22
1 —Eꞌuꞌ intanum, quibit tzajuꞌ cob inyol tan quiloluꞌ yi ko at wil nka quiꞌ.2 Yi quibital yi jiloneꞌn Pawl le cyetz chiyol, mas tcunin tzun eꞌ cweꞌn numloktz. Je tzun ben tlol scyetzeꞌj:
3 “Jun cuꞌn yol in judiy. Choꞌn itzꞌnakin Tarso cwent Cilicia. Poro choꞌn inchꞌuyeꞌn tzoneꞌj le tnumeꞌj. Choꞌn inchusnak wib teꞌj wutzileꞌn Gamaliel tan taꞌweꞌn eꞌchk chiley katanum waꞌn. Chin ẍcꞌatnak nin in tan inxconeꞌn tetz Ryos, chi quitaneꞌn cyeruꞌ jaluꞌ. 4 Nchaꞌtz in, noꞌcnakin tan chibuchleꞌn yi eꞌ wunak yi xomcheꞌ te yi jun acꞌaj chusuꞌn. Eꞌ octz waꞌn xetzeꞌ. Nin yi wajbil iꞌtz tan chibiyleꞌn cuꞌn tircuꞌn. 5 Ko na taj yi wiꞌtz paleꞌ scyuchꞌ yi eꞌ wiꞌ banl wiꞌ baꞌn choꞌc tetz instiw, na eꞌ teꞌn akꞌon uꞌj swetz tan chisajeꞌn eꞌ katanum waꞌn tan cyoqueꞌn xetzeꞌ. Nin xnaꞌknakin Damasco tan quicyꞌleꞌn tzaj yi eꞌaꞌtz yi ateꞌtz tan takꞌleꞌn yi chicaws tzoneꞌj Jerusalén.
Yi xtxolil Pawl yi ẍeꞌn cuꞌn xomeꞌn te Cristo
6 “Itzun bantz yi txant tan wuponeꞌn le tnum Damasco, yi na chinxon tbeꞌ, eꞌchk chajcuꞌn kꞌej loꞌ, jalt cuntunin innachol yi cweꞌn muleꞌn jun chin pakꞌpuchal swibaj yi choꞌn sajeꞌn tcyaꞌj. 7 Ninin tzun nnopon trimpuj wuxtxꞌotxꞌ, nin ben wital jun yol: ‘Saulo, Saulo, ¿nxac na cẍtzan tan imbuchleꞌn?’ 8 Beneꞌn tzun intzaꞌweltz: ‘¿Naꞌ scyetz iluꞌ Taꞌ?’ chinch tzun bantz. ‘I inaꞌtz, in Jesús aj Nazaret yi na cẍtzan tan buchleꞌn,’ chij ban tzajtz swetz. 9 Quilol tzun yi eꞌ yi xomcheꞌ sweꞌj yi pakꞌpuchal, nin eꞌ baj el yabtz teꞌj. Poro quinin pujxij cyaꞌn yi yol yi aꞌlchij swetz. 10 ‘Ma jaluꞌ Taꞌ ¿mbil tzimban?’ chinch tzun banintz. Nin itzun saj tloltz swetz: ‘Txiclijeꞌn nin quiloꞌk Damasco. Yaꞌstzun tzꞌaꞌlcheꞌt tzawetz cyakil yi eꞌchk takleꞌn yi txumijt tan abnol,’ chij Wajcaw bantz swetz. 11 Chꞌinuꞌn tzun wuponeꞌntz Damasco cyakꞌun yi eꞌ yi xomcheꞌ sweꞌj, na sken noꞌc moyiꞌẍ tan paj yi jun pakꞌpuchalaꞌtz yi ẍchaj tib tzinwutz.
12 “At tzun jun yaj yi na biꞌaj Ananías, yi cꞌulutxum swutz Ryos, quib yi na tal yi ley Moisés. Chumbalaj wunak iꞌ ẍchiwutz yi eꞌ judiy yi najlcheꞌ-tz Damasco. 13 Tuleꞌn tzun iꞌ-tz sweꞌj, itzun taltz: ‘Kajwutz Saulo sjakxok awutz,’ chij iꞌ bantz swetz. Inin tzun bantz, le rat jakxeꞌn inwutz nin ben wechal wutz iꞌ-tz. 14 Itzun taltz swetz: ‘Yi chiRyosil yi eꞌ kamam ncẍtxaꞌoneꞌn tan teleꞌn atxum tetz yi tetz tajbil, nin tan awilol wutz yi jun yi quiꞌc til, nin tan awital yi yol iꞌ. 15 Txaꞌij quiẍ taꞌn tan xtxoleꞌn scyetz cyakil wunak yi mbi cunin mawil tu yi mbi cunin mabit. 16 Ma jaluꞌ ¿mbi tzun tzachꞌiwtz? Or tzajeꞌn txiclok, nin jeken aꞌ tawiꞌ. Scuylok tzun yi awil yil cẍoꞌc tan naꞌwseꞌn yi tetz biꞌ,’ chij Ananías bantz swetz.
Yi xtxolil Pawl yi ẍeꞌn cuꞌn beneꞌn chakij ẍchixoꞌl yi eꞌ yi nkꞌeꞌtz eꞌ judiy
17 “Itzun bantz yi nsken nuꞌl tzoneꞌj Jerusalén nin te yi na chintzan tan nachleꞌn Kataj le caꞌl Ryos, ẍchajol tzun tib iꞌ-tz tzinwutz. 18 Wil tzun wutz iꞌ yi jiloneꞌn swetz. Je yol iꞌ yi tal: ‘Or tzaweleꞌn tzoneꞌj Jerusalén na quil cyocsaj yil cẍoꞌc tan xtxoleꞌn scyetz yi mbi ekaꞌn waꞌn,’ chij iꞌ bantz swetz. 19 ‘Poro Wajcaw,’ chinch, ‘elnak chitxum yi eꞌ intanum tetz yi ocnakin tan cyocseꞌn yi eꞌ creyent xetzeꞌ, nin caws nin eꞌ wulej lakak sinagoga. 20 Nin in jun tan biyleꞌn Esteban yi quimeꞌn yi yaj yi ocnak tan xtxoleꞌn yi mbi ekaꞌn tanuꞌ, na in incyaj cyen tan qꞌuicyꞌleꞌn yi beꞌch cyetz yi eꞌaꞌtz yi eꞌ oc tan biyleꞌn Esteban. Xom inwiꞌ scyeꞌj na yaꞌstzun yi mero wajbil tan quimeꞌn yi junaꞌtz,’ chinch bantz tetz Ryos. Poro ilenin tal Kajcaw swetz: 21 ‘Quil cẍbisun, na tajweꞌn tan abeneꞌn joylaj ẍchixoꞌl yi eꞌ yi nkꞌeꞌtz eꞌ judiy,’ chij iꞌ bantz swetz,” stzun Pawl scyetz yi eꞌ wunak.
22 Tircunin tzun eꞌ wunakaꞌtz yi ateꞌ-tz eꞌ numeꞌ-tz tan tbiteꞌn yol Pawl. Ma yi quibital yi chakij Pawl tan xtxoleꞌn scyetz yi eꞌ yi nkꞌeꞌtz eꞌ judiy, chin chijaꞌj nin tzun bantz tan yol, itzun cyaltz:
—Elk cuꞌn yi junaꞌtz swutz. Baꞌn tcuꞌn yil quim, —cheꞌch.
23 Tan paj yi chinchijaꞌj nin ban tan yol, nin na chitzan tan jabeꞌn eꞌchk chixbuꞌk, nin tan ẍchiteꞌn puklaj tcyaꞌj, 24 cawuneꞌn nintzun yi wiꞌtz ajcaw scyetz yi eꞌ sanlar tan toqueꞌn Pawl le chicaꞌl bantz cyoqueꞌn tan jicleꞌn, bantz tlol yi til, nin bantz lajluchaxeꞌn yi mbi na chiẍchꞌin yi eꞌ wunak teꞌj. 25 Itzun yi cweꞌn cꞌalij Pawl tan ẍocoꞌ, beneꞌn tzun tlol tetz yi capitán:
—¿At ptzun cu tan toqueꞌn jicleꞌn jun aj Roma yi ko ntaxk lajluchax yi til?
26 Yi tbital yi capitán yi yolaꞌtz, beneꞌn tzuntz tan talcheꞌn tetz yi wiꞌtz ajcaw:
—Taꞌ ¿mbi na banuꞌ? na aj Roma teꞌtz yi yajeꞌj, —stzun yi capitán tetz yi wiꞌtz ajcawaꞌtz.
27 Beneꞌn tzun yi wiꞌtz ajcaw te Pawl nintzun jaktz tetz:
—Alaj swetz ko aẍ aj Roma.
—In bin, —stzun Pawl tetz.
28 —¿Yaꞌtz peꞌ? Quintech nin pwok wakꞌnak wetz tan woqueꞌn tetz aj Roma, —stzun yi wiꞌtz ajcawaꞌtz tetz Pawl.
—Ma yi wetz, quiꞌ, na in aj Roma yi witzꞌleꞌn, —stzun Pawl tetz.
29 Jalcunin tzun cyeleꞌn ojk yi eꞌaꞌtz yi eꞌ oc kloꞌ tan jicleꞌn Pawl. Nchaꞌtz yi wiꞌtz ajcaw, wiꞌnin xobeꞌn tan paj yi nsken cꞌalxij taꞌn.
Yi jiloneꞌn Pawl tan colol tib ẍchiwutz yi eꞌ wiꞌ banl chiwiꞌ yi eꞌ judiy
30 Itzun le junt eklok, teleꞌn tzun pujul yi wiꞌtz ajcaw yi caren yi cꞌalol tetz Pawl, nin eꞌ ẍchak yi eꞌ wiꞌtz paleꞌ scyuchꞌ cyakil yi wiꞌ banl chiwiꞌ yi eꞌ judiy. Na yi tajbil iꞌ iꞌtz tan tbital yi mbiꞌtz yi til Pawl scyetz. Teleꞌn tzaj tzun Pawl tan yi wiꞌtz ajcaw nin cuꞌ xtxicbaltz ẍchiwutz.