Yi titzꞌeꞌn Jesús
(Mt 1.18-25)
2
1 Itzun bantz nin el jun caꞌwl takꞌun Augusto César tan cuꞌseꞌn chibiꞌ cyakil wunak yi ateꞌ wi munt. 2 Yaꞌstzun yi bajx tir yi cweꞌn chibiꞌ yi eꞌ wunak yi at tzaj Cirenio tan caweꞌn yi tnum Siria. 3 Tircunin wunak chibeneꞌntz tan cuꞌseꞌn chibiꞌ lakak chitanum. 4 Teleꞌn tzaj tzun tetz Ẍep Nazaret cwent Galilea. Choꞌn tzun jeꞌn poneꞌntz Belén, jun tnum cwent Judea. Yi jun tnumaꞌtz yaꞌstzun tanum kꞌajtzun Luwiy tu Ẍep, na chixonl quib. 5 Chijeꞌn poneꞌn tzun Ẍep tu Mariy na sken bixeꞌ chiyol tuchꞌ. Txꞌanlij tlen tuꞌ wiꞌ Mariy. 6 Ateꞌ pon cuꞌn tzuntz Belén yi tponeꞌn kꞌejlal tan tuleꞌn yos tu Mariy. 7 Yaꞌstzun uleꞌt yos tuchꞌ tu yi bajx tal. Cweꞌn tzun tolil Mariy yi tal niꞌ-tz tul buꞌy. Choꞌn tzun cweꞌn coybaltz tul jun cuꞌlbil waꞌ wacẍ, na cyaꞌl nin jaleꞌt amaꞌl cyaꞌn le mesón.Yi jiloneꞌn yi ángel scyetz eꞌ pstor
8 At tzun cobox pstor ateꞌ-tz wutz wutz nakaꞌjil Belén tan wateꞌn cyawun. 9 Nin ẍchaj tib jun ángel tetz Kajcaw ẍchiwutz. Kaleꞌn nin pakꞌpuchal yi cweꞌn muleꞌn squibaj. Xobeꞌn nin eꞌ bantz. 10 Sajeꞌn tzun tlol yi ángel scyetz: “Quil cxobwok, na ja nuꞌl tan talcheꞌn jun balaj stziblal tzitetz. Iꞌtz jun balaj stziblal yi stkꞌeꞌ tzatzin scyetz cyakil wunak. 11 Je xtxolbileꞌj: Jaluꞌ mmitzꞌij yi aj colpinl itetz le tal tanum kꞌajtzun rey Luwiy. Iꞌ yi CRISTO yi Kajcaw. 12 Je jun techleꞌj, yil cxoponwok teꞌj, choꞌn toliꞌn cuꞌn tul buꞌy. Nin choꞌn coylij tcꞌuꞌl jun cuꞌlbil waꞌ wacẍ,” stzun ángel bantz scyetz.
13 Chisajeꞌn tzun jun cꞌoloj ángel tcyaꞌj. Na chitzan len tan takꞌleꞌn chikꞌajsbil swutz Ryos. Itzun cyaltz:
14 “Kꞌajsbil swutz Ryos tcyaꞌj.
Nin tzatzin paz scyetz yi eꞌ wunak,
yi na tzatzin Kataj scyeꞌj,” cheꞌch yi eꞌ ángel bantz.
15 Itzun bantz yi cyajeꞌn yi eꞌ ángel tcyaꞌj, cyoqueꞌn tzun yi eꞌ pstor tan yol squibil quib, itzun cyaltz:
—Quin bin Belén tan xmayeꞌn mbi cuꞌn mbajij, yi mmaꞌlchij sketz tan Kajcaw, —cheꞌch bantz squibil quib.
16 Jalcunin eꞌ beneꞌntz. Ma yi cyoponeꞌntz jal Mariy cyaꞌn tu Ẍep tu yi niꞌ. Yi niꞌ choꞌn coylij tul jun cuꞌlbil waꞌ wacẍ. 17 Yi quilol yi niꞌ, nin baj chitxolil yi stziblal yi mbi cunin aꞌlchij scyetz le pstorbil. 18 Cyakil yi eꞌ yi quibit yi chiyol yi eꞌ pstor ninin eꞌ el yabtz teꞌj. 19 Ma yi Mariy, aꞌtij cyakil yi xtxolbil tetz talmaꞌ, nin wiꞌnin ticyꞌeꞌn tcꞌuꞌl. 20 Yi chipakxeꞌn yi eꞌ pstor, na chitzan tan takꞌleꞌn chikꞌajsbil tetz Ryos tan yi eꞌchk takleꞌn yi quibit tetz ángel. Nin wiꞌnin chitzatzineꞌn tan cꞌuꞌlajeꞌn Ryos tan yi mbi cuꞌn quil, na i cunin banaꞌs chi yi aꞌlchij scyetz.
Yi jatxleꞌn yi niꞌ Jesús le templo
21 Yi stzꞌakeꞌn yi wajxok kꞌej, nintzun bajij circuncidar yi niꞌ. Toqueꞌn tzun cyakꞌol yi biꞌ tetz Jesús. Yaꞌstzun biꞌ yi sken oc tan yi ángel yi ntaxk oc lacꞌp te Mariy.
22 Ma yi jeꞌn poneꞌn Mariy te yi tajlal kꞌej yi na choꞌc yi eꞌ xnaꞌn wi xan, chi tzꞌibaꞌnt cyen tul yi ley Moisés, beneꞌn tzun quicyꞌal yi niꞌ-tz le templo tan jatxleꞌn tetz Kajcaw. 23 Na yaꞌstzun yi ley Kajcaw yi tzꞌibaꞌnt cyen yi na tal: “Cyakil yi eꞌ bajx cyꞌajol yi na chitzꞌij, chin tajweꞌn cunin chijatxlok tan chixconeꞌn tetz Kajcaw.” 24 Yi cyoponeꞌn Jerusalén, nintzun takꞌ Mariy yi xtxꞌixwatz tetz Ryos, na tzꞌibaꞌnt cyen le ley Kataj yi na tal: “Oy tzaj jun lmuj xmucuy, nka cob tal plomẍ.”
25 At tzun jun yaj at-tz Jerusalén yi na biꞌaj Simeón. Chin tzꞌaknak cuꞌn iꞌ swutz Ryos. Wiꞌnin na tek ẍchiꞌ Ryos, nin wiꞌnin na takꞌ kꞌej Kataj. Ej nin na tzan iꞌ tan ẍchꞌiweꞌn yi tulbil yi tiemp tan cyeleꞌn yi eꞌ aj Israel tzakꞌ chicaꞌwl yi eꞌ awer nak. Ej nin at yi Espíritu Sant teꞌj. 26 Ej nin at jun xtxolbil yi talnak yi Espíritu Sant tetz: “Yi ntaxk ẍquim, tzawileꞌ wutz Cristo, yi jun yi bixbaꞌnt tan Ryos tan cawuꞌn.”
27 Itzun bantz, yi sken opon ticyꞌleꞌn Simeón le templo tan yi Espíritu Sant, tponeꞌn tzun ticyꞌleꞌn yi niꞌ Jesús tan yi xtxuꞌ tan chibnol taneꞌn yi ley Moisés yi tzꞌibaꞌnt cyen. 28 Jeꞌn tzun kꞌalol Simeón yi niꞌ, nin takꞌ kꞌajsbil tetz Ryos, itzun taltz:
29 “I bin jaluꞌ Wajcaw, chintzatzink yil chinquim,
na ja el cunuꞌ te yi alijt cyen tanuꞌ.
30-31 Na tzinwutz cunin yi mmuꞌl yi colpinl cyetz cyakil wunak, yi jun yi bixbaꞌnt tanuꞌ.
32 Tzꞌocopon iꞌ tetz chitxekbil yi eꞌ yi nkꞌeꞌtz eꞌ aj Israel.
Ej nin tan iꞌ sjalok kakꞌej yi oꞌ aj Israel, yi oꞌ tanumuꞌ Taꞌ,” stzun Simeón tul oración.
33 Ma yi taj xtxuꞌ yi niꞌ, wiꞌnin cyeleꞌn yab te cyakil yi eꞌchk kꞌej yi niꞌ yi na tzan Simeón tan yolcheꞌn.
34 Tkꞌol tzun Simeón yi banl squibaj, nin ben tloltz tetz Mariy, yi xtxuꞌ niꞌ:
—Yi niꞌeꞌj, bixbaꞌnt tan chixiteꞌn nka tan chitxicbajeꞌn wiꞌnin aj Israel. Yi niꞌeꞌj, xconk tan Ryos tetz jun techl scyetz wunak, poro quil cyocsaj. 35 Na tan iꞌ lajluchaxeꞌt mbi na icyꞌ ẍchicꞌuꞌl cyakil wunak. Nchaꞌtz aẍ Mariy, cẍbisunk yil tzawil yi xtxolbileꞌj. Chi taneꞌn ẍchꞌonal jun chꞌichꞌ yi na oc te cꞌuꞌl jun yaj, yaꞌstzun sbneꞌ yi ẍchꞌonal te awalmaꞌ, —stzun Simeón bantz tetz Mariy.
36 Nchaꞌtz at jun tal biẍuꞌ at-tz. Elsanl stziꞌ Ryos iꞌ, yi Ana biꞌ. Meꞌl Fanuel iꞌ, jun chixonl yi eꞌ tu Aser. Yi xnaꞌnaꞌtz juk ntziꞌ yob cyokꞌbej quib tu chmil. Nin quim tetz yajtz. 37 Jun mutxꞌ tu cyaj yob cyajleꞌnix cyen tan xmaꞌlcaꞌnil. Skꞌejl nin lakꞌbal at iꞌ le templo tan cꞌuꞌlajeꞌn Ryos. Nin at na ban cuꞌnt qui na wan tan paj nachleꞌn Kataj. 38 Nintzun opon iꞌ-tz kale ateꞌt Ẍep tu Mariy, nin octz tan tyoẍineꞌn tetz Kataj. Nchaꞌtz ben iꞌ tan xtxoleꞌn stziblal yi niꞌ scyetzak yi eꞌ aj Israel yi najlcheꞌ Jerusalén, yi eꞌ yi na chitzan tan ẍchꞌiweꞌn tan cyeleꞌn liwr ẍchikꞌab yi eꞌ awer nak.
Yi chipakxeꞌnt Nazaret
39 Yi wiꞌt chibnol taneꞌn Mariy tu Ẍep yi caꞌwl yi tzꞌibaꞌnt cyen le ley Kajcaw, chipakxeꞌn tzuntz Nazaret le cyetz chitanum, yi Nazaret cwent Galilea. 40 Chꞌuyeꞌn nin ban tetz niꞌ-tz, nin jal ẍchamil tu tajtzaꞌkl. Wiꞌnin banl Kataj at tibaj.
Yi cyajeꞌn cyen cyajsal tib Jesús le templo
41 Itzun taneꞌn chiley yi taj xtxuꞌ Jesús, cyakil nin yob na chibenak tan ticyꞌseꞌn kꞌej Pasc Jerusalén.
42 Itzun yi sken tzꞌak coblaj yob tan Jesús, nin ben quicyꞌaltz Jerusalén tan ticyꞌseꞌn yi jun kꞌejaꞌtz. 43 Ma yi ticyꞌeꞌn poneꞌn tetz kꞌej, nintzun eꞌ pakxijtz. Yi chipakxeꞌn qui nin tzꞌicyꞌ scyetz yi eꞌ taj xtxuꞌ yi cyajeꞌn cyen cyajsal tib Jesús Jerusalén. 44 Nsken el jun kꞌej chibeꞌ yi chinachoneꞌn yi quiꞌc Jesús xomij scyeꞌj. Cyoqueꞌn tzuntz tan joyleꞌn ẍchixoꞌl yi eꞌ chixonl nin ẍchixoꞌl yi eꞌ cyamiw. Cheꞌch loꞌ cyetz yi ko yaꞌtz xomijeꞌt Jesús. 45 Cyaꞌl nintzun jaleꞌttz cyaꞌn. Chipakxeꞌn tzuntz Jerusalén tan joyleꞌn. 46 Jalen le toxiꞌn kꞌej jaleꞌn cyaꞌn. Choꞌn at iꞌ le templo. Cꞌolchij ẍchixoꞌl yi eꞌ txꞌolol xoꞌl yi ley Moisés. Na tzan tan tbiteꞌn chiyol, nin tan ẍchꞌoteꞌn chitziꞌ yi eꞌ wutzileꞌnaꞌtz. 47 Cyakil yi eꞌ yi ateꞌ-tz tan tbiteꞌn yi yol Jesús, wiꞌnin cyeleꞌn yabtz te tajtzaꞌkl, nin wiꞌnin cyeleꞌn yab te yi ẍeꞌn cunin na stzaꞌwej chiyol yi eꞌ txꞌolol xoꞌl yi ley Moisés. 48 Nchaꞌtz yi taj xtxuꞌ, wiꞌnin cyeleꞌn yab te yol iꞌ. Beneꞌn tzun tlol yi xtxuꞌ tetz:
—Wal, ¿nxac na cẍtzan tan takꞌleꞌn bis oꞌkl sketz? Wiꞌnin kabisuneꞌn tu ataj yi na katzan tan ajoyleꞌn.
49 —¿Mbi xac na chitzanuꞌ tan injoyleꞌn? ¿Nkꞌeꞌtz peꞌ tajweꞌn tan imbnol yi takꞌun weri Intaj? —chij iꞌ scyetz taj xtxuꞌ.
50 Poro qui nin el chitxum te yi yol yi ben tlol scyetz.