HAGEO
Txꞌolbil Xoꞌl Yi Liwreꞌj
Yi Hageo iꞌ jun elsanl stziꞌ Ryos banak, nin ja xcon iꞌ tan Kataj tul yi yob 520 te ntaxk itzꞌij Kajcaw Jesucristo, nin yi nsken chipakxij wiꞌnin tetz tanum junt tir le tnum Jerusalén. Choꞌn cuꞌn chisajeꞌn Babilonia kale eꞌ beneꞌt ticyꞌleꞌn pres tetz mas oxcꞌal tu lajuj yob.
Ja cheꞌl tzaj liwr yi akꞌlij amaꞌl scyetz tan yi rey Ciro, chireyil yi eꞌ aj Persia (Esd 1:1). Juklajix yob cyunleꞌnixtz le cyetz chitanum yi toqueꞌn Hageo tan talcheꞌn yi tajbil Ryos scyetz. Tul yi juklaj yobaꞌtz ja bnix eꞌchk balaj caꞌl cyaꞌn, poro qui nin eꞌ oc il tan jeꞌseꞌn junt tir yi caꞌl Kataj, yi templo. Chaꞌstzun te toqueꞌn Hageo tan cꞌaseꞌneꞌn cyajtzaꞌkl tan cyoqueꞌn junt tir tan jeꞌseꞌn yi templo. Te yi tiemp yi qui na chibisun tan jeꞌseꞌn junt tir yi templo, ja chitij weꞌj; poro yi cyoqueꞌn il tan jeꞌseꞌn junt tir yi templo, ja saj kojol Kataj yi banl iꞌ squibaj.
Ej nin tan chiquiwseꞌn te yi akꞌunaꞌs, ja oc Hageo tan talcheꞌn scyetz yi ẍeꞌn sbneꞌ yi balaj templo yi sjalok Jerusalén tzantzaj (2:10-14).
Yi Weklil Yi Liwreꞌj
Yi bajx wekl (Cap. 1) na ẍchaj yi ẍeꞌn mban Ryos tan cꞌaseꞌn chitxumuꞌn yi eꞌ wiꞌtz ajcaw tan jeꞌseꞌn junt tir yi templo.
Yi caꞌp wekl (Cap. 2:1-9) na ẍchaj yi ẍeꞌn mban Ryos tan chiquiwseꞌn tan wiꞌtzeꞌn yi akꞌun. Ej nin ja tal scyetz yi ẍeꞌn sbneꞌ yi kꞌej junt templo tzantzaj.
Yi toxeꞌn wekl (Cap. 2:10-19) na ẍchaj yi ẍeꞌn mban Ryos tan ẍchajleꞌn scyetz yi eꞌ len pajol caꞌwl sajleꞌn tunintz, nin tan paj yi eꞌ pajol caꞌwl ja chitij weꞌj; poro yi cyoqueꞌn cꞌulutxum tan jeꞌseꞌn yi templo, ja takꞌ iꞌ chibanl.
Yi cyajeꞌn wekl (Cap. 2:20-23) na ẍchaj yi mbi sbajok tzantzaj yil chisotz cyakil yi eꞌ contr Israel tan Ryos, nin yil jal jun wiꞌtz cyajcawil yi Ryos txaꞌon tetz.