Yi quimeꞌn Jacow nin yi toqueꞌn Luꞌ xetzeꞌ
12
1 Nchaꞌtz te iteꞌn nin tiempaꞌtz yi mmoꞌc yi rey Herodes tan chibuchleꞌn cobox scyeri yi eꞌ cmon creyent le amaꞌl Judea. 2 Na nin cawun tan biyleꞌn Jacow yi stzicy Waꞌn tan spar. 3 Ej nin yi tilol iꞌ yi wiꞌnin chitzatzineꞌn yi eꞌ wunak te yi jun ajtzaꞌklaꞌtz nintzun octz tan stzꞌamleꞌn Luꞌ. Noj quen cuꞌntz te yi tiemp yi na bajsij yi pam yi quiꞌc xtxꞌamil. 4 Xtxꞌamxeꞌn tzun Luꞌ-tz nin octz taꞌn xetzeꞌ. Nin eꞌ oc cyaj kꞌuꞌj sanlar tan qꞌuicyꞌleꞌn. Cyaj cyaj chixoneꞌn te yi jujun kꞌuꞌj. Yi tajbil Herodes iꞌtz yi nin kloꞌ cyaj cyen Luꞌ xetzeꞌ jalen cuꞌn kloꞌ ticyꞌeꞌn poneꞌn yi jun wutzileꞌn kꞌej yi na biꞌaj Pasc. Kalenaꞌs tzun kloꞌ tkꞌol iꞌ yi caws Luꞌ ẍchiwutz cyakil wunak. 5 Cyaj cyen tzun Luꞌ xetzeꞌ, nin chin qꞌuicyꞌleꞌn nin taneꞌn iꞌ cyakꞌun sanlar. Poro yi cmon creyent wiꞌnin cweꞌn chiwutz tetz Ryos tan teleꞌn iꞌ liwr.Yi teleꞌn Luꞌ liwr xetzeꞌ
6 Itzun bantz yi junteꞌn akꞌbal tan tkꞌol Herodes yi caws Luꞌ ẍchiwutz cyakil wunak, choꞌn tzun na wit Luꞌ chinicyꞌal cob sanlar. Cꞌalij iꞌ tan cob caren, nin ateꞌ qꞌuicyꞌlom tzi yi puertil xetzeꞌ. 7 Tponeꞌn tzun jun ángel tetz Kajcaw kale atit Luꞌ. Ninin tzun pakꞌpuchax xetzeꞌ taꞌn. Nintzun oc tꞌoyol yi teml Luꞌ tan cꞌaseꞌn. Itzun ben tlol tetz: “Or yaj cꞌasen, txiclijeꞌn,” chij.
Teleꞌn tzun jiẍp yi caren te kꞌab Luꞌ. 8 “Cꞌal quen yi acꞌalbil xe acꞌuꞌl, nin akꞌ quen axajab,” stzun yi ángel tetz. Nin inin tzun tulejaꞌtz. “Txow tzaj axbuꞌk nin xomen tzaj sweꞌj,” stzun yi ángel tetz.
9 Teleꞌn tzaj tzun yi ángel nin eltzaj xomok Luꞌ teꞌj. Poro quinin el xtxum tetz yi ko bintzinin yi na bajij, na le wutz tetz tajtzaꞌkl yi wutzicyꞌ tuꞌ na ban. 10 Cyeleꞌn tzaj tzuntz kale atit yi bajx wart, nin kale atit yi caꞌp wart. Nin eꞌ opontz tzi yi puert yi chꞌichꞌ cuꞌn yi at tzibeꞌ. Jeꞌn tzun jakxuj yi puert ẍchuc. Ma yi wiꞌt cyeleꞌn tzaj, nin yi sken wiꞌt chixon jun tkuj tbeꞌ, nintzun cyaj tilol yi ángel yi Luꞌ ẍchuc. 11 Ma yi pujxeꞌn tan Luꞌ, itzun taltz tcꞌuꞌl cuntuꞌ: “Ja saj ẍchakol Kajcaw jun scyeri yi eꞌ tetz ángel tan welseꞌn liwr tkꞌab Herodes nin ẍchikꞌab yi eꞌ judiy,” stzun Luꞌ tcꞌuꞌl cuntuꞌ.
12 Itzun yi wiꞌt ticyꞌeꞌn yi yolaꞌtz tcꞌuꞌl Luꞌ, tponeꞌn tzun iꞌ-tz wutz caꞌl Luꞌch yi xtxuꞌ Waꞌn yi nchaꞌtz na aꞌlchij Marcos tetz. Wiꞌnin tzun wunak sken chicham quib tan nachleꞌn Kataj xe yi jun caꞌlaꞌtz. 13 Toqueꞌn tzun cꞌonlol Luꞌ yi puert, nin eluꞌl jun xun yi na biꞌaj Rode tan tilweꞌn yi naꞌ scyetz iꞌ yi junaꞌtz. 14 Poro yi tbital yi yaꞌtz wiꞌ Luꞌ, quinin jeꞌ jakol iꞌ yi puert tan biꞌl yi tzatziꞌn yi at cuꞌnt. Ma na lajkeꞌl nin pakxeꞌnt iꞌ tan talcheꞌn stziblal scyetz yi mas kajwutz yi ateꞌ, yi at Luꞌ tzi puert. 15 Poro yi quibital yi eꞌaꞌs yi ateꞌ xe caꞌl, quinin cyocsaj, ma na nin cyal:
—Aẍ loꞌ yab.
Poro yi xun xtxꞌanuꞌn nin tib tan talcheꞌn yi iꞌtz Luꞌ yi at tzi puert.
—Nkꞌeraꞌtz Luꞌ, —cheꞌch. —Ma na iꞌtz loꞌ ángel yi qꞌuicyꞌlom tetz, —cheꞌch.
16 Ma tetz Luꞌ tilt cuntunin tan cꞌonleꞌn quen wutz puert. Ma yi jakxeꞌn yi puert cyaꞌn, beneꞌn tzun quilol yi iꞌtz Luꞌ. Nintzun eꞌ baj el yabtz teꞌj. 17 Poro yi Luꞌ nintzun octz tan chimakleꞌn tan yi kꞌab tan qui chijiloneꞌn, nin octz tan talcheꞌn scyetz yi ẍeꞌn cunin ban yi teleꞌn tzaj iꞌ xetzeꞌ tan porer Kajcaw. Ej nin nchaꞌtz tal iꞌ yi tajweꞌn tan beneꞌn jun tan talcheꞌn stziblal tetz Jacow scyuchꞌ yi eꞌ mas kajwutz yi ja el tzaj iꞌ xetzeꞌ. Ma yi talol iꞌ yi xtxolbileꞌj nintzun ben iꞌ tul junt amaꞌl.
18 Itzun yi tuleꞌn skil le junt eklok, wiꞌnin chiyajol quib yi eꞌ sanlar squibil quib, na quiꞌct Luꞌ at xetzeꞌ, nin quinin pujx cyaꞌn yi mbi cuꞌn bajij. 19 Inti Herodes nintzun el jun ort taꞌn tan joyleꞌn Luꞌ. Poro cyaꞌl nin jaleꞌt cyaꞌn. Toqueꞌn tzun Herodes tan ẍchꞌoteꞌn chitziꞌ yi eꞌ sanlar yi eꞌ oc tan qꞌuicyꞌleꞌn Luꞌ. Nintzun cawunin tan chibiyleꞌn cuꞌn. Teleꞌn tzun iꞌ Jerusalén, nin choꞌn tponeꞌn le tnum Cesarea kale cyaj cyent cobox kꞌej.
Yi quimeꞌn Herodes
20 Itzun bantz, wiꞌnin ẍchiꞌcheꞌn cꞌuꞌl iꞌ scyeꞌj yi eꞌ aj Tiro scyuchꞌ yi eꞌ aj Sidón. Cyuleꞌn tzaj tzun yi eꞌ aj Tirojaꞌtz scyuchꞌ yi eꞌ aj Sidónaꞌtz tan moxeꞌn iꞌ, nin tan chibansal quib tuchꞌ. Cyakꞌol tzun muꞌẍ xoꞌc tetz Blasto, jun scyeri eꞌ wiꞌtz ẍchakum Herodes, tan toqueꞌn iꞌ tan quichꞌeyeꞌn. Na yi cyetz cyajbil, iꞌtz tan chibansal quib tu Herodes na choꞌn na saj cyakil yi ixiꞌn triw yi na baj cyaꞌn le amaꞌl Cesarea, kale na cawuneꞌt Herodes.
Bixeweꞌn tzun jun kꞌej tan Herodes tan chisajeꞌn molij cyakil yi eꞌ wunakaꞌtz swutz iꞌ.
21 Itzun yi tucumuleꞌn yi jun kꞌejaꞌtz, nintzun wek tib Herodes tan yi balaj beꞌch tetz, nin cꞌoleꞌcuꞌntz wi jun balaj chem le pujbil xtisyaꞌ. Toqueꞌn tzun iꞌ-tz tan yol scyetz cyakil wunak. 22 Cyoqueꞌn tzun yi eꞌ wunakaꞌtz tan takꞌleꞌn kꞌej iꞌ. Nintzun eꞌ ẍchꞌintz:
—Chumbalaj nin yi jilonuꞌ na nkꞌeꞌtz iluꞌ wunak, ma na iluꞌ Ryos, —cheꞌch bantz.
23 Na nin eltzaj yi jun yolaꞌtz le chitziꞌ wunak yi tuleꞌn jun ángel tetz Kajcaw tan takꞌleꞌn jun chin yabil te Herodes. Oqueꞌn nin ban lacꞌp yi jun chin yabilaꞌtz teꞌj tan paj yi tocsaj tib iꞌ tetz Ryos. Nintzun quim iꞌ, na nin baj yi wankil cyaꞌn amluꞌ.
24 Wiꞌnin tzun beneꞌn loꞌon yi balaj stziblal tetz Ryos, nin wiꞌnin wunak cyocsaj.
25 Inti Bernabé tu Saulo, chipakxeꞌn tzaj tzun junt tir Jerusalén tan cyoponeꞌn Antioquía, na sken wiꞌt bnix chimantar ẍchixoꞌl yi eꞌ aj Judea. Ej nin saj xomok Waꞌn scyeꞌj yi cyajeꞌn tzaj le welt. Ej nin yi jun Waꞌnaꞌtz nchaꞌtz Marcos na aꞌlchij tetz.