Ko quil kabisun tan kil sotzel kawutz sbneꞌ
13
1 I cunin na tzan Jesús tan xtxoleꞌn yi cyoponeꞌn cobox yaj tan talcheꞌn jun xtxolbil tetz. Itzun cyaltz:—At cobox aj Galilea yi i cunin na chitzan tan biyleꞌn chitxꞌixwatz yi cyoponeꞌn biyol cyetz takꞌun Pilato. Ej nin yi cyetz chiẍchꞌel nin yuj tib tu yi ẍchꞌel yi chitxꞌixwatz, —cheꞌch tzun bantz tetz Jesús.
2 —Na loꞌ cyal cyeruꞌ yi ja chitij yi qꞌuixcꞌujaꞌtz tan paj yi mas tcuꞌn cyetz quil ẍchiwutz cyakil yi eꞌ mas aj Galilea. 3 Poro quiꞌ. Ma yi eꞌ cyeruꞌ, ko quil chibisunuꞌ tan quiluꞌ, nin ko quil chitxꞌixpujuꞌ yi cyajtzaꞌkluꞌ, sotzel chiwutzuꞌ sbneꞌ. 4 Nin nchaꞌtz yi chiquimeꞌn yi wajxoklaj wunak tzakꞌ yi culunil, yi ncuꞌ wocꞌ le amaꞌl Siloé, ja loꞌ chitxumuꞌ yi mas tcuꞌn cyetz quil nchijuch ẍchiwutz cyakil wunak aj Jerusalén. 5 Poro quiꞌ. Nin nchaꞌtz eꞌuꞌ, ko quil chibisunuꞌ tan quiluꞌ, nin ko quil chitxꞌixpujuꞌ cyajtzaꞌkluꞌ sotzel chiwutzuꞌ sbneꞌ, —stzun Jesús scyetz.
Yi xtxolbil tetz jun wiꞌ loꞌbaj yi qui na wutzin
6 Tlol tzun Jesús junt elsawutzil scyetz:
—Oktz kaꞌn yi at jun yaj yi cuꞌnak tawal jun wiꞌ ibẍ tcꞌuꞌl jalaj xtxꞌotxꞌ. Beneꞌn tzun iꞌ tan tilweꞌn ko at wutz, poro quinin jal jun wutz taꞌn. 7 Itzun taltz tetz yi qꞌuicyꞌlom amaꞌl: ‘Oxix yob yi waꞌwleꞌnix tan xmayeꞌn yi wutz yi jun wiꞌ ibẍeꞌj poro quiꞌc jun wutz na jal waꞌn. Ma jaluꞌ, tameꞌn, na txꞌotxꞌ tuꞌ na mak,’ stzun taw luwar tetz yi qꞌuicyꞌlom. 8 ‘Taꞌ,’ chij yi mos, ‘cuk tuꞌ junt yobtz. Nocopon tan banleꞌn baꞌn tetz. Stzꞌok awon waꞌn txeꞌ. 9 Nin kol wutzin, qui tzun stamuꞌ-tz, poro ko quil wutzin kalenaꞌs tzun stameꞌnuꞌ-tz,’ stzun qꞌuicyꞌlomaꞌtz tetz taw ujul, —chij Jesús bantz scyetz.
Yi tuleꞌn yos tu jun xnaꞌn le jun kꞌej ujleꞌn
10 Itzun bantz, at jun tir na tzan Jesús tan chichusleꞌn wunak le jun sinagoga. 11 At tzun jun xnaꞌn yi sken el wajxoklajix yob yi tzꞌamij tan jun yabil. Jeꞌnak tlen tunin ẍocpuj tan yi jun yabilaꞌtz. Nin quinin na jeꞌ teꞌj. 12 Yi beneꞌn tilol Jesús jun xnaꞌnaꞌtz nintzun saj ẍchakoltz. Itzun taltz tetz:
—Ja wiꞌt ul yos tzawuchꞌ, —stzun Jesús bantz tetz.
13 Nin jeꞌ tkꞌol Jesús yi kꞌab twiꞌ, ninin ul yos tuchꞌ. Toqueꞌn tzun xnaꞌntz tan takꞌleꞌn kꞌajsbil tetz Ryos. 14 Poro yi ajcaw tetz yi sinagoga wiꞌnin ẍchiꞌcheꞌn cꞌuꞌl te Jesús tan paj yi mmuꞌl yos taꞌn tu jun wunak le jun kꞌej ujleꞌn. Chaꞌstzun te tlol iꞌ scyetz cyakil wunak:
—At kak kꞌej tetz akꞌun. Ej nin tcꞌuꞌl yi kak kꞌejaꞌtz baꞌn chuꞌluꞌ tan tzꞌac ib. Qui na waj yil chuꞌluꞌ tan tzꞌac ib tcꞌuꞌlak jujun kꞌej ujleꞌn, —stzun ajcaw tetz sinagoga scyetz wunak.
15 Beneꞌn tzun tlol Jesús:
—Chiplaj tuwuꞌ, chiwutz tuwuꞌ, na tcꞌuꞌl yi jun kꞌej ujleꞌn quiꞌc nin jun scyeruꞌ yi quiꞌk na stzakplen yi tetz wacẍ nka tetz buruꞌ tan ẍchajleꞌn tcꞌaꞌ. 16 Ko yaꞌtz na chibanuꞌ le jun kꞌej ujleꞌn, quiꞌc peꞌ cu tan tulseꞌn yos tuchꞌ yi xnaꞌneꞌj le jun kꞌej ujleꞌn. Na ja el wajxoklajix yob yi xtxꞌamxleꞌnix tan yabil. ¿At ptzun kil teꞌj kol tzꞌul yos tu jun wunak kaꞌn le jun kꞌej ujleꞌn? —stzun Jesús scyetz.
17 Wiꞌnin chitxꞌixweꞌn yi eꞌ contr Jesús yi quibital yi xtxolbilaꞌseꞌj. Ma yi eꞌ mas wunak wiꞌnin chitzatzineꞌn te yi eꞌchk takleꞌn balaj yi na bnix tan Jesús.
Yi elsawutzil tetz tijal muẍtans
(Mt 13.31-32; Mr 4.30-32)
18 Beneꞌn tzun tlol Jesús scyetz: “¿Mbik xcon waꞌn tan ẍchajleꞌn scyeruꞌ yi ẍeꞌn quitaneꞌn yi eꞌ yi xomcheꞌ te Ryos jaluꞌ? ¿Mbik elsawutzilil xcon waꞌn? 19 Je bin taneꞌneꞌj: Niꞌcuꞌn eꞌ chi jun bakꞌwutz muẍtans yi cuꞌ tawal jun yaj le xtxꞌotxꞌ. Jalcunin jeꞌn muleꞌn. Chumam nin wutz tkan ban, chi jun wiꞌ tzeꞌ. Poro ja choꞌc chꞌuꞌl tan banleꞌn chisoc wiꞌak kꞌab.”
Yi elsawutzil tetz yi xtxꞌamil pam
20 Nchaꞌtz tal iꞌ: “¿Mbik junt elsawutzil xcon waꞌn tan ẍchajleꞌn scyeruꞌ yi ẍeꞌn quitaneꞌn yi eꞌ yi xomcheꞌ te Ryos? 21 Je bin quitaneꞌneꞌj: Choꞌn quitaneꞌn chi na tulej jun xnaꞌn yi na yuj cuꞌn muꞌẍ txꞌam tcꞌuꞌl ox chin maꞌlbil arin, poro na ben loꞌon yi txꞌamaꞌtz tcꞌuꞌl cyakil arin.”
Yi beꞌ juy wutz
(Mt 7.13-14, 21-23)
22 Ticyꞌeꞌn tzun iꞌ lakak eꞌchk tnum tu eꞌchk aldey tan tponeꞌn jalen Jerusalén. Nin octz tan chichusleꞌn eꞌ wunak lakak eꞌchk amaꞌlaꞌtz.
23 At tzun jun yaj jilontz tetz. Itzun taltz:
—Taꞌ, chinch wetz quiꞌc mas kaxoneꞌn yi oꞌ yi skaclaxok, —stzun yaj bantz tetz Jesús.
24 —Chibneꞌuꞌ puers tan cyoqueꞌn poneꞌnuꞌ, na chin latzꞌluj nin yi puert. Na jun cuꞌn, at wiꞌnin eꞌ yi na kloꞌ cyaj choꞌc poro quil tzꞌakꞌlij amaꞌl scyetz, na jajtz yi na jop cuꞌn yi taw caꞌl yi puert ẍchiwutz. 25 Quiꞌct rmeril mpe ateꞌ ninkuꞌ-tz wutz puert. Quiꞌc rmeril mpe nink choꞌcuꞌ tan cꞌonleꞌn quen wutz puert nin tan sichꞌ: ‘Taꞌ jakeꞌnuꞌ puert skawutz.’ Quiꞌc rmeril tan jakxeꞌn yi puert, na staleꞌl tzaj taw caꞌltz: ‘Qui wajskeꞌn iwutz.’ 26 Quiꞌc rmeril mpe nink cyaluꞌ: ‘Poro taꞌ, ja kawan, nin ja kucꞌaꞌ tuchꞌuꞌ, nin ja koꞌ ẍchusuꞌ lakak beꞌ le katanum,’ cheꞌchuꞌ sbneꞌ. 27 Quiꞌc rmeril, na tzꞌeluꞌl stzaꞌwel xe caꞌl: ‘Qui wajskeꞌn iwutz. Quiteleꞌnk, na axwok pajol caꞌwl,’ stzun iꞌ sbneꞌ-tz scyeruꞌ. 28 Ẍchokꞌokuꞌ nin ẍchiꞌchok chicꞌuꞌluꞌ yil tzꞌel chitxumuꞌ tetz yi quibeꞌuꞌ cyajlal yi eꞌ yi nsken wiꞌt chicambaj yi balaj tiemp yil cawun Ryos. chi quitaneꞌn Abraham tu Isaac tu Jacow, scyuchꞌ cyakil yi eꞌ elsanl stziꞌ Ryos yi ẍchicambok te yi jun balaj tiempaꞌtz. 29 Ej nin nchaꞌtz at wiꞌnin jilwutz wunak beneꞌn tziꞌn wi munt yi chitzatzink yil chaꞌtij tul yi jun balaj tiempaꞌtz yil cawun Ryos. 30 Poro le chiwutz cyeruꞌ quiꞌc noc chibalajil yi eꞌ wunakaꞌtz, ma swutz Ryos eꞌ balaj. Nchaꞌtz at eꞌ ẍchixoꞌluꞌ yi na cyocsaj quib balaj, poro swutz Ryos quiꞌc noc chibalajil.
Yi tokꞌeꞌn cꞌuꞌl Jesús scyeꞌj aj Jerusalén
(Mt 23.37-39)
31 I cunin na tzan iꞌ tan xtxoleꞌn yi yoleꞌj yi cyoponeꞌn cobox parisey. Itzun ben cyaloltz tetz Jesús:
—Baꞌn tcuꞌn yi nink tzꞌeluꞌ ojk tzoneꞌj tnum, na yi tajbil Herodes iꞌtz tan biyleꞌnuꞌ, —cheꞌch eꞌ parisey bantz tetz Jesús.
32 —Nak cyaleꞌuꞌ tetz yi jun tal prowaꞌtz: ‘Yi in wetz na chin tzan tan telseꞌn len eꞌ espíritu cwent Baybaꞌn, nin tan chitzꞌaqueꞌn yi eꞌ yabiꞌẍ. Ej nin iteꞌn nin tzimbneꞌaꞌtz ek caꞌp. Ma oxen, yaꞌstzun lbnix yi wetz wakꞌun,’ cheꞌchuꞌ sban tetz. 33 Poro bintzinin chin tajweꞌn cunin yil wojkel nin tan wuponeꞌn ek caꞌp Jerusalén, na lastum ko nkꞌeꞌtz eꞌ aj Jerusalén lchoꞌc tan imbiyleꞌn. Na cyakil yi eꞌ elsanl stziꞌ Ryos yi nxcon taꞌn sajleꞌn tunin choꞌn nchiquim wutz ẍchikꞌab yi eꞌ aj Jerusalén.
34 “Lastum eꞌ aj Jerusalén. Lastum eꞌ, na eꞌ cuꞌn biyol elsanl stziꞌ Ryos. Nin ilenin ja choꞌc tan chicꞌoxleꞌn yi eꞌ yi na cheꞌ inchak nin ẍchixoꞌl. Jat loꞌ tir ja okꞌ incꞌuꞌl tan chiclaxeꞌn. Ja kloꞌ choꞌc jakꞌ inkꞌab, chi na cheꞌ tulej jun xtxuqꞌuitx yi eꞌ tal. Poro qui nchicujij. 35 Ma jaluꞌ, quiꞌc wetz scyuchꞌ. Chiqꞌuicyꞌlej quibaꞌtz. Poro jun cuꞌn, quiꞌt quil inwutz jalen cuꞌn yil cyal: ‘Jun cuꞌn at banl Kataj Ryos tibaj yi juneꞌj yi nsaj ẍchakol iꞌ.’