YI BALAJ STZIBLAL YI CYAJNAK CYEN STZꞌIBAL TEꞌY
Yi eꞌ mam cyen Jesucristo
(Lc 3.23-38)
1
1 I bin jaluꞌ cyakil yi biꞌajeꞌj yi na chintzan tan stzꞌibeꞌn, yaꞌstzun chibiꞌ yi eꞌ mam cyen Jesucristo, yi choꞌn itzꞌnak te chixonl kꞌajtzun Luwiy yi xonl Abraham.2 Yi Abrahamaꞌtz, yaꞌstzun taj Isaac.
Ma yi Isaacaꞌtz, yaꞌstzun taj Jacow.
Ma yi Jacowaꞌtz, yaꞌstzun chitaj Judá scyuchꞌ eꞌ mas stzicy tu titzꞌun.
3 Ma yi Judájaꞌtz tu Tamar, eꞌ taj xtxuꞌ Fares tu yaj Zara.
Ma yi Faresaꞌtz, yaꞌstzun taj Esrom.
Ma yi Esromaꞌtz, yaꞌstzun taj Aram.
4 Ma yi Aramaꞌtz, yaꞌstzun taj Aminadab.
Ma yi Aminadabaꞌtz, yaꞌstzun taj Naasón.
Ma yi Naasónaꞌtz, yaꞌstzun taj Salmón.
5 Ma Salmónaꞌtz tu Rahab, yaꞌstzun taj xtxuꞌ Booz.
Ma yi Booz tu Rutaꞌtz, yaꞌstzun taj xtxuꞌ Obed.
Ma yi Obedaꞌtz, yaꞌstzun taj Isaí.
6 Ma yi Isaíaꞌtz, yaꞌstzun taj yi rey Luwiy.
Ma yi rey Luwiyaꞌtz, tu yi txkelbeꞌn Urías, eꞌ taj xtxuꞌ Salomón.
7 Ma yi Salomónaꞌtz, yaꞌstzun taj Roboam.
Ma yi Roboamaꞌtz, yaꞌstzun taj Abías.
Ma yi Abías, yaꞌstzun taj Asa.
8 Ma yi Asa-aꞌtz, yaꞌstzun taj Josafat.
Ma yi Josafataꞌtz, yaꞌstzun taj Joram.
Ma Joram, yaꞌstzun taj Uzías.
9 Uzías, yaꞌstzun taj Jotam.
Ma Jotam, yaꞌstzun taj Acaz.
Ma Acaz, yaꞌstzun taj Ezequías.
10 Ma yi Ezequíasaꞌtz, yaꞌstzun taj Manasés.
Ma yi Manasés, yaꞌstzun taj Amón.
Ma Amón, yaꞌstzun taj Josías.
11 Ma Josías, yaꞌstzun taj Jeconías scyuchꞌ eꞌ titzꞌun. Yaꞌstzun quitzꞌeꞌntz yi chibeneꞌn ticyꞌleꞌn yi eꞌ aj Israel pres Babilonia.
12 Ma yi teleꞌn tiemp yi chibenleꞌnix pres Babilonia, jal jun nitxajil Jeconías yi Salatiel ban biꞌ.
Ej nin yi Salatielaꞌtz, yaꞌstzun taj Zorobabel.
13 Ma yi Zorobabelaꞌtz, yaꞌstzun taj Abiud.
Ma yi Abiudaꞌtz, yaꞌstzun taj Eliaquim.
Ma yi Eliaquimaꞌtz, yaꞌstzun taj Azor.
14 Ma yi Azoraꞌtz, yaꞌstzun taj Sadoc.
Ma yi Sadocaꞌtz, yaꞌstzun taj Aquim yi taj Eliud.
15 Ma yi Eliudaꞌtz, yaꞌstzun taj Eliazar.
Ma yi Eliazaraꞌtz, yaꞌstzun taj Matán.
Ma yi Matánaꞌtz, yaꞌstzun taj Jacow.
16 Ma yi Jacowaꞌtz, yaꞌstzun taj Ẍep, yi chmil Mariy. Nin yi jun Mariyaꞌtz, yaꞌstzun xtxuꞌ Jesús, yi Jesúsaꞌtz yi na aꞌlchij Cristoa tetz.
17 Yi jun cꞌoloj biꞌajaꞌtz, na tzan tan ẍchajleꞌn sketz yi cyajlaj cuꞌn wek wunak xeꞌtleꞌn tzaj te Abraham, jalen yi tuleꞌn itzꞌok Luwiy.
Ej nin cyajlajt wek wunak yi xeꞌtleꞌn tzaj te Luwiy, jalen yi chibeneꞌn quicyꞌleꞌn yi eꞌ aj Israel pres le amaꞌl Babilonia.
Ej nin yi chibeneꞌn pres yi eꞌ aj Israel jalen Babilonia, ja chijal cyajlajt wek wunak jalen yi tuleꞌn itzꞌok Cristo.
Yi titzꞌeꞌn Jesucristo
(Lc 2.1-7)
18 Itzun bantz yi titzꞌeꞌn Jesucristo. Yi Mariy, nsken bixeꞌ chitrat tu Ẍep. Jalt cuntuꞌ tan cyokꞌbel quib. Poro te yi ntaxk cyokꞌbej quib, nin oc lacꞌpuj jun niꞌ teꞌj tan porer yi Espíritu Sant.
19 Ma yi Ẍep, chumbalaj nin iꞌ ẍchiwutz wunak nin swutz Ryos, nin yi tilol iꞌ yi nsken oc lacꞌpuj jun niꞌ te Mariy, quinin oc tan telseꞌn xtxꞌix. Ma na numun cuꞌn kloꞌ cyajeꞌn cyen tilol tan qui quibital wunak.
20 Te yi na tzan iꞌ tan xtxumleꞌn yi jun ajtzaꞌklaꞌtz nintzun ẍchaj tib jun ángel le wutzicyꞌ. Itzun taltz tetz: “Ẍep, aẍ jun xonl kꞌajtzun Luwiy, qui bin tzacabej acꞌuꞌl tan toqueꞌn Mariy tetz awuxkel, na yi niꞌ yi moꞌc lacꞌpuj teꞌj, tetz yi Espíritu Sant. 21 Yil tzꞌul itzꞌok yi jun niꞌaꞌtz, baꞌn tzꞌoc yi biꞌ awaꞌn tetz Jesús. Yaꞌstzun biꞌ sbneꞌ-tz, na tan iꞌ ẍchicolpok yi eꞌ tetz tanum tkꞌab yi quil,” stzun yi ángel bantz tetz Ẍep.
22 Tan cyakil yi xtxolbilaꞌseꞌj ja el cuꞌn teꞌj yi alijt cyen tan Kataj Ryos tetz jun scyeri eꞌ elsanl stziꞌ iꞌ tentz. Nin je xtxolbileꞌj yi tzꞌibaꞌnt cyen taꞌn:
23 “Jun xun yi ntaxk cunin til wutz jun yaj, stekeꞌ pwokil jun niꞌ. Yi jun niꞌaꞌtz xicy sbneꞌ. Ej nin sbiꞌajk Emanuel” (yi na elepont: “Ryos skaxoꞌl”).