Yi tlol Luꞌ stziblal scyetz yi cmon creyent Jerusalén
11
1 Itzun yi eꞌ apostl scyuchꞌ yi eꞌ kajwutz yi najlcheꞌ Judea, nintzun quibit yi nsken wiꞌt cyocsaj yi eꞌ yi nkꞌeꞌtz eꞌ judiy yi yol Ryos. 2 Itzun yi jeꞌn poneꞌn Luꞌ Jerusalén, cyoqueꞌn tzun yi eꞌ yi banijcheꞌ circuncidar tan wakꞌ ib tuchꞌ. 3 Itzun cyaltz tetz:—¿Nxac xakeꞌnuꞌ tan chixajseꞌn yi eꞌ wunak yi nkꞌeꞌtz eꞌ katanum, yi eꞌ qui banijcheꞌ circuncidar? ¿Nin mbi xac waneꞌnuꞌ scyuchꞌ? —cheꞌch tetz Luꞌ.
4 Toqueꞌn tzun Luꞌ tan xtxoleꞌn scyetz yi ẍeꞌn cunin ban, nin je yol iꞌ-eꞌj:
5 —Choꞌn atin pon wetz Jope. Nin na chintzan cunin tan nachleꞌn Kataj yi ẍchajol tib jun takleꞌn tzinwutz. I cunin jun xbuꞌk taneꞌn. Choꞌn cꞌalij tzaj yi cyaj xtxꞌuꞌc tcyaꞌj. Cweꞌn muleꞌn tzuntz tzinwutz. 6 Woqueꞌn tzun tan xmayeꞌn, nintzun wil yi at wiꞌnin jilwutz txuc yi at tcꞌuꞌl yi jun xbuꞌkaꞌtz. At eꞌ txuc yi cyaj quikan, nin at wiꞌnin smaron txuc tul. At lubaj, nin at eꞌchk jilwutz txuc yi baꞌn na chixicyꞌin tcyaꞌj tul yi jun xbuꞌkaꞌtz. 7 Beneꞌn tzun wital jun yol yi choꞌn jiloneꞌn tzaj jalen tcyaꞌj, itzun taltz: ‘Luꞌ, txiclijeꞌn, biyweꞌ yi eꞌ txuqueꞌj nin bajsweꞌeꞌn.’ 8 ‘Quiꞌc rmeril Wajcaw,’ chinch ‘na cyaꞌl cunin na bajeꞌt eꞌchk jilwutz txucaꞌtz waꞌn yi quiꞌc cu tan bajeꞌn kaꞌn,’ chinch banintz. 9 Sajeꞌn tzun stzaꞌwel yi inyoltz: ‘Awalch yi quiꞌc xac. Awalch yi quiꞌc cu tan abajsal jun eꞌchk takleꞌn yi ja wiꞌt xansaj Ryos.’ 10 Yi wiꞌt jiloneꞌn yi junaꞌtz le toxiꞌn tir, nintzun wil yi tajeꞌn ticyꞌleꞌn tcyaꞌj. 11 Ej nin iteꞌn nin rataꞌtz cyoponeꞌn ox yaj tan injoyleꞌn le caꞌl kale atoꞌt. Choꞌn cyoponeꞌn tzaj Cesarea. 12 Tlol tzun yi Espíritu Sant swetz tan qui incabel incꞌuꞌl tan imbeneꞌn scyeꞌj. Nin nchaꞌtz eꞌ ben xomok kak kajwutz sweꞌj. Choꞌn tzun koponeꞌntz xe caꞌl jun yaj le tnum Cesarea.
13 “Ma yi koponeꞌntz nintzun tal yaj sketz yi ẍeꞌn cunin tilol iꞌ wutz jun ángel xe yi tetz caꞌl. Itzun yi jeꞌn jobtuj yi ángel swutz iꞌ, itzun taltz tetz: ‘Chakweꞌ nin cobox yaj jalen Jope tan ticyꞌleꞌn tzaj Simón yi nchaꞌtz na aꞌlchij Luꞌ tetz. 14 Na iꞌ tzꞌaꞌlon tzatz yi ẍeꞌn ẍclax tuml yi anajal,’ stzun yi ángel bantz tetz.
15 “Itzun yi woqueꞌn tan xtxoleꞌn yi puntil scyetz cweꞌn muleꞌn tzun yi Espíritu Sant scyeꞌj, chi ban yi cweꞌn muleꞌn skeꞌj ketz le xeꞌtzbil tzaj. 16 Tuleꞌn tzun txꞌakxuj yi yol Kajcaw tincꞌuꞌl yi talnak sketz: ‘Aꞌ tuꞌ yi xcon tan Waꞌn tan chibajeꞌn bautizar yi eꞌ wunak, ma yi in wetz xconk yi Espíritu Sant waꞌn tan ibajeꞌn bautizar,’ chij Jesús bantz sketz. 17 Ma jaluꞌ yi ko ja takꞌ Ryos yi Espíritu Sant scyetz yi eꞌaꞌtz, yi takꞌnak sketz ketz yi kꞌukeweꞌn kacꞌuꞌl te Kajcaw Jesucristo, ¿mbi tzun wocleꞌn wetz tan xiteꞌn yi tajbil Ryos? Quiꞌc, —chij Luꞌ bantz scyetz.
18 Yi quibital yi eꞌ kajwutz yi najlcheꞌ Jerusalén, yi xtxolbilaꞌseꞌj, quiꞌct nin tzun cyaltz. Ntin eꞌ oc tan takꞌleꞌn chikꞌajsbil tetz Ryos, nin cyaltz squibil quib:
—Ja bin takꞌ Ryos amaꞌl scyetz yi eꞌ yi nkꞌeꞌtz eꞌ katanum tan jeꞌn chitxꞌixpul cyajtzaꞌkl bantz chicambal yi itzꞌajbil yi quinin bajsbeꞌn tetz.
Yi cmon creyent yi ateꞌ Antioquía
19 Itzun bantz yi eꞌ, yi eꞌ el xit yi quimeꞌn Esteban nin yi toqueꞌn chibuchleꞌn yi eꞌ creyent. At tzun eꞌ yi choꞌn cyoponeꞌn jalen Fenicia. Nin at eꞌ yi choꞌn cyoponeꞌn Chipre. Nin at eꞌ, eꞌ opon Antioquía. Nin cyakil yi eꞌaꞌtz eꞌ baj oc len tan xtxoleꞌn yi balaj stziblal scyetz yi eꞌ judiy. Poro quinin eꞌ oc tan xtxoleꞌn scyetz yi eꞌ yi nkꞌeꞌtz eꞌ judiy. 20 Poro at cobox creyent aj Chipre tu aj Cirene, yi choꞌn cyoponeꞌn Antioquía. Ej nin yi eꞌaꞌtz eꞌ oc tan xtxoleꞌn yi balaj stziblal tetz Kajcaw Jesús scyetz yi eꞌ yi nkꞌeꞌtz eꞌ judiy, yi najlcheꞌ le jun tnumaꞌtz. Nin cyal yi at rmeril tan chiclaxeꞌn yi eꞌ yi nkꞌeꞌtz eꞌ judiy. 21 Ej nin tan yi porer Kataj, at wiꞌnin eꞌ yi jeꞌ chitxꞌixpul yi cyajtzaꞌkl tan chixomeꞌn te Kajcaw.
22 Tponeꞌn tzun jun stziblaltz chiwiꞌ yi eꞌ cmon creyent yi ateꞌ Jerusalén. Ej nin yi quibital yi stziblalaꞌtz nintzun ben chichakol kajwutz Bernabé tan chixajseꞌn yi eꞌ kajwutzaꞌtz yi ateꞌ Antioquía.
23 Itzun yi tponeꞌn Bernabé ẍchixoꞌl, wiꞌnin tzun stzatzineꞌntz yi tilol iꞌ yi at banl Kataj Ryos squibaj. Nintzun oc iꞌ-tz tan chiquiwseꞌn tan chixomeꞌn te Kajcaw, nin tan kꞌukeweꞌn mas chicꞌuꞌl teꞌj. 24 Yi Bernabéjaꞌtz chumbalaj wunak nin iꞌ, na nojnak yi talmaꞌ tan yi Espíritu Sant, nin nternin kꞌuklij cꞌuꞌl te Kataj Ryos. Wiꞌnin tzun wunak eꞌ octz tkꞌab Kataj Ryos.
25 Yi cyocsal yi jun cꞌoloj wunakaꞌtz nintzun ben iꞌ tan joyleꞌn Saulo jalen Tarso. Ej nin yi jaleꞌn taꞌn nintzun ben moxol Antioquía. 26 Jun tzun yob eꞌ aꞌtij ẍchixoꞌl yi cmon creyent Antioquía tan chichusleꞌn jun cꞌoloj wunak te yol Kataj. Yaꞌstzun yi toqueꞌn cunin chibiꞌ yi eꞌ creyent tetz Cristiano.a
27 Ej nin te iteꞌn nin tiempaꞌtz yi cyoponeꞌn cobox elsanl stziꞌ Ryos Antioquía. Choꞌn nchisaj Jerusalén. 28 Toqueꞌn tzun jun scyuchꞌ yi eꞌaꞌtz, yi Agabo biꞌ, tan txoliꞌn tan porer yi Espíritu Sant. Nin taltz yi at tulbil jun weꞌj beneꞌn tziꞌn. Ej nin yaꞌtz nin bajijtz te yi at tzaj Claudio tan cawuꞌn tibaj cyakil yi eꞌchk amaꞌl cwent Roma. 29 Bixeweꞌn tzuntz cyakꞌun yi eꞌ creyent yi najlcheꞌ Antioquía, tan beneꞌn noc chꞌeybil cyetz yi eꞌ creyent yi najlcheꞌ Judea. Nin bixeꞌ cyaꞌn yi xom quen tuꞌ yi cyoy te yi quib taneꞌn chimebiꞌl. 30 Inin tzun cyulejtz. Nin yi molxeꞌn yi oy cyaꞌn, nin ben chichakol Bernabé tu Saulo tan takꞌleꞌn ẍchikꞌab yi eꞌ wiꞌ banl chiwiꞌ yi eꞌ creyent yi ateꞌ Judea.