Yi tponeꞌn ticyꞌleꞌn Jesús swutz Pilat
(Mt 27.1-2, 11-14; Lc 23.1-5; Jn 18.28-38)
15
1 Itzun bantz yi tuleꞌn skil, chichamol tzun quib cyakil yi eꞌ wiꞌtz paleꞌ scyuchꞌ yi eꞌ chiwiꞌ banl wiꞌ eꞌ judiy, nin scyuchꞌ yi eꞌ txꞌolol xoꞌl yi ley Moisés, scyuchꞌ cyakil yi eꞌ aj txumunl. Cweꞌn tzun chicꞌalol Jesús nin ben quicyꞌal swutz Pilat. 2 Toqueꞌn tzun Pilat tan jakleꞌn tetz:—¿Aẍ peꞌ chireyil yi eꞌ judiy?
—I inaꞌtz, chi na tal tzajuꞌ swetz, —stzun Jesús bantz.
3 Poro mas tcunin til cyakꞌ yi eꞌ wiꞌtz paleꞌ. 4 Toqueꞌnt tzun Pilat tan jakleꞌn junt tir tetz Jesús:
—¿Mbi tzuntz yi quiꞌc nin na awal tzaj? ¿Qui peꞌ na awitnin yi awil yi na chitzan wunak tan jaleꞌn te akul?
5 Poro yi Jesús, quiꞌc na tal nin. Chaꞌstzun te quiꞌt pujxij tan Pilat yi mbil sban.
Yi bixeweꞌn tan cweꞌn biyij Jesús
(Mt 27.15-31; Lc 23.13-25; Jn 18.38-19.16)
6 At tzun jun cstumbr Pilat, ilen nin na stzakplen jun pres lakak kꞌej Pasc. I yi cyajbil wunak yaꞌstzun yi na el tzakpuꞌn. 7 At tzun jun pres yi na biꞌaj Barrabás. At iꞌ xetzeꞌ scyuchꞌ coboxt, tan paj yi eꞌ contr te yi gobierum nin tan paj yi eꞌ biyol nak. 8 Cyoponeꞌn tzun yi eꞌ wunak swutz pilat tan jakleꞌn tetz tan teleꞌn stzakpul jun pres chi taneꞌn nin cstumbr iꞌ.
9 —¿Na peꞌ cyajuꞌ yil tzintzakplen yi chireyiluꞌ yi eꞌuꞌ judiy? —stzun iꞌ bantz.
10 Xcon yi jun yolaꞌtz tan Pilat na el xtxum tetz yi opon ticyꞌleꞌn Jesús swutz iꞌ cyakꞌun yi eꞌ paleꞌ tan tuꞌ yi na chiꞌch chicꞌuꞌl teꞌj. 11 Poro yi eꞌ wiꞌtz paleꞌ nintzun eꞌ octz tan tocseꞌn chicꞌuꞌl yi eꞌ wunak tan chiẍchꞌineꞌn, nin tan cyalol yi baꞌn tcuꞌn yil tzꞌel tzakpuꞌn Barrabás. 12 Jakol tzun Pilat scyetz:
—¿Mbi tzun cyajbiluꞌ tan imbnol te yi yajeꞌj yi na cyaluꞌ “Kareyil” tetz? —chij Pilat ban scyetz.
13 Chiẍchꞌineꞌn tzuntz chicyakil cuꞌn, itzun cyaltz:
—Jeken swutz pasyon.
14 —Poro, ¿mbi tzun til? —stzun Pilat bantz scyetz.
Poro yi eꞌ wunak wiꞌnin chiẍchꞌineꞌn:
—Jeken swutz pasyon, —cheꞌch.
15 El tzun Barrabás liwr tan Pilat na yi tajbil iꞌ iꞌtz tan chitzatzineꞌn cyakil wunak teꞌj.
Itzun te yi nsken loꞌon Jesús tan xicyꞌxab tan caꞌwl Pilat nintzun ben waꞌbaltz tan jeꞌn swutz pasyon.
16 Nin ben quicyꞌal yi eꞌ sanlar wutzkꞌanil tpiltaꞌ, nin oc chicꞌopil quib cyakil yi eꞌ sanlar teꞌj. 17 Nin oc jun xbuꞌk cyaꞌn teꞌj yi txib yubil nin jeꞌ cyakꞌol jun coron txꞌiꞌx te twiꞌ. 18 Cyoqueꞌn tzuntz tan kꞌajlaꞌn tetz.
—Taꞌ, wiꞌnin kꞌejuꞌ, na iluꞌ chireyil yi eꞌ judiy, —cheꞌch bantz.
19 Nin nchaꞌtz eꞌ oc tan jabeꞌn yi wutz iꞌ tan jun txꞌamij. Nin eꞌ oc tan stzubeꞌn quen tꞌaꞌal chitziꞌ twutz. Ej nin eꞌ cuꞌ mejlok swutz tan takꞌleꞌn kꞌej iꞌ taneꞌn, na xcyꞌaklil tuꞌ na chiban. 20 Yi nsken wiꞌt icyꞌ chipaj tan tzeꞌeꞌn teꞌj, teleꞌn tzun quicyꞌal yi beꞌch tetz yi oc cyakꞌol yi txib yubil. Kalenaꞌs tzun toqueꞌnt yi tetz beꞌch tetz nin. Beneꞌn tzun quicyꞌaltz tan jeꞌn swutz pasyon.
Yi jeꞌn Jesús swutz pasyon
(Mt 27.32-44; Lc 23.26-43; Jn 19.17-27)
21 Itzun bantz at tzun jun yaj aj Cirene, Simón biꞌ. Iꞌ chitaj Alejandro tu Rufo. Oponeꞌn atit iꞌ tnum. Choꞌn sajeꞌn iꞌ xoꞌl wutz. Xtxꞌamxeꞌn tzuntz cyakꞌun yi eꞌ sanlar, nintzun oc chipachꞌul tzakꞌ yi pasyon yi cyꞌaꞌn tan Jesús.
22 Beneꞌn tzun quicyꞌal yi eꞌ sanlaraꞌtz le jun amaꞌl yi na biꞌaj Gólgota yi na elepont Wi Bakil Wiꞌbaj. 23 Nin eꞌ suk muꞌẍ win tetz yi yujuꞌn tib tu mirra. Poro quinin baj taꞌn. 24 Kalenaꞌs tzun jeꞌntz cyaꞌn swutz pasyon. Nin eꞌ octz tan txꞌiluꞌn te beꞌch tetz, tan quilol naꞌ lcamban tetz.
25 Beluj chꞌichꞌ jalchan yi jeꞌn Jesús swutz pasyon. 26 Nin jeꞌ tzꞌibaꞌn cobox yol swiꞌeꞌn iꞌ tan ẍchajleꞌn yi mbi til yi quimeꞌn. Je yoleꞌj: CHIREYIL YI Eꞌ JUDIY.
27 Nchaꞌtz eꞌ jeꞌ cob alkꞌom xlaj iꞌ, jun le sbal nin jun le max. 28 Tan yi xtxolbileꞌj el cuꞌn te yi tzꞌibaꞌnt cyen yi na tal: “Tzꞌocopon tetz tajlal mal nak.”
29 Ej nin cyakil yi eꞌ yi na chicyꞌ cuꞌn eꞌ octz tan telseꞌn kꞌej. Na na chiyuqueꞌn chiwiꞌ tan xbajtziꞌiꞌn teꞌj. Itzun na cyal nintz:
—I aẍaꞌtz yi awalnak: ‘Baꞌn chinxcyeꞌ tan xiteꞌn cuꞌn yi templo, nin tan jeꞌseꞌn junt tir tul ox ntziꞌ kꞌej,’ 30 colp cuꞌn tzaj awib swutz pasyon, —cheꞌch.
31 Nchaꞌtz yi eꞌ wiꞌtz paleꞌ scyuchꞌ yi eꞌ txꞌolol xoꞌl yi ley Moisés wiꞌnin chitzeꞌeneꞌn teꞌj, nin cyaltz squibil quib:
—Ja xcyeꞌ-x tan tulseꞌn yos scyuchꞌ wunak, poro yi iꞌ tetz qui na xcyeꞌ-x tan colpeꞌn cuꞌn tzaj tib. 32 Yi ko bintzinin iꞌ kareyil yi oꞌ aj Israel, cuꞌul tzun colpil tibxaꞌs swutz pasyon. Ko yaꞌtz sbanx, skocseꞌ tzun yi yolx, —cheꞌch.
Nchaꞌtz yi eꞌ yi eꞌ jeꞌ swutz pasyon xlaj iꞌ, na nin chiyajonin tetz, wech quimich tlen tuꞌ ateꞌt.
Yi quimeꞌn Jesús
(Mt 27.45-56; Lc 23.44-49; Jn 19.28-30)
33 Yi tponeꞌn chajcuꞌn kꞌej, tzꞌoꞌtz nin tuꞌ nin ban cyakil wuxtxꞌotxꞌ, jalen cuꞌn tponeꞌn ox chꞌichꞌ cuꞌlbeꞌn kꞌej. Kalenaꞌs tzun skilineꞌn. 34 Poro te yi ntaxk skilin ox chꞌichꞌ cuꞌlbeꞌn kꞌej, chin wiꞌ nin Jesús ban tan yol: “Eloi, Eloi, ¿lama sabactani?” chij iꞌ bantz. (Yi na elepont jun yolaꞌtz iꞌtz: “Siwl Taꞌ, iluꞌ inRyosil, ¿mbi tzuntz yi nchincyaj tiloluꞌ?”)
35 Beneꞌn tzun quibital cobox scyeri yi eꞌ yi ateꞌ, itzun cyaltz:
—Bitwok nin, na loꞌ tzan tan ẍchakleꞌn tzaj Elías, yi elsanl stziꞌ Ryos, tan tuleꞌn tan ẍchꞌeyeꞌn iꞌ.
36 Lajkeꞌl nin tzun beneꞌn jun tan muꞌleꞌn cuꞌn jun esponja tcꞌuꞌl muꞌẍ vinagr. Nintzun jeꞌ tkꞌol tzwiꞌ jun aj tan jeꞌn stzꞌubul kloꞌ Jesús. Itzun taltz:
—Skileꞌ bajx, ko tzꞌul Elías tan cuꞌseꞌn tzaj, —stzun.
37 Ma Jesús chin wiꞌ nin ban tan sichꞌ, nin quimtz. 38 Na quim cunin Jesús yi katzeꞌn yi xbuꞌk yi at swutz yi luwar yi chin xan nin yi at le templo. Choꞌn xeꞌteꞌn tzaj swiꞌeꞌn jalen skan. Cob cuntunin el. 39 Inti yi capitán yi aj Roma yi txiclij stkan Jesús, yi tbital yi ẍchꞌineꞌn Jesús, nin yi tilol yi ẍeꞌn cuꞌn ban yi quimeꞌn, itzun taltz:
—Jun cuꞌn yol yi yajeꞌj iꞌ Cyꞌajl Ryos.
40 Nchaꞌtz at xnaꞌn yi na chixmayin tzaj joylaj len muꞌẍ. Chixoꞌl yi eꞌ xnaꞌnaꞌtz at Luꞌch Mat, tu Salomé. Ej nin nchaꞌtz at Luꞌch yi xtxuꞌ Jacow juy tu Ẍep. 41 Yi eꞌ xnaꞌnaꞌtz eꞌ xom te Jesús yi at tzaj iꞌ Galilea. Ej nin yaꞌstzun yi eꞌ xnaꞌn yi eꞌ ban pawor tan cꞌaꞌcheꞌn. Nchaꞌtz ateꞌ wiꞌnin xnaꞌn yi xomcheꞌ te Jesús yi teleꞌn tzaj iꞌ Galilea tan tponeꞌn Jerusalén.
Yi mukxeꞌn Jesús
(Mt 27.57-61; Lc 23.50-56; Jn 19.38-42)
42 Itzun bantz te yi ntaxk oc akaleꞌn nin te yi na nucꞌx cyen chiwaꞌ tetz yi jun kꞌej ujleꞌn, 43 nintzun nimsaj tib Ẍep yi aj Arimatea tan jakleꞌn yi wankil Jesús tetz Pilat. Yi jun Ẍepaꞌtz iꞌ jun scyeri yi eꞌ chiwiꞌ banl wiꞌ yi eꞌ judiy. Nin at wiꞌnin kꞌej iꞌ ẍchixoꞌl. Nchaꞌtz nter nin na tzan iꞌ tan ẍchꞌiweꞌn yi tulbil Ryos tan cawuꞌn. 44 Ma yi tbital Pilat yi nsken quim Jesús, wiꞌnin teleꞌn yab teꞌj. Chaꞌstzun te ẍchakol iꞌ yi capitán, nintzun jaktz tetz yi ko bintzinin ja nin quim Jesús nka quiꞌ. 45 Yi talol capitán yi bintzinin sken quim Jesús, tkꞌol tzun Pilat amaꞌl tetz Ẍep tan cweꞌn tzaj tcyꞌal yi wankil. 46 Lokꞌol tzun Ẍep jun balaj xbuꞌk nin bentz tan cuꞌseꞌn cuꞌn tzaj yi wankil Jesús nin cuꞌ tkꞌoltz tul yi balaj xbuꞌkaꞌtz. Kalenaꞌs tzun beneꞌntz tan takꞌleꞌn yi wankil Jesús tul yi jun nich yi kopij wutz cꞌub. Yi nsken oc quen, nintzun oc jokbal jun chin cꞌub stziꞌ. 47 Ma Luꞌch Mat tu Luꞌch yi xtxuꞌ Ẍep, quil kale oc quent yi wankil Jesús.