Yi cꞌuchul Pawl tan jiloneꞌn tetz César yi wiꞌtz ajcaw tetz Roma
25
1 Yi teleꞌn ox kꞌej yi sken opon Festo le tnum Cesarea beneꞌn tzun iꞌ-tz tan xoꞌn le tnum Jerusalén. 2 Cyoqueꞌn tzun eꞌ wiꞌtz paleꞌ swutz, scyuchꞌ eꞌ bajxom cyetz judiy tan takꞌleꞌn til Pawl. Nintzun cuꞌ chiwutz tetz, 3 tan bnol pawor scyetz tan sajeꞌn ẍchakol iꞌ Pawl Jerusalén, na sken bixeꞌ chiyol tan chibnol jun tramp tbeꞌ tan quimseꞌn Pawl. 4 Stzaꞌwel tzun Festo yi chiyoltz:—Choꞌn at Pawl xetzeꞌ Cesarea kale atit imbembil tetz coboxt kꞌej. 5 Baꞌn cxomwok nin sweꞌj, yi axwok yi amaꞌl tuꞌ iwutz, nin ko at til yaj baꞌn tzun tzitalwok swetz, —stzun Festo scyetz.
6 Eꞌchk wajxok nka lajuj peꞌ kꞌej cyaj cyen Festo Jerusalén. Kalenaꞌs tzun tponeꞌntz Cesarea. Itzun le junt ekloktz cꞌoleweꞌn tzun le pujbil xtisyaꞌ, nintzun cawuntz tan tponeꞌn Pawl swutz iꞌ. 7 Ma yi tponeꞌn Pawl swutz iꞌ, nintzun eꞌ baj cyen nil yi eꞌ judiy yi choꞌn chisajeꞌn Jerusalén, tan takꞌleꞌn til Pawl. Chin chꞌon nin til Pawl cyakꞌ poro quiꞌc xeꞌ. 8 Xeꞌteꞌn tzun Pawl tan yol tan colol tib:
—Cyaꞌl cunin injuchwit wil, mpe ik te kaley yi oꞌ judiy, mpe ik te yi katemplo, mpe ik te kawutzileꞌn César, —chij Pawl scyetz.
9 Inti Festo i taj tan toqueꞌn mas kꞌej iꞌ ẍchiwutz yi eꞌ judiy, itzun ben tloltz tetz Pawl:
—¿Qui ptzun na awaj cẍben Jerusalén? Baꞌn kaban taneꞌn yi axtisyaꞌ choneꞌj, —stzun uꞌlij Pawl tan Festo.
10 Itzun tal Pawl:
—¿Mbi tzun tzinjoy nintz? ¿Nkꞌeꞌtz ptzun choꞌn atin swutz yi pujbil xtisyaꞌ César? na yaꞌstzun yi wetz impujbil xtisyaꞌ. Nin at swutzuꞌ yi cyaꞌl na injuchwit wil ẍchiwutz yi eꞌ intanum judiy. 11 Ma yi ink juchul il, nin yi atk jun takleꞌn mimban yi baꞌn chinquim taꞌn, baꞌn tzun chinquimtz. Poro ko cyaꞌl atit xeꞌ yi wil yi na chitzan tan takꞌleꞌn, cyaꞌl tzun jun xcyeꞌ tan injatxleꞌn ẍchikꞌab. Nicyꞌpon binaꞌstz swutz César, —stzun Pawl bantz tetz Festo.
12 Yi wiꞌt jakol Festo tajtzaꞌkl scyetz yi eꞌ akꞌol tajtzaꞌkl iꞌ, beneꞌn tzun stzaꞌwel yi yol Pawl:
—Yi ko choꞌn na awaj cẍben swutz César, yaꞌtz nin atit awopombiltz, —stzun uꞌlij Pawl tan Festo.
Yi tponeꞌn Pawl swutz rey Agripa tu Berenice
13 Itzun yi teleꞌn cobox kꞌej cyoponeꞌn tzun yi rey Agripa tu Berenice yi txkel tan talcheꞌn jun yos tetz Festo le tnum Cesarea. 14 Alaꞌ tzun kꞌej eꞌ aꞌtijtz, nintzun xtxol Festo yi xtisyaꞌ Pawl tetz rey Agripa. Itzun taltz tetz:
—At jun yaj at cyen xetzeꞌ tan Félix. 15 Itzun yi xnaꞌkeꞌntz Jerusalén nintzun eꞌ baj opon yi eꞌ wiꞌtz paleꞌ scyuchꞌ yi eꞌ wiꞌ banl wiꞌ cyetz judiy tan talcheꞌn swetz tan wakꞌol caws iꞌ. 16 Itzun wal wetz scyetz yi nkꞌeraꞌtz bin chicstumbr yi eꞌ aj Roma tan jatxleꞌn jun wunak tan cweꞌn quimsaꞌn yi ko ntaxk akꞌlij amaꞌl tetz tan colol tib ẍchiwutz yi eꞌ akꞌol til. 17 Itzun yi cyulakeꞌn yi eꞌ akꞌol til tzoneꞌj quinin tzun ben mas tiemptz, na ninin le junt eklok yi incꞌoleweꞌn le pujbil xtisyaꞌ, yi inchakol yi jun yajaꞌtz. 18 Le wutz wetz wajtzaꞌkl je til yajeꞌj, poro cyaꞌl jun yi jak tal yi wetz yi na icyꞌ tincꞌuꞌl, na apart yi til yi cyal swetz. 19 I tuꞌ cyetz chicstumbr yi na cyocsaj, yaꞌstzun til Pawl cyaꞌn. Ej nin yi junt til iꞌtz tan paj yi na tal yi itzꞌ yi Jesús yi quimnak. 20 Nintzun sotz cuꞌn incꞌuꞌltz tan xtxumleꞌn, beneꞌn tzun injakol tetz yi ko yaꞌtz tajbil tan beneꞌn Jerusalén tan banleꞌn taneꞌn yi xtisyaꞌtz. 21 Jak tzun iꞌ-tz tan ticyꞌeꞌn swutz kawutzileꞌn Augusto yi wiꞌtz kajcaw. Incawuneꞌn tzuntz tan toqueꞌn iꞌ xetzeꞌ jalen cuꞌn tzinchak nin swutz César, —stzun Festo tetz rey Agripa.
22 —Na kloꞌ waj lwit yi jilon yi jun yajaꞌtz, —stzun yi rey Agripa tetz Festo.
—Baꞌn bin tbituꞌ yi yol iꞌ eklen, —stzun Festo tetz.
23 Itzun le junt eklok, wiꞌnin tzun alegr bajijtz yi cyoponeꞌn Agripa tu Berenice tpiltaꞌ. Cyoqueꞌn tzun tpiltaꞌ scyuchꞌ eꞌ chibajxom yi eꞌ sanlar scyuchꞌ yi eꞌ bajxom tetz tnum. Ẍchakxeꞌn tzun Pawl tan Festo. 24 Beneꞌn tzun tlol Festo scyetz:
—Iluꞌ rey Agripa, nin cyakil eꞌuꞌ yi ateꞌuꞌ skeꞌj tzoneꞌj, je bin jun yajeꞌj. Cyakil yi eꞌ judiy chin chijaꞌj nin bantz sweꞌj tan xochleꞌn iꞌ tzoneꞌj nin Jerusalén tan teleꞌn cuꞌn swutz. 25 Poro cyaꞌl nin jaleꞌt til waꞌn tan quimeꞌn, nin iꞌ teꞌn nin iꞌ jakon tetz tan ticyꞌeꞌn swutz kawutzileꞌn Augusto yi wiꞌtz kajcaw. Ja tzun wiꞌt bixeꞌ-tz waꞌn tan beneꞌn inchakol swutz. 26 Poro cyaꞌl bin jaleꞌt puntil waꞌn tan beneꞌn intzꞌibal yi til swutz Augusto yi César. Chaꞌstzun te muꞌl wucyꞌaltz ẍchiwutzuꞌ nin swutzuꞌ iluꞌ rey Agripa. Ma jaluꞌ yil wiꞌt baj chichꞌotiluꞌ stziꞌ, na waj yil cyakꞌuꞌ jun xeꞌ swetz tan beneꞌn intzꞌibal tetz César. 27 Na le wutz wetz wajtzaꞌkl, quiꞌc xtxolbil ko tul tzinchak nintuꞌ jun pres nin quiꞌc til lwakꞌ nintz, —stzun Festo bantz.