22
1 Nchaꞌtz ẍchaj yi ángel jun chin aꞌ swetz, yi aꞌ yi na takꞌ itzꞌajbil. Choꞌn na el tzaj swutz yi cꞌolchbil Ryos tu yi cꞌolchbil yi Katxꞌixwatz. Yi jun chin aꞌaꞌtz chin skoj nin. I cunin spej taneꞌn. Nin choꞌn na xon nicyꞌal yi beꞌ yi at xoꞌl caꞌl. 2 Ej nin xlajak yi jun aꞌaꞌtz wil cobox tzeꞌ yi na takꞌ coblaj tir wutz tul jun yob. Tul xawiꞌn na wutzin. Ej nin yi biꞌ yi jun jilwutz tzeꞌaꞌtz iꞌtz: Yi tzeꞌ yi na takꞌ itzꞌajbil. Nin yi xak yi tzeꞌaꞌtz na xcon tan chitzꞌaqueꞌn cyakil jilwutz wunak yi ateꞌ beneꞌn tziꞌn wi munt. 3 Quiꞌt lcawsij jun eꞌchk takleꞌn tan Ryos.a Yaꞌstzun atit yi cꞌolchbil Ryos tu yi cꞌolchbil yi Katxꞌixwatz. Ej nin yaꞌstzun kalel choꞌqueꞌt yi eꞌ ẍchakum Ryos tan cꞌuꞌlajeꞌn iꞌ. 4 Squileꞌ len wutz Ryos, nin tzꞌocopon biꞌ iꞌ wutzak chiplaj. 5 Quiꞌt tzꞌoc tzꞌoꞌtz. Skꞌejl cuntunin sbneꞌ. Quiꞌt tajweꞌn eꞌchk txekbil, mpe ik tkan kꞌej. Na Kataj Ryos yaꞌstzun txekbil sbneꞌ. Yi eꞌ wunak yi ateꞌ tul yi jun tnumaꞌtz ẍchicawunk tetz ben kꞌej ben sak.Txant tan tuleꞌn junt tir Jesucristo
6 Itzun tal yi ángel swetz: “Yi eꞌchk xtxolbilaꞌseꞌj yaꞌstzun yi mero bintzi, yi baꞌn lkꞌukeꞌ chicꞌuꞌl wunak teꞌj. Yi Ryos yi makꞌon cyajtzaꞌkl yi eꞌ elsanl stziꞌ iꞌ, iꞌ nchinchakon tzaj, na in jun scyeri yi eꞌ tetz ángel. Ja nuꞌl tan talcheꞌn scyetz cyakil yi eꞌ tetz, yi mbi sbajok chan. 7 Nin je yol iꞌeꞌj: ‘¡Bitwok tzaj! Txant tan wuponeꞌn. Baꞌn cyeri yi eꞌ yi na quibit, nin na chitzan tan banleꞌn taneꞌn yi yol Ryos yi tzꞌibaꞌnt cyen tul yi liwreꞌj,’ ” chij yi ángel bantz swetz.
8 Yi in, yi in Waꞌn, ja wil, nin ja wit cyakil yi eꞌchk xtxolbil yi tzꞌibaꞌnt tul yi liwreꞌj. Itzun yi beneꞌn wital yi yol yi ángel, incweꞌn tzun kloꞌ mejloktz swutz tan cꞌuꞌlajeꞌn iꞌ. 9 Poro itzun saj tlol swetz: “Quil cẍmejeꞌ cuꞌn tzinwutz, na nchaꞌtz in, in tuꞌ ẍchakum Ryos chi awutaneꞌn. In tuꞌ jun aj txolinl chi quitaneꞌn yi eꞌ mas awajwutz yi na chitxol yi tajbil Ryos. In tuꞌ ẍchakum Ryos chi quitaneꞌn yi eꞌ yi na chitzan tan banleꞌn taneꞌn yi tajbil Ryos yi tzꞌibaꞌnt tul yi liwreꞌj. Qui bin cẍmejeꞌ cuꞌn tzinwutz, ma na mejlen cuꞌn swutz Ryos.”
10 Nchaꞌtz tal yi ángel swetz: “Qui na waj yil tzꞌoc jun sey te yi liwreꞌj, na yi wajbil iꞌtz tan chisiꞌlel wunak. Na, na waj yil ben loꞌon yi xtxolbil yi tzꞌibaꞌn tcꞌuꞌl, na txant tan kocomponeꞌn xeꞌ quen yi tiemp yil bajij yi eꞌchk xtxolbilaꞌtz. 11 Poro yi eꞌ mal wunak yi qui na chitaneꞌ tan banleꞌn eꞌchk takleꞌn cachiꞌ, baꞌn nin chiban yi cyetz cyajbil. Ej nin yi eꞌ yi qui na chitaneꞌ tan banleꞌn eꞌchk takleꞌn yi qui na yub, baꞌn chibantz. Ma yi eꞌ yi na chiban yi eꞌchk takleꞌn balaj, eꞌ tzakpiꞌch len tkanil. Nka yi eꞌ yi xansaꞌncheꞌt, benk quikan ttxꞌotxꞌ,” chij yi ángel swetz.
12 Nchaꞌtz je yolt Kajcaw:
“¡Bitwok tzaj! Txant tan wuponeꞌn. Cyꞌaꞌn eꞌchk oy waꞌn yil nopon. Swakꞌeꞌ len jujun oy scyetz wunak, xomquen tuꞌ te yi mbi mbaj chibnol. 13 Niꞌcuꞌn wutaneꞌn chi taneꞌn yi letra A jalen Z. In xeꞌtzbil nin in wiꞌtzbil te cyakil.”
14 Baꞌn cyeri yi eꞌ yi txꞌajij cuꞌn te cyajtzaꞌkl, na tzꞌakꞌlok amaꞌl scyetz tan chibajsal yi loꞌbaj yi na takꞌ itzꞌajbil, nin tan cyoponeꞌn tul yi jun tnumaꞌtz. 15 Poro yi eꞌ yi qui na cyocsaj inyol, scyuchꞌ yi eꞌ aj cun, scyuchꞌ yi eꞌ aj xnaꞌninl, tu yi eꞌ aj yajinl, scyuchꞌ yi eꞌ biyol nak, scyuchꞌ yi eꞌ yi na chimejeꞌ quen swutz yi eꞌchk takleꞌn yi banij quitaneꞌn, nin cyakil yi eꞌ yi na chitzatzin yi na chixcyeꞌ tan subleꞌn junt wunak, cyakil yi eꞌaꞌtz quil tzꞌakꞌlij amaꞌl scyetz tan cyoponeꞌn tul yi jun tnumaꞌtz.
Ej nin talt iꞌ yi jeꞌj:
16 “I inaꞌtz in Jesús. Nin ja ben inchakol jun scyeri eꞌ in ángel tan talcheꞌn yi xtxolbileꞌj scyetz yi eꞌ cmon creyent. Tan in njaleꞌt rey Luwiy, nin in yi xonl iꞌ yi at tulbil. Nchaꞌtz in yi jun yi na aꞌlchij xkisum tetz,” chij yi Kajcaw ban swetz.
17 “Baꞌn cxuꞌl,” chij yi Espíritu Sant scyetz cyakil wunak. “Baꞌn cxoc tkꞌab Kataj,” cheꞌch yi cmon creyent, yi txkel yi Katxꞌixwatz taneꞌn. Ej nin cyakil yi eꞌ yi na quibit yi xtxolbileꞌj tajweꞌn lcyal:
“Baꞌn tzꞌocuꞌ tkꞌab Kataj.”
Cyakil yi eꞌ yi na chiquim tan saktziꞌ baꞌn lchuꞌl tan ucꞌaꞌeꞌn te yi aꞌ yi na takꞌ itzꞌajbil, nin quiꞌc jamel na taj.
18 I bin jaluꞌ, cyakil yi eꞌ yi na quibit yi ẍchusuꞌn Ryos yi at tul yi liwreꞌj na waj lwal scyetz: Oquiꞌch stzꞌaꞌpl cyaꞌn, na yi ko at jun yil tzꞌocsan stzꞌaꞌpl, scawsok teraꞌtz tan Ryos. Stijeꞌ iꞌ cyakil yi eꞌchk qꞌuixcꞌuj yi tzꞌibaꞌn tul yi liwreꞌj. 19 Ej nin nchaꞌtz ko at jun yil tzꞌoc tan telseꞌn muꞌẍ tal, stzajsok yi biꞌ iꞌ tul yi liwr kale cuꞌnakit chibiꞌ yi eꞌ yi ẍchiclaxok. Quil tzꞌakꞌlij amaꞌl tetz tan najeweꞌn tul yi jun balaj tnumaꞌtz yi chin xan nin, nin quil cambaj iꞌ yi eꞌchk takleꞌn balaj yi tzꞌibaꞌn cyen tul yi liwreꞌj.
20 Nchaꞌtz je yol yi jun yi ntal yi xtxolbileꞌj: “Jun cuꞌn nuꞌl chan,” stzun iꞌ.
Amén. Yaꞌstzunk sbantz. ¡Lok tzꞌul chanuꞌ Taꞌ Jesús!
21 Takꞌ tzaj bin Kajcaw Jesucristo yi banl squibuꞌ chicyakiluꞌ. Amén.