Yi toqueꞌn Pawl tan txoliꞌn le tnum Efeso
19
1 Itzun bantz te yi at Apolos le tnum Corint nintzun ben tetz Pawl tan xtxoleꞌn yol Kataj lakak eꞌchk luwar cwent Asia. Ma yi wiꞌt bajeꞌn xoꞌmbel cyakil eꞌchk luwaraꞌtz, nin bentz Efeso. Nintzun cu quilol quibtz tu cobox creyent yi ateꞌ-tz le tnumaꞌtz, nin ben jakol scyetz:2 —¿Cuꞌul peꞌ yi Espíritu Sant scyeꞌjuꞌ yi cyocsal cunuꞌ?
Sajeꞌn tzun chitzaꞌweltz:
—Cyaꞌl cunin na kubitwit yi ko at Espíritu Sant, —cheꞌch bantz.
3 —¿Mbi tzun jilwutz bautismil bajij scyeꞌjuꞌ? —chij Pawl scyetz.
—I bin yi bautism yi na ẍchaj yi na kaxom te yi ẍchusuꞌn kꞌajtzun Waꞌn Bautist, —cheꞌch.
4 Beneꞌn tzun tlol Pawl scyetz:
—Yi bautism yi banak Waꞌn, iꞌtz jun bautism yi na ẍchaj yi ja xtxꞌixpuj jun yaj yi tajtzaꞌkl tan quiꞌt juchul mas til. Poro nchaꞌtz xtxolnak iꞌ scyetz wunak yi baꞌn kꞌukeꞌ chicꞌuꞌl te yi jun yi txant tan tuleꞌn. Iꞌtz yi Jesús, yi jun yi bixbaꞌnt tan Ryos tan kacolpeꞌn.
5 Yi quibital yi yol Pawl yi tal scyetz, nintzun jeꞌ aꞌ ẍchiwiꞌ tan biꞌ Kajcaw Jesús. 6 Ej nin yi jeꞌn tkꞌol Pawl yi kꞌab ẍchiwiꞌ, cweꞌn muleꞌn tzun yi Espíritu Sant scyeꞌj. Apart tzun yol baj chiyolol. Ej nin baj chitxolil yi yol Kataj. 7 Coblaj loꞌ chixoneꞌn yi eꞌ yajaꞌtz yi cuꞌul yi Espíritu Sant scyeꞌj.
8 Ma tetz Pawl, ilenin na benak le sinagoga tan xtxꞌolcheꞌn xoꞌl yol Kataj. Qui na xob yi na oc tan xtxoleꞌn. Ox tzun xaw ban iꞌ-tz ẍchixoꞌl tan xtxꞌolcheꞌn xoꞌl yol Kataj scyetz. Yi tajbil iꞌ iꞌtz yi nink xom chiwiꞌ te yi chusuꞌn yi na tal yi ẍeꞌn sban Ryos tan cawuꞌn. 9 At tzun eꞌ yi quinin cyocsaj yol Pawl, nin ẍchiwutz cunin cyakil wunak yi na chitzan tan talcheꞌn yi quiꞌc xac yi ẍchusuꞌn Kajcaw. Teleꞌn tzaj tzun jatxol tib Pawl ẍchixoꞌl yi eꞌaꞌtz. Itzun yi eꞌ yi nsken kꞌukeꞌ chicꞌuꞌl, nin eꞌ xomeꞌl tzaj te Pawl. Choꞌn tzun toqueꞌn Pawl le jun scweꞌlbil tan xtxoleꞌn yol Kataj. Yi jun scweꞌlbilaꞌtz iꞌtz tetz jun yaj yi na biꞌaj Tirano. Cyakil nintzun kꞌej na benak Pawl tan txoliꞌn le yi jun scweꞌlbilaꞌtz. 10 Cob tzun yob ban iꞌ-tz tan txoliꞌn le jun amaꞌlaꞌtz. Chaꞌstzun te quibital cyakil wunak yi yol Kajcaw. Nchaꞌtz quibit cyakil yi eꞌ judiy yi najlcheꞌ lakak eꞌchk luwar cwent Asia. 11 Wiꞌnin eꞌchk chin wutzileꞌn milawr baj bnol Pawl ẍchixoꞌl wunak tan porer Ryos, 12 na nin baj ben quicyꞌal eꞌchk suꞌt, nin eꞌchk xbuꞌk tan toqueꞌn cyakꞌol te Pawl. Nin na chicyꞌaj nintz tan toqueꞌn scyeꞌjak yabiꞌẍ tan tuleꞌn yos scyuchꞌ. Ej nin at eꞌchk espíritu cachiꞌ na el le chiwankil wunak tan tuꞌ yi na oc yi eꞌchk xbuꞌkaꞌtz scyeꞌj.
13 At tzun cobox judiy yi na chixon lakak eꞌchk tnum beneꞌn tziꞌn yi na chixcyeꞌ tan lajeꞌn len eꞌchk espíritu cachiꞌ le chiwankil wunak. Cyoqueꞌn tzun tan pileꞌn tan naꞌwseꞌn yi biꞌ Kajcaw Jesústz tan lajeꞌn len kloꞌ yi eꞌchk espíritu cachiꞌ le chiwankil wunak. Itzun cyaltz:
—Chincawunk nin tzatz tan biꞌ Jesús, yi jun yi na tzan Pawl tan xtxoleꞌn: ¡Cawleꞌn le wankil yajeꞌj! —cheꞌch.
14 At tzun juk yaj yi xcon yi jun yolaꞌtz cyaꞌn. Eꞌ cuꞌn cyꞌajl jun wiꞌtz chipaleꞌil yi eꞌ judiy yi na biꞌaj Esceva. 15 Stzaꞌwel tzun yi espíritu cachiꞌ scyetz:
—Wajskeꞌn wutz Jesús, nin wajskeꞌn wutz Pawl, poro yi axwok itetz, qui wajskeꞌn iwutz, —chij yi espíritu cachiꞌ ban scyetz.
16 Itzun yi jun yajaꞌtz yi at yi espíritu cachiꞌ twankil, nin ben balkꞌujtz scyeꞌj yi eꞌ yajaꞌtz, nin eꞌ octz tan biy ib. Poro xcyeꞌ yi jun yajaꞌtz yi at espíritu cachiꞌ twankil scyeꞌj yi jukaꞌtz na nin eꞌ el ojkuj. Txꞌanl cheꞌ cuntuꞌ, nin qꞌuixpnakeꞌ yi cyeleꞌn ojk. 17 Yi quibital cyakil yi eꞌ judiy, scyuchꞌ yi eꞌ yi nkꞌeꞌtz eꞌ judiy yi najlcheꞌ Efeso, wiꞌnin tzun chixobeꞌn cyakil yi wunaktz yi ateꞌ-tz, nin cyakꞌ kꞌej Kajcaw Jesús.
18 Itzun yi eꞌ yi nsken choꞌc creyent, eꞌ ultz tan xtxoleꞌn yi eꞌchk takleꞌn cachiꞌ yi banakeꞌ cyen. 19 Nchaꞌtz yi eꞌ yi eꞌ aj cun banakeꞌ cyen, nin baj saj quicyꞌal yi chiliwr yi txconak cyaꞌn yi ẍeꞌn eꞌ ban tan jaleꞌn quipisyoꞌ. Ej nin ẍchiwutz cunin cyakil wunak yi toqueꞌn chipatil tkꞌakꞌ. Yi teleꞌn cyajal te yi jamel eꞌchk liwraꞌtz, jepon te nicyꞌ cient mil sakal. 20 Wiꞌnin tzun beneꞌn loꞌon yi yol Kajcaw le jun tnumaꞌtz.
21 Itzun yi bajeꞌn yi eꞌchk takleꞌnaꞌseꞌj, cweꞌn tzun xtxumul Pawltz tcꞌuꞌl cuntuꞌ tan beneꞌn Jerusalén, poro jalen cuꞌn xoꞌmbel cyakil yi eꞌchk tnum cwent Macedonia tu Acaya. “Yil baj inxajsal Jerusalén, choꞌn tzun chimben jalen Roma,” chij Pawl bantz tcꞌuꞌl cuntuꞌ. 22 Cheꞌ beneꞌn tzun ẍchakol cob scyeri yi eꞌ ẍchꞌeyum jalen Macedonia. Timoteo tu Erasto, yaꞌstzun eꞌ ben ẍchakol. Choꞌn tzun cyajeꞌn cyen coboxt kꞌej tetz Pawl le luwar cwent Asia.
Yi bajeꞌn yi oyintziꞌ Efeso
23 Itzun te yi at Pawl le tnum Efeso cwent Asia, xeꞌteꞌn tzun jun chin wutzileꞌn oyintziꞌ tan paj yi yol Kataj yi na tzan xtxoleꞌn. 24 At tzun jun yaj yi na biꞌaj Demetrio. Iꞌ jun txakꞌol chꞌichꞌ sakal. Iꞌ bnol eꞌchk tal neꞌẍ teblal yi caꞌl Diana, yi chiryosil wunak. Wiꞌnin txꞌacoꞌn ateꞌt yi eꞌ akꞌunwil te yi jun jilwutz akꞌunaꞌtz. 25 Itzun bantz, yi nsken chicham quib yi eꞌ akꞌunwilaꞌtz, itzun ben tlol Demetrio scyetz:
—Elnak chitxumuꞌ tetz yi choꞌn na jal yi kariquil te kakꞌuneꞌj. 26 Ej nin ja quibituꞌ, nin sak ẍchiwutzuꞌ yi wiꞌnin wunak yi ja xcyeꞌ nocx Pawl tan xtxꞌixpeꞌn cyajtzaꞌkl. Ej nin nkꞌeꞌtz ntin eꞌ aj Efeso yi ja chitxꞌixpuj cyajtzaꞌkl, ma na nchaꞌtz cyakil yi eꞌ aj Asia. Na i na talx: ‘Yi eꞌchk takleꞌn yi banij quitaneꞌn, nkꞌeꞌtz eꞌ Ryos cyeraꞌtz,’ chij nocx Pawlaꞌtz. 27 Ma jaluꞌ, tzꞌelepon loꞌ cꞌuꞌlaꞌtz yi kakꞌun. Poro nkꞌeꞌtz ntin loꞌ yi kakꞌun poro nchaꞌtz loꞌ yi caꞌl yi wutzileꞌn karyosil Diana. Quiꞌct loꞌ xac sbneꞌ, nin chocopon loꞌ tan telseꞌn yi kꞌej yi junaꞌtz yi na chiloꞌk cyakil eꞌ aj Asia scyuchꞌ cyakil wunak wi munt, —stzun Demetrio bantz scyetz yi eꞌ akꞌunwil.
28 Yi quibital yi yol yi tal Demetrio scyetz, ẍchiꞌcheꞌn tzun chicꞌuꞌltz, nin chin chiwiꞌ nin bantz tan yol. Itzun cyaltz:
—Wiꞌnin kꞌej yi ketz karyosil Diana, —cheꞌch cyakil.
29 Bajeꞌn tzun sukꞌul tib cyajtzaꞌkl cyakil yi eꞌ aj tnum, nin eꞌ ben quicyꞌal yi cob aj Macedonia, yi tamiw Pawl yi na chibiꞌaj Gayo tu Aristarco. Choꞌn chibeneꞌn ticyꞌleꞌn le amaꞌl kale na bajeꞌt eꞌchk chitxumuꞌn. 30 Nin kloꞌ ben Pawl tan yol ẍchiwutz cyakil wunak tan chicolpeꞌn yi cob tamiwaꞌtz, poro yi eꞌ mas creyent quinin cyakꞌ amaꞌl tetz tan beneꞌn. 31 Nchaꞌtz cobox eꞌ wiꞌ banl wiꞌ tetz Asia, yi cyamiw quib tu Pawl, nin ben chichakol jun tan talcheꞌn tetz Pawl tan qui beneꞌn iꞌ le jun amaꞌlaꞌtz. 32 Inti cyakil yi eꞌ wunak, at eꞌ wiꞌnin chiẍchꞌineꞌn. Poro aparchklen chiyol, na nsken baj sukꞌul tib cyajtzaꞌkl. Ej nin at wiꞌnin eꞌ quinin el chitxum tetz yi mbi chichamoꞌn quib teꞌj. 33 Teleꞌn tzaj tzun chipitol yi jun judiy yi na biꞌaj Alejandro ẍchiwutz eꞌ wunak. Jeꞌn tzun tkꞌol Alejandro yi kꞌabtz tan chicweꞌn kloꞌ numlok. I kloꞌ taj yi nink jilon iꞌ scyetz tan colol tib. 34 Poro yi cyechal wutz yi iꞌ jun judiy, cob tzun or eꞌ bantz tan sichꞌ. Chin chiwiꞌ nin bantz. Tu nin na chiẍchꞌin tunintz:
—¡Wiꞌnin kꞌej katxuꞌ Diana, yi karyosil! —cheꞌch tzun cyakil yi eꞌ aj Efesojaꞌtz.
35 Poro yi wiꞌt chicweꞌn numlok yi eꞌ wunak takꞌun yi aj tzꞌib, beneꞌn tzun tlol scyetz:
—Eꞌuꞌ aj Efeso, ¿naꞌ scyetz jun yi qui na el xtxum tetz yi iꞌ qꞌuicyꞌlom tetz caꞌl katxuꞌ Diana, tu yi tetz teblal yi choꞌn sajnak tcyaꞌj? 36 Cyaꞌl nin jun yi nink xcyeꞌ tan talcheꞌn yi nkꞌeꞌtzk bintzi yi xtxolbileꞌj. Chaꞌstzun te, chin tajweꞌn cunin tan chinumeweꞌnuꞌ. Quil chipokꞌ tuꞌ quibuꞌ. 37 ¿Nxac nsaj quicyꞌaluꞌ yi eꞌ yajeꞌj? Iẍkaj na tzunk chitzan tan talkꞌeꞌn eꞌchk takleꞌn yi at xe caꞌl katxuꞌ. Nin qui na chitzan tan jisleꞌn. 38 Ko na choyintzin Demetrio cyuml yi eꞌ akꞌunwil yi ateꞌ tuchꞌ te junt wunak, ateꞌ cuꞌn yi eꞌ wiꞌ banl wiꞌ tetz tnum tan chibanleꞌn taneꞌn. Baꞌn cyakꞌ len chipart. 39 Poro ko apart na icyꞌ chicꞌuꞌl, baꞌn tzun cheꞌ kacham cyakil yi eꞌ nim juy tan xtxꞌajleꞌn teꞌj. 40 Na at xtxintxal yi mbi cuꞌn na chibanuꞌ jaluꞌ. Qui cunin batz tzꞌaꞌlchij yi kajbil iꞌtz tan xiteꞌn yi gobierum, na ¿mbil kal scyetz yil chijak sketz yi xeꞌ yi jun moloꞌn ibaꞌtzeꞌj?
41 Yi wiꞌt bajeꞌn tlol yi yoleꞌj, nintzun ben stzajsal wiꞌ chicmontz.