Yi titzꞌeꞌn Jesús ẍchixoꞌl almaꞌ
(Mt 28.1-10; Lc 24.1-12; Jn 20.1-10)
16
1 Itzun bantz yi sken icyꞌ yi jun kꞌej ujleꞌn, nintzun eꞌ ben Luꞌch Mat tu Salomé tu Luꞌch yi xtxuꞌ Jacow tan lokꞌcheꞌn jun jilwutz tzꞌacꞌbil yi wiꞌnin cꞌoꞌcal, tan chibeneꞌn tan tocseꞌn te wankil Jesús. 2 Chin jalchan cunin tzun eꞌ beneꞌntz le bajx kꞌej te sman. Nsken jeꞌul kꞌej yi cyoponeꞌn kale oc quent wankil Jesús. 3 Poro te yi ntaxk chopon na chijilon squibil quib:—¿Al nink scyetz jun tzꞌicyꞌan len yi cꞌub tzi jul? —cheꞌch.
4 Ma yi beneꞌn quilol kale oc cyent Jesús nsken wiꞌt el toliꞌn yi jun chin cꞌubaꞌtz. 5 Cyoqueꞌn tzun tul yi jul nin ben quilol jun xicy yi cꞌolchij. Choꞌn at iꞌ le chisbal nin chin sak cuꞌn yi beꞌch tetz. Wiꞌnin queleꞌn yab teꞌj. 6 Poro itzun saj tlol yi junaꞌtz scyetz:
—Quil chixobuꞌ, na na el intxum tetz yi na chitzanuꞌ tan joyleꞌn Jesús yi aj Nazaret, yi jun yi nquim swutz pasyon. Quiꞌct at tzoneꞌj, na ja itzꞌij junt tir. Quil cuꞌnuꞌ kale cyajeꞌt coybaꞌn. Quiꞌct at. 7 Chibenkuꞌ bin tan talcheꞌn stziblal scyetz yi eꞌ ẍchusbeꞌtz nin tetz Luꞌ, yi at tpombil iꞌ tan chichꞌiweꞌn jaleꞌn Galilea. Squileꞌ wutz iꞌ choneꞌj chi alijt cyen taꞌn.
8 Cyeleꞌn tzun ojkuj yi eꞌ xnaꞌnaꞌtz. Wiꞌnin chilucneweꞌn tan xoꞌw. Nin quinin cyal jun yol tetz jun, tan paj xoꞌw yi ateꞌ cuꞌnt.
Yi ẍchajol tib Jesús swutz Luꞌch Mat
(Jn 20.11-18)
9 Iteꞌnin te yi bajx kꞌejaꞌtz te sman, chin jalchan nin, yi sken itzꞌij junt tir Jesús, bajx ẍchajol tib swutz Luꞌch Mat, yi jun yi elnak juk espíritu cwent Baybaꞌn twankil taꞌn. 10 Beneꞌn tzun iꞌ tan talcheꞌn stziblal scyetz yi eꞌ yi xomcheꞌ te Jesús. Na wiꞌnin chibisuneꞌn nin wiꞌnin cyokꞌeꞌn. 11 Ma yi quibital yi nsken wiꞌt itzꞌij junt tir Jesús, nin yi nsken wiꞌt iꞌlwij wutz tan Luꞌch, quinin cyocsaj.
Yi ẍchajol tib Jesús ẍchiwutz cob ẍchusbeꞌtz iꞌ
(Lc 24.13-35)
12 Pontzaj tlen ẍchajol tib Jesús ẍchiwutz cobt ẍchusbeꞌtz, poro apart yubil iꞌ. Choꞌn ẍchajol tib scyetz te yi na chixon joylaj len yi tnum. 13 Yi nsken ẍchaj tib ẍchiwutz chipakxeꞌn tzuntz tnum tan talcheꞌn stziblal scyetz yi eꞌ mas ẍchusbeꞌtz. Poro quinin cyocsaj chiyol.
Yi eꞌ beneꞌn ẍchakol Jesús yi eꞌ apostl
(Mt 28.16-20; Lc 24.36-49; Jn 20.19-23)
14 Pontzaj tlen tzun ẍchajol tib Jesús ẍchiwutz yi junlaj ẍchusbeꞌtz te yi na chiwan cuꞌn wi mes. Nin yajon iꞌ-tz scyeꞌj tan paj stzeꞌtzal cyalmaꞌ, na quinin cyocsaj chiyol yi eꞌ yi iꞌlon tetz yi nsken itzꞌij iꞌ. 15 Itzun taltz scyetz: “Quibeneꞌnk beneꞌn tziꞌn wi munt tan xtxoleꞌn yi balaj stziblal scyetz cyakil wunak. 16 Cyakil yi eꞌ yil chincyocsaj, nin yil jeꞌ aꞌ ẍchiwiꞌ ẍchiclaxok cyeraꞌtz. Ma yi eꞌ yi quil chincyocsaj tzꞌakꞌlok cyetz chicawsaꞌtz. 17 Nchaꞌtz ẍchibneꞌ eꞌchk takleꞌn yi na ẍchaj yi choꞌn kꞌuklij chicꞌuꞌl sweꞌj. Xconk imbiꞌ cyaꞌn tan chilajeꞌn len yi eꞌ espíritu cwent Baybaꞌn. Chixcyek tan yolcheꞌn eꞌchk jilwutz yol tan porer yi Espíritu Sant. 18 Kol chitzꞌameꞌn lubaj, nka kol baj wenen cyaꞌn, quiꞌc chiban taꞌn. Nchaꞌtz kol cyakꞌeꞌn chikꞌab squibaj yi eꞌ yabiꞌẍ tzꞌul yos scyuchꞌ.”
Yi tajeꞌn Jesús tcyaꞌj
(Lc 24.50-53)
19 Itzun yi wiꞌt jiloneꞌn Kajcaw Jesús scyetz, nin aj ticyꞌleꞌntz tcyaꞌj, nin cꞌoleꞌ cuꞌntz le sbal Kataj Ryos jalen tziꞌn tcyaꞌj.
20 Chibaj beneꞌn tzun yi eꞌ ẍchusbeꞌtz tan xtxoleꞌn yi balaj stziblal beneꞌn tziꞌn wi munt. Nin oc Kajcaw tan quichꞌeyeꞌn. Nin tan yi eꞌchk milawr yi bnix cyaꞌn lajluchax yi iꞌtz yi bintzi yi xtxolbil yi na chitzan tan xtxoleꞌn. Amén.