Yi beneꞌn Pawl Jerusalén
21
1 Itzun yi kajatxol kibtz scyuch yi eꞌ kajwutz, kicyꞌeꞌn tzun kestz wi aꞌ. Nsbej nin kabeneꞌntz le amaꞌl Cos. Ma le junt eklok jalen tzun le amaꞌl Rodas oꞌ oponeꞌt-tz. Keleꞌnt tzuntz, choꞌn tzun koponeꞌntz Pátara. 2 Ej nin at tzun jun barc yi choꞌn at bembil jalen Fenicia. Koqueꞌn nin tzun tcꞌuꞌl, nintzun oꞌ icyꞌtz wi aꞌ. 3 Kilol nin tzun yi amaꞌl yi na biꞌaj Chipre. Choꞌn cyajeꞌn cyen le kamax. Oꞌ cyecyꞌen tuꞌ-tz tan koponeꞌn le amaꞌl Siria. Choꞌn tzun kocomponeꞌntz Tiro, na yaꞌtz atit telbil tektz yi barctz. 4 Kabeneꞌn tzun tan chijoyleꞌn yi eꞌ kajwutz yi ateꞌ-tz. Yi chijaleꞌn kaꞌn, nintzun oꞌ aꞌtij juk kꞌej scyeꞌj. Cyalol tzuntz tetz Pawl tan yi Espíritu Sant tan qui beneꞌn Jerusalén. 5 Jeꞌn pon tzun te cobox kꞌejaꞌs kakꞌun, nintzun oꞌ icyꞌt junt tir. Cyakil cunin tzun eꞌ, eꞌ xom nintz skeꞌj tuml quixkel scyuchꞌ chinitxaꞌ tan kakꞌleꞌn juꞌ tnum. Kacweꞌn tzun mejloktz tzi aꞌ tan nachleꞌn Kataj. 6 Itzun yi wiꞌt kakꞌalul kibtz skibil kib, koqueꞌn tzun kestz tcꞌuꞌl yi barc. Ma yi eꞌ cyetz, eꞌ pakxijtz lakak chicaꞌl.7 Cyajeꞌn cyen tzun yi tnum Tiro kaꞌn. Choꞌn tzun koponeꞌntz Tolemaida, yaꞌstzun kawiꞌtzal kabeꞌ wi aꞌ. Oꞌ icyꞌak jun kꞌej tan talcheꞌn jun yos scyetz yi eꞌ kajwutz yi ateꞌ-tz le yi amaꞌlaꞌtz. 8 Itzun le junt ekloktz ticyꞌeꞌn tzun Pawltz nin oꞌ xom nintz teꞌj. Koponeꞌn tzuntz Cesarea, nintzun oꞌ ocopontz tan posariꞌn le caꞌl Liꞌp, yi aj txolinl te yi balaj stziblal. Iꞌ jun scyeri yi juk diácono yi eꞌ bixeꞌ. 9 At tzun cyaj meꞌltz yi ntaxk oc quichmil. Eꞌ len elsanl stziꞌ Ryos. 10 Yi kaꞌteꞌn cobox kꞌejaꞌs, cweꞌn muleꞌn tzun yi elsanl stziꞌ Ryos yi na biꞌaj Agabo. Choꞌn sajeꞌn iꞌ Judea. 11 Yi tuleꞌn iꞌ skeꞌj, beneꞌn tzuntz tan pujleꞌn len yi cꞌalbil Pawl xe cꞌuꞌl, nintzun cuꞌ cꞌalol yi tetz tkantz tu kꞌab. Itzun taltz sketz:
—Chi ncuꞌ wulel wibeꞌj, chaꞌtz cuꞌn tzun tzꞌuꞌlij yi taw cꞌalbileꞌj cyakꞌun yi eꞌ judiy yi ateꞌ Jerusalén, nin sjatxloktz ẍchikꞌab yi eꞌ yi nkꞌeꞌtz eꞌ judiy. Yaꞌstzun tal yi Espíritu Sant swetz, —stzun iꞌ sketz.
12 Yi kubital yi yolaꞌs, nin cu kawutz tetz Pawl tan qui beneꞌn Jerusalén, poro nkꞌeꞌtz ntin oꞌ, nchaꞌtz eꞌ yi najlcheꞌ nintz, cu chiwutz tetz Pawl tan qui beneꞌn Jerusalén. 13 Poro itzun tal Pawltz:
—Baꞌn tcuꞌn quil cxokꞌwok, na na cxtzan tan takꞌleꞌn bis swetz. List atineꞌt tan incweꞌn cꞌalij, nin nkꞌeꞌtz ntinaꞌtz, ma na nchaꞌtz list atineꞌt tan inquimeꞌn, ko yaꞌtz tzun cyajbil sweꞌj. Poro quil chintaneꞌ tan xtxoleꞌn yi balaj stziblal tetz Kajcaw Jesucristo, —chij Pawl sketz.
14 Quinin tzun oꞌ xcyeꞌ-tz tan xtxꞌixpeꞌn tajtzaꞌkl.
—Bneꞌ bin Kajcaw tajbil teꞌjuꞌ, —koꞌch tzun bantz tetz.
15 Yi ticyꞌeꞌn poneꞌn cobox kꞌejaꞌtz, nin yi wiꞌt kabaj nucꞌxeꞌn, kicyꞌeꞌn tzuntz tan koponeꞌn Jerusalén. 16 Xomcheꞌ cobox kajwutz skeꞌj. At tzun jun ẍchixoꞌl yi na biꞌaj Mnasón. Aj Chipre iꞌ, nin iꞌ jun scyeri eꞌ bajx creyent yi tocsaj. Choꞌn tzun at kopombiltz tan posariꞌn le caꞌl iꞌ Jerusalén.
Yi jiloneꞌn Pawl tan colol tib
17 Itzun yi koponeꞌn Jerusalén, wiꞌnin chitzatzineꞌn yi eꞌ kajwutz skeꞌj. 18 Nin le caꞌp kꞌej kabeneꞌn tzuntz tu Pawl tan xajseꞌn kajwutz Jacow. Nsken chicham quib cyakil yi eꞌ wiꞌ banl wiꞌ xe tetz caꞌl. 19 Yi wiꞌt talol jun yos scyetz, txol cunin ban Pawl tan xtxoleꞌn yi mbi cunin ban Ryos tan iꞌ ẍchixoꞌl yi eꞌ yi nkꞌeꞌtz eꞌ judiy. 20 Yi quibital yi xtxolbilaꞌtz, tircunin tzun eꞌ, cyakꞌ kꞌajsbiltz tetz Ryos. Poro nin cyal tetz Pawl:
—Il cun tzuntz herman Pawl, jatix loꞌ mil creyent ateꞌ skaxoꞌl yi oꞌ judiy, nin tircuꞌn eꞌ wiꞌnin chiẍcꞌatnakil tan banleꞌn taneꞌn yi ley Moisés. 21 Poro na kubit jun yol tzaweꞌj yi na cẍtzan tan chichusleꞌn tan cyajeꞌn cyen quilol yi ley Moisés. Nin na cẍtzantz tan talcheꞌn scyetz yi qui tajweꞌn tan chibnol circuncidar chinitxaꞌ, nin na awal scyetz yi nkꞌeꞌtz tajweꞌn tan chixomeꞌn te chichusuꞌn kamam kateꞌ, cheꞌch. 22 Ma jaluꞌ ¿mbil kaban? na cyakil cunin wunak ẍchiꞌchok chicꞌuꞌl tzaweꞌj yil quibit yi ja wiꞌt cẍuꞌl tzoneꞌj. 23 Banaj bin taneꞌn kayol yi na kalnin tzawetz. Ateꞌ cyaj yaj skaxoꞌl yi chin tajweꞌn cunin tan cyeleꞌn cuꞌn te jun chiyol yi alijt cyakꞌun tetz Ryos. 24 Cyꞌajweꞌ nin tzaweꞌj, nin banswok itib tu Ryos, nin chojaj yi scꞌucheꞌ yi paleꞌ tzitetz, baꞌn tzun tzꞌel jakꞌ chiwiꞌ. Tzꞌelepon tzun chitxum wunaktz tzawetz yi nkꞌeꞌtz bintzi yi yol yi na tzan tzaweꞌj, na squileꞌ yi na cẍtzan tan banleꞌn taneꞌn yi ley Moisés. 25 Ma yi eꞌ yi nkꞌeꞌtz eꞌ judiy, yi ocsaꞌnt yi balaj stziblal, ten ben uꞌj kaꞌn ẍchiwutz yi qui tajweꞌn tan chixomeꞌn te yi ketz yi na kaban. Ntinaꞌs na kaj yi quiꞌt chibajsaj yi eꞌchk takleꞌn yi na oyij tetz chitxꞌixwatz ẍchiwutz yi eꞌchk takleꞌn yi banij taneꞌn. Ej nin ten kal scyetz tan qui chibajsal chichꞌ tu yi eꞌ txuc yi qui na el chiẍchꞌel yi na chiquim, nin tan cyajeꞌn cyen quilol yi xnaꞌniꞌn tu yajiꞌn, —cheꞌch tzun yi eꞌ wiꞌ banl wiꞌ bantz tetz Pawl.
Yi xtxꞌamxeꞌn Pawl le templo
26 Eꞌ beneꞌn tzun tcyꞌal Pawl yi eꞌ yajaꞌtz. Itzun le junt eklok, yi nsken chibansaj quib tu Ryos, toqueꞌn tzun iꞌ-tz le caꞌl Ryos tan cyajeꞌn cyen tlol tetz yi paleꞌ yi mbi kꞌejlal yi tzajpon wiꞌ chimantar, bantz cyakꞌol yi chitxꞌixwatz.
27 Yi txant tan jeꞌn pon tamp yi juk kꞌej tan quimeꞌn chitxꞌixwatz yi cyaj yajaꞌtz, nintzun iꞌlwij wutz Pawl cyakꞌun cobox judiy le amaꞌl yi cyꞌanl te yi templo. Choꞌn sajnakeꞌ yi eꞌ yajaꞌtz Asia, nintzun eꞌ octz tan tocseꞌn chicꞌuꞌl cyakil yi tnum tan contriꞌn te Pawl. Xtxꞌamxeꞌn tzun Pawltz cyakꞌun. 28 Chin chijaꞌj nin tzun bantz tan yol, itzun cyaltz:
—Eꞌuꞌ katanum, aj Israel, kuchꞌeyeꞌ kib. Je jun yajeꞌj yi alchok tunin na tzaneꞌt tan chichusleꞌn wunak nin na tal iꞌ yi quiꞌct nin xac yi ketz kaley tu yi amaꞌleꞌj. Nin nkꞌeꞌtz ntinaꞌtz, poro ja choꞌc stzakpul iꞌ aj griego le amaꞌleꞌj kale quiꞌc cu tan cyucumuleꞌn. Ja poꞌtij yi amaꞌleꞌj taꞌn, yi wiꞌnin xanil, —cheꞌch tzun bantz.
29 Cyal yi jun yolaꞌtz na at jun yaj aj Efeso, yi Trófimo biꞌ, sken iꞌlwij wutz te Pawl xoꞌl caꞌl. Itzun le wutz cyetz cyajtzaꞌkl yi ja loꞌ xaꞌk iꞌ-tz te Pawl le amaꞌl cyꞌanl tetz yi templo kale quiꞌcleꞌt cu tan toqueꞌn jun yi nkꞌeꞌtz judiy. 30 Chibaj jeꞌn tzun nil cyakil eꞌ aj tnum nin cuꞌ chichamol quibtz. Xtxꞌamxeꞌn tzun Pawl cyaꞌn, nin eltzaj chikinoltz le templo nin baj jopxij yi eꞌchk puertil yi templo cyaꞌn. 31 Cyoqueꞌn tzun yi eꞌ wunak tan biyleꞌn Pawl. I kloꞌ cyajbil tan cweꞌn chibiyol junawes. Tponeꞌn tzun stziblaltz twiꞌ yi wiꞌtz cyajcaw yi eꞌ sanlar, yi sken chibaj je nil cyakil eꞌ aj Jerusalén tan oyintziꞌ. 32 Chibeneꞌn tzun tcyꞌal yi ajcawaꞌtz yi eꞌ sanlar scyuchꞌ yi chicapitán. Lajkel nin tzun cyoponeꞌn scyeꞌj yi eꞌ wunak yi na chitzan tan biyleꞌn Pawl. Yi quilol yi eꞌ wunak yi toponeꞌn yi wiꞌtz ajcaw scyuchꞌ yi eꞌ sanlar yi xomcheꞌ teꞌj chitaneweꞌn tzuntz tan biyleꞌn Pawl. 33 Xtxꞌamxeꞌn tzun Pawl tan yi wiꞌtz ajcaw nin cawuntz tan cweꞌn cꞌalij tan cob caren. Nin jak scyetz wunak yi naꞌ scyetz iꞌ, nin mbi til ncuꞌ juchul. 34 Poro yi eꞌ wunak, chin chijaꞌj nin bantz tan yol. Apartlen eꞌchk chiyol. Quinin tzun pujxijtz tan yi wiꞌtz ajcaw yi mbiꞌtz yi xeꞌ yi oyintziꞌ. Chaꞌstzun te cawuneꞌn nin tzun iꞌ-tz tan beneꞌn ticyꞌleꞌn Pawl le chicaꞌl yi eꞌ sanlar. 35 Yi cyoponeꞌn wutz yotxil yi tzi caꞌl, palij tzun toqueꞌn Pawl cyaꞌn yi eꞌ sanlar tan paj yi wiꞌnin wunak nilẍcheꞌ scyeꞌj. 36 Na cyakil cunin wunak xomcheꞌ nintz wutz chicoc. Nin chin chijaꞌj nintz tan yol:
—¡Quimoken! —cheꞌch tzun na ban nintz.
Yi jiloneꞌn Pawl tan colol tib
37 Yi txant tan tocomponeꞌn Pawl le chicaꞌl sanlar, beneꞌn tzun tloltz tetz yi ajcaw:
—¿Cu peꞌ tanuꞌ yil chinjilon teruꞌ? —stzun Pawl tetz.
—¿Baꞌn ptzun yol griego awaꞌn? 38 ¿Nkꞌeꞌtz ptzun i aẍaꞌtz yi jun aj Egipto yi acꞌaj cunin ocnak tan contriꞌn te kagobierum, yi jun yi xomcheꞌ cyaj mil biyolnak teꞌj le amaꞌl tzꞌinunin tuꞌ? —stzun jep tetz Pawl.
39 —Jun cuꞌn yol, in judiy. In aj Tarso, jun lmak tnum cwent Cilicia. Baneꞌ binuꞌ pawor swetz, takꞌuꞌ amaꞌl swetz tan yol scyetz yi eꞌ wunakeꞌj, —stzun Pawl tetz yi wiꞌtz ajcaw.
40 Yi tkꞌol yi ajcaw amaꞌl tetz Pawl, cweꞌn tzun txicloktz wi scalon, nin ben ẍchajol jun techl scyetz wunak tan kꞌab tan chicweꞌn numlok. Chicweꞌn tzun numloktz. Toqueꞌn tzun Pawl tan yol scyetz le chiyol yi na biꞌaj hebreo: