Yi xaꞌkeꞌn Pawl Macedonia tu Grecia
20
1 Yi numeweꞌn yi jun oyintziꞌaꞌtz, cheꞌ ẍchakol tzun Pawl yi cmon creyent tan chiquiwseꞌn. Yi nsken baj quiwsal iꞌ yi eꞌ kajwutz, nin eꞌ baj kꞌalultz tan chicawul quib. Beneꞌn tzun Pawltz le luwar cwent Macedonia. 2 Yi wiꞌt bajeꞌn xoꞌmbel cyakil eꞌchk luwar cwent Macedonia tan chiquiwseꞌn yi eꞌ kajwutz tan eꞌchk balaj yol, choꞌn tzun tponeꞌnt le amaꞌl cwent Grecia. 3 Ox tzun xaw aꞌtijtz le amaꞌl cwent Grecia. Choꞌn kloꞌ at bembil iꞌ Siria, poro yi quibital yi eꞌ judiy yi eꞌ contr teꞌj yi choꞌn at bembil Siria, nintzun eꞌ octz tan joyleꞌn juꞌ tan cweꞌn iꞌ le tramp. Bixeweꞌnt tzun taꞌn tan pakxeꞌnt Macedonia. 4 Ej nin xom nin yi yaj Sópater teꞌj, yi aj Berea, yi beneꞌn Asia. Nin nchaꞌtz eꞌ xom nin coboxt, nin je chibiꞌeꞌj: Aristarco tu Segundo yi aj Tesalónica; nin Gayo tu Timoteo yi aj Derbe; nin Tíquico tu Trófimo yi aj Asia. Yaꞌstzun yi eꞌaꞌtz yi eꞌ xom nin te Pawl yi beneꞌn iꞌ Asia. 5 Nintzun eꞌ bajxijtz skawutz tu Pawl. Choꞌn tzun koꞌ chichꞌiwaltz le tnum Troas. 6 Yi wiꞌt ticyꞌeꞌn yi eꞌchk kꞌej yi na bajsij yi pam yi quiꞌc xtxꞌamil, cyajeꞌn cyen tzun kilol Filipos, nintzun oꞌ icyꞌtz wi aꞌ. Kachamolt tzun kibtz scyuchꞌ le toꞌiꞌn kꞌej jalen Troas. Yaꞌstzun oꞌ aꞌteꞌt juk kꞌejtz.Yi wiꞌtzbil tir yi xaꞌkeꞌn Pawl Troas
7 Itzun yi bajx kꞌej te sman, kachamol tzun kib scyuchꞌ yi eꞌ kajwutz tan bajseꞌn pam yi quiꞌc xtxꞌamil. Toqueꞌn tzun Pawl tan yol scyetz kajwutz, na le junt eklok at kelbil. Ben tquen tunin Pawl tan yol jalen nicyꞌakꞌbal. 8 Wiꞌnin tzun cantil ateꞌ-tz kale kachamoneꞌt kib. Choꞌn atoꞌ le toxiꞌn chup. 9 At tzun jun xicy at-tz yi na biꞌaj Eutico. Cꞌolchij iꞌ tzi wentanuꞌ. Tan paj yi ben tquen tunin Pawl tan yol, nin saj watl yi jun xicyaꞌtz. Ej nin tan paj watl, sajeꞌn tzun trimpuj le toxiꞌn chup jalen wuxtxꞌotxꞌ. Nsken tzun quimtz yi jeꞌn quicyꞌal. 10 Cweꞌn tzaj tzun Pawltz, nintzun ben cꞌoꞌloktz tan kꞌaleꞌn tzaj. Itzun taltz:
—Quil chibisunuꞌ, itzꞌeꞌt, —stzun iꞌ bantz.
11 Itzun yi kajeꞌnt poneꞌn le toxiꞌn chup, nintzun oꞌ octz tan bajseꞌn yi pam. Yi wiꞌt bajeꞌn pam kaꞌn toqueꞌn tzun Pawl tan yol. Jalen sajeꞌn xe cyaꞌj taneweꞌn iꞌ tan yol. Tajeꞌn tzun iꞌ-tz. 12 Inti yi jun xicyaꞌtz, nsken ul yos tuchꞌ yi jeꞌn quicyꞌaltz. Ej nin wiꞌnin chitzatzineꞌntz teꞌj.
Yi ticyꞌeꞌn Pawl wi aꞌ tan tponeꞌn Mileto
13 Kabajxeꞌn tzun kestz, nin oꞌ oc nin tul jun barc. Wi aꞌenleꞌn kabeneꞌn tan koponeꞌn le tnum Asón tan ticyꞌeꞌn kucyꞌaj Pawltz, na nsken bixeꞌ taꞌn tan beneꞌn xoꞌn cuntuꞌ le tnum Asón. 14 Kachamolt tzun kibtz Asón, nintzun oc iꞌ-tz tcꞌuꞌl barc. Kicyꞌeꞌn tzuntz tan koponeꞌn Mitilene.
15 Itzun le junt eklok, kicyꞌeꞌnt junt tir wi aꞌ. Choꞌn tzun kicyꞌeꞌn cuꞌntz nakaꞌjil yi tnum Quío. Ma le junt eklok choꞌn tzun koponeꞌntz le tnum Samos. Jalen tzun le toxiꞌn kꞌej keleꞌntz, nin oꞌ icyꞌak le tnum Trogilio. Choꞌn tzun koponeꞌntz Mileto. 16 Poro quinin xkaꞌk Efeso na bixbaꞌnt tan Pawl tan qui kicyꞌakeꞌn tul yi amaꞌlaꞌtz na qui na taj iꞌ kaꞌtij mas tiemp le amaꞌl cwent Asia, na i yi jun kꞌej Pentecostés yaꞌstzun na tojkelnin tan stzꞌamonpon jalen Jerusalén.
Yi tlol Pawl cobox cyajtzaꞌkl yi eꞌ wiꞌ banl wiꞌ tetz yi cmon creyent Efeso
17 Cheꞌ ẍchakol tzun yi eꞌ wiꞌ banl wiꞌ tetz cmon creyent cwent Efeso tan cyoponeꞌntz te iꞌ Mileto. 18 Itzun yi cyoponeꞌn eꞌ kajwutz te iꞌ, itzun taltz scyetz:
“Sak ẍchiwutzuꞌ yi mbi cunin imban ẍchixoꞌluꞌ sajleꞌn tunintz, jetz yi bajx kꞌej yi wunleꞌnix Asia. 19 Sak ẍchiwutzuꞌ yi incꞌulutxumil yi inxconeꞌn tetz Kajcaw. Nin sak ẍchiwutz yi ẍeꞌn cunin ban yi cheꞌwokꞌlejuꞌ. Nin sak ẍchiwutzuꞌ yi ẍeꞌn cuꞌn eꞌ ban eꞌ judiy tan imbuchleꞌn. 20 Nin sak ẍchiwutzuꞌ yi quinin nchinxob tan talcheꞌn jun yol scyeruꞌ yi choꞌn txcon scyeruꞌ, nin yi ẍeꞌn imban yi woqueꞌn tan chichusleꞌnuꞌ ẍchiwutz cyakil wunak nin lakak eꞌchk caꞌl. 21 Nin quilnakuꞌ yi ẍeꞌn cunin woqueꞌn tan xtxoleꞌn scyetz yi eꞌ judiy, scyuchꞌ yi eꞌ yi nkꞌeꞌtz eꞌ judiy yi tajweꞌn tan jeꞌn chitxꞌixpul cyajtzaꞌkl nin tan kꞌukeweꞌn chicꞌuꞌl te Kajcaw Jesucristo. 22 Poro yi jaluꞌ, quibit tzajuꞌ, bixbaꞌnt tan yi Espíritu Sant tan imbeneꞌn Jerusalén. Chaꞌstzun te nchimben, poro qui na wil mbi loꞌ sbajok sweꞌj choneꞌj, 23 na alaꞌix tir tal yi Espíritu Sant swetz yi at wocbil xetzeꞌ, nin tzintijeꞌ qꞌuixcꞌuj yil nopon Jerusalén. 24 Quiꞌc nin jun takleꞌn yi nink lwajlaj, nin qui na chinxob tetz quimichil. Ntin na waj yi najk chintzatzin yil chinjepon tu yi inmunl yi takꞌnak yi Kajcaw Jesús swetz. Yi inmunlaꞌtz iꞌtz tan xtxoleꞌn yi balaj stziblal yi iꞌtz yi banl talmaꞌ Ryos.
25 “I bin jaluꞌ, cyakil yi eꞌuꞌ yi quibitnakuꞌ yi yol Ryos sweꞌj, swaleꞌ cyen scyeruꞌ: Ja wiꞌt el intxum tetz yi quiꞌt quiluꞌ inwutz sbneꞌ opon tunintz. 26 Chaꞌstzun te swaleꞌ scyeruꞌ yi quiꞌc cunin impaj scyeꞌjuꞌ, 27 na quinin inxob tan xtxoleꞌn scyeruꞌ cyakil yi tajbil Ryos. 28 Quil tuꞌ bin quibuꞌ. Cheꞌ chiqꞌuicyꞌlejuꞌ cyakil yi eꞌ cneruꞌ, na i yi Espíritu Sant nchoꞌcsanuꞌ tetz qꞌuicyꞌlom cyetz, nin tan chicꞌaꞌcheꞌn. Cheꞌ chiqꞌuicyꞌlejuꞌ bin yi cmon creyent tetz Ryos, yi eꞌ yi ja cheꞌ cambaj tan tetz ẍchꞌel. 29 Or bin quiluꞌ, chiqꞌuicyꞌlej quibuꞌ, na ja wiꞌt el intxum tetz, yil naꞌj wetz, chocopon pokꞌ xoꞌj ẍchixoꞌluꞌ taneꞌn. Iẍkaj nink chixob tan chipoꞌtzeꞌn yi eꞌ cmon. 30 Nin ẍchixoꞌlteꞌnuꞌ ẍchijalok wunak yi ẍchitxoleꞌ eꞌchk xtxolbil yi nkꞌeꞌtz bintzi. Yaꞌstzun ẍchibneꞌ tan chibeneꞌn xomok yi eꞌ creyent scyeꞌj. 31 Chaꞌstzun te, or quiluꞌ, ulk txꞌakxuj chicꞌuꞌluꞌ chijunaluꞌ yi tul ox yob skꞌejl tu lakꞌbal ja cheꞌwokꞌlejuꞌ tan xtxoleꞌn scyeruꞌ tan chibnoluꞌ yi eꞌchk takleꞌn balaj.
32 “Ma jaluꞌ eꞌuꞌ wajwutz, cheꞌ wabnaj cyenuꞌ tkꞌab Ryos, nin jakꞌ caꞌwl yi yol iꞌ, yi na ẍchaj yi banl talmaꞌ iꞌ. Cheꞌ wabnaj cyenuꞌ jakꞌ yi caꞌwl yi yol iꞌ yi na xcyeꞌ tan kaquiwseꞌn, nin tan takꞌleꞌn jun herens sketz ẍchixoꞌl yi eꞌ xansaꞌncheꞌt. 33 Ej nin chinach cunuꞌ yi atin tzaj ẍchixoꞌluꞌ quinin el walmaꞌ te sakal, nka or, mpe ik beꞌch tetz jun. 34 Poro ja quiluꞌ yi ja incꞌay inkꞌab tan incꞌaꞌchal wib, nin tan chicꞌaꞌcheꞌn yi eꞌ yi xomcheꞌ sweꞌj. 35 Cyakil yi imbanak txconk tan chichusleꞌnuꞌ, yi chin tajweꞌn cunin tan cyakꞌujeꞌnuꞌ tan quichꞌeyeꞌn yi eꞌ mebaꞌ. Nin chinach cunuꞌ yi yol yi cyajnak tlol Kajcaw Jesús: ‘Mas tzatziꞌn na takꞌ sketz yi na koꞌyin swutz yi na kacotzin,’ stzun Jesús banak cyen,” chij Pawl scyetz.
36 Yi wiꞌt bajeꞌn tlol yi yolaꞌs, kacweꞌn tzun mejloktz scyuchꞌ yi eꞌ kajwutz, nintzun oꞌ octz tan nachleꞌn Kataj. 37 Cyakil cunin tzun eꞌ, eꞌ okꞌtz, nin eꞌ baj bentz tan kꞌaleꞌn Pawl, nin baj chitzꞌubul quib. 38 Wiꞌnin tzun chibisuneꞌntz tan yi yol Pawl yi tal scyetz, yi quiꞌt quil wutz junt tir. Nintzun eꞌ xom nintz skeꞌj tan kakꞌleꞌn tul barc.