Yi toqueꞌn pileꞌn Jesús
(Mr 1.12-13; Lc 4.1-13)
4
1 Yi bajeꞌn yi eꞌchk takleꞌneꞌj, nintzun ben ticyꞌleꞌn Jesús tan yi Espíritu Sant tul jun amaꞌl yi tzꞌinunin tuꞌ. Ja ben ticyꞌleꞌn tan takꞌleꞌn amaꞌl tetz Baybaꞌn tan pileꞌn yi kol sjuch til nka quiꞌ. 2 Caꞌwnak kꞌej nin caꞌwnak akꞌbal, quiꞌc nin jun piẍ waj baj taꞌn. Le caꞌwnak kꞌej sajeꞌn tzun jun chin weꞌjtz teꞌj. Yi wiꞌt tilol Baybaꞌn, nintzun octz tan pileꞌn Jesús. Itzun taltz tetz:3 —Yi ko aẍ nin Cyꞌajl Ryos, txꞌixpeꞌn bin yi cꞌubeꞌj tetz pam, —stzun Baybaꞌn tetz.
4 —Tzꞌibaꞌnt cyen: ‘Quil jal stzꞌajbil jun yaj ntin tan waj, ma na kol sban taneꞌn cyakil yi tajbil Ryos,’ —stzun Jesús tetz.
5 Ej choꞌn tzun beneꞌn tcyꞌal Baybaꞌn yi Jesús jalen le tnum Jerusalén, yi tnum yi wiꞌnin xanil. Yi cyoponeꞌn, nintzun ben moxol Baybaꞌn yi Jesús tibaj yi culunil yi templo. 6 Itzun taltz:
—Yi ko aẍ nin Cyꞌajl Ryos, cꞌoxnin awib jalen wuxtxꞌotxꞌ. Na tzꞌibaꞌnt cyen:
‘Yi chuꞌl ẍchakol Ryos yi tetz ángel tan acolcheꞌn. List quitaneꞌn tan atxobleꞌn bantz qui aloꞌoneꞌn te cꞌub,’ —stzun Baybaꞌn tetz Jesús.
7 Stzaꞌwel tzun Jesús:
—Bintzi, poro nchaꞌtz alijt cyen tan Ryos yi quiꞌc cu tan toqueꞌn jun tan pileꞌn iꞌ, —stzun Jesús tetz Baybaꞌn.
8 Beneꞌn tzun tcyꞌal Baybaꞌn Jesús wi jun chin wutz yi chin wutz tkan nin. Yi chijeꞌn poneꞌn, nin ben ẍchajol cyakil yi eꞌchk lmak tnum beneꞌn tziꞌn wi munt, tu eꞌchk balaj takleꞌn yi at. Yi wiꞌt ẍchajol cyakil yi amaꞌlaꞌtz, itzun taltz tetz:
9 —Swakꞌeꞌ cyakil yi eꞌchk amaꞌleꞌj tzatz kol ẍmejeꞌ tzinwutz tan inlokꞌeꞌn.
10 —Caleꞌn sweꞌj, na tzꞌibaꞌnt cyen le tuꞌj Kataj: ‘Lokꞌaj yi awajcaw yi aRyosil, ntin banaj amunl swutz iꞌ.’
11 Teleꞌn tzun jatxol tib Baybaꞌntz te Jesús. Cyoponeꞌn tzun yi eꞌ ángel tan ẍchꞌeyeꞌn.
Yi xeꞌteꞌn Jesús tan chichusleꞌn wunak
(Mr 1.14-15; Lc 4.14-15)
12 Itzun bantz, yi tbital Jesús yi nsken oc Waꞌn xetzeꞌ, nintzun bentz le amaꞌl Galilea. 13 Quinin cyaj cyen iꞌ le tnum Nazaret, ma na choꞌn najeweꞌn iꞌ le tnum Capernaum. Iꞌtz jun tnum yi choꞌn at tzi jun chin lagun yi at tul yi luwar cwent Zabulón tu Neftalí. 14 Yi tponeꞌn iꞌ tul yi amaꞌlaꞌtz, yaꞌstzun teleꞌn cuꞌn teꞌj yi yol yi tzꞌibaꞌnt cyen tan Isaías, yi elsanl stziꞌ Ryos tentz. Je yi cyajnak cyen stzꞌibaleꞌj:
15 “Yi sbajok le amaꞌl cwent Zabulón tu Neftalí, at eꞌ wunak yi nkꞌeꞌtz eꞌ judiy yi choꞌn najlcheꞌ tul eꞌchk amaꞌlaꞌtz cwent Galilea. Choꞌn najlcheꞌ xlajak yi beꞌ yi na icyꞌ tzi mar, swutzeꞌl tzaj yi aꞌ Jordán.
16 Yi eꞌ wunakaꞌtz ateꞌ tul tzꞌoꞌtz wutzil, poro squileꞌ wutz yi jun yi tzꞌul. Xcyek iꞌ tan xiteꞌn yi tzꞌoꞌtz wutzil. Yi eꞌ wunakaꞌtz yi quimich tlen tuꞌ ateꞌt tkꞌab ilcꞌol, sjalok cyajtzaꞌkl tan yi junaꞌtz yi chitxekbil taneꞌn.”a
17 Yi tponeꞌn Jesús Galilea, yaꞌstzun xeꞌteꞌn iꞌ tan xtxoleꞌn. Je yi yol iꞌeꞌj. “Chitxꞌixpeꞌnuꞌ cyajtzaꞌkluꞌ, na txant tan tuleꞌn yi ajcaw yi at tcyaꞌj, tan cawuꞌneꞌn tzoneꞌj wuxtxꞌotxꞌ.”
Yi chisajeꞌn ẍchakol Jesús yi cyaj aj cayinl
(Mr 1.16-20; Lc 5.1-11)
18 Itzun bantz te yi na chixon Jesús tzi aꞌ Galilea, nin eꞌ ben tilol cob yaj yi quitzꞌun quitzicy quib. Iꞌtz Simón Luꞌ tu yi titzꞌun yi na biꞌaj Leẍ. Choꞌn na chitzan tan joꞌleꞌn chileb wi aꞌ, na eꞌ aj cayinl. Itzun tal Jesús scyetz:
19 —Xomen tzajwok sweꞌj. Tzinchajeꞌ tzitetz yi ẍeꞌn na ban tan chicambajeꞌn wunak, —stzun Jesús scyetz.
20 Cyajeꞌn cyen tzun quilol chileb, nin eꞌ xomnintz te Jesús.
21 Jun tkujix nin quicyꞌleꞌntz yi beneꞌn tilol Jesús cobt yaj yi quitzꞌun quitzicy quib nintz. Eꞌ Jacow tu Waꞌn, yi cyꞌajl Zebedeo. Choꞌn ateꞌ tu chitaj tul jun barc. Na chitzan tan laqꞌueꞌn chileb. Cheꞌ sajeꞌn tzun ẍchakol Jesús. 22 Lajkeꞌl nin tzun cyeleꞌn tzajtz tul barc, nin eꞌ xomnintz te Jesús. Ma chitaj cyaj cyen tuꞌ quiloltz tul yi barc.
Yi toqueꞌn Jesús tan chichusleꞌn wiꞌnin wunak
(Lc 6.17-19)
23 Beneꞌn tzun Jesús lakak amaꞌl cwent Galilea. Nintzun octz tan chichusleꞌn yi eꞌ wunak lakak sinagoga kale na chichamwit quib wunak tan tbiteꞌn yol Kataj. Yi chusuꞌn yi oc iꞌ tan xtxoleꞌn iꞌtz yi balaj stziblal yi at tulbil Ryos tan cawuꞌn. Nchaꞌtz oc iꞌ tan tulseꞌn yos scyuchꞌ yi eꞌ yabiꞌẍ. 24 Beneꞌn nin ban loꞌon yi stziblal Jesús lakak eꞌchk amaꞌl cwent Siria. Chaꞌstzun te eꞌ opon ticyꞌleꞌn wiꞌnin yabiꞌẍ teꞌj. Bichk cuntunin jilwutz yabilil yi na chicyꞌan. At eꞌ yi at yi espíritu cwent Baybaꞌn le chiwankil. Ej nin at eꞌ yi xyaꞌy wiꞌil na chicyꞌan. Ej nin at eꞌ yi yeꞌyuj chiwankil, poro ul len cuꞌn yos scyuchꞌ tan Jesús. 25 Wiꞌnin aj Galilea eꞌ xomnintz teꞌj. Nchaꞌtz at eꞌ aj Decápolis eꞌ xomnintz. At eꞌ aj Jerusalén nin at eꞌ yi choꞌn chisajeꞌn lakak eꞌchk amaꞌl cwent Judea, scyuchꞌ yi eꞌ wunak yi choꞌn najlcheꞌ jalaj cyꞌen yi aꞌ Jordán.