8
1 Inti yi jun xicyaꞌtz yi na biꞌaj Saulo wiꞌnin stzatzineꞌn iꞌ yi quimeꞌn Esteban.Yi toqueꞌn Saulo tan chibuchleꞌn yi eꞌ cmon creyent
Itzun bantz, iteꞌn nin kꞌejaꞌtz yi toqueꞌn chibuchleꞌn yi cmon creyent Jerusalén. Nin cyakil yi cmon creyent nin eꞌ baj el xittz lakak eꞌchk amaꞌl cwent Judea tu Samaria. Ntin cuꞌn eꞌ apostl, quinin eꞌ el ojk. 2 Poro at cobox wunak yi na cyek ẍchiꞌ Ryos yi eꞌ octz tan mukleꞌn yi wankil Esteban. Wiꞌnin oꞌkl eꞌ bantz teꞌj. 3 Ma tetz Saulo nternin na tzan tan chibuchleꞌn yi eꞌ cmon creyent. Txol cunin tzun beneꞌntz lakak chicaꞌl tan chijuteneꞌl tzaj yi eꞌ yaj tu xnaꞌn, nin eꞌ baj oc taꞌn xetzeꞌ.
Yi toqueꞌn xtxoleꞌn yi balaj stziblal Samaria
4 Poro yi eꞌ yi eꞌ baj el xit tulak eꞌchk amaꞌl, nintzun eꞌ octz tan xtxoleꞌn yi yol Ryos scyetz yi eꞌ wunak kale eꞌ oponeꞌt. 5 Nchaꞌtz Liꞌp, choꞌn cweꞌn pon iꞌ Samaria, nin octz tan xtxꞌolcheꞌn xoꞌl yi mbi ekaꞌn tan Cristo scyetz yi eꞌ aj Samariajaꞌtz. 6 Ma yi eꞌ wunak nin cyakꞌ amaꞌl tan tbiteꞌn yi mbi cuꞌn na tzan iꞌ tan xtxoleꞌn. Nchaꞌtz quil yi eꞌchk milawr yi mbnix taꞌn. 7 Nin ja quil yi wiꞌnin espíritu cwent Baybaꞌn yi eꞌ el len ẍchiwankil wunak tan Liꞌp. Wiꞌnin chiẍchꞌineꞌn yi eꞌ espíritujaꞌtz yi cyeleꞌn le chiwankil wunak. Nchaꞌtz at wiꞌnin eꞌ yi yeꞌyuj chiwankil scyuchꞌ eꞌ coꞌx yi baj ul len yos scyuchꞌ. 8 Chaꞌstzun te wiꞌnin chitzatzineꞌn yi eꞌ wunak te yi mbi cuꞌn mbajij.
9 Poro at tzun jun yaj yi na biꞌaj Simón. Quin tech nin wunak eꞌ baj subul le tnum Samaria tan yi tetz tpisyoꞌ. Ej nin nchaꞌtz nsken tocsaj tib nim tu tajtzaꞌkl. 10 Na cyakil nim juy eꞌ xom te tetz ẍchusuꞌn nin je cyaleꞌj:
—Yi yajeꞌj, cyꞌaꞌn yi porer Ryos taꞌn, —cheꞌch.
11 Wiꞌnin tzun wunak yi xom chiwiꞌ te yi yol iꞌ, na quin tech nin tiemp eꞌ baj subul tan yi tetz tpisyoꞌ. 12 Poro yi toqueꞌn Liꞌp tan xtxoleꞌn scyetz yi at tulbil Ryos tan cawuꞌn, nin yi mbi ekaꞌn tan Jesucristo, wiꞌnin tzun eꞌ cyocsaj yi yol iꞌ. At wiꞌnin yaj nin wiꞌnin xnaꞌn yi cyocsaj, nin baj jeꞌ aꞌ ẍchiwiꞌ. 13 Nchaꞌtz yi jun yajaꞌtz, yi na biꞌaj Simón, tocsaj yi balaj stziblal yi xtxol Liꞌp. Nin wiꞌnin teleꞌn yab iꞌ te eꞌchk milawr yi mbnix tan Liꞌp.
14 Itzun yi quibital yi eꞌ apostl yi ateꞌ Jerusalén yi sken cyocsaj yi eꞌ aj Samariajaꞌtz yi yol Ryos, beneꞌn tzun chichakol Luꞌ tu Waꞌn scyeꞌj tan quichꞌeyeꞌn. 15 Ma yi cyoponeꞌn, nintzun eꞌ octz tan nachleꞌn Ryos tan tkꞌol iꞌ yi Espíritu Sant scyetz yi eꞌaꞌtz yi sken cyocsaj. 16 Na ntaxk cuꞌul yi Espíritu Sant scyeꞌj, na ntin jeꞌnak aꞌ ẍchiwiꞌ tan biꞌ Jesús. 17 Jeꞌn tzun cyakꞌol Luꞌ tu Waꞌn chikꞌab ẍchiwiꞌ yi eꞌ wunakaꞌtz. Nintzun cuꞌul yi Espíritu Sant squibaj.
18 Ma yi tilol Simón yi na cuꞌul yi Espíritu Sant, yi na cyakꞌeꞌn Luꞌ tu Waꞌn chikꞌab ẍchiwiꞌ wunak, nintzun octz tan sukeꞌn pwok scyetz tan cyakꞌol yi jun poreraꞌtz tetz. Beneꞌn tzun tlol scyetz:
19 —Cyakꞌeꞌuꞌ yi jun poreraꞌtz swetz bantz cweꞌn muleꞌn yi Espíritu Sant squibaj yi eꞌ wunak kale wakꞌeꞌnt inkꞌab.
20 Beneꞌn tzun tlol Luꞌ tetz:
—Simón quiꞌc muꞌẍ axac tu apuꞌk. Na ¿nxac na atxum yi at rmeril tan lokꞌcheꞌn jun eꞌchk takleꞌn yi Ryos na akꞌon tetz? 21 Quiꞌc nin awetz tuchꞌ, na cob acꞌuꞌl te Ryos. 22 Txꞌixpeꞌn bin yi awajtzaꞌkl cachiꞌ. Ej nin cꞌuchaj cuybil apaj tetz Ryos, nin qui cunin batz scuyeꞌ iꞌ apaj. 23 Na na wil nin, yi chin picr nin aẍ, nin aẍ nin pres tkꞌab yi ilcꞌol, —chij Luꞌ bantz tetz.
24 —Eꞌuꞌ kawutzileꞌn chinacheꞌuꞌ Kataj swibaj. Nink cu chiwutzuꞌ tetz Ryos yi quiꞌk bajij yi xtxolbilaꞌtz sweꞌj chi na cyal tzajuꞌ swetz, —stzun Simón bantz.
25 Itzun yi bajeꞌn chitxolil yi eꞌ apostl yi yol Ryos lakak eꞌchk aldey cwent Samaria. Nintzun eꞌ pakxij cyetz le tnum Jerusalén.
Yi Liꞌp tu yi aj Etiopía
26 Yi wiꞌt bnixeꞌn yi xtxolbileꞌj, nintzun tal jun ángel cwent Kajcaw tetz Liꞌp: “Nucꞌaj awib, nin or tzabeneꞌn jalen lucuꞌn. Baꞌn cẍben tul yi beꞌ yi na el Jerusalén nin yi na cupon jalen Gasa,” stzun yi ángel bantz.
Yi jun beꞌaꞌtz, choꞌn na icyꞌak le amaꞌl tzꞌinunin tuꞌ. 27 Tcyꞌal tzun Liꞌp yi jun beꞌaꞌtz. Nin te yi na xontz, cweꞌn tzun chicꞌulul quib tu jun yaj yi aj Etiopía, iꞌ jun eunuco. Iꞌ jun scyeri eꞌ ajcaw yi ateꞌ jakꞌ caꞌwl Candace yi chireina yi eꞌ aj Etiopía. Iꞌ qꞌuicyꞌlom te cyakil yi mebiꞌl yi jun reinajaꞌtz. Choꞌn pakxeꞌn tzaj tan cꞌuꞌlajeꞌn Ryos jalen Jerusalén.
28 Nin choꞌn at tpombil iꞌ le tetz tanum. Cꞌolchij iꞌ tul yi tetz carros nin na tzantz tan siꞌleꞌn yi liwr yi tzꞌibaꞌnt cyen tan Isaías.
29 Beneꞌn tzun tlol yi Espíritu tetz Liꞌp tan toqueꞌn ẍkansal tib te yi jun carrosaꞌtz: “Ẍkansquen awib te carros nin xom nintz teꞌj,” stzun yi Espíritu tetz iꞌ.
30 Tocomponeꞌn tzun ẍkansal tib Liꞌp nakaꞌjil yi carros. Nin ben tbital yi na tzan yi eunuco tan siꞌleꞌn yi liwr yi tzꞌibaꞌnt cyen tan Isaías. Beneꞌn tzun jakol Liꞌptz tetz:
—¿Na peꞌ el xtxumuꞌ tetz yi xtxolbil yi na tzanuꞌ tan siꞌleꞌn?
31 —¿Ẍeꞌn tzꞌel intxum tetz, na quiꞌc jun tan xtxꞌolcheꞌn xoꞌl swetz? —stzun yi eunuco tetz Liꞌp.
Toqueꞌn tzun moxol yi eunuco yi Liꞌptz tan cweꞌn cꞌolchok xlaj iꞌ le carros.
32 Ma yi xtxolbil te yi yol Kataj yi na tzan yi eunuco tan siꞌleꞌn iꞌtz:
“Ja ben ticyꞌleꞌn chi na ben ticyꞌleꞌn jun cneꞌr tan cweꞌn biyij.
Nin quinin jilon iꞌ, chi jun tal cneꞌr yi qui na ẍchꞌin yi na el xiꞌil tan matzol.
33 Chin cꞌulutxum nin iꞌ, nin quiꞌc muꞌẍ til.
Poro ja akꞌlij caws.
Nchaꞌtz cyaꞌl naꞌwseꞌt xonl iꞌ, na quiꞌc xonl iꞌ sbneꞌ,
tan paj yi quinin ncyakꞌ amaꞌl tetz tan taꞌteꞌn tzoneꞌj wuxtxꞌotxꞌ.”
34 Beneꞌn tzun jakol yi eunuco tetz Liꞌp:
—Taꞌ, tal tzajuꞌ swetz, yi mbi na elepont yi xtxolbileꞌj, ¿iteꞌn poloꞌ yi elsanl stziꞌ Ryos na yolbej tib, nka na peꞌ tzan iꞌ tan yolcheꞌn junt?
35 Xeꞌteꞌn tzun Liꞌp tan xtxꞌolcheꞌn xoꞌl yi xtxolbil, yi sken wiꞌt chisiꞌlej tan teleꞌn xtxum yi eunuco tetz yi mbi ekaꞌn tan Jesús.
36 Itzun te yi na chixontz tbeꞌ chinojeꞌn poneꞌn tzuntz te jun aꞌ. Nintzun tal eunuco tetz Liꞌp:
—Je jun aꞌeꞌj, ¿at poloꞌ makol wetz tan jeꞌn aꞌ tinwiꞌ tzoneꞌj? —stzun yi eunuco tetz Liꞌp.
37 —Quiꞌc, —stzun Liꞌp. —Ntin yi ko tetz cuꞌn talmaꞌuꞌ na tocsajuꞌ yi mbi ekaꞌn tan Jesucristo, —stzun Liꞌp tetz.
—Jun cuꞌn na wocsaj yi Jesucristo yaꞌstzun yi Cyꞌajl Ryos, —stzun iꞌ bantz tetz Liꞌp.
38 Nintzun cawun nin tan taneweꞌn yi carros. Chicweꞌn tzuntz chicabil xe aꞌ, nintzun jeꞌ aꞌ twiꞌ eunuco tan Liꞌp. 39 Yi chijeꞌn tzaj xe aꞌ beneꞌn tzun ticyꞌleꞌn tetz Liꞌp tan yi Espíritu Kajcaw tul junt amaꞌl. Quiꞌt tzun til eunuco yi wutz Liꞌp. Nin yi tcyꞌalt yi tetz beꞌ wiꞌnin stzatzineꞌn.
40 Ma Liꞌp choꞌn tzun tilweꞌn wutz tul jun tal neꞌẍ tnum yi na biꞌaj Azote. Ej nin txol cunin beneꞌn iꞌ lakak tnum tan xtxoleꞌn yi ẍeꞌn chiclax wunak. Oponeꞌn cunin txoliꞌn taꞌn jalen le tnum Cesarea.