Yi chitxumuneꞌn yi eꞌ wiꞌ banl wiꞌ Jerusalén
15
1 Itzun bantz te yi cyaꞌteꞌn Pawl tu Bernabé le tnum Antioquía, nin eꞌ opon cobox aj Judea le tnumaꞌtz. Nin yi eꞌaꞌtz nin eꞌ oc tan chichusleꞌn yi eꞌ kajwutz, itzun cyaltz: “Ko quil chibajijuꞌ circuncidar chi na tal yi ley Moisés, quil chiclaxuꞌ,” cheꞌch bantz.2 Xeꞌteꞌn tzun jun chin wutzileꞌn wakꞌ ib ẍchixoꞌl Pawl scyuchꞌ yi eꞌaꞌtz. Chaꞌstzun te bixeweꞌn cyakꞌun kajwutz tan chibeneꞌn Pawl tu Bernabé scyuchꞌ coboxt kajwutz jalen Jerusalén tan jakleꞌn yi ẍeꞌn chiban te yi xtxolbilaꞌtz. Nin bixeꞌ cyakꞌun tan chibeneꞌn ẍchiwutz yi eꞌ apostl scyuchꞌ yi eꞌ wiꞌ banl wiꞌ yi cmon creyent yi ateꞌ Jerusalén.
3 Yi bixeweꞌn cyakil nintzun eꞌ ben yi eꞌ cmon creyent tan chitzakpeꞌn juꞌ tnum. Poro te yi na chixon Pawl tbeꞌ eꞌ icyꞌak le eꞌchk amaꞌl cwent Fenicia tu Samaria tan talcheꞌn scyetz yi eꞌ kajwutz yi ẍeꞌn cunin cyocsal yi eꞌ yi nkꞌeꞌtz eꞌ judiy yi yol Kataj. Yi quibital yi eꞌ kajwutzaꞌtz yi stziblalaꞌtz wiꞌnin tzun chitzatzineꞌntz.
4 Ma yi cyoponeꞌn Pawl tu Bernabé Jerusalén, wiꞌnin chitzatzineꞌn yi eꞌ kajwutz scyuchꞌ yi eꞌ apostl, scyuchꞌ yi eꞌ wiꞌ banl wiꞌ scyeꞌj. Chitxolil tzun Pawl yi mbi cuꞌn bnix cyaꞌn tan porer Ryos. 5 Poro at tzun cobox scyeri yi eꞌ parisey yi sken wiꞌt cyocsaj yi balaj stziblal. Nintzun cyaltz:
—Chin tajweꞌn cunin tan chibajeꞌn circuncidar yi eꞌ creyent yi nkꞌeꞌtz eꞌ judiy. Nin tajweꞌn tan chibnol taneꞌn yi ley Moisés, —cheꞌch.
6 Chichamol tzun quib yi eꞌ apostl scyuchꞌ yi wiꞌ banl wiꞌ yi eꞌ cmon creyent, tan xtxumleꞌn yi ẍeꞌn chiban te yi jun xtxolbilaꞌtz. 7 Ma yi nsken ben nim tiemp cyaꞌn tan yol nintzun jeꞌ txiclok Luꞌ, itzun taltz:
—Eꞌuꞌ kajwutz, elnak chitxumuꞌ tetz yi nimix tiemp yi injeꞌnleꞌnix xtxaꞌol Ryos tan xtxoleꞌn yi balaj stziblal scyetz yi eꞌ yi nkꞌeꞌtz eꞌ judiy bantz chiclaxeꞌn. 8 Nin yi kaRyosil yi na iꞌlon tetz yi mbi na icyꞌ chicꞌuꞌl cyakil wunak, iꞌ akꞌon jun techl scyetz yi at rmeril tan cyoqueꞌn tkꞌab iꞌ. Ej nin yi jun techlaꞌtz yi takꞌ iꞌ iꞌtz yi Espíritu Sant, chi yi takꞌnak sketz. 9 Na swutz Ryos quiꞌc jatxbil kaxoꞌl. Nicyꞌ nintuꞌ oꞌ, na nchaꞌtz eꞌ ja tzaj yi cyetz quil tan tuꞌ yi nkꞌukeꞌ chicꞌuꞌl te Ryos.
10 “Ma jaluꞌ, ¿mbi tzuntz na cabej chicꞌuꞌluꞌ te yi jun xtxolbilaꞌtz yi txumijt cyen tan Ryos? Na yi cyeruꞌ cyajbiluꞌ iꞌtz tan jeꞌn cyakꞌoluꞌ jun yucuꞌ te chikul yi eꞌ prow kajwutzaꞌtz, yi jun yucuꞌaꞌtz iꞌtz yi eꞌchk caꞌwl yi quinin eꞌ xcyeꞌ yi eꞌ kamam tan banleꞌn taneꞌn mpe ik yi oꞌ ketz jaluꞌ. 11 Na yi oꞌ ketz na kocsaj yi skaclaxok tan tuꞌ yi banl talmaꞌ Kajcaw Jesucristo. Nchaꞌtz eꞌaꞌtz, ẍchiclaxok tan tuꞌ yi banl talmaꞌ Kajcaw.
12 Itzun yi quibital yi yol Luꞌ tircunin tzun chibaj cweꞌn numlok, nin cyakꞌ amaꞌl tan tbiteꞌn yi chiyol Pawl tu Bernabé. Cyal Pawl yi ẍeꞌn cunin bnixeꞌn eꞌchk milawr ẍchixoꞌl yi eꞌ yi nkꞌeꞌtz eꞌ judiy. 13 Ma yi chitaneweꞌn tan yol, jiloneꞌn tzun Jacow, itzun taltz:
—Eꞌuꞌ kajwutz, quibit tzajuꞌ cobox tal inyol: 14 Ja quibituꞌ yi xtxolbil yi ntal kajwutz Luꞌ, yi mbi cunin bnix tan Ryos yi xaꞌkeꞌn iꞌ ẍchixoꞌl yi eꞌ yi nkꞌeꞌtz eꞌ judiy. Na ja kubit yi eꞌ jeꞌ xtxaꞌol Ryos cobox tan cyoqueꞌn tcwent iꞌ. 15 Ej nin yi jun xtxolbilaꞌtz yi nkubit ja tcyꞌaj tib tu yi chiyol cyakil yi eꞌ elsanl stziꞌ Ryos tentz. Na je na tal juneꞌj:
16 ‘Yi nsken baj wiꞌ yi xtxolbilaꞌseꞌj kalenaꞌs tzun chimpakxij.
Nin swakꞌeꞌ amaꞌl scyetz yi eꞌ xonl Luwiy tan chicawuneꞌn squibaj yi eꞌ mas wunak,
chi nchiban te yi tiemp tetz Luwiy.
17 Yaꞌstzun lwulej,
bantz cyoqueꞌn cyakil yi eꞌ yi nkꞌeꞌtz eꞌ judiy
tan injoyleꞌn, yi in wetz yi in Ajcaw.
Nin yaꞌstzun lwulej,
bantz chixomeꞌn yi eꞌ yi nkꞌeꞌtz eꞌ judiy sweꞌj,
yi eꞌ yil choꞌc waꞌn tetz wajal.
18 Ej nin yi xtxolbileꞌj, alijt cyen tan Kajcaw tenẍchan.’
19 “Chaꞌstzun te, baꞌn tcuꞌn yi quil kal scyetz yi tajweꞌn tan chibnol taneꞌn yi circuncisión. Na tzan cyajeꞌn quen quilol yi cyajtzaꞌkl cachiꞌ tan chixomeꞌn te tajbil Ryos. 20 Ntinaꞌtz, chinch wetz, baꞌn kol kaban nin jun cart scyetz tan cyajeꞌn quen quilol yi eꞌchk cstumbr yi na chiban swutz yi eꞌchk takleꞌn yi banij tuꞌ taneꞌn, yi na xcyeꞌ tan chipoꞌtzeꞌn. Ej nin nchaꞌtz tajweꞌn tan kalol scyetz tan cyajeꞌn cyen quilol yi xnaꞌniꞌn tu yajiꞌn. Nin skaleꞌ scyetz yi quiꞌc cu tan chibajsal yi eꞌ txuc yi qui na el chiẍchꞌel yi na chiquim. Ej nin baꞌn kal scyetz yi quiꞌc cu tan bajeꞌn alchok ẍchꞌel txuc cyaꞌn. 21 Na sajleꞌn tunintz ja siꞌlij nin ja txolij yi ley Moisés lakak sinagoga yi at lakak tnum yi xan yi kol baj yi eꞌchk takleꞌnaꞌtz tan jun judiy, —stzun Jacow scyetz.
22 Baꞌn tzun ban yi yol Jacow ẍchiwutz yi eꞌ mas apostl nin ẍchiwutz cyakil yi wiꞌ banl wiꞌ tetz cmon creyent. Nin baꞌn nin mban ẍchiwutz cyakil yi cmon. Cyoqueꞌn tzuntz tan chisicyꞌleꞌn cobox yaj tan chibeneꞌn scyeꞌj Pawl tu Bernabé jalen Antioquía. Jeꞌn tzun chitxaꞌol Judas yi nchaꞌtz na biꞌaj Barsabás tu Silas. Eꞌ bajxom ẍchixoꞌl yi eꞌ kajwutz yi ateꞌ-tz. 23 Nin eꞌ bixeꞌ-tz tan beneꞌn quicyꞌal jun cart tan tponeꞌn scyetz eꞌ kajwutz Antioquía. Nin je yi xtxolbil yi cuꞌ nin tul:
“Ma jaluꞌ eꞌuꞌ kajwutz yi eꞌuꞌ yi nkꞌeꞌtz eꞌuꞌ judiy, yi najlcheꞌuꞌ Antioquía tu Siria tu Cilicia, na katzan tan talcheꞌn nin jun yos scyeruꞌ yi oꞌ apostl, scyuchꞌ yi eꞌ wiꞌ banl wiꞌ tetz yi cmon creyent tzoneꞌj, nin scyuchꞌ cyakil yi eꞌ kajwutz yi ateꞌ tzoneꞌj. 24 Ja kubit yi at eꞌ yi ja chopon ẍchixoꞌluꞌ, yi choꞌn benakeꞌ tzoneꞌj. Poro nkꞌeꞌtz oꞌ, oꞌ chakonin yi eꞌaꞌtz. Na ja kubit yi ja choꞌc tan chixoꞌwseꞌnuꞌ nin tan subleꞌn cyajtzaꞌkluꞌ tan chibnoluꞌ taneꞌn yi circuncisión, nin tan chibnoluꞌ taneꞌn yi ley Moisés. 25 Chaꞌstzun te baꞌn skawutz ketz yi nkajoy cobox kajwutz yaj tan chibeneꞌn kachakol tan chixajseꞌnuꞌ. Choꞌn chixomok nin scyeꞌj kajwutz Pawl tu Bernabé yi wiꞌnin na kapekꞌ scyeꞌj. 26 Na yi eꞌ kajwutz Pawlaꞌtz, jatix loꞌ tir cheꞌl swutz quimichil tan paj xtxoleꞌn yi mbi ekaꞌn tan Kajcaw Jesucristo. 27 Ej nin nchiben kachakol Judas tu Silas tan chixajseꞌnuꞌ. Nin scyaleꞌ scyeruꞌ yi chin tajweꞌn cunin tan chibnoluꞌ taneꞌn yi xtxolbil yi skaleꞌ scyeruꞌ. 28 Na baꞌn atit swutz yi Espíritu Sant, nin baꞌn skawutz ketz tan qui jeꞌn junt cyektzuꞌ swiꞌ yi eꞌchk takleꞌn yi skaleꞌ scyeruꞌ yi chin tajweꞌn cunin tan chibnoluꞌ taneꞌn. Nin je yi xtxolbileꞌj: 29 Chibajsiꞌchuꞌ yi eꞌchk txꞌixwatz yi na oyij ẍchiwutz yi eꞌchk ryos yi banij tuꞌ taneꞌn. Nin chibajsiꞌchuꞌ yi eꞌ txuc yi qui na el chiẍchꞌel yi na chiquim. Nin quil baj chichꞌ cyanuꞌ. Nin quil cyenuꞌ yi xnaꞌniꞌn tu yajiꞌn, na ko yaꞌtz chibanuꞌ baꞌn tzun cheꞌleꞌtuꞌ-tz swutz Ryos. Ntinaꞌtz bin yi xtxolbil, nin kilt kib scyuchꞌuꞌ.” Yaꞌstzun cuꞌ nin tul yi uꞌj.
30 Chibeneꞌn tzun yi eꞌ kajwutzaꞌtz yi eꞌ bixeꞌ cyaꞌn. Nin choꞌn nin tzun cyoponeꞌntz Antioquía. Yi cyoponeꞌn, chichamol tzun quib cyakil yi eꞌ kajwutz yi ateꞌtz le yi amaꞌlaꞌtz. Ma yi eꞌ kajwutz yi eꞌ opon, nin cyakꞌ yi cart scyetz. 31 Ej nin yi quibital yi eꞌ kajwutz yi xtxolbil yi at tcꞌuꞌl yi cart, wiꞌnin tzun chitzatzineꞌn teꞌj. 32 Nin mas tcunin chitzatzineꞌn yi cyoqueꞌn Judas tu Silas tan chimayseꞌn, nin tan chiquiwseꞌn. Na xcon eꞌchk balaj yol cyakꞌun na eꞌ elsanl stziꞌ Ryos. 33 Itzun yi teleꞌn cobox kꞌej cyakꞌun Judas tu Silas ẍchixoꞌl yi eꞌ kajwutzaꞌtz, chipakxeꞌn tzun junt tir Jerusalén scyeꞌj yi eꞌ kajwutz yi eꞌ chakon nin. Wiꞌnin tzun chitzatzineꞌn yi chijatxol quib scyuchꞌ yi eꞌ kajwutz tetz Antioquía. 34 Poro yi Silas nin cyaj cyen cyajsal tib, na yaꞌtz nin tajbil iꞌ-tz. 35 Nchaꞌtz Pawl tu Bernabé, eꞌ cyaj cyen tan xtxꞌolcheꞌn xoꞌl yi yol Kajcaw scyetz yi eꞌ aj Antioquía. Nin nchaꞌtz at cobox tkan aj Antioquía yi eꞌ oc tan quichꞌeyeꞌn tan txoliꞌn.
Yi chijatxol quib Pawl tu Bernabé
36 Itzun yi teleꞌn cobox kꞌejtz tlol tzun Pawl tetz Bernabé:
—Quin, cheꞌ kaxajseꞌ yi eꞌ kajwutz lakak eꞌchk tnum kale katxolnakit yi yol Kajcaw, tan cheꞌ kilol yi ko baꞌn ateꞌt.
37 Itzun tajbil Bernabé yi nink xom nin Waꞌn scyeꞌj yi nchaꞌtz na biꞌaj Marcẍ. 38 Poro quinin cujij Pawl. Na yi jun Marcẍaꞌtz iꞌ yi jun yi el cyen jatxol tib scyeꞌj jalen Panfilia nin quinin ben tkꞌol tib tan quichꞌeyeꞌn Pawl tan xtxoleꞌn yi yol Kataj te yi bajx tir. 39 Quinin tzun cꞌul tib chiwiꞌ Pawl tu Bernabé. Nintzun cuꞌ chijatxol quibtz. Beneꞌn tzun tcyꞌal Bernabé yi Marcẍ teꞌj. Quicyꞌeꞌn tzuntz wi mar, nin choꞌn tzun cyoponeꞌntz Chipre. 40 Ma tetz Pawl jeꞌn tzun xtxaꞌol iꞌ Silas tan xomeꞌn nin teꞌj. Ej nin yi ntaxk chiben eꞌ oc yi eꞌ kajwutz tan cyabnajeꞌn tkꞌab Kajcaw. Ej kalenaꞌs tzun chibeneꞌntz. 41 Quicyꞌakeꞌn tzuntz Siria tu Cilicia tan chiquiwseꞌn yi eꞌ cmon creyent yi najlcheꞌ-tz le eꞌchk amaꞌlaꞌtz.