Yi chicaws yi eꞌ aj Jerusalén
3
1 Lastum yi eꞌ aj Jerusalén, tzꞌul chicaws, na ntin xoꞌquiꞌn cyaꞌn. Chin pajol caꞌwl nin eꞌ. Na eꞌ teꞌn na choꞌc tan chibuchleꞌn chitanum.2 Qui na quibit yi caꞌwl Kataj Ryos. Qui na ocpon jun yol teꞌj chiwiꞌ. Qui na kꞌukeꞌ chicꞌuꞌl te Ryos, nin qui na chijak ẍchꞌeybil cyetz tetz.
3 Yi chibajxom niꞌcuꞌn eꞌ tu león yi na chiẍchꞌin tan weꞌj, na na choꞌc tan xileꞌn cyeꞌj yi eꞌ prow wunak. Nin yi eꞌ pujul xtisyaꞌ, niꞌcuꞌn eꞌ tu xoꞌj,a yi qui na chitzakpuj muꞌẍ tal chimeꞌbiꞌl wunak, na na cyetzaj tircuꞌn.
4 Ej nin at eꞌ elsanl stziꞌ Ryos, yi eꞌ cꞌoxol yol scyeꞌj wunak. Nin eꞌ subul nak. Nchaꞌtz yi eꞌ paleꞌ na el kꞌej yi caꞌl Kataj cyaꞌn, nin na chipaj yi caꞌwl Ryos yi chin xan nin.
5 Ma yi Kataj Ryos, at nintz Jerusalén. Ej nin ntin eꞌchk takleꞌn balaj na ban. Cyakil nin jalchan na lajluchax yi tetz balajil. Poro yi eꞌ mal nak qui na chitxꞌixwij muꞌẍ tal te cyetz quil.
6 Je na tal Kataj Ryoseꞌj: “Ja chixit yi eꞌchk nación waꞌn, ja chicuꞌ inwoqꞌuil yi eꞌchk torre yi ateꞌ-eꞌn wiꞌak tapijil chitnumil. Ja chinxcyeꞌ tan chisotzajeꞌn cyakil yi eꞌ wunak yi najlcheꞌ tul. Cyaꞌl jun yi nak xon tbeꞌ jaluꞌ. Chin tzꞌinunin tunin taneꞌn.
7 Le wutz wetz wajtzaꞌkl, yi eꞌ aj Jerusalén ja kloꞌ cyek inchiꞌ, ja kloꞌ choꞌc cꞌulutxum yi woqueꞌn tan chinucꞌleꞌn kloꞌ. Yi nink choꞌc cꞌulutxum, qui kloꞌ lxit chinajbil waꞌn. Poro yi eꞌ cyetz jalcunin nchoꞌc tan banleꞌn cyakil jilwutz yab ajtzaꞌkl, chaꞌstzun te quil chiclax.
8 Chaꞌstzun te chichꞌiweꞌ bajx, na tzꞌul chan yi kꞌejlal yil noꞌc tan takꞌleꞌn quil yi eꞌchk nación. Na ja bixeꞌ waꞌn tan chimolcheꞌn cyakil jilwutz wunak tetz cyakil jilwutz nación tan wicyꞌsal incꞌuꞌl scyeꞌj, yi jun ẍchiꞌchbeꞌn incꞌuꞌlaꞌtz yi nternin slamcank. Cyakil yi wuxtxꞌotxꞌ stzꞌeꞌok tan yi walor yi ẍchiꞌchbeꞌn incꞌuꞌl.
Yi ẍeꞌn cuꞌn ljal junt tir chibanl, yi eꞌ xonl Israel
9 ”Te yi jun tiempaꞌtz yaꞌstzun yil noꞌc tan xtxꞌajleꞌn len cuꞌn cyakil jilwutz chiyol wunak, bantz junit ẍchibneꞌ tan banleꞌn taneꞌn chimunl tzinwutz.
10 Yi eꞌ intanum yi elnakeꞌ xit choꞌn ẍchisajk jalaj icyꞌen yi tzanlaꞌ cwent Etiopía. Chuꞌl tzinwutz tan jakleꞌn pawor swetz, nin tzꞌul eꞌchk oy cyaꞌn tan toyeꞌn swetz.
11 Axwok jun cꞌoloj intanum, te yi jun tiempaꞌtz quiꞌt cxtxꞌixwijwok tan yi eꞌchk takleꞌn cachiꞌ yi ibanak cyen tzinwutz, na tzꞌelpon incyꞌal yi jun itajtzaꞌklaꞌtz yi na itocsaj itib nim. Quiꞌt jal jun yi nink tocsaj tib nim tu tajtzaꞌkl wi yi juꞌwtzeꞌj yi chin xan nin.
12 Na ntin ẍchicyajk cyen yi eꞌ tal wunak waꞌn yi na cyocsaj quib juy tu cyajtzaꞌkl, yi eꞌ yi choꞌn kꞌuklij chicꞌuꞌl sweꞌj.
13 Yi cobox xonl Israelaꞌtz yi ẍchicyajk cyen, ntin ẍchibneꞌ eꞌchk takleꞌn balaj. Quil chijalcuꞌn jun wi cyakꞌ,b nin quil choꞌc tan chisubleꞌn wunak. Ẍchiwank, nin ẍchuꞌjek lakꞌbal, nin quil chixob tetz jun takleꞌn,” stzun Ryos.c
Yi chibitz yi eꞌ aj Jerusalén tzantzaj
14 ¡Chibitzinkuꞌ eꞌuꞌ aj Sión! ¡Nimit chiwiꞌuꞌ sban tan yi tzatzin yi at ẍchixoꞌluꞌ eꞌuꞌ xonl Israel! ¡Chitzatzinkuꞌ eꞌuꞌ aj Jerusalén, chitzatzinkuꞌ tetz cuꞌn cyalmaꞌuꞌ!
15 Na ja tzaj wiꞌ yi chicawsuꞌ tan Kataj Ryos, nin ja oc iꞌ tan chilajeꞌn len yi chicontruꞌ. Yi Kataj, yi kaRyosil yi oꞌ xonl Israel, choꞌn at skaxoꞌl. Quiꞌt tzun kaxob tetz jun takleꞌn yil tzꞌul skawutz.
16 Te yi jun tiempaꞌtz stzꞌaꞌlchok scyeꞌjtz yi eꞌ aj Jerusalén: “¡Quil chixobuꞌ eꞌuꞌ aj Sión, quiwit!”
17 Na yi Kajcaw yi chiRyosiluꞌ choꞌn at ẍchixoꞌluꞌ. ¡Chin cham nin iꞌ tan oyintziꞌ, nin tzꞌocpon tan chicolcheꞌnuꞌ!d Wiꞌnin na tzatzin iꞌ scyeꞌjuꞌ. Wiꞌnin na pekꞌ iꞌ scyeꞌjuꞌ, nin stkꞌeꞌ iꞌ jun acꞌaj quitzꞌajbiluꞌ. Nin sbitzink iꞌ ẍchixoꞌluꞌ, tan yi tzatzin yi at cuꞌnt.
18 Na sjalok jun chin tzatziꞌn tetz iꞌ,e chi ik jun chin kꞌej na tzan.
Je na tal Kataj kaRyosileꞌj: “Tzꞌelpon incyꞌal yi bis oꞌkl yi at te italmaꞌ, tan yi sotzeꞌn yi ja ul tziwutz, nin tzꞌelpon incyꞌal yi txꞌixweꞌn tzitetz.
19 Tul yi jun tiempaꞌtz nocpon tan chixiteꞌn cuꞌn cyakil yi eꞌ yi na chitzan tan ixiteꞌn itetz. Nin nocpon tan quichꞌeyeꞌn cyakil yi eꞌ yi ateꞌ ẍchixoꞌluꞌ yi niꞌcuꞌn eꞌ tu jun tal cneꞌr yi coꞌx. Nin nocpon tan chimolcheꞌn tzaj junt tir cyakil yi eꞌ yi elnakeꞌ xit.f Quiꞌc ikꞌej ẍchiwutz wunak jaluꞌ, poro yil tzꞌopon yi jun tiempaꞌtz, sjalok ikꞌej ẍchiwutz cyakil jilwutz wunak beneꞌn tziꞌn wi munt.
20 Tul yi jun tiempaꞌtz nocpon tan imolcheꞌn junt tir. Nin sjalok ibanl junt tir. Sjalok wiꞌnin ikꞌej ẍchiwutz cyakil wunak yi ateꞌ beneꞌn tziꞌn wi munt. Yi in wetz yi in iTaj Jehová, jun cuꞌn nelpon cuꞌn teꞌj yi xtxolbilaꞌseꞌj yi na wal nin,” stzun Ryos bantz.