Wiꞌtzbil tlen ẍchitxꞌaconk yi eꞌ aj Jerusalén scyeꞌjak chicontr
14
1 Txant tan tuleꞌn yi kꞌejlal yil tzꞌul Kajcaw tan chicawseꞌn yi eꞌ wunak. Ej nin te yi jun tiempaꞌtz chocpon chicontr yi eꞌ judiy le tnum Jerusalén, nin copon chijatxol yi eꞌchk meꞌbiꞌl ẍchixoꞌl yi ẍchicambajeꞌtz. 2 Te yi jun kꞌejlalaꞌtz tzꞌocpon Kajcaw tan chimolcheꞌn cyakil yi eꞌ nación tan cyoqueꞌn tan oyintziꞌ scye yi eꞌ aj Jerusalén. Nin ẍchixcyek yi naciónaꞌtz scyeꞌj. Scyetzajeꞌ cyakil yi eꞌchk takleꞌn yi at xeꞌak chicaꞌl yi eꞌ aj Jerusalén. Chocpon tan chipoꞌtzeꞌn xnaꞌn. Ej, nin nchiben pres mas nicyꞌ te yi wunakaꞌtz yi ateꞌ tnum. Ntin cobox ntziꞌ ẍchiclaxok cyen. 3 Tzꞌocpon tzun yi Ryos yi Kajcawil tan oyintziꞌ scye yi naciónaꞌtz, nin stzꞌoyintzink scyeꞌj chi na ban iꞌ tentz. 4 Le yi jun kꞌejaꞌtz cuꞌul txiclok wi yi juꞌwtz Oliw, yi choꞌn at swutz len Jerusalén, nin sjalok jun siwun yi choꞌn xeꞌtok tzaj lilen nin choꞌn tzꞌul tzajk jalen Jerusalén. Sjatxeꞌ tib yi jun juꞌwtzaꞌtz yi na biꞌaj Oliw. Jalaj mben ẍkansal tib lejeꞌnak, nin yi jalajt licuꞌnak. 5 Ma yi axwok itetz cxelpon ojk tul yi jun siwunaꞌtz yi sjalok txoꞌl yi cob juꞌwtzaꞌtz. Na yi jun siwunaꞌtz tzꞌopon stziꞌ te yi amaꞌl Azal, yi at le jalajt. Cxelpon ojk chi nchiban cyen yi eꞌ imam iteꞌ, yi bajijeꞌn yi coblaj nob te yi na cawun tzaj yi rey Usías le amaꞌl cwent Judá. Tzꞌul tzun yi Kajcaw yi kaRyosil scyuchꞌ cyakil yi eꞌ tetz ángela yi xomij chiwiꞌ teꞌj. 6 Te yi jun tiempaꞌtz quiꞌc tkan skil sbneꞌ, nin quiꞌc mas cheꞌw sbneꞌ.b 7 Quil jal junt tiemp niꞌcuꞌn chi yi jun tiempaꞌtz. Ntin at swutz Ryos yi ẍeꞌn cuꞌn sbneꞌ. Te yi jun tiempaꞌtz, quil jal tkan kꞌej, nin quil tzꞌoc tzꞌoꞌtz. Nchaꞌtz yi lakꞌbal tzꞌocpon tetz skꞌejl. 8 Nin tzꞌeluꞌl balaj aꞌ le tnum Jerusalén, yi quil tzaj le tiemp cresum, nin quil tzaj le tiemp kꞌalaj. Nicyꞌ te yi aꞌaꞌtz tzꞌopon tul yi Mar Muerto, nin yi niꞌcyt choꞌn tzꞌopon jalen tul yi mar Mediterráneo. 9 Te yi jun tiempaꞌtz, scawunk Kajcaw, yi kaRyosil, squibaj cyakil wunak beneꞌn tziꞌn wi munt. Cyakil cuꞌn tzun wunak tzꞌelpon chitxumtz tetz yi ntin cuꞌn iꞌ, iꞌ Ryos. Nin quil chinaꞌwsaj biꞌ junt ryos. 10 Nin cyakil yi amaꞌl txoꞌl Geba jalen Rimón, tzꞌocpon cyen tetz jun chin ẍkꞌajlaj, yi nim ateꞌn swutz yi mas amaꞌl cwent Judá. Choꞌn xeꞌtok tzaj yi jun ẍkꞌajlajaꞌtz le amaꞌl Geba yi at xlajeꞌn (norte) Jerusalén, nin choꞌn tzajpon tul yi amaꞌl Rimón yi at xlajcuꞌn (sur) Jerusalén.c Scyajk cyen tzun Jerusalén wiꞌwtz, swutz yi mas tnum, nin sjalok wiꞌnin wunak tul. Ẍchinajank te yi sawan yi na biꞌaj Tetz Benjamín jalen te yi sawan yi na biꞌaj Xtxꞌuꞌc (kale xitnakit yi sawan yi na biꞌaj Antiw). Nchaꞌtz ẍchinajank wunak kale atit yi caꞌl yi nim wutz tkan tetz Hananeel, jalen kale atit yi mulin tetz aceit tetz rey. 11 Jun cuꞌn yol, ẍchinajank wiꞌnin wunak le tnum Jerusalén, nin quiꞌt xit yi tnumaꞌtz junt tir. Quiꞌt chixob yi eꞌ aj Jerusalén tetz jun chicontr sbneꞌ opon tunintz.
12 Ma yi nación yi eꞌ oc tan oyintziꞌ te Jerusalén, tzꞌocpon Kajcaw yi kaRyosil tan chicawseꞌn cunin. Itzꞌenleꞌn skꞌayok chichiꞌbel. Nchaꞌtz chiwutz tu cyakꞌ, skꞌayok. 13 Le jun tiempaꞌtz, chelpon yab te cyakil yi eꞌchk takleꞌn yi sbajok scyeꞌj, nin tzꞌocpon xyaꞌyil chiwiꞌ tan paj. Cyakil eꞌ ẍchibiyeꞌ quib squibil quib. Chocpon tan oyintziꞌ squibil quib. 14 Nchaꞌtz yi eꞌ aj Judá yi najlcheꞌ Jerusalén, chocpon tan oyintziꞌ scyeꞌj. Chixcyek tzun tan majleꞌn wiꞌnin meꞌbiꞌl scye yi eꞌ nación yi najlcheꞌ-tz nakaꞌjil Israel. Ẍchicambajeꞌ wiꞌnin meꞌbiꞌl, chi taneꞌn sakal, oro tu beꞌchok. 15 I teꞌn nin castiwaꞌtz yi na tzan scye yi eꞌ naciónaꞌtz, copon squibaj cyakil chichej tu chicamey tu chimulaꞌ nin chiburuꞌ, chicyakil cuꞌn yi ekum ektz yi xomcheꞌ scyeꞌj.
16 Yi nsken wiꞌt bajij yi xtxolbilaꞌseꞌj, cyakil yi eꞌ jilwutz wunak yi ẍchiclaxok cyen ẍchixoꞌl yi eꞌ, yi eꞌ opon tan oyintziꞌ scyeꞌj yi eꞌ aj Jerusalén, choꞌn nin chopontz Jerusalén cyakil nin yob, tan takꞌleꞌn chikꞌajsbil tetz yi wiꞌtz Rey, yi Kataj Ryos yi cyaꞌl jun na xcyeꞌ quen teꞌj. Na cyakil nin yob chopontz Jerusalén tan ticyꞌseꞌn yi wutz kꞌej Scabteꞌ.d 17 Nin ko at jun kꞌuꞌj wunak yi quil chopon Jerusalén tan lokꞌeꞌn wutz kaReyil, yi Kataj Ryos, quiꞌc aꞌbal sbneꞌ-tz le chitanum. 18 Nin ko quil chopon yi eꞌ aj Egipto, tan ticyꞌseꞌn yi jun kꞌejaꞌtz, iteꞌn nin tzun cawsaꞌtz stkꞌeꞌ Ryos scyetz. Nin iteꞌn nin cawsaꞌtz tzꞌul squibaj alchok kꞌuꞌj wunakil yi quil chiben tan banleꞌn taneꞌn yi wutz kꞌej Scabteꞌ. 19 Yaꞌstzun chicastiw yi eꞌ aj Egipto sbneꞌ, scyuchꞌ alchok kꞌuꞌj wunak yi quil chiben tan banleꞌn taneꞌn yi jun kꞌejaꞌtz.
20 Te yi tiempaꞌtz tzꞌocpon len tzꞌibaꞌn yi yol: “Xansaꞌnt tan xconeꞌn tetz Kataj” teꞌjak chicampanuꞌ yi eꞌ chej. Nin tircuꞌn yi eꞌchk ẍwokꞌ yi xconk le caꞌl Kataj, chin xan nin sbneꞌ, chi xanil eꞌchk lak yi na xcon te yi altar. 21 Ej nin tircuꞌn yi eꞌchk ẍwokꞌ, yi na xcon Jerusalén tu yi na xcon Judá chin xan nin sbneꞌ swutz Kataj Ryos. Xconk eꞌchk ẍwokꞌaꞌtz tan xtxicyleꞌn ẍchiꞌbel chitxꞌixwatz yi eꞌ yil chuꞌl tan toyeꞌn tetz Ryos. Ej, nin te yi jun tiempaꞌtz quiꞌt aj cꞌayinl sjalok le templo yi Kataj Ryos yi cyaꞌl na xcyeꞌ quen teꞌj.