Yi toqueꞌn Waꞌn Bautist tan txoliꞌn
(Mt 3.1-12; Mr 1.1-8; Jn 1.19-28)
3
1 Itzun bantz yi na xon Tiberio César tul oꞌlaj yob tan cawuꞌn squibaj eꞌchk tnum, iteꞌn nin tiempaꞌtz yi at tzaj Poncio Pilato tan caweꞌn eꞌchk amaꞌl cwent Judea. Ej nin iteꞌn nin tiempaꞌtz yi at tzaj Herodes tan cawuꞌn squibaj eꞌchk tnum cwent Galilea. Nchaꞌtz Liꞌp yi titzꞌun Herodes, at tzaj iꞌ tetz ajcaw squib eꞌchk amaꞌl yi na biꞌaj Iturea tu Traconite. Ej nin iteꞌn nin tiempaꞌtz, yi at tzaj Lisanias tetz ajcaw le tnum Abilinia. 2 Nin ateꞌ tzaj Anás tu Caifás tetz wiꞌtz paleꞌ. Yaꞌstzun yi tiemp yi toqueꞌn juclul Ryos jun xtxolbil le wiꞌ Waꞌn, yi cyꞌajl Zacarías. Yi toqueꞌn yi jun xtxolbilaꞌtz le wiꞌ Waꞌn choꞌn at iꞌ le jun amaꞌl yi tzꞌinunin tuꞌ. 3 Toqueꞌn tzun iꞌ tan xtxoleꞌn yi tajbil Ryos lakak eꞌchk amaꞌl nakaꞌjil yi aꞌ Jordán. Nin octz tan xtxoleꞌn scyetz wunak yi baꞌn jeꞌ aꞌ chiwiꞌ tan ẍchajleꞌn yi bintzinin ja chitxꞌixpuj cyajtzaꞌkl. Nin nchaꞌtz tal yi ko yaꞌtz ẍchibneꞌ sjalok tzun cuybil chipaj swutz Ryos. 4 Choꞌn nin bantz tan xtxoleꞌn chi tzꞌibaꞌnt cyen tan Isaías, yi elsanl stziꞌ Ryos. Je yol yi tzꞌibaꞌnt cyeneꞌj:“Sjilonk jun tul jun amaꞌl tzꞌinunin tuꞌ.
Nin chin wiꞌ nin iꞌ sbneꞌ tan yol, nin staleꞌ:
‘Chinuqꞌueꞌuꞌ cyajtzaꞌkluꞌ,
chi na oc nucꞌleꞌn jun balaj beꞌ,
yi at tulbil jun yaj yi at kꞌej.
Cyenak nin tuꞌ cyulejuꞌ cyajtzaꞌkluꞌ,
tan cꞌulcheꞌn Kajcaw.
5 Cyakil yi eꞌchk jocoꞌjil snojsok.
Cyakil wiꞌwtz tu eꞌchk juꞌ wutz snicyꞌsok.
Cyakil yi eꞌchk ẍoꞌquil beꞌ syubsok.
Cyakil yi eꞌchk beꞌ ploj spakꞌsok.
Yaꞌstzun sbneꞌ Ryos te kajtzaꞌkl yil tzꞌul.
6 Ej nin tzꞌelepon chitxum cyakil wunak te colpiꞌn ibaj yi na tzan Ryos tan sukeꞌn sketz,’
stzun Isaías banak cyen.”
7 Wiꞌnin tzun wunak eꞌ opontz te Waꞌn tan jeꞌseꞌn aꞌ chiwiꞌ. Talol tzun Waꞌn scyetz:
—I cun cyuchꞌuꞌ lubaj. ¿Naꞌ aꞌlon scyeruꞌ yi at rmeril tan cyeleꞌnuꞌ ojk swutz yi caws yi at tulbil? 8 Baꞌn tcuꞌn kloꞌ yi nink chibanuꞌ taneꞌn yi eꞌchk takleꞌn yi na ẍchaj yi bintzinin ja wiꞌt chitxꞌixpujuꞌ cyajtzaꞌkluꞌ. Quil cyaluꞌ chicꞌuꞌl cuntuwuꞌ: ‘Yi oꞌ ketz chumbalaj nin oꞌ, na oꞌ cuꞌn xonl kꞌajtzun Abraham.’ Quiꞌc na takꞌ jun ajtzaꞌklaꞌtz, na na xcyeꞌ Ryos tan cyocseꞌn alchok scyetz jilwutz wunak tetz jun xonl Abraham yi bintzinin xomcheꞌ te tajtzaꞌkl Abraham, mpe nkꞌeꞌtzk eꞌ xonl iꞌ. Nin ko na taj Ryos, baꞌn xcyeꞌ iꞌ tan toqueꞌn yi eꞌchk cꞌubeꞌj tetz mero xonl Abraham. 9 Poro yi eꞌ cyeruꞌ, niꞌcuꞌn eꞌuꞌ tu jun wiꞌ tzeꞌ yi qui na wutzin, yi na el tamij, nin yi na ben joꞌliꞌn tkꞌakꞌ. Or bin quiluꞌ, na list atit yi cxbil tan chitamleꞌnuꞌ, —stzun Waꞌn scyetz.
10 Beneꞌn tzun chijakol yi eꞌ wunak tetz:
—¿Ẍeꞌn tzun kabantz tan kaclaxeꞌn? —cheꞌch.
11 —Yi yaj yi at cob cmiꞌẍ baꞌn toy nin jun te yi yaj yi quiꞌc tetz. Nin alchok scyetz yi wiꞌnin waꞌ, baꞌn toy nin tetz yi jun yi quiꞌc tetz, —stzun Waꞌn bantz scyetz.
12 Nchaꞌtz, at eꞌ elsanl alcawal ẍchixoꞌl yi eꞌ wunak yi eꞌ opon te Waꞌn tan jeꞌn aꞌ chiwiꞌ. Beneꞌn tzun chijakoltz tetz Waꞌn:
—Kajcaw, ¿mbi tzun lkaban ketz? —cheꞌch.
13 —Quil chipeyunuꞌ mas swutz yi caꞌwl yi alijt scyeruꞌ, —stzun Waꞌn scyetz.
14 Nchaꞌtz eꞌ ban cobox tkan sanlartz tan jakleꞌn tetz:
—Ma ketz, ¿mbi lkaban?
—Quil chibuchuꞌ yi eꞌ wunak, quil chimajlenuꞌ chipuꞌk. Nin quil chixoꞌquinuꞌ scyeꞌj. Cuk chicꞌuꞌluꞌ te yi na chitxꞌacuꞌ.
15 Cyoqueꞌn tzun cyakil wunak tan xtxumleꞌn yi Waꞌn yaꞌtz tzun yi Cristo. 16 Poro chin clar cunin tlol scyetz: “Yi in wetz ja jeꞌ aꞌ waꞌn ẍchiwiꞌuꞌ, poro aꞌ tuꞌ. Poro at junt yi at tulbil yi at mas porer tzinwutz wetz, na yi in wetz quiꞌc nin muꞌẍ inkꞌej siquierk tan pujleꞌn wutz yi xajab iꞌ. 17 Ej nin yil tzꞌul tzaj yi junaꞌtz, choꞌn sbneꞌ iꞌ ẍchixoꞌluꞌ chi na ban yi na oc jun yaj tan xupeꞌn tcꞌuꞌl triw. Yi triw scolxok, ma yi stzꞌisil mben teraꞌtz tkꞌakꞌ. Yi jun kꞌakꞌaꞌtz, quiꞌc bajsbeꞌn tetz,” stzun Waꞌn bantz scyetz wunak.
18 Yaꞌstzun jilwutz xtxolbil yi xcon tan Waꞌn tan chichusleꞌn wunak. Nin yi na tzan iꞌ tan xtxoleꞌn yi balaj stziblal scyetz wunak, xcon wiꞌnin jilwutz elsawutzil taꞌn.
19 Itzun bantz, nin oc iꞌ tan makleꞌn wutz Herodes yi gobernador, na nin jeꞌ cyokꞌbel quib tu Herodías yi txkel yi titzꞌun yi na biꞌaj Liꞌp. Ej nin nchaꞌtz oc tan makleꞌn wutz Herodes te cyakil yi eꞌchk takleꞌn cachiꞌ yi na tzan iꞌ tan banleꞌn, nin octz tan makleꞌn wutz Herodes tan quiꞌt bnol. 20 Poro qui nin tocsaj yi yol Waꞌn. Mas tcunin til octz tan juchleꞌn, na nin oc Waꞌn taꞌn xetzeꞌ.
Yi jeꞌn aꞌ twiꞌ Jesús
(Mt 3.13-17; Mr 1.9-11)
21 Itzun bantz yi na tzan jeꞌseꞌn aꞌ ẍchiwiꞌ wunak, nchaꞌtz Jesús, jeꞌ aꞌ twiꞌ. I cunin na tzan Jesús tan nachleꞌn Ryos yi jeꞌn cꞌapxuj yi tcyaꞌj nin cuꞌ ul yi Espíritu Sant tibaj. 22 Choꞌn ban yi cweꞌn muleꞌn chi na cuꞌ ul jun plomẍ. Quibital tzun jun yoltz tcyaꞌj, yi na tal:
—Yi aẍatz, aẍ inCyꞌajl. Okꞌleꞌn awutz waꞌn. Na chintzatzin tzaweꞌj.
Yi eꞌ mam cyen Jesús
(Mt 1.1-17)
23 Yi na tzan bajeꞌn eꞌchk takleꞌnaꞌseꞌj, na tzun xon Jesús tul junaklaj yob. Iꞌ cyꞌajl Ẍep taneꞌn ẍchiwutz wunak. Yi Ẍep, cyꞌajl Elí. 24 Ej nin yi jun Elíjaꞌtz iꞌ cyꞌajl Mata. Ej nin yi Matajaꞌtz iꞌ cyꞌajl Leví; yi Leví iꞌ cyꞌajl Melqui; yi Melqui iꞌ cyꞌajl Jana; yi Jana iꞌ cyꞌajl Ẍep. 25 Ma Ẍep iꞌ cyꞌajl Matatías; yi Matatías iꞌ cyꞌajl Amós; yi Amós iꞌ cyꞌajl Nahum; yi Nahumaꞌtz iꞌ cyꞌajl Esli; yi Eslijaꞌtz iꞌ cyꞌajl Nagai. 26 Ma yi Nagai iꞌ cyꞌajl Maat; yi Maataꞌtz iꞌ cyꞌajl Matatías; yi Matatías iꞌ cyꞌajl Semei, yi Semei iꞌ cyꞌajl Ẍep, yi cyꞌajl Judá. 27 Ma yi Judá iꞌ cyꞌajl Joana; yi Joana iꞌ cyꞌajl Resa; yi Resa iꞌ cyꞌajl Zorobabel; yi Zorobabel iꞌ cyꞌajl Salatiel; yi Salatiel iꞌ cyꞌajl Neri; 28 yi Neri iꞌ cyꞌajl Melqui; yi Melqui iꞌ cyꞌajl Adi. Ma yi Adi iꞌ cyꞌajl Cosam yi cyꞌajl Elmodam; yi Elmodam iꞌ cyꞌajl Er; 29 yi Er iꞌ cyꞌajl Josué; yi Josué iꞌ cyꞌajl Eliezer, yi cyꞌajl Jorim; ma yi Jorim iꞌ cyꞌajl Matat; 30 yi Matat iꞌ cyꞌajl Leví; yi Leví iꞌ cyꞌajl Simeón; yi Simeón iꞌ cyꞌajl Judá; yi Judá iꞌ cyꞌajl Ẍep; yi Ẍep iꞌ cyꞌajl Jonán. Ma yi Jonánaꞌtz iꞌ cyꞌajl Eliaquim; 31 yi Eliaquim iꞌ cyꞌajl Melea; yi Melea iꞌ cyꞌajl Mainán. Ma yi Mainán iꞌ cyꞌajl Matata; yi Matata iꞌ cyꞌajl Natán; 32 yi Natán iꞌ cyꞌajl Luwiy, yi cyꞌajl Isaí. Ma yi Isaí iꞌ cyꞌajl Obed; yi Obed iꞌ cyꞌajl Booz; yi Booz iꞌ cyꞌajl Salmón; yi Salmón iꞌ cyꞌajl Naasón; 33 yi Naasón iꞌ cyꞌajl Aminadab; yi Aminadab iꞌ cyꞌajl Aram; yi Aram iꞌ cyꞌajl Esrom; yi Esrom iꞌ cyꞌajl Fares; yi Fares iꞌ cyꞌajl Judá; 34 yi Judá iꞌ cyꞌajl Jacow; yi Jacow iꞌ cyꞌajl Isaac, yi cyꞌajl Abraham; yi Abraham iꞌ cyꞌajl Taré; yi Taré iꞌ cyꞌajl Nacor; 35 yi Nacor iꞌ cyꞌajl Serug; yi Serug iꞌ cyꞌajl Ragau; yi Ragau iꞌ cyꞌajl Peleg; yi Peleg iꞌ cyꞌajl Heber; yi Heber iꞌ cyꞌajl Sala; 36 yi Sala iꞌ cyꞌajl Cainán; yi Cainán iꞌ cyꞌajl Arfaxad, yi cyꞌajl Sem. Ma yi Sem iꞌ cyꞌajl Noé, yi cyꞌajl Lamec. 37 Ma yi Lamec iꞌ cyꞌajl Matusalén, yi cyꞌajl Enoc; yi Enoc iꞌ cyꞌajl Jared, yi cyꞌajl Mahalaleel, yi Mahalaleel iꞌ cyꞌajl Cainán, 38 yi cyꞌajl Enós. Ma yi Enós iꞌ cyꞌajl Set, yi cyꞌajl Adam. Ma Adam iꞌ cyꞌajl Ryos.