2
1 Ma jaluꞌ, axwok yi quiꞌc muꞌẍ tal itxꞌix, txumwok cunin yi mbi na iban, te yi ntaxk cxeꞌlwok cuꞌn swutz, chi na ban jun bocꞌoj chꞌim yi jun ntziꞌ tkuj na tzaj tan kꞌakꞌ.2 Txumwok cunin yi ntaxk saj yi ẍchiꞌchbeꞌn cꞌuꞌl Ryos tzitibaj, yi ntaxk ul yi jun kꞌejlalaꞌtz, yi xcyek tan ixiteꞌn len, chi na ban xak tzeꞌ tan cyekꞌekꞌ.a
3 Ma yi axwok itetz yi qui na itocsaj itib nim tu itajtzaꞌkl, yi axwok yi na ibanwok taneꞌn tircuꞌn yi caꞌwl Ryos, joywok bin puntil tan qui teleꞌn Ryos te icꞌuꞌl. Banwok yi eꞌchk takleꞌn balaj, nqueꞌnwok cꞌulutxum, nin qui cunin batz sjalok colbil itetz, yil tzꞌul yi jun kꞌejlal yil ẍchaj Ryos yi ẍchiꞌchbeꞌn cꞌuꞌl squibaj cyakil jilwutz wunak.b
Yi eꞌchk caws yi tzꞌul squibaj cyakil nación
4 Quiꞌt jal jun wunak le tnum Gaza, nin xitok yi tnum Ascalón. Skꞌejl cuꞌn chelpon lajuꞌn cyakil yi eꞌ aj Asdod. Nchaꞌtz yi eꞌ aj Ecrón chelpon lajuꞌn le cyetz chitanum.
5 Lastum axwok aj Creta, yi najlquixwok jaluꞌ tzi mar Canaán.c Je icawseꞌj yi alijt cyen tan Kataj Ryos: “¡Xitok yi jun amaꞌlaꞌtz waꞌn nin cyaꞌl jun snajank tul!
6 Yi jun amaꞌlaꞌtz yi at tzi mar, tzꞌocpon tetz jun amaꞌl tetz pstorbil tuꞌ, kalel bnixeꞌt chipeꞌmil cneꞌr yi eꞌ intanum.”
7 Yil tzꞌul tzaj Kajcaw tan quichꞌeyeꞌn nin tan takꞌleꞌn chibanl yi eꞌ aj Judá yil ẍchiclaxok cyen, scyeꞌjtzajeꞌ tzun yi eꞌchk amaꞌlaꞌtz. Choꞌn chocpontz tan pstoreꞌn cyawun tul, nin ẍchiwitok xoꞌlak eꞌchk kꞌuchbeꞌn caꞌl yi sjalok le tnum Ascalón.
8-9 Je yol Kataj Ryoseꞌj, yi tzꞌelpon cuꞌn teꞌj, yi Ryos yi na xcyeꞌ te cyakil, yi kaRyosil yi oꞌ xonl Israel: “Witnak yi cyoqueꞌn yi eꞌ aj Moab tan ijisleꞌn,d nin wilnak eꞌchk takleꞌn cachiꞌ yi nchiban yi eꞌ aj Amóne tziteꞌj, na nin eꞌ oc tan ijisleꞌn nin tan cyetzal eꞌchk amaꞌl cwent itanum. Chaꞌstzun te jun cuꞌn yol swaleꞌ nin yi niꞌcuꞌn sbneꞌ yi tnum Moab chi banak Sodoma. Nin yi tnum Amón, niꞌcuꞌn sbneꞌ chi banak Gomorra.f Na ntin txꞌiꞌx tu atzꞌum na jaltz Sodoma tu Gomorra, nin chin tzꞌinunin tunin taneꞌntz. Poro yi eꞌ weri intanum yil chiclax cyen, chocpon tan majleꞌn len cyakil yi meꞌbiꞌl yi at tul yi tnum Moab tu yi tnum Amón. Nin scyeꞌjtzajeꞌ tircuꞌn yi eꞌchk amaꞌlaꞌtz,” stzun Ryos bantz.
10 Yaꞌstzun ẍchojoꞌnil yi quil yi eꞌ aj Moab scyuchꞌ yi eꞌ aj Amón, tan paj yi cyoqueꞌn tan chijisleꞌn yi eꞌ tanum Ryos, nin tan paj yi cyoqueꞌn tan majleꞌn chitxꞌotxꞌ yi eꞌ tanum yi Ryos yi cyaꞌl na xcyeꞌ quen teꞌj.
11 Chin xoꞌwbil nin sbneꞌ Kataj Ryos scyeꞌj. Copon xitul cyakil chiryosil yi eꞌ wunakaꞌtz. Nin ntin yi tetz biꞌ snaꞌwsok beneꞌn tziꞌn wi munt.
12 ¡Nchaꞌtz axwok aj Etiopía,g cxloꞌonkwok tan yi spar Kataj!
13 Nchaꞌtz axwok aj Asiria,h tzꞌocpon Kataj Ryos tan ixiteꞌn cuꞌn, nin chin tzꞌinunin tunin sbneꞌ yi tnum Nínive. Tzꞌocpon tetz jun amaꞌl yi chin tzꞌinunin tuꞌ.
14 Tircuꞌn eꞌchk stzeꞌil chicaꞌl tzꞌelpon ticyꞌleꞌn. Nin xconk eꞌchk caꞌl tetz chipeꞌmil cneꞌr, nin tetz chinajbil smaron txuc. Ẍchiwitok yi tucruj wiꞌak eꞌchk tkan caꞌl yi scyajk cyen txiclij. Nin ẍchiẍchꞌink yi eꞌ chꞌoc lakak jul yi at wutzak xan.
15 Lastum yi tnumaꞌtz, wech na wiꞌnin na cyocsaj quib nim tu cyajtzaꞌkl, nin qui na chibisun tan jun chicontr. Le wutz cyetz cyajtzaꞌkl yi cyaꞌl nin jun tnum beneꞌn tziꞌn wi munt yi nim teꞌn cuꞌnk kꞌej ẍchiwutz cyetz. Poro xituꞌn cuꞌn sbneꞌ tircuꞌn chitnumil, nin ntin smaron txuc ẍchinajanktz tul. Cyakil yi eꞌ wunak yil chicyꞌaktz, ẍchitzeꞌenk len te yi mbi cuꞌn squileꞌ, nin mbinin sbneꞌ chin chiwutz tan ẍchajleꞌn yi quiꞌc muꞌẍ xac yi luwaraꞌtz ẍchiwutz.