞌeꞌok tan kꞌakꞌ.
Squimok, na yaꞌstzun txumijt tan Ryos,
yi Ryosaꞌtz yi cyaꞌl jun na xcyeꞌ quen teꞌj.”
9 Ẍchokꞌok yi eꞌ wiꞌtz ajcaw yi ateꞌ beneꞌn tziꞌn wi munt, yi eꞌ yi ja xom chiwiꞌ te tajtzaꞌkl yi jun xnaꞌnaꞌtz. Ẍchibisunk yil quil nin yi tzan jeꞌn sibel yi tnum. 10 Joylaj chixmayintzit tan paj yi xoꞌw yi ateꞌ cuꞌnt. Itzun scyaleꞌ-tz:
“Lastum yi jun chumbalaj tnum.
Lastum Babilonia, na chin cham nin iꞌ sajleꞌn.
Poro tul jun tkuj ja akꞌlij caws, nin ja el cuꞌn swutz,” cheꞌch sbneꞌ.
11 Iteꞌn nin ẍchibneꞌ yi eꞌ aj pyaj. Nchaꞌtz eꞌ, ẍchokꞌok nin ẍchibisunk, na quiꞌct wunak tul yi jun tnumaꞌtz tan lokꞌcheꞌn chicꞌaꞌy yi cyꞌaꞌn cyaꞌn. 12 Na at aj pyaj yi cyꞌaꞌn oro tu sakal cyaꞌn, tu eꞌchk balaj cꞌub, tu eꞌchk uwaj yi chin litzꞌun nin. Nin at eꞌ yi cyꞌaꞌn eꞌchk balaj xbuꞌk cyaꞌn yi chin yubeꞌn nin. Nin at aj pyaj yi cyꞌaꞌn eꞌchk balaj tzeꞌ cyaꞌn yi chin cꞌoꞌc nin, tu eꞌchk balaj takleꞌn yi na bnix te teꞌ txuc, nka te eꞌchk tzeꞌ yi nim jamel, nka te eꞌchk jilwutz chꞌichꞌ chi taneꞌn bronce nka te yi jun jilwutz cꞌub yi na biꞌaj mármol. 13 Ej nin at eꞌ yi chin ektz nin canel cyꞌaꞌn cyaꞌn tu eꞌchk balaj cꞌoꞌcsbil, tu incens tu mirra nin perjum. Ej nin at eꞌ yi win, nin aceit tetz cumir cyꞌaꞌn cyaꞌn, nin balaj arin tu ixiꞌn triw. Ej nin at eꞌ yi txuc cyꞌaꞌn cyaꞌn tetz chicꞌaꞌy. At cyꞌaꞌn cneruꞌ cyaꞌn. Nin at eꞌ cyꞌaꞌn chej cyaꞌn tu careꞌt. Ej nin at eꞌ yi esclaw cyꞌaꞌn cyaꞌn tetz chicꞌay. 14 Ej nin yi eꞌ aj pyajaꞌtz scyaleꞌ:
“Lastum cyakil yi eꞌchk takleꞌn balaj yi el cyalmaꞌuꞌ teꞌj sajleꞌn. Ja sotz.
Ej nin ja el cuꞌn swutz cyakil yi eꞌchk takleꞌn balaj yi chin elsbil almaꞌ nin. Quiꞌt ljal.”
15 Joylaj chixcyeꞌ nint cyakil yi eꞌ aj negos scyuchꞌ yi eꞌ mas yi jalnak chiriquil tul yi jun tnumaꞌtz. Joylaj chixcyeꞌ nint tan biꞌl yi xoꞌwl yi ateꞌ cuꞌnt na nsken ul caws yi jun tnumaꞌtz. Ẍchokꞌok nin ẍchibisunk, 16 nin scyaleꞌ:
“Lastum yi jun chumbalaj tnumaꞌtz.
Na yi sajleꞌn, niꞌcuꞌn iꞌ tu jun xnaꞌn yi wiꞌnin na ban cuꞌn tib tu yi beꞌch tetz yi chumbalaj nin chi taneꞌn lino, tu eꞌchk balaj xbuꞌk yi na xcon cyakꞌun eꞌ rey.
Chin yubeꞌn nin yi jun tnumaꞌtz sajleꞌn,
chi yubel jun xnaꞌn yi wiꞌnin na ban cuꞌn tib tan eꞌchk balaj uwaj, tu oro, tu eꞌchk balaj neꞌẍ cꞌub yi nim jamel.
17 Lastum, —cheꞌch— na juneꞌn tkuj mmeꞌl cuꞌnt swutz cyakil yi mebiꞌl iꞌ.”
Ej nin cyakil yi eꞌ yi na chixon wi aꞌ, chi taneꞌn yi eꞌ capitán tetz barc, scyuchꞌ yi eꞌ aj tolinl barc, nin scyuchꞌ yi eꞌ wunak yi cyꞌancheꞌ tan yi barc, cyakil yi eꞌaꞌtz kajpeꞌn nin lchixmayinint tan xmayeꞌn yi sibel yi jun tnumaꞌtz yi na tzan kꞌaꞌkl. 18 Ej nin yil quil nin yi na tzan kꞌaꞌkl yi jun tnumaꞌtz scyaleꞌ: “Lastum yi jun chumam tnumaꞌtz. Wech na quiꞌc nin junt tnum yi choꞌn nink chi juneꞌj.”
19 Nin tan biꞌl yi bis oꞌkl, je pon chichitol tzaꞌj xoꞌl chiwiꞌ, nin scyaleꞌ:
“Ah, lastum yi ja el cuꞌn swutz yi jun chin tnumeꞌj,
na cyakil oꞌ yi na kakꞌuj wi mar ja kariquin taꞌn.
Lastum, na juneꞌn tkuj mmeꞌl cuꞌnt swutz,” cheꞌch sbneꞌ.
20 Ma yi eꞌ cyeruꞌ, yi najlcheꞌuꞌ tcyaꞌj chitzatzinkuꞌ,
na ja sotz yi jun tnumaꞌtz.
Nin nchaꞌtz eꞌuꞌ apostol, scyuch yi eꞌuꞌ yi na chitxoluꞌ yi tajbil Kataj, scyuchꞌ cyakil yi eꞌuꞌ yi xansaꞌn cheꞌtuꞌ chitzatzinkuꞌ,
na ja ticyꞌsaj Ryos cꞌuꞌl te yi jun tnumaꞌtz.
Na ja takꞌ Ryos caws tan paj yi eꞌchk takleꞌn cachiꞌ yi banak scyeꞌjuꞌ.
21 Beneꞌn tzun jun ángel yi chin cham nin tan xicleꞌn jun chin cꞌub chi taneꞌn eꞌchk cꞌub yi na xcon tan ẍcheꞌjeꞌn ixiꞌn triw. Choꞌn tzun beneꞌn joꞌliltz wi mar. Itzun taltz:
“Yaꞌstzun sbajok te yi chin wutzileꞌn tnum Babilonia,
nin quiꞌt ljal sbneꞌ opon tunintz.
22 Cyaꞌl tzꞌocsan eꞌchk suꞌ.
Nin cyaꞌl tzꞌocsan eꞌchk arpa tu eꞌchk chun yi quibitnak wunak sajleꞌn tul yi jun tnumaꞌtz.
Quiꞌct akꞌunwil ẍchijalok.
Cyaꞌl bajeꞌt eꞌchk tzatziꞌn chi eꞌchk tzatziꞌn yi na bajij yi na chumeꞌ jun lmuj aj umleꞌn.
Na ja el cuꞌn jun tnumaꞌtz swutz,
tan paj yi mbi cuꞌn eꞌ banak cyakil yi eꞌ aj negos,
yi ocnakeꞌ tan chisubleꞌn cyakil jilwutz wunak beneꞌn tziꞌn wi munt tan yi cyetz cyajtzaꞌkl yi chin cachiꞌ nin.
24 Ja el cuꞌn swutz yi jun tnumaꞌtz tan paj yi ocknakeꞌ tan chibiyleꞌn yi eꞌ elsanl stziꞌ Ryos, scyuchꞌ yi eꞌ xansaꞌncheꞌ yi najlcheꞌ beneꞌn tziꞌn wi munt.