MALAQUÍAS
Txꞌolbil Xoꞌl Yi Liwreꞌj
Yi biꞌaj “Malají” le chiyol yi eꞌ aj Israel na elepont “yi inchakum”. Yi eꞌchk xtxolbileꞌj yi alijt cyen tan Malaquías ja bajij oꞌ cient yob yi ntaxk ul itzꞌok Kajcaw Jesucristo. Ej nin yi templo, nsken wiꞌt bnix junt tir. Nchaꞌtz yi eꞌ paleꞌ, na chitzan tan banleꞌn chimunl le templo tan chaꞌtz tuꞌ. Poro chin qꞌuixbel nin ateꞌ cuꞌn yi eꞌ wunak na quiꞌt na chixom te eꞌchk caꞌwl yi tzꞌibaꞌnt cyen na cyaꞌl jun jak buch tib tan chichusleꞌn te eꞌchk caꞌwlaꞌtz. Chaꞌstzun te ja cabej chicꞌuꞌl yi eꞌ xonl Israelaꞌtz te Ryos. Nchaꞌtz buchij cheꞌ yi eꞌ meꞌbaꞌ, scyuchꞌ yi eꞌ prow xmaꞌlcaꞌn cyakꞌun yi eꞌ ric. Ej nin te yi jun tiempaꞌtz at wiꞌnin yaj yi ja chipax quib tu quixkel tan chaꞌtz tuꞌ.
Ja tzun xcon Malaquías tan Ryos tan makleꞌn chiwutz yi eꞌ paleꞌ scyuchꞌ yi eꞌ tetz tanum tan tuleꞌn txꞌakx chicꞌuꞌl yi trat yi bnixnak cyen taꞌn scyuchꞌ chimam chiteꞌ.
Yi Weklil Yi Liwreꞌj
Yi bajx wekl (Cap. 1:1-5) na ẍchaj yi wiꞌnin na pekꞌ Kataj Ryos scyeꞌj yi eꞌ tetz tanum.
Yi caꞌp wekl (Cap. 1:6–2:9) na ẍchaj yi chipaltil yi eꞌ paleꞌ.
Yi toxeꞌn wekl (Cap. 2:10-17) na ẍchaj yi chipaltil yi eꞌ xonl Israel.
Yi cyajeꞌn wekl (Cap. 3:1-4) na ẍchaj yi at tulbil yi Mesías.
Yi toꞌeꞌn wekl (Cap. 3:5-15) na ẍchaj yi jun cuꞌn chicawsok yi eꞌ pajol caꞌwl.
Yi kakeꞌn wekl (Cap. 3:16–4:6) na jilon te yi oy yi stkꞌeꞌ Ryos scyetz yi eꞌ cꞌulutxum tu chicaws yi eꞌ pajol caꞌwl.