Yi elsawutzil tetz jun juez tu jun xmaꞌlcaꞌn
18
1 At jun tir tal Jesús jun elsawutzil scyetz yi eꞌ ẍchusbeꞌtz tan ẍchajleꞌn scyetz yi baꞌn tcuꞌn nachleꞌn Kataj swutz yi cob cꞌuꞌlal. 2 Itzun taltz scyetz: “At jun yaj yi juez iꞌ tul jun tnum. Quinin na tek iꞌ ẍchiꞌ Ryos. Pyor yi eꞌ tal wunak quiꞌc chikꞌej swutz iꞌ. 3 Toqueꞌn tzun jun xnaꞌn xmaꞌlcaꞌn tan cꞌucheꞌn jun pawor tetz. ‘Taꞌ, chincoleꞌuꞌ tkꞌab yi jun yi na tzan tan inxuxeꞌn.’ 4 Poro quinin oc il teꞌj te bajx tir xochoꞌn, ma yi teleꞌn nin cobox kꞌej tan xnaꞌn tan xochoꞌn nintzun oc iꞌ tan xtxumleꞌn: ‘Qui na wek ẍchiꞌ Ryos, nin quiꞌc chikꞌej wunak tzinwutz. 5 Poro tan tuꞌ yi na tzan taꞌk xnaꞌneꞌj tan inxuxeꞌn, tzimbneꞌ taneꞌn xtisyaꞌ iꞌ,’ stzun juez, chij Jesús.6 “Ma jaluꞌ elk itxum te xtxumuꞌn juez. 7 Ko ja chꞌeyan yi juez te yi prow xnaꞌnaꞌtz ¿qui ptzun tzꞌoc Ryos tan icolcheꞌn itetz yi axwok yi txaꞌij quixt taꞌn, yi axwok yi na cuꞌ iwutz skꞌejl nin lakꞌbal tetz? Tzꞌocopon bin, na qui na icyꞌ paj tan tbiteꞌn iyol. 8 Jun cuꞌn yol swaleꞌ nin tzitetz, jalcunin tzꞌocopon Ryos tan icolcheꞌn. Na wiꞌnin pasens Kataj Ryos skibaj. Poro yil nuꞌl tzaj junt tir ¿mi ẍchijalok peꞌ yi eꞌ yi kꞌuklij chicꞌuꞌl sweꞌj, nka quiꞌ peꞌ?
Yi elsawutzil tetz jun parisey tu jun aj peyunl
9 Ma jaluꞌ je junt elsawutzileꞌj yi xcon tan Jesús tan cꞌaseꞌn cyajtzaꞌkl yi eꞌ yi na cyocsaj yi ntin eꞌ cyetz eꞌ balaj. Itzun taltz:
10 “At jun tir eꞌ opon cob yaj tan nachleꞌn Kataj le caꞌl Ryos, jun parisey, nin jun elsanl alcawal cwent awer nak. 11 Jeꞌn tzun txiclok yi parisey tan nachleꞌn Kataj, nintzun taltz tcꞌuꞌl cuntuꞌ: ‘Ntyoẍ teruꞌ Taꞌ yi nkꞌeꞌtz niꞌcuꞌn in chi quitaneꞌn yi eꞌ mas wunak yi xkantzaj nink na cyaj. Chin cachiꞌ nin eꞌ. Eꞌ cuꞌn jopol wutzaj. Ntyoẍ teruꞌ Taꞌ yi nkꞌeꞌtz choꞌn in chi taneꞌn yi jun elsanl alcawaleꞌj. 12 Na yi in wetz, cob tir na inmucꞌ weꞌj le jun sman. Na wakꞌ indiesum te cyakil yi na intxꞌac,’ stzun yaj tetz Ryos tcꞌuꞌl cuntuꞌ. 13 Ma yi elsanl alcawal, joylaj txicl tzaj tan nachleꞌn Kataj. Ajnak cuntunin wutz wuxtxꞌotxꞌ. Quinin na xmayin nin muꞌẍ tal tcyaꞌj. Nternin na xtxakꞌ wutz teml tan paj yi wiꞌnin til na nach. Itzun taltz: ‘Taꞌ, elk kꞌajabuꞌ sweꞌj. Max cꞌuꞌluꞌ swibaj, na in juchul il,’ stzun iꞌ bantz,” chij Jesús scyetz. 14 “Jun cuꞌn yol na wal nin, yi jun yi xtxol yi til, yaꞌstzun yi jun yi sken cuylij paj yi tajeꞌn xe caꞌl. Ma yi junt, quiꞌ. Na cyakil yi eꞌ yi na cyocsaj quib nim, chocopon tetz juy. Na cyakil yi eꞌ yi na cyocsaj quib juy, sjalok cyetz chikꞌej swutz Ryos.”
Yi tkꞌol Jesús banl squibaj eꞌ nitxaꞌ
(Mt 19.13; Mr 10.13-16)
15 Wiꞌnin cyoponeꞌn wunak tu chinitxaꞌ, na yi cyetz cyajbil iꞌtz tan jeꞌn tkꞌol Jesús yi kꞌab ẍchiwiꞌ. Poro yi quilol yi eꞌ ẍchusbeꞌtz nin eꞌ octz tan chimakleꞌn. 16 Cheꞌ ẍchakol tzun Jesús yi eꞌ ẍchusbeꞌtz, itzun taltz scyetz:
—Akꞌwok amaꞌl tan cyucumuleꞌn yi eꞌ nitxaꞌ sweꞌj. Quil tzimak chiwutz. Na cyakil yi eꞌ yi choꞌn taneꞌn chicꞌulutxumil chi taneꞌn yi cꞌulutxumil jun nitxaꞌ yi na tocsaj tib juy, yaꞌstzun yi eꞌ yi ateꞌ tkꞌab Ryos. 17 Jun cuꞌn yol na wal nin tzitetz, alchok scyetz yi quil tocsaj yi balaj stziblal chi na tocsaj jun nitxaꞌ, quil tzꞌoc teꞌtz tajlal yi eꞌ yi ateꞌ jakꞌ caꞌwl Ryos.
Yi yaj yi chin ric nin
(Mt 19.16-30; Mr. 10.17-31)
18 Itzun bantz at jun yaj yi chibajxom wunak nintzun opontz tan jakleꞌn tetz Jesús yi ẍeꞌn lclax iꞌ:
—Taꞌ, chumbalaj nin iluꞌ. Taleꞌuꞌ swetz yi mbi tajweꞌn tan imbnol tan incambal yi itzꞌajbil yi quinin bajsbeꞌn tetz, —chij iꞌ.
19 —¿In peꞌ balaj le awutz atz? Ntin Ryos balaj. 20 Poro ko na awaj tzacambaj yi itzꞌajbil yi quinin bajsbeꞌn tetz, tajweꞌn yil cxom te yi caꞌwl Kataj yi na tal: “Quil cẍalkꞌij. Quil tzajal cuꞌn jun wi awakꞌ yi cẍoꞌc tan stiwiꞌn. Ej nin lokꞌweꞌ ataj atxuꞌ.”
21 —Poro Taꞌ, juyil cuꞌn in yi woqueꞌn tan banleꞌn taneꞌn cyakil yi eꞌchk caꞌwleꞌj.
22 Yi tbital Jesús yi yol iꞌ, itzun taltz:
—¿Yaꞌtz peꞌ? Poro at junt yi txeꞌn cẍjepon tuchꞌ. Cun cꞌay cyakil yi amebiꞌl, nin yi jamel baꞌn tzawoy scyetz yi eꞌ mebaꞌ. Sjalok tzun yi amebiꞌl tcyaꞌj. Kalenaꞌs tzun cxom tzaj sweꞌj, —stzun Jesús tetz.
23 Yi tbital yi yaj yi xtxolbileꞌj, quinin tzatzin teꞌj, na quinin cuꞌ swutz, na at wiꞌnin mebiꞌl. 24 Yi beneꞌn tilol Jesús yi quinin cuꞌ yi xtxolbilaꞌseꞌj swutz yaj, nintzun taltz scyetz wunak:
—At wiꞌnin qꞌuixbel tetz jun yi at mebiꞌl tan toqueꞌn jakꞌ caꞌwl Ryos. 25 Niꞌcuꞌn qꞌuixbel chi yi nink tzꞌicyꞌ jun camey tul yi julil jun bak tzꞌisbil.
26 Yi quibital wunak yi jun xtxolbilaꞌtz, itzun cyaltz:
—Ko yaꞌtz bintzi ¿ẍeꞌn tzun lclax jun?
27 —Bintzinin, at eꞌchk takleꞌn yi qui na chixcyeꞌ wunak teꞌj, poro yi Ryos na xcyeꞌ te cyakil, —stzun Jesús scyetz.
28 —Ma oꞌ ketz Taꞌ, ¿ja peꞌ kaclax? na ja cyaj kilol cyakil kamebiꞌl tan kaxomeꞌn teꞌjuꞌ, —stzun Luꞌ tetz Jesús.
29 —Jun cuꞌn yol swaleꞌ nin tzitetz, kol til cyen jun yaj yi caꞌl, nka yi taj xtxuꞌ, nka eꞌ titzꞌun tu stzicy, nka txkel tu eꞌ nitxajil, tan xomeꞌn te tajbil Ryos, tzꞌakꞌlok xel tetz. 30 Tzꞌakꞌlok mas tcuꞌn xel tetz tzoneꞌj wuxtxꞌotxꞌ, nin tul yi tiemp yi na xom tzaj scambok te jun itzꞌajbil yi quinin bajsbeꞌn tetz, —stzun Jesús scyetz.
Yi talol Jesús yi txant tan quimeꞌn iꞌ
(Mt 20.17-19; Mr 10.32-34)
31 Itzun bantz nin eꞌ cuꞌ ẍchamol yi eꞌ ẍchusbeꞌtz, itzun taltz scyetz:
—Ma jaluꞌ at kopombil Jerusalén, nin cyakil eꞌchk takleꞌn yi tzꞌibaꞌnt cyen cyakꞌun yi eꞌ elsanl stziꞌ Ryos, itzun iꞌaꞌs sbajok sweꞌj. 32 Na chinjatxlok ẍchikꞌab yi eꞌ yi nkꞌeꞌtz eꞌ katanum. Chocopon tan injisleꞌn. Chocopon tan imbuchleꞌn. Chocopon tan stzubeꞌn yi tꞌaꞌal chitziꞌ tinwutz. 33 Chinloꞌonk cyaꞌn tan xicyꞌxab, nin chinquimok cyaꞌn. Ma le toxiꞌn kꞌej nitzꞌok junt tir ẍchixoꞌl almaꞌ, —chij Jesús bantz scyetz.
34 Poro te yi xtxolbileꞌj quiꞌc nin muꞌẍ tal yi nink pujxij cyaꞌn. Na quinin lajluchax ẍchiwutz. Nin quinin meꞌl chitxum tetz yi mbi ekaꞌn tan yi yol yi tal Jesús.
Yi jakxeꞌn wutz moyiꞌẍ aj Jericó
(Mt 20.29-34; Mr 10.46-52)
35 Itzun bantz yi txant tan tponeꞌn Jesús le tnum Jericó, at tzun jun moyiꞌẍ cꞌolchij tzi beꞌ tan rmosumiꞌn. 36 Yi tbital moyiꞌẍ yi wiꞌnin chitencaneꞌn wunak tbeꞌ, nin ben jakol scyetz:
—¿Mbi na bajij?
37 —I yi Jesús yi aj Nazaret, ja icyꞌ cuꞌn tzoneꞌj, —cheꞌch wunak tetz.
38 Toqueꞌn tzun yi moyiꞌẍ tan sichꞌ:
—Jesús iluꞌ yi xonl kꞌajtzun Luwiy yi sukiꞌnt yi at tulbil,a elk kꞌajabuꞌ sweꞌj.
39 Cyoqueꞌn tzun yi eꞌ wunak yi bajxcheꞌ tan makleꞌn wutz tan qui ẍchꞌineꞌn. Poro mas tcunin ẍchꞌineꞌn iꞌ:
—¡Jesús iluꞌ yi xonl kꞌajtzun Luwiy, elk kꞌajabuꞌ sweꞌj!
40 Nintzun xcyeꞌ cuꞌn Jesús, nin ben ẍchakol jun tan ticyꞌleꞌn tzaj yi moyiꞌẍ swutz iꞌ. Ma yi tponeꞌn, beneꞌn tzun jakol Jesús tetz:
41 —¿Mbi na awaj yil tzimban tzaweꞌj?
—Taꞌ, yi wajbil iꞌtz yil jakxij yi inwutz tanuꞌ.
42 —Ja wiꞌt ul yos tzawuchꞌ, tan tuꞌ yi na awocsaj yi inaꞌtz yi jun xonl Luwiy yi at tulbil.
43 Jalt cuntunin sajeꞌn tlol Jesús yi yoleꞌj yi taꞌweꞌn wutz yi moyiꞌẍ. Ninin tzun xom nintz te Jesús. Wiꞌnin beneꞌn iꞌ tan takꞌleꞌn kꞌajsbil tetz Ryos. Nin nchaꞌtz cyakil yi eꞌ yi iꞌlon yi baꞌn xmayin yi moyiꞌẍ, nin eꞌ octz tan takꞌleꞌn chikꞌajsbil tetz Ryos.