23
1 Xmayineꞌn nin tzun Pawl scyetz yi eꞌ pujul xtisyaꞌ nin ben tlol scyetz:—Eꞌuꞌ intanum quibit tzajuꞌ cob tal inyol. Qui na chimbisun na na chin nachon teꞌj yi quiꞌc wetz wil swutz Ryos sajleꞌn tunintz, —stzun Pawl scyetz.
2 Cawuneꞌn tzun Ananías yi wiꞌtz paleꞌ scyeꞌj yi eꞌ yi ateꞌtz nakaꞌjil Pawl tan teleꞌn jun kꞌab cyaꞌn xak stziꞌ Pawl. 3 Beneꞌn tzun tlol Pawl tetz:
—Ryos tzꞌakꞌon cawsuꞌ, na wutz tuwuꞌ plaj tuwuꞌ yi na taluꞌ yi xomijuꞌ te yi ley Moisés. Niꞌcuꞌn iluꞌ chi jun tapij yi chin skoj nin tan txun, poro txꞌotxꞌ tuꞌ tcꞌuꞌl. Elnak xtxumuꞌ te yi ley Moisés, nin yaꞌstzun na xcon tanuꞌ tan lajluchaxeꞌn yi ko at wil nka quiꞌ. Poro lastum yi qui na banuꞌ taneꞌn yi jun leyaꞌtz, na ja cawunuꞌ tan inloꞌoneꞌn. Iẍkaj yaꞌstzunk na tal yi ley yi baꞌn loꞌon jun yaj ko ntaxk lajluchax yi til.
4 Beneꞌn tzun cyalol cobox tkan yi ateꞌ-tz:
—¿Nxac na cẍtzan tan yajleꞌn yi wiꞌtz kapaleꞌil yi na xcon tetz Ryos?
5 —Eꞌuꞌ kawutzileꞌn, chicuyeꞌuꞌ impaj. Na quinin meꞌl intxum tetz yi ko yaꞌtz yi wiꞌtz paleꞌ yi juneꞌj. Elnak intxum tetz yi xtxolbil yi tzꞌibaꞌnt cyen yi na tal: ‘Ayajiꞌch len jun wiꞌ banl wiꞌ scyeri atanum,’ —stzun Pawl.
6 Poro yi teleꞌn xtxum Pawl tetz yi cob txꞌakaj quitaneꞌn yi eꞌ bajxomaꞌtz, jun txꞌakaj sadusey, nin jun txꞌakaj parisey, chin tjaꞌj nin tzun bantz tan yol:
—Eꞌuꞌ intanum, in bin parisey. In nitxajil jun parisey. Atin tzoneꞌj tan tbiteꞌn wil tan tuꞌ yi na wocsaj yi at itzꞌeꞌn junt tir ẍchixoꞌl almaꞌ, nin tan tuꞌ yi at inchꞌiw teꞌj.
7 Yi tlol Pawl yi yolaꞌtz jeꞌn tzun chitxꞌujsal quib yi eꞌ parisey scyuchꞌ eꞌ sadusey. Cob cuntuꞌ tzun eltz. 8 Na i na cyal yi eꞌ sadusey yi quiꞌc itzꞌeꞌn junt tir ẍchixoꞌl almaꞌ, nin quiꞌc ángel, nin quiꞌc espíritu. Poro yi eꞌ parisey na cyal yi at. 9 Chibajeꞌn tzun niltz tan wokꞌneweꞌn. Chijeꞌn tzun txiclok cobox scyeri yi txꞌolol xoꞌl yi ley yi nchaꞌtz eꞌ, eꞌ parisey, itzun cyaltz:
—Skawutz ketz cyaꞌl atit til yi yajeꞌj. Ko ja jilon jun espíritu koꞌk jun ángel tetz, quil kamak yi tajbil Ryos, —cheꞌch.
10 Jaleꞌn tzun jun chumam oyintziꞌ ẍchixoꞌl, chaꞌstzun te cawuneꞌn yi wiꞌtz ajcaw scyetz yi eꞌ sanlar tan teleꞌn ticyꞌleꞌn Pawl ẍchixoꞌl, nin tan beneꞌn quicyꞌal kale atit chicaꞌl na nin xob iꞌ ko tzun ẍeꞌn tzꞌel cuꞌn Pawl cyaꞌn swutz.
11 Itzun le caꞌp akꞌbaltz yi at Pawl xetzeꞌ nintzun ẍchaj tib Kajcaw swutz, itzun taltz: “Quiwit Pawl, chi matxol yi mbi ekaꞌn waꞌn tzoneꞌj Jerusalén, i nin tzawulejaꞌtz yil cẍopon Roma.”
Yi xtxumxeꞌn jun tramp te Pawl cyakꞌun yi eꞌ contr iꞌ
12 Itzun yi tuleꞌn skil cyoqueꞌn tzun cobox judiytz tan nucꞌleꞌn cuꞌn jun tramp te Pawl, itzun cyaltz: “Jun cuꞌn yol, quil kawan nin quil kucꞌaꞌ jaleꞌn cuꞌn lquim Pawl kaꞌn. Ja nin kaquimtz yi ko quil keꞌl cuꞌn teꞌj,” cheꞌch tzun bantz. 13 Mas caꞌwnak chixoneꞌn yi eꞌaꞌtz yi cyal yi xtxolbilaꞌtz. 14 Chibeneꞌn tzuntz scyeꞌj yi eꞌ wiꞌtz paleꞌ nin scyuchꞌ yi eꞌ wiꞌ banl wiꞌ, nintzun cyaltz scyetz:
—Yi oꞌ ketz, ja kal jun kayol swutz Ryos yi squimok Pawl kaꞌn, nin ko quil keꞌl cuꞌn teꞌj ja nin kaquimtz. 15 Ma jaluꞌ eꞌuꞌ kawutzileꞌn, i kloꞌ kaj yil chibanuꞌ yi xtxolbileꞌj. Chijakeꞌuꞌ tetz yi wiꞌtz cyajcawil yi eꞌ sanlar tan sajeꞌn ẍchakol iꞌ Pawl tan tuleꞌn tzoneꞌj ẍchiwutzuꞌ. Cyaleꞌuꞌ tetz yi na cyajuꞌ quibituꞌ junt claración Pawl. List tzun oꞌ-tz tan biyleꞌn cuꞌnx tbeꞌ yi ntaxk ul ẍchiwutzuꞌ, —cheꞌch tzun bantz tetz yi wiꞌtz paleꞌ.
16 Itzun yi tbital yi tal yi tanub Pawl yi chitxumuꞌn yi eꞌ wunakaꞌtz, nintzun bentz le chicaꞌl yi eꞌ sanlar tan talcheꞌn tetz Pawl. 17 Ẍchakol tzun Pawl jun capitán, itzun ben tlol tetz:
—Tcyꞌaj ninuꞌ yi xicyeꞌj swutz yi wiꞌtz tajcawuꞌ, na at cob yol cyꞌaꞌn taꞌn, —stzun Pawl.
18 Beneꞌn tzun tcyꞌal sanlar yi xicy swutz yi ajcaw, itzun taltz:
—Ja bin chinsaj ẍchakol Pawl, yi pres, nin ja cuꞌ wutz swetz tan sajeꞌn wucyꞌal yi jun xicyeꞌj swutzuꞌ, na at loꞌ cob yol cyꞌaꞌn taꞌn tetz teruꞌ, —stzun yi capitán bantz tetz yi wiꞌtz ajcaw.
19 Beneꞌn tzun ẍchꞌinul yi ajcawaꞌtz yi xicy, nintzun eꞌ eltz chichuc, nintzun jaktz tetz:
—¿Mbi tzun na awaj tzawal swetz? —stzun iꞌ.
20 —Ja bixeꞌ chiyol yi eꞌ judiy tan jakleꞌn jun pawor teruꞌ tan beneꞌn ẍchakoluꞌ Pawl ẍchiwutz yi eꞌ wiꞌ banl wiꞌ tetz tnum ekl. Scyaleꞌ yi na cyaj quibit junt claración iꞌ poro nkꞌeraꞌtz bintzi. 21 Quil tocsajuꞌ chiyol na at mas caꞌwnak chixoneꞌn yi ẍchibneꞌ jun tramp te Pawl. Je tzun chiyol yi ncyal tetz Ryos: ‘Quil kawan nin quil kucꞌaꞌ jalen cuꞌn lquim Pawl kaꞌn,’ cheꞌch bantz. Na chitzantz tan ẍchꞌiweꞌn yi ko cu tanuꞌ nka quiꞌ, —stzun yi xicy bantz.
22 Tajeꞌn tzun ẍchakol yi wiꞌtz ajcaw yi xicytz, poro nin cawunin tetz yi cyaꞌl talwit yi ja xaꞌk iꞌ tan talcheꞌn yi xtxolbil tetz.
Yi beneꞌn ticyꞌleꞌn Pawl swutz Félix jalen Cesarea
23 Cheꞌ ẍchakol tzun yi wiꞌtz ajcawaꞌtz cob capitán. Yi cyoponeꞌn swutz nintzun cawun nin scyetz tan chibnol list quib cob cient sanlar yi ntaxk opon beluj chꞌichꞌ tetz lakꞌbal, scyuchꞌ oxcꞌal tu lajuj aj chej, tu cob cient aj lans tan chibeneꞌn jalen Cesarea. 24 Nin cawun nin scyetz sanlar tan chibnol list cobox chej tan ticyꞌleꞌn nin Pawl, bantz baꞌn cuntuꞌ tzꞌopon iꞌ swutz yi gobernador. 25 Nintzun bnix nin jun uꞌj tan yi ajcaw. Itzun ban nin yol iꞌ-tz:
26 “I bin jaluꞌ wutzileꞌn kagobernador, na waj lwal jun yos teruꞌ, na chumbalaj nin iluꞌ. Yi in wetz in Claudio Lisias. 27 Ja incol yi yajeꞌj ẍchikꞌab yi eꞌ judiy, na ja kloꞌ cuꞌ chibiyol. Wutzileꞌn cuꞌn in scyuchꞌ yi eꞌ insanlar oꞌ opon tan colcheꞌn ẍchikꞌab yi eꞌ judiy na nin el intxum tetz yi iꞌ jun aj Roma. 28 Nintzun ben wucyꞌal iꞌ-tz ẍchiwutz yi cyetz wiꞌ banl chiwiꞌ tan wital yi til. 29 Ej nin tan chiyol nin el intxum tetz yi tan tuꞌ yi cyetz chiley ncyakꞌwit til. Poro le wutz wetz wajtzaꞌkl cyaꞌl atit til tan quimeꞌn, nka tan toqueꞌn quen xetzeꞌ. 30 Poro nin wit yi ja wiꞌt txumxij jun tramp cyaꞌn eꞌ judiy tan biyleꞌn cuꞌn iꞌ. Chaꞌstzun te ja ben inchakol swutzuꞌ nin ja chincawun nin scyetz yi eꞌ akꞌol til iꞌ tan cyoponeꞌn swutzuꞌ tan takꞌleꞌn chipart. Cu bin, ntinaꞌtz cuntuꞌ inyoltz. Tiltuꞌ tibuꞌ,” stzun yi wiꞌtz ajcaw ban nintz tul uꞌj.
31 Quib yi ben alij scyetz yi eꞌ sanlar, i nin tzun cyulejtz. Lakꞌbal tzun beneꞌn quicyꞌal Pawl. Choꞌn tzun cyoponeꞌntz le tnum Antípatris. 32 Itzun le junt eklok nin cyajeꞌn cyen chijatxol yi Pawl ẍchikꞌab yi eꞌ aj chej. Chipakxeꞌn tzun Jerusalén yi eꞌ sanlar yi quikan cuntuꞌ eꞌ beneꞌn. 33 Ma yi cyoponeꞌn yi eꞌ aj chej yi akꞌol tetz Pawl Cesarea, nintzun cyakꞌ yi uꞌj tuml Pawl tetz yi gobernador. 34 Itzun yi wiꞌt bajeꞌn siꞌlel gobernador yi uꞌj, nintzun ben jakol tetz Pawl yi naꞌ sajeꞌt iꞌ. Ma yi teleꞌn xtxum tetz yi aj Cilicia Pawl, 35 beneꞌn tzun tlol tetz:
—Yil chuꞌl eꞌ akꞌol awil tzinwutz switeꞌ yi xtxolbil, —stzun yi ajcawaꞌtz bantz tetz Pawl.
Nintzun cawun nintz tan toqueꞌn qꞌuicyꞌleꞌn Pawl le yi jun chin wutzileꞌn caꞌl yi bnixnak tan Herodes yi tpiltaꞌ taneꞌn.