Yi jiloneꞌn Pawl swutz Félix tan colol tib
24
1 Itzun yi teleꞌn oꞌ kꞌejtz, chicweꞌn poneꞌn tzun Ananías yi wiꞌtz paleꞌ scyuchꞌ cobox wiꞌ ban wiꞌ tu Tértulo yi wiꞌtz yolol, nintzun eꞌ octz swutz yi gobernador tan takꞌleꞌn til Pawl. 2 Itzun yi ẍchakxeꞌn Pawl toqueꞌn tzun Tértulo tan takꞌleꞌn kloꞌ til. Itzun taltz tetz Félix:—Tan iluꞌ taꞌ, at tzatzin paz skaxoꞌl, nin ja bnix wiꞌnin eꞌchk takleꞌn balaj tan yi balaj tajtzaꞌkluꞌ. 3 Chumbalaj nin iluꞌ taꞌ Félix. Ben kꞌej ben sak katyoẍi yi eꞌchk takleꞌn yi na banuꞌ tetz ketz. 4 Qui na kaj tzꞌel mas tiempuꞌ kaꞌn. Quiꞌk tzꞌicyꞌ pajuꞌ skeꞌj. Max cꞌuꞌluꞌ skibaj. Tbiteꞌuꞌ cob tal kayol. 5 Ja wiꞌt el katxum tetz yi yajeꞌj, iꞌ jun akꞌol chiꞌch cꞌuꞌlal. Iꞌ jun ocsanl chicꞌuꞌl yi eꞌ judiy yi ateꞌ beneꞌn tziꞌn wi munt. Na tzan iꞌ tan tocseꞌn chicꞌuꞌl tan cyoqueꞌn tan contriꞌn te yi gobierum. Bajxom iꞌ ẍchiwutz jun txꞌakaj yi na chibiꞌaj Nazarenos. 6 Nin kloꞌ oc tan poꞌtzeꞌn yi ketz katemplo, poro nin txꞌamxij kaꞌn. Nin kloꞌ oꞌ octz tan takꞌleꞌn caws quib yi na tal yi ketz kaley. 7 Poro quinin takꞌ Lisias yi cyajcawil yi eꞌ sanlar amaꞌl sketz tan kakꞌol caws, na nin oc pitol tib skaxoꞌl tan telseꞌn Pawl tkakꞌab. 8 Chaꞌstzun te ja koꞌ saj ẍchakol swutzuꞌ tan kalol yi til. I bin jaluꞌ yil tzꞌocuꞌ tan pujleꞌn kaxoꞌl tzꞌelepon chan xtxumuꞌ tetz cyakil yi til yi na katzan tan xtxoleꞌn cyen teruꞌ, —stzun Tértulo bantz tetz Félix.
9 Jun tzun chitziꞌ yi eꞌ mas judiy bantz te yi yol Tértulo. 10 Ma beneꞌn bnol yi gobernador jun techl tetz Pawl tan jiloneꞌn, nintzun icyꞌ tcyꞌal Pawl yi yoltz. Itzun taltz:
—I bin jaluꞌ taꞌ na wil yi tenstzaj tunleꞌnuꞌ tan pujleꞌn xtisyaꞌ le ketz katnumil, chaꞌstzun te tetz cuꞌn walmaꞌ yi swaleꞌ cobox inyol tan incolol wib. 11 Kol tzꞌocuꞌ tan joyleꞌn juꞌ, skojank swutzuꞌ yi txeꞌn el coblajix kꞌej yi xnaꞌkleꞌnix Jerusalén tan nachleꞌn Ryos. 12 Nin cyaꞌl nin chintxꞌamxeꞌt tan wakꞌ ib tu jun wunak nka tan chimakꞌsajeꞌn jun cꞌoloj wunak, mpe ik le katemplo, mpe ik lakak eꞌchk sinagoga, mpe ik tnum. 13 Quil chixcyeꞌ tan jalseꞌn juꞌ wil yi na chitzan tan takꞌleꞌn swutzuꞌ. 14 Ma yi wetz swaleꞌ yi mero bintzi teruꞌ. Yi in wetz na wocsaj jun chusuꞌn yi na cyal cyetz yi chin juntlen nin, wech xomchin te chiRyosil yi eꞌ kamam kateꞌ, nin na wocsaj cyakil yi yol tetz kaley nin cyakil yi eꞌchk yol yi tzꞌibaꞌnt cyen cyakꞌun yi eꞌ elsanl stziꞌ Ryos. 15 At inchꞌiw te Ryos quib yi quitaneꞌn cyetz. Na kocsaj scyuchꞌ yi chitzꞌok junt tir yi eꞌ quimnakeꞌ, yi eꞌ yi quiꞌc quil nin yi eꞌ yi at quil. 16 Chaꞌstzun te ilenin na chintzan tan joyleꞌn puntil tan qui jaleꞌn wil swutz Ryos, nka ẍchiwutz wunak.
17 “Ja el alaꞌix yob yi qui na nuꞌlak tzoneꞌj le intanum, nin anaꞌ nnuꞌl tan takꞌleꞌn jun oy scyetz yi eꞌ intanum yi at tajweꞌn scyetz, nin tan takꞌleꞌn jun ofrent le templo. 18 Yaꞌstzun na chintzantz tan banleꞌn le templo yi chinojeꞌn cyen cobox tkan judiy sweꞌj yi choꞌn najlcheꞌ Asia. Nsken tzun inxansaj wib swutz Ryos. Inchuc, quiꞌc jun wunak at sweꞌj, nin cyaꞌl na chintzaneꞌt tan oyintziꞌ yi injaleꞌn cyaꞌn yi eꞌ aj Asiajaꞌtz. 19 Eꞌ tzun kloꞌ nchuꞌltz tan takꞌleꞌn wil swutzuꞌ ko at nin wil ẍchiwutz. 20 Poro baꞌn bin cyal tzaj yi eꞌ yajeꞌj yi ko jal wil cyakꞌun yi eꞌ wiꞌ banl wiꞌ tetz tnum Jerusalén yi inchakxeꞌn cyaꞌn. 21 Nka yaꞌtz wiltz yi walol scyetz: ‘Atin bin tzoneꞌj tan tbiteꞌn wil tan tuꞌ yi na wocsaj yi at itzꞌeꞌn junt tir ẍchixoꞌl almaꞌ,’ chinch bantz scyetz, —stzun Pawl tetz Félix.
22 Ma yi bajeꞌn tbital Félix yi yolaꞌtz, nintzun cuꞌ makol yi xtisyaꞌtz, na at le wiꞌ iꞌ yi mbi na cyocsaj yi eꞌ creyent. Nintzun ben tlol scyetz:
—Yil cuꞌul Lisias yi wiꞌtz cyajcawil yi eꞌ sanlar Jerusalén, kalenaꞌs tzun kawiꞌtz cuꞌn wiꞌ yi ixtisyaꞌ, —stzun Félix bantz scyetz.
23 Nintzun cawun nin tetz yi capitán tan toqueꞌn tan qꞌuicyꞌleꞌn Pawl, poro qui tzꞌamlij mas tkanil. Nin cawun nin tetz yi capitánaꞌtz tan tkꞌol amaꞌl scyetz yi eꞌ tamiw Pawl tan chicꞌaꞌchal, nin tan chixajsal.
24 Itzun yi ticyꞌeꞌn cobox kꞌejtz nin xtxum Félix tuml Drusila yi txkel, yi iꞌ jun xnaꞌn yi judiy, tan ẍchakleꞌn Pawl. Na yi tajbil iꞌtz yil tbit yi mbiꞌtz yi na cyocsaj wunak te Jesucristo.
25 Toqueꞌn tzun Pawl tan xtxꞌolcheꞌn xoꞌl tetz Félix yi chin tajweꞌn cunin tan chibnol taneꞌn yi eꞌchk takleꞌn balaj, nin yi tajweꞌn tan chimakol quib te yi eꞌchk takleꞌn cachiꞌ. Nchaꞌtz tal iꞌ scyetz yi sbajok jun xtisyaꞌiꞌn tzantzaj. Sajeꞌn tzun jun chin xobeꞌn tetz Félix, chaꞌstzun te beneꞌn tlol tetz Pawl:
—Stzicuꞌn loꞌ. Quiloꞌk. Yil tzꞌamaꞌlix inwutz, nintzun cẍinchak junt tir tan atxolil mas yi xtxolbileꞌj swetz, —stzun Félix bantz tetz Pawl.
26 Na yi tajbil Félix iꞌtz yi nink takꞌ Pawl xoꞌc tetz tan teleꞌn liwr. Chaꞌstzun te alaꞌ cuꞌn tir ẍchak iꞌ Pawl tan jiloneꞌn tuchꞌ. 27 Poro yi ticyꞌeꞌn cob yob, toqueꞌn tzun Porcio Festo tetz xel Félix. Nintzun cyaj tkꞌol Félix Pawl xetzeꞌ tan jaleꞌn mas kꞌej iꞌ ẍchiwutz yi eꞌ judiy yi qui na cyocsaj.