Yi toqueꞌn Waꞌn Bautist tan txoliꞌn
(Mr 1.1-8; Lc 3.1-9, 15-17; Jn 1.19-28)
3
1 Itzun bantz yi teleꞌn tiemp, choꞌn tzun toponeꞌn Waꞌn Bautist tan txoliꞌn le jun amaꞌl tzꞌinunin tuꞌ cwent Judea. 2 Nin je yi yol iꞌeꞌj: “Chitxꞌixpeꞌnuꞌ cyajtzaꞌkluꞌ, na txant tan tuleꞌn Ryos tan cawuꞌn.”3 Yi jun Waꞌnaꞌtz, yaꞌstzun yi junaꞌtz yi cyajnak stzꞌibal Isaías, jun scyeri eꞌ elsanl stziꞌ Ryos tentz. Je yi xtxolbil yi cyajnak stzꞌibal Isaías:
“Sjilonk jun tul jun amaꞌl tzꞌinunin tuꞌ, nin chin wiꞌ nin sbneꞌ tan yol, nin je staleꞌeꞌj: ‘Chinuqꞌueꞌuꞌ cyajtzaꞌkluꞌ chi na oc nucꞌleꞌn jun balaj beꞌ yi at tulbil jun yi at kꞌej. Cyejnak nin tuꞌ cyulejuꞌ cyajtzaꞌkluꞌ,’ ” stzun Isaías ban cyen.
4 Yi beꞌch tetz Waꞌn, xiꞌil camey tuꞌ nin tzꞌuꞌm tuꞌ icyꞌnak xe cꞌuꞌl tetz sinch. Ej nin sacꞌ tuꞌ na baj taꞌn tetz waꞌ tu cabil wunak txuc. 5 Cyakil yi eꞌ aj Jerusalén, scyuchꞌ yi eꞌ yi najlcheꞌ le luwar cwent Judea, nin scyuchꞌ yi eꞌ wunak yi najlcheꞌ tzi aꞌ Jordán, cyakil cuꞌn eꞌ wunakaꞌtz eꞌ opon len tan tbiteꞌn yi yol Waꞌn. 6 Yi bajeꞌn chitxolil quil, nintzun jeꞌ aꞌ-tz ẍchiwiꞌ tan Waꞌn tzi aꞌ Jordán.
7 Poro yi tilol Waꞌn yi wiꞌnin cyoponeꞌn yi eꞌ parisey scyuchꞌ yi eꞌ sadusey tan jakleꞌn ko at rmeril tan jeꞌn aꞌ ẍchiwiꞌ, itzun ben tloltz scyetz: “¿Nxac na cyajuꞌ tan jeꞌn aꞌ ẍchiwiꞌuꞌ? Na i cun cyuchꞌuꞌ lubaj. Iẍkaj ja tzunk cheꞌluꞌ liwr tkꞌab yi jun qꞌuixcꞌuj yi na xon tzaj tan chicawseꞌnuꞌ. 8 Chitxꞌixpeꞌnuꞌ cyajtzaꞌkluꞌ. Baꞌn tcuꞌn nink chibanuꞌ yi eꞌchk takleꞌn balaj tan lajluchaxeꞌn yi ja wiꞌt chitxꞌixpujuꞌ cyajtzaꞌkluꞌ. 9 Quil choꞌcuꞌ tan xtxumleꞌn yi jak wiꞌt chiclaxuꞌ tan tuꞌ yi eꞌuꞌ xonl Abraham. Na baꞌn choꞌc alchok jilwutz wunak tkaꞌb Ryos, na xcyek iꞌ tan wenkseꞌn yi cꞌubeꞌj tan toqueꞌn tetz meꞌl cyꞌajl iꞌ ko na taj. 10 Or bin quiluꞌ, na at tulbil chicawsuꞌ na niꞌcuꞌn quitaneꞌnuꞌ chi taneꞌn jun wiꞌ tzeꞌ yi qui na wutzin. Nin list atit cxbil tan chitamleꞌn cyꞌenuꞌ bantz chibeneꞌnuꞌ joꞌliꞌn tkꞌakꞌ. 11 Ma yi in wetz, yi na jeꞌ aꞌ waꞌn ẍchiwiꞌ wunak iꞌtz tan ẍchajleꞌn yi ja wiꞌt chitxꞌixpuj yi cyajtzaꞌkl. Poro at jun yi at tulbil yi stkꞌeꞌ yi Espíritu Sant scyetz yi eꞌ yi na chitxꞌixpuj cyajtzaꞌkl. Nin yil takꞌ chicaws yi eꞌ yi qui na chixom teꞌj. Yi junaꞌtz yi tzꞌul, at mas tetz kꞌej tzinwutz wetz. Na siquier atk muꞌẍ wetz inkꞌej tan pujleꞌn wutz yi xajab yi junaꞌtz yi at tulbil, na quiꞌc ekaꞌn waꞌn. 12 Yil tzꞌul iꞌ, cyꞌaꞌn caꞌwl taꞌn. Tzꞌul iꞌ tan katxaꞌleꞌn chi na ban jun yaj yi na xcon paleꞌt taꞌn tan xupeꞌn tul triw. Yi triw scolxok, poro yi tzꞌis mben teꞌtz tul jun kꞌakꞌ yi quinin bajsbeꞌn tetz.”
Yi jeꞌn aꞌ twiꞌ Jesús
(Mr 1.9-11; Lc 3.21-22)
13 Itzun bantz, choꞌn sajeꞌn Jesús le amaꞌl Galilea. Nin opontz tzi aꞌ Jordán, kale atit Waꞌn tan jeꞌseꞌn aꞌ chiwiꞌ wunak. Na yi tajbil Jesús iꞌtz tan toqueꞌn Waꞌn tan jeꞌseꞌn aꞌ twiꞌ. 14 Yi toqueꞌn tlol Jesús tetz Waꞌn bajx tir, quinin cujij Waꞌn tan jeꞌn aꞌ twiꞌ. Itzun taltz tetz Jesús:
—¿Mbitzuntz yi na tzanuꞌ tan jakleꞌn pawor swetz tan jeꞌseꞌn aꞌ twiꞌuꞌ? In kloꞌ wetz na chintzan tan jakleꞌn pawor teruꞌ, —stzun Waꞌn bantz tetz.
15 —Bintzi na awal tzaj, poro banaj yi wetz yi na el walmaꞌ teꞌj. Na tajweꞌn tan kabnol taneꞌn cyakil yi tajbil Ryos, —stzun Jesús bantz tetz.
Yi tbital Waꞌn yi yol Jesús, nintzun jeꞌ aꞌ-tz taꞌn twiꞌ. 16 Na jeꞌ tzaj cunin xe aꞌ yi jeꞌn jakxuj yi tcyaꞌj. Nin ben tilol Jesús yi Espíritu Sant yi cweꞌn muleꞌn twiꞌ iꞌ. Choꞌn cunin ban chi na ban jun plomẍ yi na cuꞌul. 17 Nin ben quibital jun yoltz tcyaꞌj yi na tal:
“Yi juneꞌj yaꞌstzun yi jun tal ẍutuj inCyꞌajl yi wiꞌnin okꞌleꞌn wutz wakꞌun.”