Yi oy yi opon tan jun xnaꞌn xmaꞌlcaꞌn mebaꞌ
(Mr 12.41-44)
21
1 Itzun bantz te yi at Jesús le templo nin ben xmayil yi eꞌ ric yi na chitzan tan cuꞌseꞌn chiꞌofrent le cuꞌlbil pwok. 2 Nchaꞌtz ben tilol Jesús jun tal prow xnaꞌn xmaꞌlcaꞌn yi ocopon tan cuꞌseꞌn cob tal centaw. 3 Beneꞌn tzun tlol scyetz yi eꞌ ẍchusbeꞌtz:—Jun cuꞌn yol swaleꞌ nin tzitetz, yi jun prow xmaꞌlcaꞌneꞌj, iꞌ mmakꞌon mas pwok ẍchiwutz cyakil yi eꞌ mas wunak. 4 Na yi eꞌ mas, wiꞌ tlen tuꞌ chipuꞌk ncuꞌ cyaꞌn, ma yi prow xnaꞌneꞌj yi chin mebaꞌ nin, ja toy cyakil yi puꞌk yi colij taꞌn tetz gast.
Yi talol Jesús yi xitok yi templo
(Mt 24.1-2; Mr 13.1-2)
5 At tzun cobox yi eꞌ oc tan xtxumleꞌn yi ẍeꞌn cuꞌn taneꞌn yi templo, yi chumbalaj nin. Eꞌ oc tan xtxumleꞌn yi eꞌchk cꞌub tu yi eꞌchk oy yi cyakꞌnak wunak tetz yubil yi templo. Poro yi teleꞌn xtxum Jesús te chiyol, nintzun ben tlol scyetz:
6 —Xitok cyakil eꞌchk takleꞌneꞌj, na tzꞌul jun tiemp yi cyakil yi eꞌchk cꞌubeꞌj copon chꞌukiꞌn, —stzun Jesús scyetz.
Sbajok eꞌchk techl yi txant tan tuleꞌn yi chicaws wunak
(Mt 24.3-28; Mr 13.3-23)
7 Beneꞌn tzun chijakoltz:
—Taꞌ, ¿mbi tiempil bajij eꞌchk takleꞌnaꞌtz? ¿Tzꞌakꞌlok peꞌ jun techl yi txant tan tuleꞌn yi jun tiempaꞌtz?
8 Beneꞌn tzun tlol Jesús scyetz:
—Or tzitilwok, acxubsiꞌch. Na at eꞌ yi scyaleꞌ: ‘I inaꞌtz in Cristo.’ Nchaꞌtz at eꞌ yi scyaleꞌ: ‘Txant tan tuleꞌn yi tiemp,’ cheꞌch len sbneꞌ. Poro xomiꞌch iwiꞌ scyeꞌj. 9 Ej nin yil tzitbit yi na tzan eꞌchk lmak oyintziꞌ tu eꞌchk moloꞌn ib tan paj chiꞌch cꞌuꞌlal, quil cxeꞌl yab teꞌj. Na bintzinin sbajok yi eꞌchk takleꞌnaꞌtz, poro at tzaj nintz tan tuleꞌn yi wiꞌtzbil tiemp, —stzun Jesús bantz scyetz.
10 Nchaꞌtz tal iꞌ scyetz: “Choyintzink eꞌchk lmak tnum squibil quib. Nchaꞌtz eꞌ gobierum, choyintzink squibil quib. 11 Tzꞌul wiꞌnin eꞌchk lmak coblajnob. Tzꞌul weꞌj. Tzꞌul wiꞌnin yabil. Ej nin sbajok cyakil yi eꞌchk takleꞌnaꞌtz beneꞌn tziꞌn wi munt. Sbajok eꞌchk takleꞌn yi chin xoꞌwbil nin. Ej nin sjalok eꞌchk techl jalen tziꞌn tcyaꞌj.
12 “Poro yi ntaxk bajij cyakil yi eꞌchk takleꞌnaꞌtz, chocopon wunak tan itzꞌamleꞌn, nin tan ibiyleꞌn. Ncxben ticyꞌleꞌn ẍchiwutz eꞌ wiꞌ banl wiꞌ tetz eꞌchk sinagoga. Ej nin ncxben ticyꞌleꞌn xetzeꞌ cyaꞌn, tan tuꞌ yi na chin itocsaj. Ej nin ncxben ticyꞌleꞌn ẍchiwutz yi eꞌ rey, nin ẍchiwutz yi eꞌ gobernador. 13 Poro baꞌn, na sjalok amaꞌl tan xtxoleꞌn yi bintzi scyetz. 14 Quil cxbisun tan joyleꞌn puntil eꞌchk yol yi xconk itaꞌn tan icolol itib. 15 Na yil cxoponwok ẍchiwutz yi eꞌaꞌtz, swakꞌeꞌ itajtzaꞌkl tu yi eꞌchk weltil iyol. Nin cyaꞌl jun scyeri icontr yi nink xcyeꞌ tan xiteꞌn iyol. 16 At eꞌ tzixoꞌl yi chocopon chitaj chitxuꞌ tan chixochleꞌn. Ej nin nchaꞌtz at eꞌ yi iteꞌn nin quitzꞌun tu quitzicy chocopon tan chixochleꞌn. Nin nchaꞌtz at eꞌ yi chixonl quib chixocheꞌ chixonl. Nchaꞌtz ẍchibneꞌ eꞌ itamiw, chocopon tan ixochleꞌn. Nin at eꞌ tzixoꞌl yi ẍchiquimok cyaꞌn. 17 Cyakil wunak ẍchiꞌchok chicꞌuꞌl tziteꞌj tan paj yi xomquixwok sweꞌj. 18 Poro ilenin atix tetz tajal Ryos. Siquier nink jun xiꞌil iwiꞌ nink sotz cyaꞌn. 19 Kol tzꞌicyꞌpon eꞌchk qꞌuixcꞌujaꞌtz itaꞌn, xcambokwok te jun itzꞌajbil yi quinin bajsbeꞌn tetz.
20 “Ma yil tzitilwok yil sutij solteꞌj yi tnum Jerusalén cyaꞌn sanlar, iꞌtz jun techl yi txant tan sotzeꞌn yi tnum. 21 Cyakil yi eꞌ yi najlcheꞌ Judea, chin tajweꞌn cunin tan cyeleꞌn ojk wiꞌwtz. Nin yi eꞌ yi ateꞌ Jerusalén, tajweꞌn cunin tan cyeleꞌn ojk. Yi eꞌ yi quibeꞌ tnum, baꞌn tcuꞌn quil chipakxij. 22 Na yaꞌstzun tiemp yi tzꞌul chicaws yi eꞌ aj Jerusalén. Na tzꞌelk cuꞌn te yi tzꞌibaꞌnt cyen. 23 Poro chikꞌajab yi eꞌ xnaꞌn yi chꞌon wiꞌ, scyuchꞌ yi eꞌ yi niꞌ cuꞌn niꞌ scyeꞌj. Na cyakil wunak chitijeꞌ qꞌuixcꞌuj, nin tzꞌakꞌlok jun chin wutzileꞌn chicaws. 24 At eꞌ yi ẍchiquimok tul oyintziꞌ. Nin at eꞌ nchiben ticyꞌleꞌn pres beneꞌn tziꞌn lakak tnum. Ej nin chicawunk yi eꞌ awer nak le tnum Jerusalén jalen cuꞌn yil jepon te yi tiemp yi akꞌijt scyetz tan chicawuneꞌn.
Mbi cuꞌn sbajok yil tzꞌul tzaj yi Bajx Cyꞌajol
(Mt 24.29-35, 42-44; Mr 13.24-37)
25 “Kalenaꞌtz tzun bajij eꞌchk techl tcyaꞌj, te kꞌej nin te xaw, nin scyeꞌj eꞌchk txꞌuml. Ej nin chelepon yab wunak te yi mbi cuꞌn sbajok wi munt. Nin ẍchixobok tetz. Na chin xoꞌwbil nin sbneꞌ, niꞌcuꞌn sbneꞌ chi na wiꞌcaꞌp wiꞌ yi mar nin yi na jincan yi pakꞌbil. 26 Yil choꞌc wunak tan xtxumleꞌn yi mbi cuꞌn sbajok wi munt chuꞌl tunin colpuj tan xoꞌw. Nin cyakil yi eꞌ yi at caꞌwl ẍchikꞌab yi ateꞌ tcyaꞌj tul sutan tuꞌ chitxumuꞌn. 27 Kalenaꞌs tzun quil nin wunak in wutz, yi in Bajx Cyꞌajol. Choꞌn nuꞌl tcyaꞌj kale atit eꞌchk sbakꞌ. Cyꞌaꞌn nin inkꞌej tu inchamil waꞌn yil nuꞌl tzaj. 28 Ej nin yil xeꞌtij yi eꞌchk takleꞌnaꞌseꞌj, quiwswok itib. Quil cxbisun, na txant tzuntz tan iteleꞌntz liwr,” stzun Jesús scyetz.
29 Nchaꞌtz at jun elsawutzil xcon tan Jesús. Itzun taltz:
“Elk itxum tetz jun wiꞌ ibẍ, nka alchok jilwutz tzeꞌ. 30 Yi na xeꞌtij tan xlumineꞌn, na el katxum tetz yi txant tan tucumuleꞌn kꞌalaj. 31 Nchaꞌtz yil tzitil yi eꞌchk takleꞌnaꞌtz, iꞌtz jun techl yi txant tan tuleꞌn Ryos tan cawuꞌn wuxtxꞌotxꞌ.
32 “Jun cuꞌn yol na wal nin tzitetz, yi ntaxk chisotz yi eꞌ wunakaꞌtz,a sbajok eꞌchk takleꞌnaꞌtz. 33 Bintzi, yi tcyaꞌj tu yi wuxtxꞌotxꞌ sotzok, poro yi weri inyol quil sotz teraꞌtz.
34 “Or tzitil, eliꞌch nin italmaꞌ te yi eꞌchk takleꞌn yi quiꞌc na takꞌ. Oquiꞌch len aꞌ tiwiꞌ. Quil cxbisun tan eꞌchk sotzaj cꞌuꞌlal, na yi ko yaꞌtz, qui tzꞌicyꞌ tzitetz yil tzꞌul tzaj yi jun kꞌejlalaꞌtz. 35 Yil tzꞌul tzaj jun kꞌejlalaꞌtz, qui tzꞌicyꞌ scyetz yi eꞌ wunak wi munt, na choꞌn ẍchibneꞌ chi na cuꞌ lajpuj jun txuc tul paꞌtx. 36 Banwok list itib, na at tulbil yi jun tiempaꞌtz. Nin cꞌuchwok ẍchꞌeybil itetz tetz Kataj tan iteleꞌn liwr tkꞌab eꞌchk il yi sbajok. Ej nin nachwok Kataj yi iẍnink txiclquixeꞌtwok yil nuꞌl tzaj,” stzun Jesús bantz scyetz.