Yi ateꞌ tzaj Pawl tu Bernabé Iconio
14
1 Itzun yi cyoponeꞌn Pawl tu Bernabé le tnum Iconio nin yi cyoqueꞌn tan xtxoleꞌn yi balaj stziblal le eꞌchk chisinagoga yi eꞌ judiy, quintech nin tzun judiy cyocsajtz. Nin nchaꞌtz wiꞌnin eꞌ yi nkꞌeꞌtz eꞌ judiy yi cyocsajtz. 2 Poro itzun yi eꞌ judiy yi qui xom chiwiꞌ te yi chusuꞌn yi chitxol Pawl, nintzun eꞌ baj octz tan tocseꞌn chicꞌuꞌl yi eꞌ yi nkꞌeꞌtz eꞌ judiy tan qui xomeꞌn chiwiꞌ scyeꞌj kajwutz. 3 Poro ilenin nim tiemp eꞌ cyaj cyen Pawl tu Bernabé ẍchixoꞌl yi eꞌ kajwutzaꞌtz Iconio. Te yi ateꞌtz quinin chixob tan xtxoleꞌn yi yol Ryos, nin tan talcheꞌn yi at cuybil chipaj wunak tan tuꞌ yi banl talmaꞌ Ryos. Nin ja lajluchax yi bintzinin yi chiyol tan yi eꞌchk milawr yi bnix tan Ryos. 4 Poro yi eꞌ wunak yi najlcheꞌ tul yi tnumaꞌtz, cob eꞌ el. At eꞌ yi choꞌn xomeꞌn chiwiꞌ scyeꞌj yi eꞌ judiy, nin at eꞌ yi choꞌn xomeꞌn chiwiꞌ scyeꞌj yi eꞌ apostl. 5 Cyoqueꞌn tzun yi eꞌ judiy scyuchꞌ yi eꞌ yi nkꞌeꞌtz eꞌ judiy tu yi cyajcawil tan xtxumleꞌn tan cyoqueꞌn kloꞌ tan chibuchleꞌn nin tan chicꞌoxleꞌn yi eꞌ apostl tan cꞌub. 6 Poro yi quibital Pawl tu Bernabé yi yaꞌtz chitxumuꞌn cyeleꞌn tzun ojk. Choꞌn tzun cyoponeꞌntz le tnum Listra, nin eꞌ icyꞌtz Derbe. Yi eꞌchk tnumaꞌtz choꞌn at cwent yi amaꞌl tetz Licaonia. 7 Chitxol yi balaj stziblal le cob tnumaꞌtz, nin tul cyakil yi eꞌchk amaꞌl yi at solteꞌj len.Yi loꞌoneꞌn Pawl tan cꞌub le tnum Listra
8 Ma yi cyoponeꞌn Pawl le tnum Listra, at tzun jun yaj at-tz yi coꞌx tkan. Tetz nin iꞌ-tz yi titzꞌeꞌn. Quiꞌc jun tir yi jajk xon. 9 Cꞌolch tzun iꞌ-tz tan tbiteꞌn yi mbi na tzan Pawl tan yolcheꞌn. Beneꞌn tzun xmayil Pawl yi jun coꞌxaꞌtz. Nin nachontz teꞌj yi kꞌuklij cꞌuꞌl iꞌ te yi at rmeril tan xoneꞌn tan porer Ryos. 10 Chin wiꞌ nin tzun Pawl bantz tan yol tetz:
—Yaj, txiclijeꞌn.
Lajkeꞌl nintzun jeꞌn txiclok yi coꞌx nin xontz. 11 Yi quilol wunak yi mbi cuꞌn ban Pawl te yi coꞌx wiꞌnin tzun chiẍchꞌineꞌn le cyetz chiyol. Itzun cyaltz:
—Ja chicuꞌul yi karyosil skaxoꞌl. Nin ja choꞌc tetz wunak.
12 Cyal yi Bernabé iꞌtz yi chiryosil yi na biꞌaj Júpiter, nin yi Pawl iꞌtz yi chiryosil yi na biꞌaj Mercurio, na iꞌ yi mas na jilon. 13 Choꞌn tzun at yi templo tetz yi chiryosil yi na biꞌaj Júpiter, juꞌ caꞌl len. Itzun yi quibital yi eꞌ paleꞌ cwent Júpiter, beneꞌn tzun chimantar tan ticyꞌleꞌn tzaj jun mam tor tu yi eꞌchk buch. Na yi cyajbil iꞌtz tan cyoqueꞌn tan chicꞌuꞌlajeꞌn nin tan biyleꞌn chitxꞌixwatz ẍchiwutz yi eꞌ apostl. 14 Poro yi quibital Pawl tu Bernabé yi mbi na chitzan yi eꞌ wunak tan banleꞌn, cyoqueꞌn tzuntz tan katzleꞌn yi beꞌch cyetz tan ẍchajleꞌn yi qui na chipekꞌ te yi cyajtzaꞌkl yi eꞌ wunak, nin lajkeꞌl chibaj beneꞌn tan chimakleꞌn. Chin chiwiꞌ nin bantz tan yol itzun cyaltz:
15 —¿Nxac na chitzanuꞌ tan banleꞌn yi eꞌchk takleꞌneꞌj? Na yi oꞌ ketz, oꞌ tu wunak. Niꞌcuꞌn oꞌ scyuchꞌuꞌ. Ej nin ja kuꞌl tzoneꞌj tan xtxoleꞌn scyeruꞌ tan cyajeꞌn cyen quiloluꞌ yi cyajtzaꞌkluꞌ yi quiꞌc na takꞌ. Nin ja kuꞌl tan talcheꞌn scyeruꞌ tan chixomeꞌnuꞌ te yi tajbil Ryos yi itzꞌ nin tetz, yi Ryos yi bnol teri yi tcyaꞌj tu yi wuxtxꞌotxꞌ tu yi mar tu cyakil eꞌchk takleꞌn yi na kil nin tan kawutz. 16 Sajleꞌn tunintz takꞌnak iꞌ amaꞌl tan chibnol wunak yi cyetz cyajbil. 17 Poro ilenin ẍchajnak iꞌ yi itzꞌ iꞌ tan yi eꞌchk takleꞌn balaj yi na takꞌ sketz. Chumbalaj nin iꞌ, na iꞌ na akꞌon abal, nin iꞌ na akꞌon eꞌchk balaj cosech. Nin na takꞌ cyakil yi tajweꞌn sketz, na iꞌ na akꞌon kawaꞌ tu cyakil yi na takꞌ tzatzin sketz, —stzun Pawl bantz scyetz.
18 Yi wiꞌt tlol Pawl yi xtxolbilaꞌseꞌj, kaleꞌnin il chixcyeweꞌn tan chimakleꞌn yi eꞌ wunak tan qui cyakꞌol chitxꞌixwatz scyetz.
19 Itzun yi cyoponeꞌn cobox judiy yi choꞌn chisajeꞌn Antioquía tu Iconio, nin eꞌ oc tan tocseꞌn chicꞌuꞌl cyakil wunak tan cyoqueꞌn tan contriꞌn te Pawl. Cyoqueꞌn tzun tan cꞌoxleꞌn Pawl tan cꞌub.
Ma yi wiꞌt loꞌoneꞌn Pawl cyaꞌn, teleꞌn tzun quicyꞌaltz tnum, na cheꞌch loꞌ cyetz yi ko nsken quim. 20 Poro yi cyoponeꞌn chimolol quib yi eꞌ kajwutz kale atit Pawl, nintzun je txiclok iꞌ ẍchiwutz. Nintzun oc junt tirtz tnum. Jalen tzun le junt eklok ticyꞌeꞌn iꞌ, nin xom nin Bernabé teꞌj. Choꞌn tzun chibeneꞌntz le tnum Derbe.
21 Itzun yi nsken baj chitxolil yi balaj stziblal le tnumaꞌtz, nin yi nsken cyocsaj wiꞌnin wunak, nintzun eꞌ pakxij junt tir. Eꞌ icyꞌak junt tir Listra, tu Iconio jalen yi cyoponeꞌn junt tir Antioquía. 22 Ej nin te yi na chicyꞌak lak eꞌchk tnumaꞌtz eꞌ oc tan chiquiwseꞌn yi eꞌ creyent tan kꞌukeweꞌn mas chicꞌuꞌl te yi na cyocsaj. Nin cyal yi chin tajweꞌn cunin tan chimucꞌul wiꞌnin jilwutz qꞌuixcꞌuj, yi ntaxk chopon kale na cawuneꞌt Ryos.a 23 Nchaꞌtz eꞌ baj bixeꞌ cyen wiꞌ banl wiꞌ cyaꞌn le jujun cmon. Nin yi na choꞌc tan cyabnajeꞌn yi eꞌ wiꞌ banl wiꞌaꞌtz tetz Kataj Ryos, yi Ryos yi nsken kꞌukeꞌ chicꞌuꞌl teꞌj, na choꞌc tan nachleꞌn Kataj nin tan mucꞌleꞌn weꞌj.
Yi cyoponeꞌn Pawl tu Bernabé junt tir le tnum Antioquía cwent Siria
24 Yi nsken wiꞌt bajij yi xtxolbilaꞌseꞌj nintzun eꞌ icyꞌtz le amaꞌl cwent tetz Pisidia tan cyoponeꞌn le amaꞌl cwent Panfilia. 25 Ej nin yi wiꞌt bajeꞌn chitxolil yi yol Ryos le tnum Perge, chicweꞌn poneꞌn tzuntz Atalia. 26 Yaꞌstzun eꞌ icyꞌeꞌt wi mar tan cyoponeꞌn Antioquía, yi tnum kale eꞌ oqueꞌt yi eꞌ kajwutz tan cyabnajeꞌn tkꞌab Kataj tan chibeneꞌn tan banleꞌn yi akꞌun yi eꞌ bixeꞌ teꞌj.
27 Itzun yi cyoponeꞌn Antioquía chichakol tzun cyakil yi cmon creyent. Nintzun baj chitxolil cyakil yi eꞌchk milawr yi bnix cyaꞌn tan porer Ryos. Nin chitxol yi ẍeꞌn cunin tkꞌol Ryos amaꞌl scyetz yi eꞌ yi nkꞌeꞌtz eꞌ judiy tan cyocsal yi yol Kataj. 28 Nim tzun tiemp eꞌ aꞌtij Pawl tu Bernabé scyeꞌj yi eꞌ creyent yi najlcheꞌ-tz Antioquía.