Yi ẍeꞌn cuꞌn tocsal Saulo
9
1 Itzun ban Saulo, wiꞌnin ẍchiꞌcheꞌn cꞌuꞌl iꞌ scyeꞌj yi eꞌ yi kꞌuklij chicꞌuꞌl te Kajcaw. Nin yi tajbil iꞌ iꞌtz tan chibiyleꞌn cuꞌn. Xaꞌk iꞌ swutz yi wiꞌtz paleꞌ 2 tan jakleꞌn jun ort tan ẍchajleꞌn ẍchiwutz yi eꞌ ajcaw lakak eꞌchk sinagoga yi at Damasco. Yi xac yi jun ortaꞌtz iꞌtz tan chitzꞌamleꞌn yi eꞌ yi choꞌn kꞌuklij chicꞌuꞌl te Kajcaw, nin tan chisajeꞌn pres Jerusalén. Quiꞌc na ban yi ko eꞌ yaj nka eꞌ xnaꞌn, tircuꞌn na taj iꞌ tan chisajeꞌn pres. 3 Poro itzun bantz te yi txant tan tponeꞌn iꞌ Damasco, jalt cuntunin nachol iꞌ yi cweꞌn muleꞌn jun chin pakꞌpuchal teꞌj yi choꞌn sajeꞌn tcyaꞌj. 4 Yi cweꞌn muleꞌn yi jun pakꞌpuchalaꞌtz, nintzun opon jokpuj Saulo wuxtxꞌotxꞌ, nin ben tbital wiꞌ jun yi jilon tzaj tetz:5 —¡Saulo! ¡Saulo! ¿Nxac na cẍtzan tan imbuchleꞌn? —chij yi junaꞌtz ban tzaj.
—¿Naꞌ tzun scyetz iluꞌ Taꞌ? —chij Saulo.
—I inaꞌtz in Jesús, nin i inaꞌtz yi na cẍtzan tan buchleꞌn. Poro aẍteꞌn na abiy awib chi na ban jun mam tor yi na oc tan xajleꞌn yi puy, —chij yi junaꞌtz ban tzaj tetz Saulo.
6 Wiꞌnin tzun xobeꞌn Saulo, nin jaltaꞌtz saj tlol:
—Wajcaw ¿mbi na tajuꞌ yil tzimban?
Itzun saj tlol Kajcaw tetz Saulo:
—Txiclijeꞌn nin nqueꞌn tnum, nin choꞌn tzꞌaꞌlchij tzatz yi mbi tajweꞌn tan abnol.
7 Wiꞌnin tzun cyeleꞌn yab yi eꞌ yi xomcheꞌ te Saulo, na nin ben quibital yi na jilon tzaj jun poro quinin quil wutz jun wunak. 8 Jeꞌn tzun txiclok Saulo nin jeꞌ jakol wutz poro quiꞌt na xmayin, na nin oc cyen tetz moyiꞌẍ. Chaꞌstzun te chꞌinuꞌn beneꞌn tan tponeꞌn Damasco.
9 Ma yi tponeꞌn Damasco yaꞌstzun aꞌteꞌt tetz ox kꞌej. Poro quinin xmayin iꞌ, nin quinin wan, quinin ucꞌaꞌ tul yi ox kꞌejaꞌtz.
10 At tzun jun kajwutz yi na biꞌaj Ananías, yi choꞌn najlijtz Damasco. Nintzun jilon Kajcaw tetz chi tul wutzicyꞌ taneꞌn, itzun taltz:
—¡Ananías! —stzun Kajcaw tetz.
—¿Mbi Wajcaw?
11 —Quiloꞌk le beꞌ yi na biꞌaj Quilnintuꞌ Teꞌj, nin joyaj jun yajtz yi na biꞌaj Saulo, aj Tars iꞌ. Choꞌn at le caꞌl taꞌ Judas. Nin na tzan iꞌ tan innachleꞌn. 12 Ja wiꞌt til chi tul wutzicyꞌ taneꞌn yi ja opon jun yaj teꞌj yi na biꞌaj Ananías. Nin ja til yi jeꞌn tkꞌol yi jun yajaꞌtz yi kꞌab twiꞌ bantz jakxeꞌn wutz, —stzun Kajcaw tetz.
13 Yi tbital Ananías yi yol Ryos itzun taltz:
—Wajcaw, poro wiꞌnin wunak na aꞌlon swetz yi mbi cuꞌn na ban yi jun yajaꞌtz scyeꞌj yi eꞌ kajwutz yi ateꞌ Jerusalén. 14 Nin akꞌijt caꞌwl tetz cyakꞌun yi eꞌ wiꞌtz paleꞌ tan chitzꞌamleꞌn cyakil yi eꞌ yi na chitzan tan naꞌwseꞌn biꞌuꞌ tzoneꞌj, —stzun Ananías tetz Ryos.
15 Poro nintzun saj tlol Kajcaw tetz Ananías:
—Or tzabeneꞌn, na yaꞌstzun jun inchakum sbneꞌ. Na ja jeꞌ intxaꞌol tan xtxoleꞌn yi mbi ekaꞌn waꞌn scyetz yi eꞌ yi nkꞌeꞌtz eꞌ judiy, nin nchaꞌtz scyetz yi eꞌ wiꞌtz bajxom lakak tnum beneꞌn tziꞌn. Nin nchaꞌtz ja jeꞌ intxaꞌol tan xtxoleꞌn yi mbi ekaꞌn waꞌn scyetz yi eꞌ aj Israel. 16 Tzinchajeꞌ tetz yi stijeꞌ wiꞌnin qꞌuixcꞌuj tan paj yi tzꞌocopon iꞌ tan xtxoleꞌn yi mbi ekaꞌn waꞌn, —stzun Kajcaw.
17 Beneꞌn tzun Ananías, nin opontz xe caꞌl kale atit Saulo. Yi tocomponeꞌn nintzun jeꞌ tkꞌol yi kꞌab twiꞌ, itzun taltz:
—Wajwutz Saulo, ja chinsaj ẍchakol Kajcaw Jesús, yi jun yi nẍchaj tib swutzuꞌ tbeꞌ. Nin ja nuꞌl tan teleꞌn pacxuj te wutzuꞌ bantz xmayineꞌnuꞌ nin tan nojeꞌn yi talmaꞌuꞌ tan yi Espíritu Sant, —stzun Ananías bantz tetz Saulo.
18 Le rat nin baj cyeleꞌn kotxꞌpuj te wutz iꞌ. I cunin xtiꞌlil te cay. Kalenaꞌs tzun xmayineꞌntz. Ej nin jeꞌ aꞌ twiꞌ.
19 Ma yi jeꞌn aꞌ twiꞌ, kalenaꞌs tzun waneꞌntz, nin jalt junt tir walor. Nintzun aꞌtij cobox kꞌej ẍchixoꞌl yi eꞌ kajwutz aj Damasco.
Yi toqueꞌn Saulo tan xtxoleꞌn yi balaj stziblal Damasco
20 Toqueꞌn tzun Saulo tan xtxoleꞌn yi balaj stziblal lakak eꞌchk sinagoga, nin tal iꞌ scyetz wunak: “Yi Jesús yaꞌstzun yi Cyꞌajl Ryos.” 21 Wiꞌnin tzun cyeleꞌn yab cyakil wunak te yi yol iꞌ. Itzun cyaltz:
—¿Nkꞌeraꞌtz ptzun yi yajeꞌj yi moꞌc tan chixiteꞌn yi eꞌ kajwutz yi najlcheꞌ Jerusalén? ¿Nin nkꞌeraꞌtz peꞌ iꞌ yi jun yi muꞌl kloꞌ tzoneꞌj tan kacꞌalcheꞌn nin tan koponeꞌn ticyꞌleꞌn ẍchiwutz yi eꞌ wiꞌtz paleꞌ jalen Jerusalén?
22 Poro mas tcunin quiwsaj tib Saulo tan xtxoleꞌn yi Jesús yaꞌstzun yi Cristo. Nin xcyeꞌ iꞌ tan xiteꞌn cyajtzaꞌkl yi eꞌ judiy yi quinin cyocsaj yi Jesús iꞌ yi Cristo.
Yi ẍeꞌn cuꞌn claxeꞌn Saulo ẍchikꞌab yi eꞌ judiy
23 Itzun yi teleꞌn cobox kꞌej bixeweꞌn tzuntz cyakꞌun yi eꞌ judiy tan cweꞌn kloꞌ chibiyol Saulo. 24 Nin baj cuꞌ len wart cyaꞌn tziꞌak yi sawanil yi tnum tan stzꞌamleꞌn kloꞌ Saulo tan cweꞌn biyij. Poro nin tbit Saulo yi mbi iꞌ ilaꞌtz chitxumuꞌn. 25 Lakꞌbal tzun teleꞌn quicyꞌal kajwutz yi Saulo. Choꞌn cweꞌn tzaj cyaꞌn tul jun moꞌtx wi tapij.
Yi tponeꞌn Saulo Jerusalén
26 Ma yi tponeꞌn Saulo Jerusalén, nintzun joy puntiltz tan tocomponeꞌn ẍchixoꞌl yi eꞌ kajwutz yi ateꞌtz. Wiꞌnin tzun chixobeꞌn cyen yi eꞌ kajwutz tetz, na le wutz cyetz cyajtzaꞌkl nkꞌeꞌtz creyent iꞌ.
27 Ma yi kajwutz Bernabé iꞌ icyꞌan nin ẍchiwutz yi eꞌ apostl. Nin tal Bernabé yi ẍeꞌn cunin ban yi tilol Saulo wutz Kajcaw tbeꞌ, nin yi mbi cunin ban yi jiloneꞌn Kajcaw tetz. Nin nchaꞌtz tal iꞌ yi quinin xob Saulo tan xtxoleꞌn yi mbi ekaꞌn tan Jesús te yi at iꞌ Damasco. 28 Chaꞌstzun te taꞌteꞌn cobox kꞌej scyeꞌj yi cmon creyent yi ateꞌ Jerusalén. Nin nternin ncheꞌl nchoꞌc scyuchꞌ. 29 Nin quinin xob iꞌ tan xtxoleꞌn yi mbi ekaꞌn tan Kajcaw Jesús. Poro yi eꞌ mas judiy yi na chijilon le griego nin eꞌ octz tan wakꞌ ib tuchꞌ. Ej nin eꞌ octz tan joyleꞌn puntil tan cweꞌn kloꞌ chibiyol. 30 Ma yi quibital yi eꞌ kajwutz yi mbi na icyꞌ chicꞌuꞌl yi eꞌ contr Saulo, nintzun ben quicyꞌaltz jalen Cesarea. Kalenaꞌs tzun beneꞌn chichakoltz le tnum Tarso.
31 Wiꞌnin tzun tzatzin paz jaltz ẍchixoꞌl yi eꞌ creyent lakak eꞌchk amaꞌl cwent Judea tu Galilea tu Samaria. Nin ja chiquiwix tkꞌab Kataj, na ja cyek ẍchiꞌ Ryos. Nin ja oc yi Espíritu Sant tan quichꞌeyeꞌn, nin chꞌuyeꞌn nin ban yi tajlal yi cmon.
Yi tuleꞌn yos tu Eneas
32 Itzun bantz te yi na chitzan Luꞌ tan chixajseꞌn cyakil yi eꞌ cmon creyent, nchaꞌtz opontz tan chixajseꞌn yi eꞌ yi najlcheꞌ le amaꞌl Lida. 33 Nojompon tzun Luꞌ te jun yaj yi na biꞌaj Eneas. Yi jun yajaꞌtz sken el wajxokix yob taꞌn wi soc tan paj yi yeꞌyuj wankil. 34 Beneꞌn tzun tlol Luꞌ tetz:
—Eneas, tzꞌul yos tzawuchꞌ tan Jesucristo. Txiclijeꞌn, nin wekaj asoc, —stzun Luꞌ banintz tetz.
35 Jeꞌn tzun txiclok, nin xontz.
Ma yi beneꞌn quilol cyakil yi eꞌ aj Lida scyuchꞌ yi eꞌ aj Sarón yi mmuꞌl yos tuchꞌ, ja cyaj cyen quilol cyakil yi cyetz chicstumbr nin ja chixom te ẍchusuꞌn Kajcaw.
Yi titzꞌeꞌn junt tir Dorcas
36 Itzun te yi tiempaꞌtz at tzun jun xnaꞌn yi creyent jalen le tnum Jope yi na biꞌaj Tabita, yi na elepont Dorcas. Wiꞌnin eꞌchk pawor baj bnol nin wiꞌnin chꞌeyaꞌn ban scyeꞌj eꞌ mebaꞌ. 37 Yobteꞌn tzun iꞌ-tz nin quimtz.
Ma yi wiꞌt xtxꞌajoneꞌn, nin octz cyaꞌn tul jun cuart yi at le caꞌp chup. 38 Nakaꞌj tzun xoꞌl yi tnum Jope tu yi tnum Lida. Itzun yi quibital yi eꞌ creyent yi choꞌn at Luꞌ le tnum Lida, beneꞌn tzun chichakol cob yajtz tan ẍchakleꞌn iꞌ.
—Na jaꞌwij yil tzꞌoponuꞌ Jope jaluꞌ, —cheꞌch tzun yi cob yajaꞌtz bantz.
39 Nucꞌul tzun tib Luꞌ, nin bentz scyeꞌj. Ma yi cyoponeꞌn Jope, beneꞌn tzun quicyꞌaltz kale atit yi almaꞌ. Toqueꞌn tzun chicmonil quib yi eꞌ xmaꞌlcaꞌn te Luꞌ. Wiꞌnin cyokꞌeꞌn, nin baj chichajol cyakil yi eꞌchk cmiꞌẍ tu eꞌchk xbuꞌk yi bnixnak tan Dorcas. 40 Toqueꞌn tzun Luꞌ tan talcheꞌn scyetz cyakil yi eꞌ wunak yi ateꞌ te yi almaꞌ tan cyeleꞌn. Ma yi cyeleꞌn nintzun cuꞌ mejlok tan nachleꞌn Kataj. Yi wiꞌt nachol Kataj nintzun xmayin nin tetz yi almaꞌ, itzun taltz:
—Tabita, txiclijeꞌn.
Jeꞌn tzun jakol iꞌ yi wutz. Nin ben tilol yi at Luꞌ. Cꞌoleweꞌn tzun iꞌ-tz. 41 Beneꞌn tzun Luꞌ tan ẍchꞌineꞌn kꞌab, nin jeꞌ xtxicbaltz. Cheꞌ ẍchakol tzun yi eꞌ xmaꞌlcaꞌn yi ateꞌtz scyuchꞌ yi eꞌ mas kajwutz, nin ben ẍchajol scyetz yi nsken itzꞌij junt tir Dorcas.