Yi mbi cuꞌn bajij yi at tzaj Pawl Corint
18
1 Yi wiꞌt bajeꞌn yi xtxolbilaꞌseꞌj, nintzun el Pawl le tnum Atenas. Choꞌn tzun tponeꞌntz le tnum Corint. 2 Yi tponeꞌn, nintzun quil quibtz tu jun yaj yi judiy yi na biꞌaj Aquila yi choꞌn itzꞌnak le tnum Ponto, ma yi txkel na biꞌaj Priscila. Acꞌaj cunin cyeleꞌn lajuꞌn le amaꞌl cwent Italia, na nin cawun Claudio yi tajweꞌn tan cyeleꞌn lajuꞌn cyakil yi eꞌ judiy yi ateꞌ le tnum Roma. Choꞌn tzun tponeꞌn Pawl scyeꞌj Aquila yi toponeꞌn iꞌ le tnum Corint. 3 Nin cyaj cyen iꞌ-tz tan akꞌun scyuchꞌ, na eꞌ tzꞌisol mantial. Ej nin yaꞌtz nin takꞌun Pawl. Chaꞌstzun te cyajeꞌn cyen scyuchꞌ. 4 Itzun lakak jujun kꞌej ujleꞌn, nintzun na ben iꞌ-tz le sinagoga nin na joy iꞌ puntil tan yol scyetz yi eꞌ yi ateꞌ-tz na i kloꞌ taj ẍeꞌnk tan chitxꞌixpul yi eꞌ judiy cyajtzaꞌkl scyuchꞌ yi eꞌ yi nkꞌeꞌtz eꞌ judiy yi na chibenak le sinagoga.5 Ma yi Silas tu Timoteo, choꞌn ateꞌ cyen cyetz Macedonia, poro nin eꞌ txum tan chibeneꞌn le tnum Corint kale atit Pawl. Yi cyoponeꞌn, quiꞌt nin akꞌuj Pawl te yi takꞌun tan biꞌl nin xtxoleꞌn yol Kataj. Baj xtxolil iꞌ scyetz yi eꞌ judiy yi Jesús, yaꞌstzun yi jun yi bixbaꞌnt tan Ryos tan kaclaxeꞌn. 6 Cyoqueꞌn tzun yi eꞌ judiy tan makleꞌn wutz Pawl tan quiꞌt jiloneꞌn. Nin eꞌ octz tan jisleꞌn. Toqueꞌn tzun Pawl tan jabeꞌn len te beꞌch tetz, tan ẍchajleꞌn scyetz yi at tulbil chicaws. Itzun ben tloltz:
—Eꞌuꞌ cuꞌn, ko qui na cyajuꞌ quibituꞌ. Nkꞌeꞌtz impaj, na sbneꞌ opon tunintz nchimben tan xtxoleꞌn scyetz yi eꞌ yi nkꞌeꞌtz eꞌ judiy.
7 Teleꞌn tzaj tzuntz, choꞌn tzun tocomponeꞌntz xe caꞌl Justo, yi jun yajaꞌtz na tek ẍchiꞌ Ryos. Nin choꞌn at caꞌl iꞌ xlaj yi sinagoga. 8 Nchaꞌtz yi bajxom tetz yi sinagoga yi na biꞌaj Crispo, tocsaj iꞌ yi yol Kataj tuml cyakil najal. Ej nin wiꞌnin yi eꞌ aj Corint yi quibit yi balaj stziblal, nin cyocsaj, nin jeꞌ aꞌ ẍchiwiꞌ. 9 Lakꞌbal tzun jiloneꞌn Kajcaw tetz Pawl tcꞌuꞌl wutzicyꞌ taneꞌn, itzun taltz: “Pawl quil cxob. Baꞌn cẍjilon. Qui tzamemij atziꞌ tan xtxoleꞌn yi balaj stziblal tzoneꞌj, 10 na atin tzaweꞌj. Nin cyaꞌl jun tzꞌoc tan abiyleꞌn. Ej nin tan aẍ at wiꞌnin eꞌ yi scyocseꞌ inyol le tnumeꞌj,” stzun Ryos bantz tetz Pawl le wutzicy taneꞌn.
11 Chaꞌstzun te xkancaꞌp tzun yob aꞌtij Pawltz Corint tan xtxoleꞌn yol Ryos.
12 Itzun bantz yi at tzaj yi amaꞌl Acaya jakꞌ yi caꞌwl Galión, junit tzun ban cyajtzaꞌkl cyakil yi eꞌ judiy yi najlcheꞌ-tz le yi amaꞌlaꞌtz tan contriꞌn te Pawl. Nintzun ben quicyꞌaltz le pujbil xtisyaꞌ. 13 Nin cyaltz:
—Yi yajeꞌj, na tzan tan tocseꞌn chicꞌuꞌl yi eꞌ wunak tan chilokꞌil Ryos, poro qui na xom yi tetz ẍchusuꞌn te yi eꞌchk caꞌwl yi xomchoꞌ ketz teꞌj, —cheꞌch tzun bantz.
14 List tzun kloꞌ taneꞌn tetz Pawl tan yol yi beneꞌn tlol Galión scyetz eꞌ judiy:
—Axwok judiy, ik junk takleꞌn yi atk wuskil, nka jun takleꞌn yi chin chꞌon nink teꞌj, baꞌn kloꞌ tzimban taneꞌn. 15 Ma ko yol tuꞌ, nka eꞌchk biꞌaj tuꞌ, nka iley tuꞌ yi na cxoyintzin teꞌj, axwok cuꞌn teꞌj. Quiꞌc wetz tuchꞌ. Qui na waj noꞌc tan pujleꞌn eꞌchk takleꞌnaꞌseꞌj, —stzun Galión bantz scyetz.
16 Nintzun eꞌ el lajul Galión le pujbil xtisyaꞌ. 17 Ma yi eꞌ mas wunak yi eꞌ griego cyoqueꞌn tzuntz tan stzꞌamleꞌn Sóstenes, yi bajxom tetz sinagoga. Yi xtxꞌamxeꞌn, nin loꞌontz cyakꞌun swutz yi pujbil xtisyaꞌ, poro quiꞌc nin ben tlol Galión scyetz.
Yi pakxeꞌnt Pawl Antioquía nin yi beneꞌnt le toxiꞌn tir tan xtxoleꞌn scyetz yi eꞌ awer nak
18 Poro yi Pawl, ben tlen tiemp taꞌn le tnum Corint. Itzun yi nsken wiꞌt baj chicawul quib scyuchꞌ yi eꞌ kajwutz, nin eꞌ icyꞌtz. Nin eꞌ xom nin Aquila tu yi txkel yi na biꞌaj Priscila te Pawl. Itzun bantz yi tponeꞌn Pawl le tal tnum Cencrea, nintzun el jukij yi xiꞌil wiꞌ, tetz jun techl yi nsken tal tetz Ryos yi tzꞌelepon kꞌab te yi yol yi nsken suk. Quicyꞌeꞌn tzuntz wi aꞌ tan cyoponeꞌn le amaꞌl cwent Siria. 19 Poro te yi ntaxk opon iꞌ Siria, nin icyꞌaktz le tnum Efeso. Yaꞌstzun eꞌ jatxwit quib Pawl tu Aquila. Toqueꞌn tzun Pawltz le sinagoga tan yol scyuchꞌ eꞌ judiy. 20 Nintzun cu chiwutz tetz tan taꞌteꞌn nim tiemp scyeꞌj. Poro quinin cujij Pawl. 21 Chicawul tzun quibtz, itzun cyaj tloltz:
—Chin tajweꞌn cunin tan wilol yi kꞌej yi txant tan tucumuleꞌn Jerusalén. Poro Ryos cuꞌn na waj nuꞌlt scyeꞌjuꞌ, —chij Pawl ban scyetz.
Cyajeꞌn cyen tzun tilol yi tnum Efeso, nintzun icyꞌtz wi aꞌ tan tponeꞌn le amaꞌl cwent Siria.
22 Itzun yi tponeꞌn le tnum Cesarea yi cwent Siria, nintzun bentz tan talcheꞌn jun yos scyetz yi cmon creyent yi ateꞌ Jerusalén. Kalenaꞌtz tzun beneꞌnt jalen Antioquía. 23 Itzun yi teleꞌn tiemp taꞌn Antioquía, teleꞌn tzaj tzuntz, nintzun bentz tan chixajseꞌn cyakil eꞌ creyent yi ateꞌ le amaꞌl cwent tetz Galacia tu Frigia, nin eꞌ baj quiwsaltz.
Yi tponeꞌn Apolos le tnum Efeso
24 Itzun bantz, nintzun opon jun judiy yi na biꞌaj Apolos le tnum Efeso. Choꞌn itzꞌnak iꞌ le tnum Alejandría. Chumbalaj nin jilon iꞌ, nin at yol Kataj le wiꞌ. 25 Chusijt iꞌ te yi tajbil Kajcaw, nin chin ẍcꞌatnak nin iꞌ te yi yol Kataj. Nin wiꞌnin balaj chusuꞌn takꞌ iꞌ te yi mbi cunin tajbil Kajcaw. Poro quinin el xtxum tetz yi bautism yi na kaban ketz. Ntin elnak xtxum tetz yi bautism yi banak Waꞌn Bautist. 26 Quinin xob iꞌ yi toqueꞌn tan xtxoleꞌn yol Kataj le sinagoga. Itzun yi beneꞌn quibital Priscila tu yi yaj Aquila yi yol iꞌ, nintzun el tzaj chimoxoltz tan cyoqueꞌn tan xtxꞌolcheꞌn xoꞌl, nin tan lajluchaxeꞌn mas yi tajbil Ryos swutz.
27 Itzun yi teleꞌn tiemp nin cu xtxumul Apolos tan beneꞌn tan xtxoleꞌn yol Kataj lakak amaꞌl cwent Acaya. Cyoqueꞌn tzun yi eꞌ creyent tan quiwseꞌn iꞌ tan beneꞌn, nin ben cyakꞌol jun cart tetz tan ẍchajol scyetz yi eꞌ creyent kalel tzꞌoponeꞌt iꞌ. Yi na tal yi jun cartaꞌtz iꞌtz yi baꞌn cyakꞌ amaꞌl tetz tan xtxoleꞌn yol Kataj scyetz. Itzun ban yi tponeꞌn Apolos Acaya. Nin oc iꞌ tan chiquiwseꞌn yi eꞌ kajwutz yi nsken cyocsaj tan porer Kataj. 28 Yi jiloneꞌn iꞌ ẍchiwutz cyakil wunak xcon quiw yol taꞌn tan xiteꞌn chiyol yi eꞌ judiy, nin xcon yi yol Kataj taꞌn tan ẍchajleꞌn scyetz yi Jesús yaꞌstzun yi Cristo yi jun yi bixbaꞌnt tan Ryos tan tuleꞌn tan kacolpeꞌn.