Yi chibeneꞌn ẍchakol yi oxcꞌal tu lajuj aj txolinl
10
1 Itzun bantz yi bajeꞌn xtxolil yi eꞌchk xtxolbilaꞌseꞌj, toqueꞌn tzun Jesús tan chibixbajeꞌn cobox ẍchakum. Oxcꞌal tu lajuj chixoneꞌn.a Nin eꞌ ben ẍchakol lakak eꞌchk tnum kale atiteꞌt bembil iꞌ.2 Yi ntaxk chiben, nintzun ben tlol jun elsawutzil scyetz:
“Jun cuꞌn yol swaleꞌ nin tzitetz, yi cosech wiꞌnin, poro yi eꞌ akꞌunwil quiꞌc mas chixoneꞌn. Chaꞌstzun te, cꞌuchwok tetz yi taw cosech tan tkꞌol iꞌ mas akꞌunwil tan jeꞌseꞌn yi tetz cosech. 3 Or bin tzibeneꞌn, poro niꞌcuꞌn stzibneꞌwok ẍchixoꞌl yi eꞌ wunak chi na ban jun cneruꞌ ẍchixoꞌl yi eꞌ xoꞌj. 4 Yi cxbenwok quil tzitcyꞌaj nin jun sam, nin quil tzitcyꞌaj nin muꞌẍ aꞌ. Nin quil tzꞌoc nin ixajab. Nin quil xtaqueꞌ cuꞌnwok tan yol tbeꞌ tu alchok scyetz yil tzicꞌulwok. 5 Ej nin yil cxopon xe jun caꞌl, baꞌn tzital te taw caꞌl: ‘Takꞌ tzaj Kataj banl squibuꞌ.’ 6 Ko cꞌulutxum yi jun najalaꞌtz, stkꞌeꞌ Ryos banl squibaj, ma yi ko quiꞌ quil jal chibanl. 7 Poro ko cꞌulutxum eꞌ, baꞌn tzun xcyaj cyenwok scyuchꞌ. Nin baꞌn baj yi eꞌchk takleꞌn itaꞌn yil tzꞌoyij tzitetz, na yi akꞌunwil tajweꞌn tan waneꞌn te yi takꞌun. Quil tzijoy junt iposar. 8 Ej nin yil cxopon tcꞌuꞌl jun amaꞌl baꞌn baj yi eꞌchk takleꞌn itaꞌn yil tzꞌakꞌlij tzitetz. 9 Tzꞌacwokeꞌ eꞌ yabiꞌẍ yi ateꞌ lakak eꞌchk tnum, nin txolwok yi xtxolbil scyetz: ‘Txant tan tuleꞌn yi tiemp tan toqueꞌn Ryos tan cawuꞌn.’ Yaꞌstzun tajweꞌn tzitalwok. 10 Kol cxopon tul jun tnum kale qui na cyajwit quibit iyol, baꞌn cxben lakak beꞌ tan talcheꞌn yi yoleꞌj: 11 ‘Na katzan tan masleꞌn len yi puklaj te kukan tetz jun techl yi at tulbil chicawsuꞌ. Poro oken tetz cyajaluꞌ yi txant tan tuleꞌn yi tiemp tan cawuꞌneꞌn Ryos,’ cẍchijwok sbantz,” stzun Jesús scyetz. 12 “Ma jaluꞌ jun cuꞌn swaleꞌ nin tzitetz: Yi eꞌ wunakaꞌtz tzꞌakꞌlok mas chicaws swutz yi chicaws yi eꞌ aj Sodoma.
13 Ej nin nchaꞌtz tal Jesús:
“Lastum yi eꞌ aj Corazín. Lastum yi eꞌ aj Betsaida. Na wiꞌnin milawr bnixnak waꞌn ẍchixoꞌl, poro quinin cyocsaj. Baꞌn tcuꞌn kloꞌ yi choꞌnk bnixeꞌn eꞌchk milawraꞌtz ẍchixoꞌl yi eꞌ awer nak yi najlcheꞌ le tnum Tiro tu yi tnum Sidón. Ja kloꞌ chibisun tan cyetz quil, nin ja kloꞌ chitxꞌixpuj yi cyajtzaꞌkl. Nin ja kloꞌ chicꞌoleꞌ tul tzaꞌj nin ja kloꞌ oc beꞌch cyetz yi sac tuꞌ tan ẍchajleꞌn yi wiꞌnin na chibisun tan quil. 14 Chaꞌstzun te, yil tzꞌul yi kꞌejlal tan takꞌleꞌn chicaws cyakil wunak, mas tcuꞌn chicaws yi eꞌ aj Corazín scyuchꞌ yi eꞌ aj Betsaida tzꞌakꞌlok ẍchiwutz yi eꞌ aj Tiro tu yi eꞌ aj Sidón, 15 Nchaꞌtz yi axwok aj Capernaum, le iwutz itetz cxoponwok tcyaꞌj poro quiꞌ, na choꞌn cxben joꞌliꞌn tqꞌuixcꞌuj.
16 “Ma jaluꞌ bin, alchok scyetz yil tocsaj yi yol yi stzitxoleꞌwok, na tzun tocsaj weri inyoltz. Poro alchok scyetz yi quil tocsaj yi yol yi tzitxoleꞌwok, qui tzun na tocsaj inyol. Nin qui na tocsaj yi yol yi jun yi nchinchakon tzaj,” stzun Jesús bantz scyetz.
Yi chipakxeꞌn yi oxcꞌal tu lajuj
17 Itzun yi chipakxeꞌn yi oxcꞌal tu lajuj ẍchakum Jesús, wiꞌnin chitzatzineꞌn, itzun cyaltz:
—Kajcaw, nicyꞌ nin yi eꞌ espíritu cwent Baybaꞌn, ja cheꞌl ojkuj yi nxcon yi biꞌuꞌ kaꞌn.
18 Sajeꞌn tzun stzaꞌwel Jesús:
—Yi in wetz, wilnak yi teleꞌn tzaj lajuꞌn yi Baybaꞌn, yi Satanás, tcyaꞌj. Lajkeꞌl cweꞌn muleꞌn wuxtxꞌotxꞌ chi na cu jun xlitzꞌ. 19 Bitwok tzaj, yi in wetz swakꞌeꞌ imporer tzitetz tan ixcyeweꞌn tan chiyakꞌpeꞌn yi eꞌ lubaj tu sinaꞌj. Xcyekwok te cyakil ẍchamil yi icontr. Cyaꞌl jun xcyeꞌ tziteꞌj. 20 Poro quil cxtzatzinwok tan tuꞌ yi na xcyeꞌwok tan lajeꞌn len eꞌchk espíritu cwent Baybaꞌn, ma na baꞌn tcuꞌn yil cxtzatzinwok te yi ja wiꞌt cxoꞌcwok tajlal yi eꞌ yi tzꞌibaꞌnt chibiꞌ tcyaꞌj.
Yi stzatzineꞌn Jesús
21 Toqueꞌn tzun lacꞌpuj jun chin tzatzin tetz Jesús. Itzun taltz: “Taꞌ, yi iluꞌ teruꞌ yi iluꞌ Ajcaw te yi tcyaꞌj tu wuxtxꞌotxꞌ, swakꞌeꞌ inkꞌajsbil teruꞌ na quinin ẍchajuꞌ yi eꞌchk takleꞌnaꞌtz scyetz yi eꞌ yi tzꞌaknak cuꞌn cyajtzaꞌkl, ma na choꞌn nẍchajuꞌ scyetz yi eꞌ yi qui tunin kꞌusij eꞌ. Ntyoẍ teruꞌ Taꞌ, na yaꞌstzun tajbiluꞌ.”
22 Ej nintzun ben tlol scyetz yi eꞌ ẍchusbeꞌtz:
—Cyakil yi eꞌchk takleꞌn yi na chinxcyeꞌ tan banleꞌn iꞌtz tan tuꞌ yi akꞌijt imporer tan Intaj. Na yi in wetz yi in Cyꞌajl Ryos, cyaꞌl nin jun na el xtxum te yi ẍeꞌn wutaneꞌn ma na ntin Intaj. Nchaꞌtz cyaꞌl jun na el xtxum te yi ẍeꞌn taneꞌn Intaj ma na ntin in, scyuchꞌ yi eꞌ yi tzintxoleꞌ scyetz.
23 Ej nin nchaꞌtz te yi ateꞌ chichuc cuntuꞌ, nin ben tlol scyetz yi eꞌ ẍchusbeꞌtz:
—Baꞌn itetz na na cxtzanwok tan xmayeꞌn yi eꞌchk takleꞌn yi na bajij jaluꞌ. 24 Na tenstzaj at eꞌ nachol scyuchꞌ eꞌ rey yi yaꞌstzun cyajbil tan tilweꞌn, poro quinin quil. Ej nin yaꞌtz cyajbil tan tbiteꞌn poro quinin quibit, —stzun Jesús bantz scyetz.
Yi elsawutzil tetz aj Samaria
25 Tponeꞌn tzun jun scyeri yi eꞌ txꞌolol xoꞌl yi ley Moisés te Jesús, nintzun octz tan pileꞌn. Itzun taltz:
—Max cꞌuꞌluꞌ Taꞌ, poro ¿mbil tzimban tan incambal yi itzꞌajbil tetz ben kꞌej ben sak?
26 Sajeꞌn tzun stzaꞌwel Jesús:
—¿Mbi ekaꞌn tan yi ley Moisés yi na ocuꞌ tan siꞌleꞌn? ¿Mbi na tal teruꞌ?
27 Sajeꞌn tzun stzaꞌwel yajtz:
—Lokꞌaj yi Awajcaw, yi aRyosil, tetz cuꞌn awalmaꞌ, nin tetz cuꞌn awajtzaꞌkl, nin tetz cuꞌn achamil, nin tetz cuꞌn anaꞌchl; nin lokꞌweꞌ yi eꞌ awisin chi na alokꞌ awib atz. Yaꞌstzun na tal yi ley Moisés, —stzun iꞌ bantz.
28 Beneꞌn tzun tlol Jesús tetz:
—Baꞌn atit. At le wiꞌuꞌ. Poro tajweꞌn tan bnoluꞌ taneꞌn. Tzun cambajuꞌ yi stzꞌajbiluꞌ tetz ben kꞌej ben sak.
29 Itzun tan colol tib yi yaj tkꞌab yi til, beneꞌn tzun jakoltz tetz Jesús:
—¿Naꞌ scyetz eꞌ inwisin Taꞌ?
30 Sajeꞌn tzun stzaꞌwel Jesús tan yi xtxolbileꞌj:
—At jun yaj yi choꞌn sajeꞌn le tnum Jerusalén. Choꞌn at bembil iꞌ-tz Jericó. Nintzun noj cyentz ẍchikꞌab alkꞌom. Teleꞌn tzun chimajol yi beꞌch tetz, nin loꞌon cyentz cyakꞌun, nin eꞌ icyꞌtz. Txant nin qui quim cyentz cyakꞌun.
31 Itzun bantz, na tzun xon tzaj jun paleꞌ. Ej nin yi beneꞌn tilol yi yaj yi qꞌuixpnak, quil cyꞌen tuꞌ iꞌ-tz xlaj beꞌ. Jakꞌenleꞌn wutz ban nintz yi ticyꞌeꞌn cuꞌn xlaj beꞌ. 32 Nchaꞌtz, i nin ban jun scyeri yi eꞌ tu Leví. Yi tponeꞌn iꞌ le amaꞌlaꞌtz, ben tunin xmayil, nin icyꞌtz. 33 Na tzun xon tzaj jun yaj aj Samaria. Yi tponeꞌn kale atit yi qꞌuixpnak, nintzun el nin kꞌajabtz teꞌj. 34 Toqueꞌn tzun ẍkansal tibtz teꞌj, nintzun oc tan stzꞌaqueꞌn. Nin oc kojol tzꞌacꞌbil te yi qꞌuixpnak. Iꞌtz jun jilwutz aceit tu win. Jeꞌn tzun tkꞌoltz te tetz ẍchej, nin ben tcyꞌaltz le jun mesón, nin octz tan qꞌuicyꞌleꞌn.
35 Itzun le junt eklok yi txant tan ticyꞌeꞌn, nin cyaj tkꞌol pwok tetz taw mesón: “Ma jaluꞌ, yi yajeꞌj yabiꞌẍ. Qꞌuicyꞌlejuꞌ. Cꞌachajuꞌ. Kol sotz mas pwok tanuꞌ teꞌj, tzinchojeꞌ yil nult tzaj,” stzun yaj ban cyentz. 36 Ma jaluꞌ, scyeri yi ox yajaꞌtz yi eꞌ icyꞌ cuꞌn te yi yaj yi qꞌuixpnak cyakꞌun alkꞌom, ¿naꞌ scyetz wisin iꞌ bantz, le wutz teruꞌ? —stzun Jesús tetz yaj.
37 —Pues, i bin yi jun yi el quen kꞌajab teꞌj, —stzun yaj bantz.
—Benkuꞌ, nin bneꞌuꞌ taneꞌntz chi banak yi jun yajaꞌtz, —stzun Jesús tetz.
Yi xaꞌkeꞌn Jesús tan chixajseꞌn Mariy tu Mart
38 Itzun bantz yi na xon Jesús tbeꞌ, choꞌn tzun tocomponeꞌntz tcꞌuꞌl jun aldey kale najleꞌt jun xnaꞌn yi na biꞌaj Mart. Tkꞌol tzun yi jun xnaꞌnaꞌtz amaꞌl tetz Jesús tan tocomponeꞌn le caꞌl iꞌ. Wiꞌnin chitzatzineꞌn yi tponeꞌn Jesús tan chixajseꞌn. 39 At tzun jun titzꞌun yi xnaꞌnaꞌtz yi na biꞌaj Mariy. Nintzun cꞌoleꞌ cuꞌntz te Jesús tan tbiteꞌn yi yol iꞌ yi na tzan tan xtxoleꞌn. 40 Ma yi Mart, choꞌn nin tzajnak wutz te takꞌun. Beneꞌn tzun iꞌ-tz tan talcheꞌn tetz Jesús:
—Wajcaw, ¿qui peꞌ na el kꞌajabuꞌ sweꞌj yi inchuc nin na chintxꞌujtij tan akꞌun nin quiꞌc Mariy at tan wuchꞌeyeꞌn? ¿Qui poloꞌ ltal ninuꞌ noc tetz yi nink tzꞌoc tan wuchꞌeyeꞌn?
41 Beneꞌn tzun tlol Jesús tetz: