Yi chibeneꞌn Bernabé tu Saulo tan xtxoleꞌn yol Kataj ẍchixoꞌl yi eꞌ awer nak yi najlcheꞌ joylaj
13
1 Ateꞌ tzun elsanl stziꞌ Ryos, nin aj chusunl ẍchixoꞌl yi cmon creyent yi ateꞌ Antioquía. Ej nin ẍchixoꞌl yi eꞌ elsanl stziꞌ Ryosaꞌtz at Bernabé tu Simón yi nchaꞌtz na biꞌaj Niger. Nchaꞌtz at jun yi na biꞌaj Lucio yi aj Cirene. Nchaꞌtz at Saulo tu junt yaj yi na biꞌaj Manaén, yi niꞌcuꞌn chichꞌuyeꞌn tu Herodes, yi Herodes yi iꞌ wiꞌtz ajcaw tibaj cyakil yi amaꞌl cwent Galilea. 2 Itzun te yi na chitzan yi eꞌ wunakaꞌtz tan banleꞌn chimunl swutz Kajcaw, nin tan mucꞌleꞌn weꞌj, nintzun jilon yi Espíritu Sant scyetz: “Bixbajwok eꞌ Bernabé tu Saulo tan chibnol yi akꞌun yi ja wiꞌt bixeꞌ waꞌn tan chibnol,” chij yi Espíritu Sant ban scyetz.3 Inin tzun cyulejtz, na nin eꞌ octz tan mucꞌleꞌn weꞌj, nin tan orariꞌn squibaj. Nintzun jeꞌ cyakꞌol chikꞌabtz ẍchiwiꞌ tan cyabnajeꞌn tkꞌab Kataj. Ma yi wiꞌt chibixeweꞌn kalenaꞌs tzun chijatxol quibtz.
Yi cyoqueꞌn Bernabé tu Saulo tan xtxoleꞌn yol Kataj le isla yi na biꞌaj Chipre
4 Beneꞌn nin tzun eꞌ ban Bernabé tu Saulo le amaꞌl yi sken tal yi Espíritu Sant scyetz. Choꞌn tzun chicweꞌn poneꞌntz le tnum Selucia, nin eꞌ icyꞌtz wi mar tan cyoponeꞌn Chipre. 5 Itzun yi cyoponeꞌn le tnum Salamina yi at mero tzi aꞌ cuꞌn, nintzun eꞌ octz tan txoliꞌn lakak sinagoga kale na chicham wit quib yi eꞌ judiy. Nin nchaꞌtz xomij Waꞌn scyeꞌj tetz chichakum. 6 Quicyꞌeꞌn tzuntz Salamina choꞌn tzun cyoponeꞌn jalen Pafos. Chinojeꞌn pon tzun te jun yaj yi at tpisyoꞌ. Yi yajaꞌtz iꞌ jun judiy, yi tocsaꞌn tib tetz elsanl stziꞌ Ryos. Barjesús biꞌ. 7 Yi jun yajaꞌtz yi at tpisyoꞌ, cyamiw quib tu yi wiꞌtz ajcaw tetz tnum yi na biꞌaj Sergio Paulo. Iꞌ jun ajcaw yi wiꞌnin tajtzaꞌkl. Cheꞌ ẍchakol tzun yi wiꞌtz ajcawaꞌtz yi Bernabé tu Saulo, na yi tajbil iꞌ iꞌtz tan tbiteꞌn yi yol Ryos yi na chitzan tan xtxoleꞌn. 8 Poro nintzun oc Elimas yi jun yajaꞌtz yi at tpisyoꞌ tan makleꞌn chiwutz Bernabé tu Saulo, na i kloꞌ taj iꞌ tan qui tocsal yi jun ajcawaꞌtz yi yol Ryos. 9 Ma tetz Saulo, yi nchaꞌtz na aꞌlchij Pawl tetz, quinin xob iꞌ tetz, na xomij yi Espíritu Sant teꞌj. Xmayineꞌn nin tzuntz tetz yi yajaꞌtz yi at tpisyoꞌ. 10 Itzun taltz:
—Yi aẍatz, aẍ subul nak. Chin cachiꞌ nin aẍ. Aẍ nitxajil Baybaꞌn na aẍ contr te cyakil yi eꞌchk ajtzaꞌkl balaj. ¿Nxac na cẍtzan tan poꞌtzeꞌn yi ẍchusuꞌn Kajcaw yi tzꞌaknak cuꞌn? 11 Ma jaluꞌ jun cuꞌn yol swaleꞌ nin tzatz, stkꞌeꞌ Kataj yi acaws, na cẍocopon tetz moyiꞌẍ, nin quiꞌt cxmayin tetz cobox tiemp, —stzun Pawl bantz.
Ma le junt rat toqueꞌn tzun muj te wutz iꞌ. Nin quiꞌt xmayin. Nintzun oc iꞌ tan joyleꞌn junt tan ẍchꞌineꞌn nin. 12 Ma yi tilol yi wiꞌtz ajcaw yi mbi cuꞌn bajij, nintzun tocsaj yi yol Kataj. Na wiꞌnin teleꞌn yab te yi porer yi ẍchusuꞌn Kataj.
Yi eꞌ ẍchaꞌkeꞌn Pawl tu Bernabé le tnum Antioquía cwent Pisidia
13 Itzun yi cyeleꞌn le tnum Pafos, nin eꞌ icyꞌtz wi mar tan cyoponeꞌn le tnum Perge yi at cwent Panfilia. Yaꞌstzun eleꞌt jatxol tib Waꞌn scyeꞌj, nintzun pakxij iꞌ Jerusalén. 14 Ma Pawl tu Bernabé nin eꞌ icyꞌtz Perge nin choꞌn cyoponeꞌntz le tnum Antioquía cwent Pisidia. Ej nin yi tucumuleꞌn yi kꞌej ujleꞌn nintzun eꞌ oc le sinagoga nin eꞌ baj cꞌoleꞌ cuꞌntz. 15 Nin yi nsken wiꞌt siꞌlij noc te yi ley Moisés tu muꞌẍt te junt liwr yi tzꞌibaꞌnt cyen takꞌun jun scyeri eꞌ elsanl stziꞌ Ryos, nin opon jun chichakum yi eꞌ wiꞌ banl wiꞌ tetz sinagoga tan yol scyetz, itzun taltz:
—Eꞌuꞌ katanum, quiꞌc peꞌ cob yol cyꞌaꞌn cyanuꞌ tan kaquiwseꞌn, ko at, baꞌn chijilonuꞌ, —chij iꞌ bantz scyetz.
16 Jeꞌn tzun txiclok Pawl, nintzun ben ẍchajol yi kꞌab tan chicweꞌn numlok. Itzun taltz scyetz:
—Quibit tzajuꞌ inyol cyakil eꞌuꞌ aj Israel, scyuchꞌ yi eꞌuꞌ yi ateꞌuꞌ skaxoꞌl yi na cyekuꞌ ẍchiꞌ yi ketz kaRyosil. 17 Yi ketz kaRyosil yi oꞌ aj Israel, iꞌ txaꞌoneꞌn yi eꞌ kamam kateꞌ. Ej nin tan iꞌ eꞌ oc chixonl tetz jun wutzileꞌn nación te yi ateꞌ tzaj ẍchixoꞌl yi eꞌ aj Egipto. Ej nin tan yi tetz porer eꞌ eltzaj tcyꞌal jakꞌ chicaꞌwl yi eꞌ aj Egiptojaꞌtz. 18 Ej nin eꞌchk caꞌwnak loꞌ yob ban iꞌ tan mucꞌleꞌn chipaj chimamaj te yi ateꞌ tzaj le amaꞌl yi tzꞌinunin tuꞌ. 19 Itzun yi wiꞌt chisotzeꞌn yi juk jilwutz wunakaꞌtz yi ateꞌ le amaꞌl Canaán, nintzun takꞌ yi amaꞌlaꞌtz scyetz yi kamam kateꞌ. 20 Ej nin cyakil yi xtxolbilaꞌtzeꞌj ja bajij tul cyaj cient tu niꞌcy yob loꞌ.
“Ma yi wiꞌt bajeꞌn yi xtxolbileꞌj nintzun eꞌ bixeꞌ pujul xtisyaꞌ ẍchixoꞌl tan Kataj Ryos. Nin ja chixcon yi jun jilwutz bajxomaꞌtz taꞌn jalen te Samuel, jun scyeri eꞌ elsanl stziꞌ iꞌ. 21 Kalenaꞌs tzun chijakol jun chireyil tetz Kataj, nintzun bixeꞌ yi Saúl taꞌn tetz chireyil. Ma yi jun Saúlaꞌtz, iꞌ jun scyeri yi eꞌ cyꞌajl Cis, jun scyeri yi eꞌ xonl Benjamín. Caꞌwnak tzun yob xcon iꞌ tetz chireyil kamam kateꞌ.
22 “Itzun yi xtxꞌixpeꞌn Saúl tan Ryos, Luwiy tzun oc cyentz taꞌn tetz xel iꞌ. Ej nin je jun xtxolbileꞌj yi talnak Ryos: ‘Yi Luwiy, yi cyꞌajl Isaí, yaꞌstzun yi jun yi na waj lcyaj cyen tetz rey, na tzꞌocopon tan banleꞌn taneꞌn yi wetz wajbil,’ stzun Ryos banak cyen.
23 “Ej nin yi teleꞌn tiemp ja jal jun xonl kꞌajtzun Luwiyaꞌtz yi na biꞌaj Jesús. Yaꞌstzun yi jun yi bixeꞌ tan Ryos tan kacolpeꞌn ketz yi oꞌ yi oꞌ aj Israel. Ja tzun el cuꞌn teꞌj, chi alijt cyen taꞌn scyetz kamam kateꞌ. 24 Poro yi ntaxk ẍchaj tib yi Jesúsaꞌtz, nsken xtxol Waꞌn scyetz yi eꞌ katanum yi tajweꞌn tan chitxꞌixpul cyajtzaꞌkl nin tan jeꞌn aꞌ chiwiꞌ tan ẍchajleꞌn yi bintzinin na chibisun tan quil.
25 “Na je tal Waꞌneꞌj yi txant tan quimeꞌn: ‘¿Naꞌ scyetz in le chiwutz cyeruꞌ? Nkꞌeraꞌtz in yi jun yi bixbaꞌnt tan tuleꞌn. Poro txant tan tuleꞌn. Na yi in wetz quiꞌc wetz inkꞌej siquierk tan pujleꞌn wutz xajab yi junaꞌtz yi at tulbil,’ stzun Waꞌn banak cyen scyetz wunak.
26 “I bin jaluꞌ eꞌuꞌ xonl intanum, eꞌuꞌ xonl kꞌajtzun kamam Abraham, nin yi eꞌuꞌ yi nkꞌeꞌtz eꞌuꞌ katanum, poro yi na cyekuꞌ ẍchiꞌ yi kaRyosil: Tetz ketz kacyakil cuꞌn yi jun xtxolbilaꞌseꞌj yi na tal yi baꞌn kaclax. 27 Ma yi eꞌ katanum yi najlcheꞌ Jerusalén, scyuchꞌ yi cyajcawil, quinin pujx cyaꞌn yi mbi ekaꞌn tan Jesús. Nchaꞌtz quinin pujx cyaꞌn yi mbi na elepont yi eꞌchk xtxolbil yi tzꞌibaꞌnt cyen cyakꞌun yi eꞌ elsanl stziꞌ Ryos. Wech na chisiꞌlej lakak eꞌchk kꞌej ujleꞌn. Poro ja el cuꞌn teꞌj yi eꞌchk xtxolbilaꞌtz yi tzꞌibaꞌnt cyen yi cyoqueꞌn tan biyleꞌn. 28 Poro cyaꞌl nin jaleꞌt til iꞌ tan cweꞌn biyij. Chaꞌstzun te eꞌ beneꞌn swutz Pilat tan jakleꞌn pawor tetz tan cweꞌn biyij.
29 “Ma yi teleꞌn cuꞌn teꞌj cyakil yi tzꞌibaꞌnt cyen te iꞌ, nintzun cu tzaj swutz pasyon nin oc cyentz tjul. 30 Poro Ryos jeꞌsan tzaj ẍchixoꞌl almaꞌ. 31 Nin alaꞌ tir ẍchaj tib iꞌ ẍchiwutz yi eꞌ yi xomcheꞌ teꞌj yi teleꞌn tzaj iꞌ Galilea tan tponeꞌn Jerusalén. Ej nin yi eꞌaꞌtz, eꞌ cuꞌn stiw teꞌj nin na chitzan tan xtxoleꞌn yi jun cuꞌn ja itzꞌij junt tir Jesús ẍchixoꞌl almaꞌ.
32 “Nchaꞌtz oꞌ ketz, iteꞌn nin xtxolbil na katzan tan xtxoleꞌn. Na yaꞌstzun yi balaj stziblal yi alijt cyen takꞌun Ryos scyetz yi eꞌ kamam kateꞌ. 33 Nin yi jun xtxolbilaꞌtz yi alijt cyen taꞌn, iꞌtz tetz ketz jaluꞌ, yi oꞌ yi oꞌ chixonl. Na yi titzꞌeꞌn junt tir Jesús tan Ryos, yaꞌstzun teleꞌn cuꞌn teꞌj yi tzꞌibaꞌnt cyen le caꞌp salmo yi na tal: ‘Aẍ jun cꞌoloj incyꞌajl jaluꞌ nwakꞌ itzꞌajbil tzatz.’ 34 Na jun cuꞌn, alijt cyen tan Ryos yi stzꞌitzꞌok iꞌ junt tir ẍchixoꞌl almaꞌ, bantz qui kꞌayeꞌn yi wankil iꞌ. Na je yol Ryos yi tzꞌibaꞌnt cyen: ‘Cyakil yi sukiꞌnt waꞌn tetz Luwiy swakꞌeꞌ tzitetz.’a 35 Ej nin nchaꞌtz tzꞌibaꞌnt cyen tul junt salmo yi na tal: ‘Yi iluꞌ teruꞌ, quil takꞌuꞌ amaꞌl tan kꞌayeꞌn yi wankil yi jun ẍchakumuꞌ, yi wiꞌnin okꞌleꞌn wutz tanuꞌ.’b 36 Yi yoleꞌj qui na jop kꞌajtzun Luwiy, na quimnak iꞌ, nin kꞌay yi tetz wankil. Na yi wiꞌt txconeꞌn iꞌ tan Ryos tetz chibajxom yi eꞌ wunak tentz, quimich nin ban iꞌ-tz, nin opon yi talmaꞌ kale ateꞌt cyalmaꞌ yi eꞌ mam iꞌ. 37 Poro yi jun yi itzꞌij junt tir ẍchixoꞌl almaꞌ tan Ryos, quinin kꞌay yi tetz wankil. 38 Chaꞌstzun te, eꞌuꞌ intanum, na kloꞌ waj yil tzꞌel chitxumuꞌ tetz, yi tan Jesús, yi jun yi qui kꞌay yi tetz wankil, na jal cuybil kapaj. 39 Na na el katxum tetz yi qui na jal balajil jun yaj swutz Ryos tan tuꞌ yi na buch tib tan banleꞌn taneꞌn yi ley Moisés. Poro sjalok kabalajil kol kꞌukeꞌ kacꞌuꞌl te Jesús. Scuylok kapaj, nin sjalok kabalajil swutz Ryos. 40 Poro or quiluꞌ, ko tzun tzꞌul chicawsuꞌ chi tzꞌibaꞌnt cyen cyakꞌun yi eꞌ elsanl stziꞌ Ryos. Na je na tal jun xtxolbil yi tzꞌibaꞌnt cyen cyaꞌn:
41 ‘Or tzitil, yi axwok yi qui na itakꞌ kꞌej inyol,
na cxeleponwok yab te yi mbi sbajok tziteꞌj, nin cxsotzokwok.
Na nocopon tan banleꞌn milawr tzixoꞌlwok.
Poro quil tzitocsaj,
mpe nink tzꞌoc jun tan xtxꞌolcheꞌn xoꞌl tzitetz,’
chij Ryos banak cyen, —stzun Pawl scyetz yi eꞌ wunak yi ateꞌ le sinagoga.
42 Yi stzajeꞌn wiꞌ yi chimunl, nin yi cyeleꞌn tzaj le sinagoga, nintzun eꞌ oc yi eꞌ wunak yi nkꞌeꞌtz eꞌ judiy tan chimoxeꞌn Pawl tu Bernabé tan chitxolil yi iteꞌn nin xtxolbilaꞌtz scyetz le junt kꞌej ujleꞌn. 43 Ma yi chijatxol quib, wiꞌnin tzun judiy eꞌ xom nintz scyeꞌj Pawl tu Bernabé. Ej nin nchaꞌtz at eꞌ yi nkꞌeꞌtz eꞌ judiy yi eꞌ xom nin scyeꞌj. Cyoqueꞌn tzun Pawl tu Bernabé tan chiquiwseꞌn tkꞌab Kataj. 44 Itzun le junt kꞌej ujleꞌn, cyakil yi eꞌ aj tnum eꞌ cham quib tan tbiteꞌn yi yol Ryos yi cyꞌaꞌn tan Pawl. 45 Poro yi quilol yi eꞌ judiy yi jun cꞌoloj wunakaꞌtz, nintzun jeꞌ ẍchiwutz, nin eꞌ octz tan telseꞌn chikꞌej Pawl, nin tan talcheꞌn yi nkꞌeꞌtz bintzi chiyol. 46 Poro quinin chixob Pawl tu Bernabé scyetz, na je tal Pawleꞌj:
—Bintzinin chin tajweꞌn cunin yi bajx katxol yi yol Ryos scyeruꞌ, poro quinin ncyocsajuꞌ. Nin quiꞌc xac yi itzꞌajbil yi quinin bajsbeꞌn tetz ẍchiwutzuꞌ. Chaꞌstzun te choꞌn kocopon ketz tan xtxoleꞌn scyetz yi eꞌ yi nkꞌeꞌtz eꞌ judiy. 47 Na yaꞌtz cawbeꞌn ketz tan Kataj, na je yi yol iꞌeꞌj yi tzꞌibaꞌnt cyen:
‘Ja cẍbixeꞌ waꞌn tetz chitxekbil yi eꞌ yi nkꞌeꞌtz eꞌ judiy.
Nin ja cẍbixeꞌ waꞌn tan chiclaxeꞌn yi eꞌ yi ateꞌ beneꞌn tziꞌn wi munt,’c
chij Kataj banak cyen, —cheꞌch Pawl tu Bernabé scyetz cyakil wunak.
48 Wiꞌnin tzun chitzatzineꞌn yi eꞌ wunak yi nkꞌeꞌtz eꞌ judiy te yi xtxolbil yi quibit. Nintzun cyaltz yi chumbalaj nin yi xtxolbil tetz Jesucristo yi nquibit scyeꞌj Pawl. Cyocsaj tzun yi eꞌ yi bixeꞌ cyaꞌn tan chicambal yi itzꞌajbil yi quinin bajsbeꞌn tetz. 49 Wiꞌnin tzun beneꞌn loꞌon yi balaj stziblal tetz Jesucristo tulak yi eꞌchk mas tnum yi at cwent yi amaꞌl yi na biꞌaj Pisidia.
50 Poro yi eꞌ judiy nintzun eꞌ octz tan tocseꞌn chicꞌuꞌl yi xnaꞌn yi at chikꞌej, nin yi na cyek ẍchiꞌ Ryos taneꞌn, tan cyoqueꞌn tan contriꞌn scyeꞌj Pawl tu Bernabé. Nchaꞌtz eꞌ octz tan tocseꞌn chicꞌuꞌl yi eꞌ crincipal tetz tnum tan contriꞌn scyeꞌj. Cyakil yi eꞌaꞌtz eꞌ octz tan chixoꞌwseꞌn Pawl tu Bernabé nin eꞌ el chilajultz le chitanum. 51 Ma cyetz Pawl tu Bernabé el cyen chimasol yi puklaj yi at te quikan tan ẍchajleꞌn yi at tulbil chicaws yi eꞌ wunakaꞌtz. Nin eꞌ ben cyetz Iconio. 52 Poro yi eꞌ creyent yi eꞌ cyaj cyen wiꞌnin chitzatzineꞌn tkꞌab Kataj tan porer yi Espíritu Sant.