19
1 Itzun bantz yi nsken wiꞌt bajij yi xtxolbilaꞌseꞌj nintzun ben wital yi na chijilon jun cꞌoloj wunak tziꞌn tcyaꞌj. Chin chiwiꞌ nin tan yol. Itzun na cyaltz:“¡Aleluya! Kꞌajsbil tetz Kataj Ryos, na ja wiꞌt kacolpij taꞌn.
2 Baꞌn mban iꞌ yi ntakꞌ caws yi jun chin wiꞌtz aj poꞌtzanl.
Na bintzi nin at paj jun tnumaꞌtz, na ja baj poꞌtzal cyakil wunak beneꞌn tziꞌn wi munt tan yi tetz tajtzaꞌkl yi niꞌcuꞌn tu jopol wutzajiꞌn.
Ej nin ocnak tan chibiyleꞌn yi eꞌ ẍchakum Ryos. Chaꞌstzun te tkꞌol Ryos caws iꞌ tan teleꞌn cuꞌn swutz.”
3 Ej nin nchaꞌtz cyal, yi jun cꞌoloj wunakaꞌtz yi ateꞌ tcyaꞌj:
“¡Aleluya! Kꞌajsbil tetz Kataj Ryos, na sbneꞌ opon tunintz, tunin lwan cuꞌn kꞌakꞌ te yi tnumaꞌtz.
Quil taneꞌ yi sibel sbneꞌ opon tunintz.”
4 Chicweꞌn tzun joklok yi junak cyaj wiꞌ banl wiꞌ scyuchꞌ yi cyaj ẍchakum Ryos yi i cunin txuc quitaneꞌn, tan cꞌuꞌlajeꞌn yi Kataj Ryos yi cꞌolchij tib yi tetz cꞌolchbil kalel cawuneꞌt iꞌ. Itzun cyaltz: “¡Amén! Yaꞌstzun sbantz, Taꞌ. ¡Aleluya! Kakꞌeꞌ kakꞌajsbil teruꞌ.”
5 Beneꞌn tzun wital yi jiloneꞌn tzaj jun kale atit yi cꞌolchbil Ryos. Itzun taltz:
“Axwok jun cꞌoloj ẍchakum Ryos, akꞌwok yi ikꞌajsbil tetz iꞌ.
Axwok yi na itekwok ẍchiꞌ iꞌ, akꞌwok yi ikꞌajsbil tetz Ryos.
Quiꞌc na ban yi ko axwok tijlcꞌuꞌlal nka axwok nitxaꞌ, akꞌwok ikꞌajsbil tetz,” chij yi junaꞌtz.
Yi tzatzin yi sbajok yil chopon yi eꞌ creyent te Cristo
6 Beneꞌn tzun wital jun cꞌoloj wunak yi na chijilon. Chin chiwiꞌ nin ban tan yol. I cunin chi na wajcan jun chin tzanlaꞌ nka chi na nilcan kꞌancyok. Itzun na cyaltz:
“¡Aleluya! Kakꞌeꞌ kakꞌajsbil tetz yi kaRyosil,
yi Kajcaw yi cyaꞌl na xcyeꞌ quen teꞌj.
Na ja xeꞌtij iꞌ tan cawuꞌn.
7 Tan biꞌl yi tzatzin yi atoꞌ cuꞌnt kakꞌeꞌ bin kꞌej iꞌ.
Na ja wiꞌt opon yi oril tan kumeweꞌn tu yi Katxꞌixwatz.
Yi oꞌ ketz yi oꞌ txkel iꞌ taneꞌn, list atoꞌt.
8 Na ja wiꞌt akꞌlij amaꞌl sketz tan kawekol kib
tan jun jilwutz xbuꞌk yi chin stum nin, nin yi chin litzꞌun nin.
Yi jun xbuꞌkaꞌtz yi chin skoj nin na elepont yi kabalajil, yi oꞌ yi xansaꞌnchoꞌt,”
cheꞌch yi jun cꞌoloj wunakaꞌtz.
9 Sajeꞌn tzun tlol jun ángel swetz: “Tzꞌib cuꞌn yi xtxolbilaꞌseꞌj: ‘Baꞌn cyeri yi eꞌ yi ẍchitxoclok tan waꞌaꞌn yil tzꞌumeꞌ yi chitxꞌixwatz.’ ”
Nchaꞌtz tal iꞌ swetz:
“Yi eꞌchk yolaꞌseꞌj, iꞌtz yi mero bintzi na yaꞌstzun yol Ryos.”
10 Incweꞌn tzun mejlok tan cꞌuꞌlajeꞌn yi ángel, poro itzun saj tlol swetz: “Yaj, quil tzaban yi junaꞌtz, na nchaꞌtz in, in ẍchakum Ryos chi awutaneꞌn, nin chi quitaneꞌn yi eꞌ mas yi na cyocsaj yi ẍchusuꞌn Jesús. Nqueꞌn tan cꞌuꞌlajeꞌn Ryos, na yi xeꞌ cyakil yi nwal tzatz, iꞌtz tan lajluchaxeꞌn yi balajil Jesús,” stzun yi ángel bantz swetz.
Yi jun yi ateꞌn te yi chej sak teꞌj
11 Itzun bantz nin ben wilol yi jakij yi tcyaꞌj. Nin wil jun yi ateꞌn te jun chej yi sak teꞌj. Yi biꞌ yi junaꞌtz iꞌtz: Yi jun yi baꞌn kꞌukeꞌ kacꞌuꞌl teꞌj, yi jun yi na el kꞌab te yol. Tzꞌocopon iꞌ tan maꞌleꞌn cyajtzaꞌkl yi eꞌ contr. Chin jicyuch nin sbneꞌ yil cawun iꞌ. Ej nin stkꞌeꞌ chicaws yi eꞌ contraꞌtz na eꞌ aj paj. 12 Wiꞌnin litzꞌuneꞌn yi bakꞌ wutz iꞌ chi taneꞌn kꞌakꞌ. Nin ateꞌn coron twiꞌ tan ẍchajleꞌn yi iꞌ bajxom. Nin te yi wankil tzꞌibaꞌn cyen jun biꞌaj yi ntin iꞌ na el xtxum tetz. 13 Ej nin te yi beꞌch tetz iꞌ nojnak chiẍchꞌel yi eꞌ contr. Nin at junt biꞌ iꞌ, iꞌtz Yol Ryos. 14 Xomcheꞌ jun cꞌoloj sanlar te iꞌ yi choꞌn chisaj tcyaꞌj. Ateꞌ len te chej yi sak cuꞌn cyeꞌj. Ej nin yi eꞌ sanlaraꞌtz chumbalaj nin yi beꞌch cyetz, na lino cuꞌn, jun jilwutz xbuꞌk yi chin stum nin. 15 Nin wil yi na el tzaj jun spar le stziꞌ yi jun bajxomaꞌtz yi xconk tan chibiyleꞌn cuꞌn cyakil wunak beneꞌn tziꞌn wi munt. Chin cham nin iꞌ sbneꞌ tan cawuꞌn squibaj cyakil wunak. Ej nin scawunk chi cyꞌaꞌnk jun txꞌamij taꞌn yi chꞌichꞌ cuꞌn. Stkꞌeꞌ iꞌ chicaws wunak. Ẍcheꞌ bajk yakꞌpul chi na ban yakꞌpeꞌn wutz uva tan telseꞌn tꞌaꞌal. Yaꞌstzun sbneꞌ iꞌ, na wiꞌnin na chiꞌch cꞌuꞌl Ryos scyeꞌj yi eꞌ wunakaꞌtz, yi jun Ryosaꞌtz yi cyaꞌl jun nink xcyeꞌ quen teꞌj. 16 Ej nin nchaꞌtz wil yi tzꞌibaꞌn jun xtxolbil te yi beꞌch tetz nin te yi wutz cux yi na tal: “Yi Rey yi mas cham swutz alchok jilwutz rey, nin yi Ajcaw yi mas cham swutz alchok jilwutz ajcaw.”
17 Beneꞌn tzun wilol jun ángel yi choꞌn txiclij swutz yi kꞌej. Chin wiꞌ nin ban tzajtz tan yol scyetz yi eꞌ txuc yi na chixicyꞌin tcyaꞌj, nin yi na baj chichibel quimnak cyaꞌn:
“Axwok jun cꞌoloj txuc. Bitwok tzaj, chamwok cuꞌn itib te yi jun waꞌaꞌn yi ja nucꞌxij tan Kataj Ryos. 18 Chamwok cuꞌn itib tan ibajsalwok chichibel yi eꞌ rey yi ẍchiquimok, tu chichibel yi eꞌ capitán tu chichibel yi eꞌ yaj yi le wutz cyetz cyajtzaꞌkl chin cham nin eꞌ. Chamwok cuꞌn itib tan ibajsal chichibel yi eꞌaꞌs tu ẍchibel yi chichej. Na ẍchiquimok wiꞌnin wunak. Quiꞌc na ban yi ko eꞌ ajcaw nka eꞌ tuꞌ mos. Quiꞌc na ban yi ko eꞌ xicyeꞌt nka tijlcꞌuꞌlal, tircuꞌn eꞌ ẍchiquimok len.”
19 Beneꞌn tzun wilol yi taꞌk yaj yi i cunin taꞌk txuc taneꞌn, scyuchꞌ yi eꞌ wiꞌtz ajcaw tetz beneꞌn tziꞌn wi munt, scyuchꞌ chisanlar. Chichamoꞌn quib tan oyintziꞌ tu yi jun yi ateꞌn te chej, scyuchꞌ yi tetz sanlar yi xomcheꞌ teꞌj. 20 Xtxꞌamxeꞌn tzun yi jun yajaꞌtz yi i cunin txuc taneꞌn, tu yi yaj yi tocsaj tib elsanl stziꞌ Ryos, yi jun yi bnix wiꞌnin milawr taꞌn swutz yi jun yi i cunin txuc. Ej nin tan yi eꞌchk milawraꞌtz yi bnix taꞌn, ja baj subul yi eꞌ wunak yi cyakꞌ amaꞌl tan toqueꞌn cyechl, yi eꞌ oc tan cꞌuꞌlajeꞌn yi teblal yi jun yaj yi i cunin txuc taneꞌn. Chitxꞌamxeꞌn tzun yi cobaꞌtz. Itzꞌenleꞌn chibeneꞌn joꞌliꞌn tul jun chin kꞌakꞌ yi na lamcan, yi azufre cuꞌn. 21 Nin cyakil yi eꞌ mas yi xomcheꞌ scyeꞌj, eꞌ baj quim tan yi spar yi na el tzaj le stziꞌ yi jun yi ateꞌn te chej.
Inti yi eꞌ txucaꞌtz yi na chixicyꞌin tcyaꞌj yi nsken baj chimolol quib, nin quicyꞌsaj cunin chicꞌuꞌl tan bajseꞌn chiwankil yi eꞌ contr Ryosaꞌtz.