Oꞌ meꞌl cyꞌajl Ryos
3
1 Eꞌuꞌ wajwutz, choꞌkuꞌ tan xtxumleꞌn yi balajil Kataj Ryos. Wiꞌnin na pekꞌ skeꞌj, na iꞌ teꞌn nkoꞌcsan tetz meꞌl cyꞌajl iꞌ. Yi eꞌ wunak qui na el chitxum sketz, na qui na el chitxum tetz Ryos. 2 Poro eꞌuꞌ jun cꞌoloj wajwutz, yi ko oꞌ meꞌl cyꞌajl Ryos jaluꞌ, i nin tzun pyor tzantzaj, na qui ilij kaꞌn yi jat loꞌ chin tzatzin sbajok skeꞌj. Poro elnak katxum tetz yil ẍchaj tib junt tir Jesucristo, kajepon txꞌixpuj chi taneꞌn iꞌ. Nin yaꞌstzun lkech wutz iꞌ. 3 Tan tuꞌ yi kꞌuklij kacꞌuꞌl te iꞌ at kachꞌiw tan kilol yi xtxolbileꞌj nin na katzan tan joyleꞌn puntil tan koqueꞌn tetz balaj, chi taneꞌn yi balajil Jesucristo, yi quiꞌc tetz til.4 Cyakil yi eꞌ yi na chijuch quil, eꞌ cuꞌn pajol caꞌwl. Na ko na katzan tan pajleꞌn caꞌwl Ryos, oꞌ tzun juchul iltz. 5 Na el katxum tetz yi ulnak aj Jesucristo wuxtxꞌotxꞌ tan stzajseꞌn kil. Nchaꞌtz na el katxum tetz yi quiꞌc muꞌẍ tal til. 6 Chaꞌstzun te, cyakil yi eꞌ yi na cyal yi choꞌn najlcheꞌ tkꞌab Cristo tajweꞌn tan chixomeꞌn te yi tajbil iꞌ na cyakil yi eꞌ yi na chijuch quil, qui na el chitxum te yi mbi ekaꞌn tan Cristo. 7 Eꞌuꞌ jun cꞌoloj cmon kajwutz, eꞌ xubsiꞌchuꞌ. Alchok scyetz yi na ban yi eꞌchk takleꞌn balaj, balaj tzun iꞌ-tz swutz Ryos. Chumbalaj nin iꞌ chi banak Jesucristo. 8 Poro alchok scyetz yi na tzan tan pajleꞌn caꞌwl Ryos, tetz tzun Baybaꞌn iꞌ-tz. Na yi Baybaꞌn, pajol caꞌwl iꞌ le xeꞌtzbil tzaj. Chaꞌstzun te tulakeꞌn yi Cyꞌajl Ryos tan xiteꞌn yi tajtzaꞌkl Baybaꞌn.
9 Cyakil yi eꞌ meꞌl cyꞌajl Ryos nkꞌeꞌtz chꞌinchꞌuj cuntunin eꞌ tan juchleꞌn mas quil, na najlij Ryos te cyalmaꞌ. Quiꞌc rmeril tan cyoqueꞌn chꞌinchꞌuj tan juchleꞌn mas quil, na eꞌ mero meꞌl cyꞌajl Ryos. 10 Chin clar cunin na el katxum tetz yi naꞌ scyetz eꞌ yi choꞌn najlcheꞌ tul tkan skil, iꞌtz yi eꞌ cyꞌajl Ryos, nin naꞌ scyetz yi eꞌ meꞌl cyꞌajl Baybaꞌn. Na alchok scyetz yi qui na ban taneꞌn yi eꞌchk takleꞌn balaj, nka qui na pekꞌ scyeꞌj kajwutz, nkꞌeꞌtz tzun meꞌl cyꞌajl Ryos iꞌ-tz.
Kalokꞌeꞌ kib skibil kib
11 I bin jaluꞌ, yi xtxolbil yi bitaꞌnt cyanuꞌ yi cyocleꞌnixuꞌ tkꞌab Kataj, iꞌtz yi kalokꞌeꞌ kib skibil kib. 12 Na qui na yub yi kol kaxom te tajtzaꞌkl Caín, na yi tajtzaꞌkl Caín, niꞌcuꞌn tu tetz Baybaꞌn, na nin cuꞌ biyol yi titzꞌun.a Poro ¿mbi xac cweꞌn biyol yi titzꞌun le chiwutz cyeruꞌ? Iꞌtz tan paj yi at cachiꞌ ajtzaꞌkl le wiꞌ Caín. Ma yi titzꞌun, xomij teꞌtz te yi balaj ajtzaꞌkl. \p 13 Chaꞌstzun te eꞌuꞌ wajwutz, ko at jun wunak yi na chiꞌch cꞌuꞌl scyeꞌjuꞌ, quil cheꞌl yabuꞌ teꞌj. 14 Poro yi oꞌ ketz ja el katxum tetz yi ja wiꞌt keꞌl tzaj tkꞌab quimichil. Ja kacambaj kutzꞌajbil. Na at jun chin balaj lokꞌ ib skaxoꞌl. Poro alchok scyetz yi qui na pekꞌ te jun kajwutz at nin tzun teraꞌtz tkꞌab quimichil. 15 Cyakil yi eꞌ yi na chiꞌch chicꞌuꞌl scyeꞌj yi eꞌ kajwutz, eꞌ tzun biyol nak cyeraꞌtz. Ej nin na el katxum tetz yi quil chicambaj cyeraꞌtz yi itzꞌajbil tetz ben kꞌej ben sak. 16 Na el katxum tetz yi mbi na elepont lokꞌ ib kol koꞌc tan xtxumleꞌn yi mbi banak Cristo. Ja takꞌ tib iꞌ tkꞌab quimichil tetz kaxel. Nchaꞌtz oꞌ ketz jaluꞌ, tajweꞌn yi list atoꞌt tkꞌab quimichil tan colcheꞌn junt kajwutz. 17 Ej nin je junt xtxolbileꞌj: Ko at cyakil yi tajweꞌn sketz, nin na kil yi at jun prow kajwutz yi at tajweꞌn tetz, nin ko qui na el kakꞌajab teꞌj tan ẍchꞌeyeꞌn, na ẍchaj yi quiꞌc yi lokꞌ ib skeꞌj yi choꞌn na saj tu Ryos. 18 Eꞌuꞌ jun cꞌoloj cmon creyent, yi lokꞌ ib nkꞌeꞌtz choꞌn na lajluchax tan kajilon, ma na yi lokꞌ ib na lajluchax tan yi eꞌchk takleꞌn balaj yi na kaban.
Chumbalaj ko baꞌn atoꞌt swutz Ryos
19 Tan tuꞌ yi na kalokꞌ kib skibil kib, na el katxum tetz yi na kaxom te yi bintzi. Nin na el katxum tetz yi baꞌn atoꞌt swutz Ryos. 20 Poro yi ko na kanachon te yi at kapaltil, pyor tzun Ryos, na na til cyakil yi na icyꞌ tkacꞌuꞌl. 21 Poro ko na kanachon te yi quiꞌc kil, baꞌn tzun atoꞌt swutz Ryos. 22 Ej nin stkꞌeꞌ iꞌ cyakil eꞌchk takleꞌn yil kajak tetz, na na katzan tan banleꞌn taneꞌn yi tetz caꞌwl tu yi eꞌchk takleꞌn yi na tzatzin iꞌ teꞌj. 23 Yi caꞌwl yi akꞌij tan Kataj iꞌtz yil kocsaj Jesucristo yi tetz Cyꞌajl, ej nin yil kalokꞌ kib skibil kib, chi talnak iꞌ sketz. 24 Cyakil yi oꞌ yi na kaban taneꞌn yi caꞌwl Ryos, choꞌn najlchoꞌ tkꞌab. Ej nin choꞌn najlij Ryos skeꞌj ketz. Na cyakil yi oꞌ yi na kaban taneꞌn yi caꞌwl Ryos, na el katxum tetz yi xomij iꞌ skeꞌj, tan yi Espíritu Sant yi ja akꞌlij sketz.