Yi cyoponeꞌn yi eꞌ nachol tan xajseꞌn Jesús
2
1 Itzun bantz, yi at tzaj Herodes tan cawuꞌn tibaj cyakil yi amaꞌl Judea, choꞌn tzun titzꞌeꞌn Jesús le tnum Belén cwent Judea. Cyoponeꞌn tzun cobox yaj aj teleꞌn tziꞌn le tnum Jerusalén. Eꞌ cuꞌn nachol.a 2 Nin eꞌ octz tan jakleꞌn tkanil yi naꞌ mitzꞌeꞌt yi chireyil yi eꞌ judiy.—¿Naꞌ nmitzꞌeꞌt yi chireyiluꞌ yi eꞌuꞌ judiy? Na te yi atoꞌ lilen, ja kil jun txꞌuml tcyaꞌj yi ja ẍchaj sketz yi ja itzꞌij yi chireyiluꞌ. Chaꞌstzun te nkasaj tan kacꞌuꞌlal iꞌ, —cheꞌch eꞌ nacholaꞌtz bantz.
3 Yi tbital rey Herodes chitziblal yi eꞌ nachol ninin el yabtz te chiyol. Nchaꞌtz cyakil yi eꞌ wunak yi najlcheꞌ-tz Jerusalén, ninin eꞌ el yabtz teꞌj. 4 Cawuneꞌn tzun yi rey Herodes tan chichakleꞌn cyakil yi eꞌ wiꞌtz paleꞌ scyuchꞌ yi eꞌ txꞌolol xoꞌl yi ley Moisés. Ma yi cyoponeꞌn nintzun jaktz scyetz:
—¿Mbi biꞌ yi jun luwar kale tzꞌuleꞌt itzꞌok yi Cristo?
5 Itzun cyaltz:
—Le tnum Belén cwent Judea, na yaꞌstzun tzꞌibaꞌnt cyen tan jun scyeri eꞌ elsanl stziꞌ Ryos tentz. Je tzun cyajnak stzꞌibaleꞌj:
6 ‘Yi tnum Belén yi at cwent Judá,
nkꞌeꞌtz yi quiꞌck mas kꞌej ẍchiwutzak yi eꞌ mas tnum cwent Judá.
Na choꞌn stzꞌitzꞌok jun ajcaw le amaꞌlaꞌtz.
Nin xconk iꞌ tetz jun qꞌuil chibeꞌ yi eꞌ intanum yi eꞌ aj Israel.’
Yaꞌstzun yi xtxolbil yi tzꞌibaꞌnt cyen tan jun scyeri eꞌ elsanl stziꞌ Ryos tentz, —cheꞌch tzun.
7 Itzun yi cyajeꞌn cyakil yi eꞌ txꞌolol xoꞌl yi ley Moisés, nintzun ben mantar Herodes tan chichakleꞌn yi eꞌ nachol. Ẍchuc cuntuꞌ iꞌ tan jakleꞌn scyetz yi mbi tajlal xawil quilol yi jun txꞌumlaꞌtz. 8 Yi tbital iꞌ yi xtxolbil yi cyal yi eꞌ nachol, nintzun eꞌ ben ẍchakoltz jalen Belén. Itzun taltz scyetz:
—Chibenkuꞌ Belén tan jakleꞌn tkanil yi jun niꞌaꞌtz. Ej nin yil jal cyaꞌnuꞌ, baꞌn chuꞌluꞌ tan taꞌlcheꞌn swetz yi naꞌ atiteꞌt. Na nchaꞌtz in, na waj chimben tan cꞌuꞌlajeꞌn iꞌ, —stzun Herodes bantz scyetz.
9-10 Yi quibital yi yol yi rey, nintzun eꞌ bentz. I cunin na cheluꞌltz juꞌ caꞌl yi beneꞌn quilol junt tir yi txꞌuml yi nsken cyen quil jalen lilen tziꞌn. Wiꞌnin chitzatzineꞌn yi quilolt junt tir. Cweꞌn tzun bajxoktz ẍchiwutz tan ẍchajleꞌn scyetz naꞌ atiteꞌt yi niꞌ. Yi toponeꞌntz kale atit yi niꞌ, nintzun taqueꞌ cuꞌntz.
11 Itzun yi cyoqueꞌn xe caꞌl nintzun quil yi niꞌ tu Mariy, yi xtxuꞌ. Chicweꞌn tzun mejloktz tan cꞌuꞌlajeꞌn yi niꞌ. Ej nin jeꞌ chijakol yi eꞌchk chicuꞌlbil tan jeseꞌn tzaj eꞌchk or tu insens tu mirra tan toyeꞌn tetz yi niꞌ.
12 Nin te yi ateꞌ-tz, nin ẍchaj Ryos scyetz tul jun wutzicyꞌ yi baꞌn tcuꞌn quiꞌt chipakxij kale atit Herodes. Chaꞌstzun te apart beꞌ quicyꞌajtz tan cyoponeꞌn le cyetz chitanum.
Yi chibeneꞌn Ẍep tan ew ib jalen Egipto
13 Itzun bantz yi nsken chaꞌj yi eꞌ nachol, nin ẍchaj tib jun ángel le wutzicyꞌ Ẍep. Itzun taltz:
—Ẍep, elk awatl, cyꞌajnin yi niꞌ tu xtxuꞌ, ej nin baꞌn cxeꞌlwok ojk tzoneꞌj. Baꞌn cxbenwok jalen Egipto. Yil cxoponwok, ncwenwok tuꞌ-tz jalen cuꞌn lwal junt tir tzatz. Kalenaꞌs tzun cxaꞌjwok tzajtz. Na tzꞌocopon Herodes tan joyleꞌn yi niꞌ tan biyleꞌn cuꞌn, —stzun yi ángel bantz tetz Ẍep.
14 Teleꞌn tzun watl Ẍeptz. Nin wek tibtz tan beneꞌn tcyꞌal yi niꞌ tu yi xtxuꞌ. Iteꞌn nin akꞌbalaꞌtz eꞌ eltz tan cyoponeꞌn Egipto. 15 Yaꞌstzun eꞌ aꞌteꞌt-tz, jalen cuꞌn quimeꞌn Herodes. Bajij yi xtxolbilaꞌtz tan teleꞌn cuꞌn teꞌj, yi xtxolbil yi alijt cyen tan Kataj tetz jun scyeri elsanl stziꞌ iꞌ tentz. Je na taleꞌj: “Ja opon inmantar jalen Egipto tan ẍchakleꞌn tzaj inCyꞌajl.”b
Yi teleꞌn ort tan Herodes tan chibiyleꞌn cuꞌn eꞌ niꞌ
16 Yi teleꞌn xtxum Herodes tetz yi nsken xubsij iꞌ cyakꞌun eꞌ nachol, sajeꞌn tzun jun chin chiꞌch cꞌuꞌlal tetz. Ej nintzun el jun ort taꞌn tan chibiyleꞌn cuꞌn cyakil yi eꞌ niꞌ yi najlcheꞌ le tnum Belén, tuml yi eꞌ yi najlcheꞌ solteꞌj tnum. El yi ortaꞌtz taꞌn tan chibiyleꞌn cuꞌn cyakil yi eꞌ nitxaꞌ tetz cob yob le cuꞌnak tzaj. Na nin nachon iꞌ te yi tajlal yob yi alijt cyakꞌun eꞌ nachol tetz. 17 Yi wiꞌt bajeꞌn yi xtxolbileꞌj, ja el cuꞌn teꞌj yi xtxolbil yi tzꞌibaꞌnt cyen tan Jeremías, jun scyeri eꞌ elsanl stziꞌ Ryos tentz. Je xtxolbileꞌj yi tzꞌibaꞌnt cyen taꞌn:
18 “Na bajij oꞌkl jalen Ramá. Wiꞌnin oꞌkl nin wiꞌnin chunaꞌn na bajij. Wiꞌnin tokꞌeꞌn Raquel. Na okꞌ squibaj yi eꞌ xonl yi ja chiquim. Quiꞌt na moxeꞌ tan paj bis scyeꞌj eꞌ xonl yi nchiquim.”c
19 Itzun bantz yi ntaxk cheꞌl tzaj Ẍep Egipto, nin yi nsken wiꞌt quim Herodes, nin ẍchaj tib jun ángel le wutzicyꞌ Ẍep. Itzun taltz tetz:
20 “I bin jaluꞌ Ẍep, elk awatl. Cyꞌajnin yi niꞌ tu yi xtxuꞌ. Pakxenwok junt tir le amaꞌl cwent Israel. Na cyakil yi eꞌ yi eꞌ oc kloꞌ tan biyleꞌn yi niꞌ, ja wiꞌt chiquim cyeꞌtz.”
21 Eleꞌn nin ban watl Ẍeptz, nin ben tcyꞌal yi niꞌ tu xtxuꞌ jalen le amaꞌl cwent Israel. 22 Poro yi tbital Ẍep yi Arquelao at cyen tan cawuꞌn tetz xel yi kꞌajtzun taj, xobeꞌn nin bantz tan tponeꞌn junt tir Judea. Chaꞌstzun te yi choꞌn beneꞌn iꞌ-tz tul junt amaꞌl cwent Galilea, na yaꞌstzun aꞌlchij tetz tcꞌuꞌl junt wutzicyꞌ.
23 Yi cyoponeꞌn Galilea, choꞌn tzun chinajeweꞌntz le jun tnum yi na biꞌaj Nazaret. Yi wiꞌt cyoponeꞌn tan najeweꞌn le jun tnumaꞌtz, yaꞌstzun teleꞌn cuꞌntz teꞌj yi xtxolbil yi tzꞌibaꞌnt cyen cyakꞌun eꞌ elsanl stziꞌ Ryos yi at tocbil biꞌ tetz Jesús aj Nazaret.