Yi kayolol iꞌtz Jesucristo
2
1 Eꞌuꞌ jun cꞌoloj kajwutz, na chintzan tan stzꞌibeꞌn nin yi jun xtxolbileꞌj scyeruꞌ, na qui na waj yil chijuchuꞌ quiluꞌ. Poro ko at jun yi na juch til, at jun kayolol skaxoꞌl tu Ryos, iꞌtz yi Jesucristo, yi jun yi chin tzꞌaknak cuꞌn. 2 Na iꞌ katxꞌixwatz yi na cuyun kapaj. Nin nkꞌeꞌtz ntin yi ketz ma na nchaꞌtz scyetz cyakil wunak yi ateꞌ beneꞌn tziꞌn wi munt.3 Ej nin ko na katzan tan banleꞌn taneꞌn yi caꞌwl Ryos, na tzun el katxum tetz yi oꞌ tetz. 4 Poro ko at jun yi na tal: “In tetz Ryos,” nin qui na tzan tan banleꞌn taneꞌn yi tetz caꞌwl, laꞌj tzun iꞌ-tz. Nin qui na xom te yi bintzi. 5 Poro cyakil yi eꞌ yi na chitzan tan banleꞌn taneꞌn yi caꞌwl Ryos, yaꞌstzun yi eꞌ yi bintzinin na chipekꞌ te Ryos. Na kol kaban taneꞌn yi tetz caꞌwl, na tzun el katxum tetz yi atoꞌ-tz tkꞌab. 6 Na alchok scyetz yi na tal: “In tetz Ryos,” tajweꞌn cuꞌn tan xomeꞌn iꞌ te yi ẍeꞌn cuꞌn banak Cristo.
Jun acꞌaj caꞌwl
7 Eꞌuꞌ wajwutz, je jun caꞌwleꞌj swaleꞌ nin scyeruꞌ: Poro nkꞌeꞌtz jun acꞌaj caꞌwl, ma na iteꞌn nin caꞌwlaꞌtz yi quibitnakuꞌ yi cyocsal cuninuꞌ. 8 Poro tan tuꞌ yi na chintzan tan talcheꞌn nin scyeruꞌ jaluꞌ, niꞌcuꞌntz chi ik jun acꞌaj caꞌwl. Nin Kajcaw Jesucristo jeꞌnak pon tan banleꞌn taneꞌn. Na, tzan cyeleꞌn tzajuꞌ tul tzꞌoꞌtz wutzil. Chebeleꞌn cuntuꞌ xcyek yi yol Jesucristo tan xiteꞌn yi jun tzꞌoꞌtz wutzilaꞌtz.
9 Poro, ko at jun yi na tal: “Na chinxom te Ryos,” nin ko na chiꞌch cꞌuꞌl te junt tajwutz, atit nin tzuntz tul tzꞌoꞌtz wutzil. 10 Poro alchok scyetz yi na pekꞌ scyeꞌj tajwutz, ja tzun el xtxum te yi caꞌwl Ryos, nin qui na tzan tan chipoꞌtzeꞌn yi eꞌ mas. 11 Na alchok scyetz yi na chiꞌch quen cꞌuꞌl te junt tajwutz, at nin iꞌ-tz tcꞌuꞌl yi tzꞌoꞌtz wutzil. Quinin tzꞌicyꞌ tetz yi ẍeꞌn taneꞌn iꞌ tu tajtzaꞌkl, na jopij wutz tajtzaꞌkl.
12 Eꞌuꞌ jun cꞌoloj wajwutz, chi eꞌuꞌ witzꞌun taneꞌn, na chintzan tan stzꞌibeꞌn nin yi xtxolbileꞌj scyeruꞌ, na ja wiꞌt cuylij chipajuꞌ tan Jesucristo. 13 Nchaꞌtz eꞌuꞌ kawutzileꞌn, na chintzan tan stzꞌibeꞌn nin yi xtxolbileꞌj scyeruꞌ, na elnak chitxumuꞌ te yi mbi ekaꞌn tan Cristo, yi jun yi at nintz le xeꞌtzbil tzaj. Nchaꞌtz axwok jun cꞌoloj witzꞌun, yi axwok xicyeꞌt, na chintzan tan stzꞌibeꞌn nin yi xtxolbileꞌj tzitetz, na ja wiꞌt cxcyeꞌwok te Baybaꞌn.
Eꞌuꞌ jun cꞌoloj wajwutz, na chintzan tan stzꞌibeꞌn nin yi xtxolbileꞌj scyeruꞌ, na tzan teleꞌn chitxumuꞌ tetz Ryos. 14 Ej nchaꞌtz eꞌuꞌ kawutzileꞌn, na chintzan tan stzꞌibeꞌn nin scyeruꞌ, na ja wiꞌt el chitxumuꞌ tetz yi jun yi at nintz le xeꞌtzbil tzaj. Ej, nchaꞌtz axwok xicy, na chintzan tan stzꞌibeꞌn nin tzitetz, na ja cxquiwixwok na at yol Kataj le iwiꞌ. Nin ja wiꞌt cxcyeꞌwok te Baybaꞌn.
15 Quil tzꞌel nin cyalmaꞌuꞌ te eꞌchk takleꞌn tu eꞌchk ajtzaꞌkl tetz tzoneꞌj wuxtxꞌotxꞌ. Na ko na chipekꞌuꞌ te eꞌchk ajtzaꞌklaꞌtz, qui tzun na chipekꞌuꞌ te Kataj Ryos. 16 Na cyakil yi eꞌchk ajtzaꞌklaꞌtz cyetz tuꞌ wunak, nkꞌeꞌtz choꞌn na saj tu Ryos. Ej nin yi eꞌchk ajtzaꞌklaꞌtz iꞌtz chi taneꞌn: kol kakꞌ amaꞌl tetz yi tajbil kawankil, nka ko na el nin kalmaꞌ te yi eꞌchk takleꞌn yi chin elsbil almaꞌ nin, nka ko ntin yi ketz kakꞌej na kajoy. Cyakil yi eꞌchk ajtzaꞌklaꞌtz nkꞌeꞌtz choꞌn na saj tu Ryos, ma na choꞌn na jal tzoneꞌj wuxtxꞌotxꞌ. 17 Cyakil yi eꞌchk takleꞌnaꞌtz sotzok teraꞌtz tuml yi eꞌ yi na chixom teꞌj. Ma yi eꞌ yil chiban taneꞌn yi tajbil Ryos quil chisotz cyeraꞌtz.
Yi eꞌ contr Cristo
18 Eꞌuꞌ jun cꞌoloj wajwutz, txant tan tuleꞌn yi wiꞌtzbil kꞌejlal. Na bitaꞌnt cyanuꞌ yi txant tan tuleꞌn Cristo at tulbil jun yaj yi chin contr nin sbneꞌ te iꞌ. Iꞌtz yi anticristo. Nin tan tuꞌ yi ja wiꞌt jal wiꞌnin contr te yi ẍchusuꞌn Cristo na el katxum tetz yi ja wiꞌt kopon xeꞌ cyen yi jun wiꞌtzbil kꞌejlalaꞌtz. 19 Poro yi eꞌ contraꞌtz te Cristo, choꞌn cyeleꞌn skaxoꞌl, na nkꞌeꞌtz junit oꞌ scyuchꞌ. Yi ik junit oꞌ scyuchꞌ, qui kloꞌ el chijatxol quib. Poro tan tuꞌ yi cyeleꞌn chijatxol quib ja lajluchax yi nkꞌeꞌtz junit oꞌ scyuchꞌ.
20 Inti eꞌ cyeruꞌ, akꞌij yi Espíritu Sant scyeruꞌ tan Cristo. Chaꞌstzun te na el len chitxumuꞌ te yi bintzi. 21 Qui na chintzan tan stzꞌibeꞌn nin yi xtxolbileꞌj scyeruꞌ tan tuꞌ yi qui na el chitxumuꞌ tetz, ma na tan tuꞌ yi na el chitxumuꞌ tetz. Na elnak chitxumuꞌ tetz yi quiꞌc rmeril tan cweꞌn tokꞌbel tib yi laꞌjil tu yi bintzi.
22 I bin jaluꞌ, swaleꞌ nin scyeruꞌ naꞌ scyetz eꞌ yi eꞌ laꞌj. Iꞌtz yi eꞌ yi na cyal yi Jesús nkꞌeraꞌtz yi Cristo. Yi jun jilwutz wunakaꞌtz, eꞌ anticristo. Quiꞌc xac Ryos ẍchiwutz. Nin quiꞌc xac yi Cyꞌajol ẍchiwutz. 23 Nin alchok scyetz yi qui na tocsaj yi Jesús iꞌ Cyꞌajl Ryos, quiꞌc tzun Ryos te talmaꞌ. Poro alchok scyetz yi na tal yi Jesús iꞌ Cyꞌajl Ryos, at tzun Ryos te talmaꞌ.
24 Eliꞌch len te chicꞌuꞌluꞌ yi chusuꞌn yi bitaꞌnt cyanuꞌ te yi xeꞌteꞌn cuꞌn xtxoleꞌn scyeruꞌ. Na ko quil tzꞌel yi jun chusuꞌnaꞌtz te chicꞌuꞌluꞌ, junit tzun ẍchibneꞌuꞌ-tz tu Kataj Ryos, nin tu yi tetz Cyꞌajl. 25 Ej nin at jun oy yi sukiꞌnt tan Cristo sketz, iꞌtz yi itzꞌajbil tetz ben kꞌej ben sak.
26 Tan paj yi eꞌ subul nakaꞌtz, na chintzan tan stzꞌibeꞌn nin yi xtxolbileꞌj scyeruꞌ. 27 Poro qui tajweꞌn tetz cyeruꞌ, na Cristo akꞌon yi Espíritu Sant scyeruꞌ. Na ko najlij yi Espíritu Sant scyeꞌjuꞌ, qui tajweꞌn yi nink tzꞌoc jun tan chichusleꞌnuꞌ, na yi Espíritu Sant yaꞌstzun yi chusul ketz te cyakil eꞌchk takleꞌn. Ej nin yi ẍchusuꞌn iꞌ yaꞌstzun yi bintzi. Quiꞌc laꞌjil tuchꞌ. Choꞌkuꞌ bin tan banleꞌn taneꞌn yi tetz ẍchusuꞌn yi na tal: Qui bin chijatxlen quibuꞌ te Cristo.
28 Chaꞌstzun te eꞌuꞌ jun cꞌoloj wajwutz, quil chijatxleꞌn quibuꞌ te Cristo, bantz quil chixobuꞌ tetz yil tzꞌul tzaj junt tir. Na ko iẍnin atoꞌ-tz tkꞌab iꞌ yil tzꞌul tzaj quil katxꞌixwij swutz, nin qui tajweꞌn tan kewal kib swutz.
29 Nchaꞌtz elnak chitxumuꞌ tetz Jesucristo, yi ntin na ban eꞌchk takleꞌn balaj. Chaꞌstzun te cyakil yi eꞌ yi na chiban yi eꞌchk takleꞌn balaj, eꞌ cuꞌn meꞌl cyꞌajl Ryos.