Yi elsawutzil tetz jun cneꞌr yi txꞌakxij
(Mt 18.10-14)
15
1 Itzun bantz nin eꞌ opon wiꞌnin juchul il te Jesús tan tbiteꞌn yol iꞌ, scyuchꞌ cobox judiy yi na chixcon cyakꞌun awer nak tan telseꞌn alcawal. 2 Poro yi eꞌ parisey scyuchꞌ yi eꞌ txꞌolol xoꞌl yi ley Moisés, nin eꞌ octz tan yolcheꞌn Jesús. Itzun cyaltz:—Na takꞌx amaꞌl scyetz yi eꞌ juchul il nin na wanx scyuchꞌ, —cheꞌch squibil quib.
3 Chaꞌstzun te tlol Jesús yi jun elsawutzileꞌj scyetz: 4 “Ko at jun scyeruꞌ yi at jun cient tawun, nin ltxꞌakx jun ẍchixoꞌl, ¿qui pel cheꞌ jutzꞌ cyen yi jun mutxꞌ tu belulaj le pstorbil tan beneꞌn tan joyleꞌn yi junt yi ntxꞌakx cyen? Ẍcheꞌ jutzꞌeꞌ cyen, nin mben tan joyleꞌn jalen cuꞌn yil jal taꞌn. 5 Yil jal, stzatzink tzuntz, nin stekeꞌ tzajtz. 6 Ma yil tzꞌopon yaj xe caꞌl, staleꞌ stziblal scyetz eꞌ wisin, scyuchꞌ yi eꞌ mas tamiw: ‘Katzatzink, na ja jal yi jun tal wawun yi ntxꞌakxij.’ 7 Ma jaluꞌ, swaleꞌ nin scyeruꞌ yi mbi na elepont yi jun elsawutzileꞌj. Wiꞌnin tzatziꞌn na bajij tcyaꞌj yi na xtxꞌixpuj jun juchul il yi tajtzaꞌkl. Mas tcuꞌn tzatziꞌn na bajij te yi junaꞌtz yi na jal ẍchiwutz yi jun mutxꞌ tu belulaj yi baꞌn ateꞌt nin, yi quiꞌc tajweꞌn tan chitxꞌixpul cyajtzaꞌkl.
Yi elsawutzil tetz jun pwok yi txꞌakxij
8 “Nin je junt elsawutzileꞌj: Ko at jun xnaꞌn yi at lajuj sakal tuchꞌ nin ltxꞌakxij jun, ¿qui poloꞌ tzꞌoc kꞌakꞌ taꞌn nin tzꞌoctz tan masleꞌn xe caꞌl jalen cuꞌn ljal yi sakal taꞌn yi ntxꞌakxij? 9 Yil wiꞌt jal taꞌn staleꞌ scyetz yi eꞌ tamiw nin scyetz yi eꞌ wisin: ‘Katzatzink, na ja jal yi insakal yi ntxꞌakxij,’ chij iꞌ sbneꞌ scyetz. 10 Yaꞌstzun na bajij tziꞌn tcyaꞌj yi na xtxꞌixpuj jun juchul il yi tajtzaꞌkl, wiꞌnin na chitzatzin yi eꞌ ángel teꞌj.
Yi cyꞌajol yi baj sotzal yi herens
11 Ej nin tal Jesús junt xtxolbiltz: “At jun yaj yi at cob cyꞌajl. 12 Itzun yi jun juy, nin octz tan talcheꞌn tetz yi taj: ‘Taꞌ,’ chij, ‘na kloꞌ waj yil sjatx cuꞌnuꞌ yi mebiꞌluꞌ skawutz.’ Cweꞌn tzun jatxol wutzileꞌn yi mebiꞌltz ẍchiwutz. 13 Nin yi teleꞌn cobox kꞌejtz toqueꞌn tzun yi caꞌp naktz tan molcheꞌn cyakil yi jamel yi herensaꞌtz. Nintzun bentz joylaj tcꞌuꞌl junt tnum. Yaꞌstzun bajeꞌt sotzal cyakil yi puꞌk. Bich cuntunin sotz nint yi puꞌk taꞌn. 14 Te yi nsken wiꞌt baj sotzal cyakil yi puꞌk, cweꞌn tzun jun chumam weꞌj le tnumaꞌtz. Toqueꞌn tzun yajtz wutz peꞌm. 15 Jaleꞌn tzun takꞌuntz taꞌn tu jun aj tnum. Nintzun ben chakijtz tan chipstoreꞌn boch. 16 Wiꞌnin tzun teleꞌn nin talmaꞌ-tz te chiwaꞌ yi eꞌ boch. 17 Tuleꞌn tzun colpuj twiꞌ, nintzun octz tan xtxumleꞌn tcꞌuꞌl cuntuꞌ: ‘Quin tech nin akꞌunwil tuchꞌ intaj. 18 Baꞌn tcuꞌn nnaꞌj te intaj, na quiꞌc weꞌj na quil yi eꞌ mos intaj. Ma yi in wetz, chin il nin atin cuꞌnt tzoneꞌj tan weꞌj. Naꞌj loꞌtz te intaj, nin swaleꞌ tetz: Taꞌ, ja injuch wil swutz Ryos nin swutzuꞌ. 19 Quiꞌct jopij wutz waꞌn tan woqueꞌn tetz cyꞌajluꞌ. Lok scꞌuluꞌ tan woqueꞌn chi jun mosuꞌ,’ stzun iꞌ bantz tcꞌuꞌl cuntuꞌ. 20 Tajeꞌnt tzuntz te taj.
“Ma yi beneꞌn tilol yi taj yi uleꞌn atit yi cyꞌajl, nintzun el nin toꞌkl cꞌuꞌltz teꞌj. Lajkeꞌl nintzun beneꞌntz tan cꞌulcheꞌn. Nin yi chicꞌulul quib nin bentz tan kꞌaleꞌn tzaj yi cyꞌajl, nin baj stzꞌubultz. 21 Beneꞌn tzun tlol yi cyꞌajl tetz: ‘Taꞌ, ja injuch wil swutz Ryos nin swutzuꞌ. Ma jaluꞌ quiꞌc jopij wutz waꞌn tan woqueꞌn tetz cyꞌajluꞌ.’ 22 Beneꞌn tzun tlol yi taj scyetz yi eꞌ mos: ‘Joywok tzaj yi beꞌch wetz yi mas balaj nin akꞌwok quen teꞌj, nin akꞌwok quen jun xmalkꞌabtz wi kꞌab. Ej nin akꞌwok quen xajabtz. 23 Nin cun cyꞌajwok yi neꞌẍ wacẍ yi kꞌansaꞌnt, nin biywok cuꞌntz. Kawank jun, nin katzatzink, 24 na tzinwutz wetz yi incyꞌajleꞌj quimnakt. Poro quiꞌ loꞌ, na ja ult. Txꞌakxnakt, poro ja jalt junt tir.’ Chibaj xeꞌteꞌn tzuntz tan tzatziꞌn.
25 “Itzun yi bajx cyꞌajol, choꞌn tzun at teraꞌstz xoꞌl wutz. Ma yi tuleꞌn tzaj nakaꞌjil yi caꞌl, nintzun ben tbital yi son tu yi bixl yi na tzan. 26 Sajeꞌn tzun ẍchakol jun scyeri eꞌ mos yi taj, nintzun jaktz tetz: ‘¿Mbi tzun na bajij xe caꞌl?’ stzun iꞌ. 27 ‘Ja ul yi titzꞌunuꞌ, nin yi tajuꞌ ja cuꞌ biyol jun neꞌẍ wacẍ yi kꞌansaꞌnt, na baꞌn cuntuꞌ muꞌlt junt tir.’
28 “Cyakaxeꞌn tzun yi bajx cyꞌajoltz, nin quinin oc tkꞌol tib. Teleꞌn tzaj tzun yi taj tan moxeꞌn tan toqueꞌn scyeꞌj xe caꞌl. 29 Poro stzaꞌwel tzun iꞌ tetz yi taj: ‘Taꞌ, til tzajuꞌ, yi in wetz jatix nin loꞌ yob waꞌwleꞌnix tan akꞌun tuchꞌuꞌ, ej nin quiꞌc nin jun tir jak takꞌuꞌ jun inchiw tan cweꞌn imbiyol tan intzatzineꞌn scyuchꞌ eꞌ wamiw. 30 Ma yi muꞌl tzaj nocx cyꞌajluꞌeꞌj, yi ja baj sotzalx yi puꞌkuꞌ scyeꞌjak eꞌ xnaꞌn, yi eꞌ wiꞌtz bnol tetz, jalcunin ncuꞌ biyoluꞌ yi jun neꞌẍ wacẍ yi kꞌansaꞌnt,’ stzun iꞌ bantz.