Yi xomeꞌn nin Timoteo scyeꞌj Pawl tu Silas
16
1 Itzun yi cyoponeꞌn Pawl tu Silas le tnum yi na biꞌaj Derbe, nin eꞌ icyꞌtz tan cyoponeꞌn Listra. Yi cyoponeꞌntz nin eꞌ nojpontz te jun kajwutz na biꞌaj Timoteo, tal jun xnaꞌn judiy yi creyent. Poro yi taj nkꞌeꞌtz judiy. 2 Chumbalaj nin Timoteo ẍchiwutz yi eꞌ kajwutz yi najlcheꞌ Listra tu Iconio. 3 Itzun bantz chin tajbil cunin Pawl tan xomeꞌn nin Timoteo scyeꞌj. Toqueꞌn tzuntz tan bajeꞌn circuncidar Timoteo tan chitzatzineꞌn yi eꞌ judiy yi najlcheꞌ-tz le luwaraꞌtz. Na cyakil wunak elnak chitxum tetz yi nkꞌeꞌtz judiy yi taj iꞌ.4 Itzun yi na chicyꞌak lakak eꞌchk tnumaꞌtz, cyꞌaꞌnt nin chiquiwseꞌn yi eꞌ kajwutz cyaꞌn, nin nchaꞌtz na baj chitxolil yi tajweꞌn tan chixomeꞌn te eꞌchk caꞌwl yi bixeꞌ cyakꞌun yi eꞌ apostl scyuchꞌ yi eꞌ wiꞌ banl wiꞌ tetz yi cmon creyent Jerusalén. 5 Tan yi xtxolbilaꞌtz chiquiwixeꞌn tzun yi eꞌ creyent te yi na cyocsaj, nin cyakil nin kꞌej wiꞌnin ẍchꞌuyeꞌn tajlal chixoneꞌn.
Yi ẍchajol tib yi aj Macedonia swutz Pawl
6 Ej nin tan paj yi quinin takꞌ yi Espíritu Sant amaꞌl scyetz tan chitxolil yi yol Kataj cwent Asia, quicyꞌeꞌn cuꞌn tzun Frigia tu yi amaꞌl cwent Galacia. 7 Ej nin yi cyoponeꞌn Misia i kloꞌ cyaj tan cyoponeꞌn Bitinia, poro quinin takꞌ yi Espíritu Sant amaꞌl scyetz. 8 Quicyꞌeꞌn cuꞌn tzun nakaꞌjil Misia, choꞌn tzun chicweꞌn poneꞌntz Troas. 9 Lakꞌbal tzuntz jeꞌn jobtuj jun yaj aj Macedonia swutz Pawl. Yi ẍchajol tib nin cuꞌ txiclok swutz Pawl, ej nin cuꞌ wutz tetz tan ticyꞌakeꞌn Pawl le tetz tanum. Je tzun taltzeꞌj: “Wutzileꞌn taꞌ Pawl bneꞌuꞌ pawor tan ticyꞌakeꞌnuꞌ tan kuchꞌeyeꞌn le tnum Macedonia,” stzun iꞌ bantz.
10 Itzun yi sken ẍchaj tib yi jun yajaꞌtz swutz Pawl, nintzun kajoy puntiltz tan kicyꞌakeꞌn Macedonia.a Na nin el katxum tetz yi bintzi nin Ryos na tzan tan kachakleꞌn tan xtxoleꞌn yi balaj stziblal scyetz yi eꞌ wunakaꞌtz.
Yi cyoqueꞌn Pawl tu Silas xetzeꞌ le tnum Filipos
11 Cyajeꞌn cyen tzun yi tnum Troas kaꞌn, kicyꞌeꞌn tzuntz wi aꞌ, nin sbej nin koponeꞌntz le tal isla yi na biꞌaj Samotracia. Ma le junt eklok koponeꞌn tzuntz Neápolis. 12 Keleꞌn tzuntz nin choꞌn koponeꞌntz Filipos, yi tnum yi mas chumam swutz cyakil yi eꞌchk tnum yi ateꞌ cwent Macedonia. Yi jun tnumaꞌtz choꞌn at chicwent aj Roma. Choꞌn tzun kaꞌteꞌn cobox kꞌejtz.
13 Itzun le jun kꞌej ujleꞌn keleꞌn tzun tnum nin choꞌn koponeꞌn tzi jun aꞌ kale na chicham wit quib yi eꞌ wunak tan nachleꞌn Kataj. Kacweꞌn tzun cꞌolchoktz nin oꞌ octz tan yol scyetz yi eꞌ xnaꞌn yi chichamoꞌn quibtz. 14 At tzun jun xnaꞌntz yi na biꞌaj Lidia, yi choꞌn sajnak iꞌ Tiatira. Cꞌaꞌy xbuꞌk iꞌ, jun jilwutz xbuꞌk yi txib yubil. Yi xnaꞌnaꞌtz na tek ẍchiꞌ Ryos, nintzun oc iꞌ tan tbiteꞌn kayol. Nin oc tkꞌol Kajcaw tajtzaꞌkl iꞌ-tz tan xtxumleꞌn yol Pawl. 15 Itzun yi wiꞌt jeꞌn aꞌ twiꞌ scyuchꞌ yi eꞌ najal cweꞌn tzun wutz sketz nin je tzun taltzeꞌj:
—Ko bintzinin kꞌuklij incꞌuꞌl te Ryos ẍchiwutzuꞌ, baꞌn bin choꞌcuꞌ xe incaꞌl. At posar swuchꞌ.
Xcyeꞌ nin tzun iꞌ-tz tan kamoxeꞌn quentz xe caꞌl.
16 Itzun bantz yi kabeneꞌn tan nachleꞌn Ryos, ticyꞌeꞌn tzun xomok jun xun wutz kacoc. Nachol iꞌ, na at jun espíritu cwent Baybaꞌn twankil yi na akꞌon yi tpisyoꞌ. Nin wiꞌnin txꞌacoꞌn ateꞌ cuꞌnt yi eꞌ patrón teꞌj, tan yi tpisyoꞌ. 17 Bajxchoꞌ tzuntz tu Pawl, ej nin xomt tzaj tzun iꞌ wutz kacoc. Ẍchꞌineꞌn tzun iꞌ-tz itzun taltz:
—Yi eꞌ yajeꞌj bintzinin eꞌ ẍchakum yi wiꞌtz Ryos. Na chitzan tan xtxoleꞌn yi balaj stziblal tetz colbil ibaj scyeruꞌ, —chij iꞌ bantz scyetz wunak.
18 Alaꞌ cunin tzun kꞌej yi inin tunin banaꞌstz. Bajeꞌn tzun cꞌuꞌl Pawl teꞌj. Jeꞌn tzun suchꞌkꞌil tibtz, nintzun ben tlol tetz yi espíritu yi at twankil yi xun:
—Chin cawunk nin tzaweꞌj tan biꞌ Jesucristo, cawleꞌn twankil yi xun, —chij Pawl banintz tetz.
Nin lajkeꞌl nin tzun teleꞌn yi espíritu cwent Baybaꞌn twankil yi xun.
19 Poro itzun yi teleꞌn chitxum yi patrón yi xun tetz, yi quiꞌt na chitxꞌacon te yi xun, cyoqueꞌn tzuntz tan chitzꞌamleꞌn Pawl tu Silas. Yi chitxꞌamxeꞌn, nintzun eꞌ ben chikinoltz tpiltaꞌ, ẍchiwutz yi eꞌ pujul xtisyaꞌ. 20 Ma yi cyoponeꞌntz, itzun cyaltz:
—Yi eꞌ yajeꞌj eꞌ judiy, nin na chitzan tan poꞌtzeꞌn cyajtzaꞌkl yi eꞌ katanum. 21 Nin na chitzan tan tocseꞌn kacꞌuꞌl tan kaxomeꞌn te cyetz chiley. Poro quiꞌc rmeril na oꞌ aj Roma. Quiꞌc cu yi nink xom kawiꞌ te chichusuꞌn.
22 Cyakil cunin tzun wunak xom chiwiꞌ scyeꞌj. Nintzun eꞌ oc yi eꞌ pujul xtisyaꞌ tan kꞌolpeꞌn len yi beꞌch cyetz Pawl tu Silas. Kalenaꞌs tzun chicawuneꞌn nin tan chiloꞌoneꞌn tan xicyꞌxab. 23 Yi wiꞌt chiloꞌoneꞌn tan xicyꞌxab nintzun eꞌ ben ticyꞌleꞌn xetzeꞌ. Nintzun eꞌ cawun yi eꞌ ajcaw tetz yi qꞌuicyꞌlom xetzeꞌ tan cheꞌ qꞌuicyꞌlel. 24 Yi tbital yi qꞌuicyꞌlom xetzeꞌaꞌtz yi jun caꞌwlaꞌtz, nintzun eꞌ oc Pawl taꞌn tcꞌuꞌl quen xetzeꞌ kale quiꞌcleꞌt rmeril tan teleꞌn tzaj, nin oc quikantz taꞌn tcꞌuꞌl sepo.
25 Itzun bantz yi tponeꞌn nicyꞌakꞌbal na tzun chitzan cyetz Pawl tu Silas tan nachleꞌn Kataj nin tan bitz. Nin na quibit nin yi eꞌ mas pres. 26 Jalt cuntunin chinachol yi xeꞌteꞌn jun chin wutzileꞌn coblajnob. Nin nin tzun yucan yi xeꞌ caꞌl. Cyakil cunin yi eꞌchk puert baj jakxij. Nin bajeꞌn pujx yi eꞌchk carentz yi cꞌalol cyetz yi eꞌ pres. 27 Teleꞌn tzun watl yi qꞌuicyꞌlom tetz yi xetzeꞌ, nin ben tiloltz yi nsken baj jakxij cyakil eꞌchk puert. Beneꞌn tzun tan juteꞌn tzaj yi spar le soc, nintzun kloꞌ cuꞌ biyol tibtz, na le wutz tetz tajtzaꞌkl yi nsken wiꞌt cheꞌl ojkuj cyakil yi eꞌ pres. 28 Chin wiꞌ nin tzun Pawl bantz tan yol tetz, itzun taltz:
—Quil sbiy cuꞌn tibuꞌ, na atoꞌ len cuꞌn tzoneꞌj, —chij Pawl tetz.
29 Jakol tzun yi yajaꞌtz jun kꞌakꞌtz. Nin lajkeꞌl nin toqueꞌn iꞌ-tz xetzeꞌ. Wiꞌnin lucneweꞌn tan xoꞌwl yi cweꞌn mejlok ẍchiwutz Pawl tu Silas. 30 Itzun yi wiꞌt cyeleꞌn tzaj Pawl taꞌn xetzeꞌ beneꞌn tzun jakol scyetz:
—Ma jaluꞌ ¿mbik tzimban tan inclaxeꞌn?
31 —Tocsajuꞌ yi yol Kajcaw Jesucristo, nin sclaxkuꞌ tuml yi najaluꞌ, —cheꞌch Pawl tetz.
32 Chitxolil tzun yi yol Kajcaw tetz, scyuchꞌ yi najal iꞌ. 33 Toqueꞌn tzun yaj tan xtxꞌajleꞌn len yi ticyꞌleꞌn xicyꞌxab scyeꞌj Pawl tu Silas. Nin iteꞌn nin akꞌbalaꞌtz yi jeꞌn aꞌ twiꞌ yaj tuml najal. 34 Nintzun eꞌ ben tcyꞌaltz xe caꞌl iꞌ, nin el jun chin waꞌaꞌntz taꞌn. Nternin na tzatzin yaj na nsken tocsaj yi yol Kataj tuml yi najal.
35 Ma yi tuleꞌn skil cyoponeꞌn tzun cobox aj txꞌamij cyakꞌun yi eꞌ pujul xtisyaꞌ, tan talcheꞌn tetz yi qꞌuicyꞌlom tetz xetzeꞌ tan tkꞌol amaꞌl tan cyeleꞌn Pawl liwr.
36 Yi toqueꞌn yaj scyeꞌj Pawl nintzun taltz:
—Ja chicawun tzaj yi eꞌ pujul xtisyaꞌ tan cyeleꞌnuꞌ liwr. Ma jaluꞌ baꞌn cheꞌluꞌ liwr nin cheb cuntuꞌ chibenuꞌ.
37 Poro itzun tal Pawl scyetz yi eꞌ aj txꞌamij:
—Ẍchiwutz cuꞌn cyakil wunak yi kaloꞌoneꞌn ewt, wech na quiꞌc ketz kil. Ej nin at kuꞌj tan ẍchajleꞌn yi oꞌ aj Roma. Poro ja koꞌ ben chipitoltz xetzeꞌ. Ma jaluꞌ ¿mbi tzuntz yi na cyaj yi ewun cuꞌn keꞌl tzoneꞌj? Quiꞌ, nkꞌeraꞌtz wajbil. Na waj yi wutzileꞌn cuꞌn eꞌ chuꞌl tzoneꞌj tan kelseꞌn len liwr, —stzun Pawl scyetz.
38 Itzun yi quibital yi eꞌ aj txꞌamij, nintzun eꞌ bentz tan talcheꞌn yi xtxolbil scyetz yi eꞌ pujul xtisyaꞌ. Yi quibital yi at chikꞌej Pawl tu Silas, nintzun eꞌ xobtz. 39 Itzun yi cyoponeꞌntz kale ateꞌt Pawl nintzun chijak cuybil chipaj scyetz. Ma yi wiꞌt cyeleꞌn tzaj cyaꞌn xetzeꞌ, nintzun eꞌ oc tan jakleꞌn pawor scyetz tan cyeleꞌn tnum. 40 Ma cyetz Pawl yi wiꞌt cyeleꞌn tzaj xetzeꞌ choꞌn tzun cyoponeꞌntz xe caꞌl yi xnaꞌn yi na biꞌaj Lidia. Ej nin yi wiꞌt chijiloneꞌn scyuchꞌ yi eꞌ mas kajwutz, nin yi nsken wiꞌt baj chiquiwsal, quicyꞌeꞌn tzuntz cyetz tul junt tnum.