Jun acꞌaj tcyaꞌj tu jun acꞌaj wuxtxꞌotxꞌ
21
1 Beneꞌn tzun wilol jun acꞌaj tcyaꞌj nin jun acꞌaj wuxtxꞌotxꞌ, na nsken xit yi bajx tcyaꞌj tu yi bajx wuxtxꞌotxꞌ. Poro tul yi jun acꞌaj wuxtxꞌotxꞌaꞌtz quinin wil mar. 2 Ej nin tzinwutz cunin, yi in, yi in Waꞌn, yi cweꞌn muleꞌn yi acꞌaj Jerusalén, tibaj yi jun acꞌaj luwaraꞌtz. Yaꞌstzun yi jun tnumaꞌtz yi chin xan nin. Choꞌn tponeꞌn tzaj tcyaꞌj kale atit Kataj Ryos. Chin yubeꞌn nin yi jun tnumaꞌtz. I cunin jun xun yi umeweꞌn tlen tuꞌ atit, yi chin wekoꞌn nin tib. 3 Beneꞌn tzun wital jun yi chin wiꞌ nin ban tzaj swetz. Itzun taltz:“Yaj, bit tzaj. Snajank Ryos ẍchixoꞌl wunak sbneꞌ opon tunintz. Stzꞌaꞌtok ẍchixoꞌl, nin tetz cuꞌn iꞌ ẍchibneꞌ cyakil jilwutz wunak, na tzꞌocopon iꞌ tetz mero chiRyosil. 4 Quiꞌct bis oꞌkl lbajij. Nin cyalt chunan, na quiꞌct quimichil. Ej nin quiꞌct ltaj cyen chꞌon scyeꞌj, na nkꞌeꞌtz choꞌn sbneꞌ chi banak cyen,” stzun yi junaꞌtz ban swetz.
5 Jiloneꞌn tzaj tzun yi jun yi cꞌolchij wi yi jun balaj cꞌolchbilaꞌtz. Itzun saj tloltz: “¡Bit tzaj! Tzꞌocopon cyakil eꞌchk takleꞌn waꞌn tetz acꞌaj.”
6 Nchaꞌtz nin saj tlol swetz: “Ja wiꞌt bnix yi wajbil. Yi in wetz, in xeꞌtzbil, nin in wiꞌtzbil tetz cyakil. Niꞌcuꞌn wutaneꞌn chi taneꞌn yi letra A jalen Z. In lnakꞌon jun aꞌ scyetz yi eꞌ yi na chiquim tan saktziꞌ. Iꞌtz jun aꞌ yi na takꞌ itzꞌajbil. Ej nin oy tuꞌ lwakꞌwit scyetz. 7 Yi eꞌ yi chixcyek te kacontr, yaꞌstzun yi eꞌ yi ẍchicambok te quitzꞌajbil nin te cyakil yi eꞌchk xtxolbil yi ja wiꞌt wal. Nocopon tetz chiRyosil nin eꞌ cyetz chocopon tetz inmeꞌl incyꞌajl. 8 Poro cyakil yi eꞌ yi na chixob tan chixomeꞌn sweꞌj, choꞌn chopon cyeraꞌtz tul yi jun chin kꞌakꞌ yi azufre cuꞌn yi na tzan kꞌaꞌkl. Nchaꞌtz cyakil yi eꞌ yi qui na cyocsaj inyol, scyuchꞌ cyakil yi eꞌ yi chin juntlen nin cyajtzaꞌkl, scyuchꞌ cyakil yi eꞌ biyol nak, scyuchꞌ yi eꞌ aj xnaꞌninl tu aj yajinl, scyuchꞌ cyakil yi eꞌ aj cun, scyuchꞌ cyakil yi eꞌ yi na chimejeꞌ quen swutzak yi eꞌchk takleꞌn yi banij quitaneꞌn, scyuchꞌ cyakil yi eꞌ laꞌj. Cyakil yi eꞌaꞌtz yi na chiban yi eꞌchk ajtzaꞌklaꞌtz, choꞌn chopon cyeraꞌtz tul yi jun chin kꞌakꞌaꞌtz yi azufre cuꞌn. Yil tzꞌocopon jun tul yi jun kꞌakꞌaꞌtz yaꞌstzun yi caꞌp quimichil.”
Yi acꞌaj Jerusalén
9 Itzun bantz nin ul tzaj jun scyeri juk ángel yi cyꞌanl tetz yi lak kale at cuꞌnt chicaws wunak. Itzun taltz swetz: “Xomen tzaj sweꞌj. Tzinchajeꞌ tzatz yi jun yi xun taneꞌn yi tzꞌocopon tetz txkel yi Katxꞌixwatz.”
10 Chi tul wutzicyꞌ taneꞌn yi wilol junt xtxolbil tan porer yi Espíritu Sant. Imbeneꞌn tzun tcyꞌal yi ángel tib jun chin wutz, yi chin wutz tkan nin. Ẍchaj jun chin tnum swetz yi chin xan nin, yi na biꞌaj Jerusalén. Choꞌn mpon tzaj tcyaꞌj kale atit yi najbil Ryos. 11 Tan tuꞌ yi pakꞌpuchal Ryos wiꞌnin litzꞌuneꞌn yi jun tnumaꞌtz. Chin yubeꞌn nin, nin chin litzꞌun nin chi taneꞌn yi jun jilwutz cꞌub yi na biꞌaj jaspe, yi nim jamel. 12 Chin tapij cuꞌn solteꞌj yi jun tnumaꞌtz. Chin wutz tkan nin, nin coblaj cuꞌn sawanil. Nin txiclij len jujun ángel tziꞌak yi jujun sawan. Ej nin tibaj yi jujun sawan tzꞌibaꞌn jujun biꞌaj, nin iꞌtz chibiꞌ yi jujun kꞌuꞌj xonl Israel. 13 Cyaj xtxꞌuꞌcnakiꞌn taneꞌn yi tapij yi at solteꞌj yi jun tnumaꞌtz. Nin ox ox cuꞌn puert le jalajchak xlaj. 14 Coblaj cuꞌn cꞌub at tetz quiwel yi tapij. Nin te jujun cꞌub tzꞌibaꞌn jujun chibiꞌ yi eꞌ apostol tetz Katxꞌixwatz.
15 Inti yi ángel yi oꞌ jilon tuchꞌ, cyꞌaꞌn jun aj taꞌn tetz maꞌlbil, yi oro cuꞌn, Yi xac yi jun maꞌlbilaꞌtz iꞌtz tan maꞌleꞌn yi tnum, tu eꞌchk sawan, tuml yi tapij. 16 Cyaj xtxꞌuꞌcnakiꞌn taneꞌn yi jun tnumaꞌtz. Nicyꞌnintuꞌ wutz yi cyaj xlaj. Toqueꞌn tzun yi ángel tan maꞌleꞌn yi jun tnumaꞌtz. Nin lajluchax yi nicyꞌnintuꞌ wutz yi cyaj xlajaꞌtz. Iꞌtz cob mil tu cob cient kilómetro yi jujun xlaj. Ej nin iteꞌn nin wutz yi wutz tkan yi tnum. 17 Toqueꞌn tzun tan maꞌleꞌn yi wutz tkan yi tapij nin iꞌtz oxcꞌal tu oꞌ metr.
18 Yi tapijil yi tnum, cꞌub cuꞌn. Nin iꞌtz jun txꞌakaj cꞌub yi na biꞌaj jaspe. Poro yi tnum iꞌtz oro cuꞌn, jun oro yi chin tzꞌaknak cuꞌn, nin chin litzꞌun nin, chi taneꞌn spej. 19 Ma yi coblaj cꞌub yi at tetz cꞌolchbil yi tapij chin yubeꞌn nin tan wiꞌnin tal cꞌub yi chumam nin jamel. Choꞌn lacꞌẍcheꞌ quen teꞌjak jujun. Yi bajx cꞌub lacꞌẍcheꞌ tal cꞌub teꞌj yi na biꞌaj jaspe. Ma yi caꞌp, zafiro cuꞌn lacꞌẍcheꞌ teꞌj. Nin yi toxiꞌn iꞌtz ágata cuꞌn. Yi cyajiꞌn, esmeralda cuꞌn yi lacꞌẍcheꞌ quen teꞌj. 20 Yi toꞌiꞌn iꞌtz ónice cuꞌn. Yi kakiꞌn iꞌtz cornalina cuꞌn. Ej nin yi jukiꞌn iꞌtz crisólito. Ma yi wajxokiꞌn iꞌtz berilo cuꞌn. Nin yi belujiꞌn iꞌtz topacio. Ma yi lajujiꞌn iꞌtz crisoprasa cuꞌn. Ej nin yi junlajiꞌn, i tal cꞌub yi na biꞌaj jacinto lacꞌẍcheꞌ quen teꞌj. Ma yi coblajiꞌn cꞌub amatista cuꞌn lacꞌẍcheꞌ quen teꞌj. 21 Ej nin yi coblaj sawanil yi jun tnumaꞌtz, perla cuꞌn. Ej nin yi mero beꞌ yi at nicyꞌal tnum, oro cuꞌn. Iꞌtz jun jilwutz oro yi chin tzꞌaknak cuꞌn, yi baꞌn na icyꞌ kawutz tul chi taneꞌn spej.
22 Poro tcꞌuꞌl yi jun tnumaꞌtz quinin wil jun amaꞌl yi mas tcuꞌn xan tan cꞌuꞌlajeꞌn Ryos, na cyakil cuꞌn xan. Ja xcon cyakil yi tnum tan cꞌuꞌlajeꞌn yi Katxꞌixwatz, tu yi Kajcaw, yi kaRyosil yi cyaꞌl na xcyeꞌ quen teꞌj. 23 Nchaꞌtz wil tul yi jun tnumaꞌtz yi qui tajweꞌn tkan kꞌej, nin qui tajweꞌn tkan xaw tan xtxekeꞌn. Na yi pakꞌpuchal Ryos tu yi pakꞌpuchal yi Katxꞌixwatz na xcyeꞌ tan xtxekeꞌn cyakil yi tnum. 24 Ja xcon yi jun tnumaꞌtz tetz chitxekbil cyakil wunak yi ateꞌ wuxtxꞌotxꞌ. Ej nin chocopon cyakil yi rey yi ateꞌ wuxtxꞌotxꞌ scyuchꞌ yi eꞌ mas ajcaw tan takꞌleꞌn chikꞌajsbil nin tan takleꞌn kꞌej Ryos tul yi jun tnumaꞌtz. 25 Yi eꞌchk sawanil yi jun tnumaꞌtz quil jopxij na skꞌejl cuntunin sbneꞌ-tz. 26 Cyakil yi eꞌ wunak beneꞌn tziꞌn wi munt chopon tan toyeꞌn eꞌchk oy tetz Ryos tul yi jun tnumaꞌtz. Nin chopon tan takꞌleꞌn chikꞌajsbil. 27 Poro quil tzꞌakꞌlij amaꞌl tetz jun tan toqueꞌn tul yi jun tnumaꞌtz ko na ban eꞌchk takleꞌn cachiꞌ. Quil tzꞌakꞌlij amaꞌl tetz jun subul nak tan toqueꞌn le jun tnumaꞌtz, ma na ntin tzꞌakꞌlok amaꞌl scyetz yi eꞌ yi cuꞌnak chibiꞌ tul yi jun planiy kale cuꞌnakit chibiꞌ yi eꞌ yi ẍchiclaxok. Yi planiyaꞌtz, choꞌn cyꞌaꞌn tan Katxꞌixwatz.