Yi mbi cuꞌn sbajok tul jun mil yob
20
1 Beneꞌn tzun wilol jun ángel yi cweꞌn mul atit tcyaꞌj. Cyꞌaꞌn laweꞌil yi jun chin jul taꞌn, yi qui bajsbeꞌn xeꞌ. Ej nin nchaꞌtz cyꞌaꞌn jun chin caren taꞌn. 2 Beneꞌn tzun yi jun ángelaꞌtz tan stzꞌamleꞌn yi dragón nin cuꞌ cꞌalol. Yi jun dragónaꞌtz, yaꞌstzun yi jun lubaj yi iẍnin at tiemp tzaj. Ej nin yaꞌstzun yi jun yi na biꞌaj Baybaꞌn nka Satanás. 3 Beneꞌn tzun joꞌlil ángel yi jun dragónaꞌtz tul yi jul yi chumam nin xeꞌ. Yi cweꞌn quen tjul nintzun jopxij yi puertil yi jul, nin oc quen seyiltz tan ángel, bantz quiꞌt tzꞌel tzaj yi dragón tan chisubleꞌn wunak jalen yil tzꞌak jun mil yob. Poro yil jepon tamp yi jun mil yobaꞌtz, tzꞌeluꞌl tzakpuꞌn tetz muꞌẍ tiemp.4 Beneꞌn tzun wilol jun cꞌoloj cꞌolchbil. Ej nin tibaj yi eꞌchk cꞌolchbilaꞌtz, cꞌolẍcheꞌ yi eꞌ yi akꞌlij chikꞌej tan cawuꞌn. Nchaꞌtz wil cyalmaꞌ yi eꞌ yi elnakt tamij chiwiꞌ tan paj yi ocnakeꞌ tan xtxoleꞌn yi mbi ekaꞌn tan Jesús, tu yi mbiꞌtz yi tajbil Ryos. Yaꞌstzun yi eꞌ yi quinin cyakꞌ kꞌej yi jun yaj yi i cunin txuc taneꞌn, nin quinin cyakꞌ kꞌej yi teblal iꞌ. Nin nchaꞌtz yaꞌstzun yi eꞌ yi quinin chicujij tan toqueꞌn cyechl wutz chiplaj nka te chikꞌab tan yi yaj yi i cunin txuc taneꞌn. Ej nin wil yi eꞌ almaꞌaꞌtz. Eꞌ itzꞌij junt tir tan chicawuneꞌn tu Cristo tetz jun mil yob. 5 Poro yi eꞌ mas almaꞌ, quinin eꞌ itzꞌij jalen cuꞌn yi jeꞌn poneꞌn yi jun mil yobaꞌtz. Yi eꞌ yi eꞌ itzꞌij tan cawuꞌn, yaꞌstzun yi eꞌ yi bajx lchitzꞌij. 6 Baꞌn cyeri yi eꞌ yi ẍchitzꞌok te yi bajx tir itzꞌeꞌn, na xansaꞌncheꞌt nin quiꞌct ltaj quen yi caꞌp quimichil scyeꞌj. Nin chocopon tetz elsanl stziꞌ Ryos nin elsanl stziꞌ Cristo. Ẍchicawunk tu Cristo tetz jun mil yob.
7 Yil jepon tampuj yi jun mil yobaꞌtz tzꞌelpont yi Baybaꞌn liwr. 8 Ej nin tzꞌocopon tan chisubleꞌn cyakil wunak beneꞌn tziꞌn wi munt. Nchaꞌtz xcyek tan chisubleꞌn yi eꞌ aj Gog scyuchꞌ yi eꞌ aj Magog. Ej nin ẍchimoleꞌ yi cyetz chisanlar tan oyintziꞌ. Quin tech nin eꞌ ẍchimoleꞌ quib. Quinin ajlbeꞌn cyetz, chi taneꞌn puklaj yi at tzi mar. 9 Chisajeꞌn tzun nil jun cꞌoloj sanlaraꞌtz, nin jopx cunin cyakil yi chkꞌajlaj cyaꞌn. Nin baj nin chitxolil quibtz solteꞌj yi luwar kale chicoloneꞌt quib yi eꞌ xansaꞌncheꞌt tan Ryos, yi tnum yi wiꞌnin na pekꞌ Ryos teꞌj. I nin chitxolin quib te yi jun tnumaꞌtz yi sajeꞌn jun chin kꞌakꞌ tan Ryos tan chisotzajeꞌn. Tir cunin chitzꞌeꞌeꞌn tan kꞌakꞌ.
10 Inti Baybaꞌn, yi oc tan chisubleꞌn wunak, choꞌn beneꞌn cꞌoxij tul yi jun chin kꞌakꞌ yi azufre cuꞌn. Iteꞌn nin kꞌakꞌaꞌtz kale benakit cꞌoxij yi jun yaj yi i cunin txuc taneꞌn tu yi jun yaj yi tocsaj tib elsanl stziꞌ Ryos. Choꞌn ẍchaꞌtoktz tan tijleꞌn qꞌuixcꞌuj tul jun kꞌakꞌaꞌtz tetz ben kꞌej ben sak.
Yi cꞌolchbil Kajcaw yi chin sak nin kale tzꞌoqueꞌt iꞌ tan pujleꞌn xtisyaꞌ
11 Itzun bantz nin ben wilol jun yi cꞌolchij tibaj jun cꞌolchbil yi chumbalaj nin, chi taneꞌn cꞌolchbil jun rey. Chin sak nin yi jun cꞌolchbilaꞌtz. Ej nin el ojkuj yi wuxtxꞌotxꞌ tu yi tcyaꞌj swutz yi porer yi junaꞌtz yi cꞌolchij wi jun chin cꞌolchbilaꞌtz. Txꞌakx cun tuꞌ-tz. Quiꞌt jal. 12 Beneꞌn tzun wilol cyakil yi eꞌ quimnakeꞌ. Txiclcheꞌ swutz Ryos. At nitxaꞌ, nin at tijlcꞌuꞌlal. Tircuꞌn ateꞌ. Nintzun oc jun tan jakleꞌn yi eꞌchk liwr yi at tcyaꞌj. Nchaꞌtz yi junt liwr kale tzꞌibaneꞌt chibiꞌ cyakil yi eꞌ yi ẍchicambok te yi itzꞌajbil. Nintzun baj oc maꞌleꞌn cyajtzaꞌkl. Xomquen tuꞌ te yi mbi baj chibnol, na tzꞌibaꞌnt cyen tul yi eꞌchk liwraꞌtz yi mbi cuꞌn mbaj chibnol. 13 Nsken chibaj jeꞌul yi eꞌ yi eꞌ quim xe mar, scyuchꞌ cyakil yi eꞌ almaꞌ yi ateꞌ xetzeꞌ. Oc maꞌleꞌn cyajtzaꞌkl chicyakil cuꞌn. Xomquen tuꞌ te yi mbi baj chibnol yi ntaxk chiquim. 14 Beneꞌn tzun joꞌliꞌn yi porer yi quimichil tul yi jun luwar kale jopij cheꞌt yi eꞌ almaꞌ jaluꞌ, tul jun chin kꞌakꞌ yi kaleꞌn nin lamcaneꞌn. Yil tzꞌopon jun tul yi jun chin kꞌakꞌaꞌtz yaꞌstzun yi caꞌp quimichil. 15 Ej nin yaꞌstzun yi kꞌakꞌ kalel chibeneꞌt cꞌoxij cyakil yi eꞌ yi qui cuꞌnak chibiꞌ tul yi liwr kale tzꞌibaneꞌt chibiꞌ yi eꞌ yi ẍchicambok te yi itzꞌajbil.