Yi tuleꞌn yos tan Jesús tu jun yaj yi jeꞌnak tu xub wankil tan mal
14
1 Itzun bantz tcꞌuꞌl jun kꞌej ujleꞌn, nin oc Jesús tan waꞌaꞌn xeꞌ caꞌl jun wiꞌ banl chiwiꞌ eꞌ parisey. At tzun cobox parisey eꞌ ocopontz tan joyleꞌn juꞌ yi naꞌ-k jal cuꞌnt til Jesús cyaꞌn. 2 Tilol tzun Jesús jun yaj xe caꞌl yi benak tunin xub yi wankil tan mal. 3 Toqueꞌn tzun Jesús tan yol scyetz eꞌ txꞌolol xoꞌl yi ley Moisés, scyuchꞌ yi cobox pariseyaꞌtz:—¿Cu peꞌ cyanuꞌ, kol katzꞌacan le jun kꞌej ujleꞌn? —stzun Jesús scyetz.
4 Siquierk nin jun yol saj chitzaꞌwel. Toqueꞌn tzun macol Jesús yi yaj, ninin ul yos tuchꞌ. Ajeꞌn nin ban tetz yaj.
5 —¿At peꞌ jun ẍchixoꞌluꞌ kol ben mulkꞌuj jun buruꞌ nka jun wacẍ tul jun julil aꞌ le jun kꞌej ujleꞌn yi quiꞌk ben lajkeꞌl tan jeꞌseꞌn tzaj? —stzun Jesús scyetz.
6 Siquierk nin, nink saj chitzaꞌwel yi xtxolbileꞌj.
Yi elsawutzil scyetz aj quicyujinl
7 Yi tilol Jesús yi ẍeꞌn cuꞌn quitaneꞌn wunak tan joyleꞌn yi bajx chem nintzun octz tan talcheꞌn nin jun elsawutzil scyetz. Itzun taltz:
8 —Yi na chitxoclijuꞌ tan waꞌaꞌn te jun quicyuj, quil chicꞌoleꞌuꞌ tibaj yi bajx chem, na quicunin bantz ja txoclij jun yaj yi at mas kꞌej ẍchiwutz cyeruꞌ. 9 Na yi ko nsken chicꞌoleꞌuꞌ yil chuꞌl tzaj yi taw kꞌej tu yi xtxocum, staleꞌ iꞌ scyeruꞌ: ‘Cheꞌlkuꞌ tzoneꞌj. Cyakꞌ cyenuꞌ chem tetz intxocumeꞌj.’ Chitxꞌixwok tzunuꞌ-tz yil choꞌcuꞌ tan joyleꞌn yi cyeruꞌ chichemuꞌ wutz coc. 10 Ma na yil chitxoclijuꞌ, chicꞌolekuꞌ tibaj yi wiꞌtzbil chem. Yil tzꞌul tzaj yi txocol cyeruꞌ, quicunin batz staleꞌ iꞌ: ‘Or cyeruꞌ chicꞌolekuꞌ tibaj yi balaj chemeꞌj.’ Sjalok tzun cyeruꞌ chikꞌejuꞌ-tz ẍchiwutz cyakil yi eꞌ txocum yi cꞌolẍcheꞌ. 11 Na cyakil yi eꞌ yi na cyocsaj quib nim, tzꞌelepon chikꞌej. Ej nin cyakil yi eꞌ yi na cyocsaj quib tetz juy, sjalok chikꞌej.
12 Nchaꞌtz tal Jesús tetz yi taw caꞌl yi txocon iꞌ tan waꞌaꞌn:
—Yil txumxij jun waꞌaꞌn tanuꞌ, quil cheꞌ ẍchakuꞌ yi eꞌ tamiwuꞌ; quil cheꞌ ẍchakuꞌ yi eꞌ tajwutzuꞌ; quil cheꞌ ẍchakuꞌ yi eꞌ xonluꞌ; quil cheꞌ ẍchakuꞌ yi eꞌ wisinuꞌ yi wiꞌnin chimebiꞌl. Na quicunin batz chuꞌl tan xtxocleꞌnuꞌ tan cyakꞌol xel yi waꞌaꞌn yi eꞌ xtxocuꞌ teꞌj. 13 Poro yil xtxumuꞌ jun waꞌaꞌn, cheꞌ xtxoqueꞌuꞌ yi eꞌ mebaꞌ, nka yi eꞌ poꞌtnak chiwankil, yi eꞌ coꞌx, nin yi eꞌ moyiꞌẍ. 14 Ko yaꞌtz sbanuꞌ, sjalok tzun mebiꞌluꞌ-tz, na quiꞌc ẍchꞌiwuꞌ tan tuleꞌn xel cyaꞌn. Poro tzantzaj yil chitzꞌij junt tir yi eꞌ balaj, xelank yi toyuꞌ.
Jun xtxolbil tetz jun balaj waꞌaꞌn
15 At tzun jun scyeri yi eꞌ yi cꞌolẍcheꞌ wi mes, nin yi tbital iꞌ yi yol Jesús, nintzun taltz:
—Baꞌn cyeri yi eꞌ yi ẍchiwank te Ryos tzantzaj, —stzun iꞌ scyetz wunak.
16 Beneꞌn tzun tlol Jesús tetz:
—At jun yaj cuꞌ xtxumul jun chumbalaj waꞌaꞌn. Nin el stziblal taꞌn scyetzak wiꞌnin wunak. 17 Yi bnixeꞌn yi waj, nintzun ben ẍchakol jun ẍchakum tan talcheꞌn scyetz yi eꞌ xtxocum yi nsken bnix. ‘Baꞌn chibenuꞌ na ja bnix kawaꞌ,’ chij. 18 Yi quibital yi yol yi jun chakumaꞌtz, cyaꞌl nin jun cujij. Na i saj stzaꞌwel yi bajx: ‘Scuyuꞌ impaj. Quinin chimben na at jalaj intxꞌotxꞌ minlokꞌ. Chin tajweꞌn cunin chimben tan xmayeꞌn.’
19 “Ej nin at junt aꞌlon: ‘Scuyuꞌ impaj. Quinin chimben na at jun lmuj inwacẍ minlokꞌ. Chin tajweꞌn cunin chimben tan chipileꞌn yi ko baꞌn chakꞌuj.’
20 “Ej nin at junt aꞌlon: ‘Scuyuꞌ impaj. Quinin chimben, na anaꞌ na kumeꞌ.’
21 “Itzun yi pakxeꞌn yi chakum, talol tzun iꞌ yi xtxolbilaꞌtz tetz patrón. Nin yi tbital yi taw kꞌej cyakil yi xtxolbil, wiꞌnin ẍchiꞌcheꞌn cꞌuꞌl. Beneꞌnt tzun ẍchakol junt tir yi ẍchakumtz. ‘Quiloꞌk lajkeꞌl lakak eꞌchk cꞌaybil, nin lakak eꞌchk beꞌ. Txocweꞌ tzaj cyakil yi eꞌ mebaꞌ, scyuchꞌ yi eꞌ poꞌtnak chiwankil, yi eꞌ coꞌx, scyuchꞌ eꞌ moyiꞌẍ.’ 22 Ma yi pakxeꞌnt yi chakum, nintzun taltz tetz taw kꞌej: ‘Taꞌ, ja xnaꞌk te mantar yi ntaluꞌ swetz, poro na wil yi at amaꞌl tetz mas.’ 23 ‘Quiloꞌk bin lakak eꞌchk nim beꞌ, nin lakak eꞌchk kꞌab beꞌ. Banaj puers tan chimoxeꞌn tzaj yi eꞌ wunak tan cyuleꞌn tzoneꞌj, na na waj yil noj cuꞌn incaꞌl. 24 Poro jun cuꞌn yol, quil wakꞌ amaꞌl scyetz yi eꞌ yi quinin nchicujij tan cyuleꞌn,’ stzun taw kꞌej bantz, —stzun Jesús.
Tajweꞌn tan cyajeꞌn cyen kilol cyakil ko na kaj kaxom te Cristo
25 At jun tir xomcheꞌ jun cꞌoloj wunak te Jesús. Jeꞌn tzun suchꞌkꞌil tib ẍchiwutz yi eꞌ wunakaꞌtz. Itzun tal scyetz:
26 “Ko at jun yi na taj xom tzaj sweꞌj, quil wakꞌ amaꞌl tetz ko nkꞌeꞌtz list iꞌ tan cyajeꞌn cyen tilol yi taj xtxuꞌ. Nin quil wakꞌ amaꞌl tetz ko nkꞌeꞌtz list iꞌ tan cyajeꞌn cyen tilol yi txkel scyuchꞌ eꞌ nitxajil. Nchaꞌtz quil wakꞌ amaꞌl tetz ko nkꞌeꞌtz list iꞌ tan cyajeꞌn cyen tilol yi eꞌ titzꞌun scyuchꞌ eꞌ stzicy.a Ej nin nchaꞌtz, quil wakꞌ amaꞌl tetz ko nkꞌeꞌtz list iꞌ tan cyajeꞌn cyen tilol yi ankꞌiꞌn tetz tzoneꞌj wuxtxꞌotxꞌ tu cyakil yi tetz mebiꞌl. Ko nkꞌeꞌtz list jun tan cyajeꞌn cyen cyakil, quil wakꞌ amaꞌl tetz tan xomeꞌn sweꞌj.b 27 Na quiꞌc rmeril tan toqueꞌn jun yaj tetz inchusbeꞌtz ko nkꞌeꞌtz tkꞌoꞌnt tib tan quimeꞌn tan paj yi xomij iꞌ sweꞌj. 28 Na ko at eꞌ yi na cyaj chixom tzaj sweꞌj, chin tajweꞌn cunin yil choꞌc tan xtxumleꞌn yi kol chixcyeꞌ teꞌj, chi na ban jun yaj tan xtxumleꞌn jun acꞌaj caꞌl. Chin tajweꞌn cunin yil tzꞌoc iꞌ tan xtxumleꞌn yi eꞌchk gast, tan teleꞌn xtxum tetz kol xcyeꞌ tan xtxicbajeꞌn nka quiꞌ. 29 Na lastum ko ntin bnix yi xeꞌ taꞌn, nin quil xcyeꞌ tan jopleꞌn wiꞌ. Tzꞌelepon tzun xtxꞌix iꞌ yil cyal wunak: 30 ‘Lastum yi yajeꞌj. Ntin cuꞌ xeꞌtzal yi caꞌl, nin quinin meꞌl cuꞌntz teꞌj,’ cheꞌch sbneꞌ tetz.
31 “Ej nin nchaꞌtz, ko at jun rey yi ntin lajuj ntziꞌ mil sanlar ateꞌ-tz teꞌj, nin tzꞌul junt contr yi cyꞌaꞌn cheꞌ junak mil taꞌn, ¿qui peꞌ ltzꞌoc yi rey yi lajujeꞌn mil sanlar cyꞌaꞌn cheꞌ taꞌn tan xtxumleꞌn pe xcyek nka quiꞌ? 32 Nin yil nachon teꞌj yi quil xcyeꞌ, nchiben ẍchakol yi eꞌ ẍchakum tan joyleꞌn puntil tan stzajeꞌn yi oyintziꞌ. 33 Nchaꞌtz eꞌ cyeruꞌ, ko na cyajuꞌ chixom tzajuꞌ sweꞌj, chin tajweꞌn cunin yi list eꞌuꞌ tan cyajeꞌn cyen quiloluꞌ cyakil.