SOFONÍAS
1
1 Je yi xtxolbileꞌj yi tal Kataj Ryos tetz Sofonías yi elsanl stziꞌ iꞌ, te yi tiemp yi na cawun tzaj yi rey Josíasa yi cyꞌajl Amón, le amaꞌl Judá. Yi taj Sofonías Cusi biꞌ. Nin yi biꞌ yi taj Cusi, iꞌtz Geldaías. Nin yi biꞌ yi taj Geldaías iꞌtz Amarías. Ma Amarías Ezequías biꞌ yi tetz taj. Yi kꞌejlal yil ẍchaj Ryos yi ẍchiꞌchbeꞌn cꞌuꞌl
2 Je yol Kataj Ryoseꞌj: “Tzꞌelpon cuꞌn tircuꞌn waꞌn swutz. Tircuꞌn yi mbi cuꞌn at beneꞌn tziꞌn wi munt stzajk waꞌn.
3 Tircuꞌn yi eꞌ wunak scyuchꞌ yi eꞌ txuc chelpon cuꞌn waꞌn swutz, na ẍchiquimok tircuꞌn yi eꞌ txuc waꞌn yi na chixon wuxtxꞌotxꞌ, scyuchꞌ yi eꞌ yi na chixicyꞌin, scyuchꞌ yi eꞌ yi najlcheꞌ xe aꞌ. Nchaꞌtz yi eꞌ wunak yi chin juntlen nin cyajtzaꞌkl, tircuꞌn chelpon cuꞌn waꞌn swutz.”
4 Ej nin je junt yol Kataj Ryoseꞌj yi tzꞌelpon kꞌab teꞌj: “Ẍcheꞌ incawseꞌ yi eꞌ aj Judá. Nchaꞌtz yi eꞌ yi najlcheꞌ Jerusalén ẍcheꞌ incawseꞌ. Copon inxitul tircuꞌn yi eꞌchk teblal yi jun ryosaꞌtz yi na biꞌaj Baal yi na tzan lokꞌeꞌn wutz Jerusalén. Nchaꞌtz yi eꞌ paleꞌ yi na chixcon tetz yi jun ryosaꞌtz, chelpon cuꞌn waꞌn swutz tircuꞌn.
5 Tircuꞌn yi eꞌ yi na chijeꞌ wiꞌak chicaꞌl tan lokꞌeꞌn wutz eꞌch txꞌuml, chelpon cuꞌn waꞌn swutz. Nchaꞌtz yi eꞌ yi na chimejeꞌ tan naꞌwseꞌn imbiꞌ tu yi junt chiryosil yi na biꞌaj Milcom,b tircuꞌn yi eꞌaꞌtz chelpon cuꞌn waꞌn swutz.
6 Nchaꞌtz tircuꞌn yi eꞌ yi na quil cyen inchusuꞌn, chelpon cuꞌn waꞌn swutz. Tircuꞌn yi eꞌ yi qui na choꞌc tan injoyleꞌn tan jakleꞌn cyajtzaꞌkl swetz, tircuꞌn yi eꞌaꞌtz, chelpon cuꞌn waꞌn swutz,” stzun Kataj Ryos.
7 Cyaꞌl bin jun jilonc swutz Kataj Ryos. Kayutꞌeꞌ kib, na atoꞌ txeꞌ quen yi jun kꞌejlal yil ticyꞌsaj iꞌ cꞌuꞌl scyeꞌj cyakil jilwutz wunak. Na txumijt taꞌn tan chiquimseꞌn cuꞌn cyakil yi eꞌ contr. Choꞌn cuꞌn ẍchibneꞌ taꞌn chi na patij jun txꞌixwatz. Nin ja wiꞌt chixansij yi eꞌ xtxocum taꞌn.
8 “Tul yi jun kꞌejaꞌtz, nocpon tan takꞌleꞌn chicaws yi eꞌ wiꞌtz bajxom, scyuchꞌ chicyꞌajl, nin cyakil yi eꞌ yi na el cyalmaꞌ tan xconseꞌn beꞌch cyetz awer nak.d
9 Nchaꞌtz yil tzꞌopon yi jun kꞌejlalaꞌtz yil wicyꞌsaj incꞌuꞌl scyeꞌj yi eꞌ malnakaꞌtz, ẍcheꞌ incawseꞌ cyakil yi eꞌ yi na chixom te cyajtzaꞌkl yi eꞌ awer nak yi na chicyꞌ tzꞌitpuj tibaj yi xeꞌ yi marquil eꞌchk puert.e Nchaꞌtz ẍcheꞌ incawseꞌ cyakil yi eꞌ yi na choꞌc tan oyintziꞌ nin tan chisubleꞌn wunak tan chicambal chimeꞌbiꞌl bantz cyakꞌol tetz chiryosil,” chij Ryos.
10 Je junt yol Kataj Ryoseꞌj, yi tzꞌelpon kꞌab teꞌj: “Nin tul yi jun kꞌejlalaꞌtz, wiꞌnin sichꞌ sbajok tan jakleꞌn ichꞌeyaꞌn swutz cunin yi sawanil yi tapij yi na biꞌaj Sawan Tetz Cay. Nin wiꞌnin ẍchiẍchꞌink yi eꞌ wunak yi ateꞌ le caꞌp cantón. Ej nin quibiteꞌ wiꞌnin jincaneꞌn yil saj nil yi eꞌchk kotxꞌ.
11 Wiꞌnin oꞌkl ẍchibneꞌ yi eꞌ aj Jerusalén yi najlcheꞌ le cantón yi na biꞌaj Mortero,f na ẍchiquimok cyakil yi eꞌ aj lijens, tu cyakil yi eꞌ aj txꞌexul wutz pwokg yi najlcheꞌ-tz.
12 Nin tul yi jun tiempaꞌtz niꞌcuꞌntz chi nink xconk jun txekbil waꞌn tan chijoyleꞌn cyakil yi eꞌ yi na cyew quib le tnum Jerusalén. Na nocpon tan takꞌleꞌn chicaws cyakil yi eꞌ yi le wutz cyetz cyajtzaꞌkl baꞌn ateꞌt, yi eꞌ yi na cyal squibil quib: ‘Quiꞌc tulbil kacaws tan Ryos’.
13 Tan yi cyajtzaꞌklaꞌtz tzꞌelpon majij cyakil chimeꞌbiꞌl, nin copon wocꞌ chicaꞌl. Sbnixok chicaꞌl cyaꞌn, poro quil chinajeꞌ txeꞌ. Scyaweꞌ wiꞌnin wiꞌ uva swutzak chicojbil poro quil baj yi taꞌal cyaꞌn.”
14 ¡Atoꞌ txeꞌ quen yi jun kꞌejlalaꞌtz yil ticyꞌsaj Ryos cꞌuꞌl scyeꞌj yi eꞌ wunak!h ¡Atoꞌ txeꞌ quen yi jun kꞌejlalaꞌtz, na tzꞌul chan! ¡Wiꞌnin jincaneꞌn sbajok le jun kꞌejlalaꞌtz, na chin xoꞌwbil nin sbneꞌ! Na nicyꞌt nin yi eꞌ yi chin cham nin eꞌ, ẍchiẍchꞌink tan xoꞌw.
15 Ẍchajeꞌ Ryos yi ẍchiꞌchbeꞌn cꞌuꞌl, scyeꞌj yi eꞌ contr. Nin wiꞌnin sotzaj cꞌuꞌlal tzꞌul ẍchiwutz, nin ẍchitijeꞌ wiꞌnin qꞌuixcꞌuj. Tircuꞌn sloꞌonk. Chin tzꞌinunin tunin sbneꞌ. Wiꞌnin muj sbneꞌ tcyaꞌj, nin chin tzꞌoꞌtz nin tunin sbneꞌ tircuꞌn wuxtxꞌotxꞌ.
16 Tul yi jun kꞌejlalaꞌtz ẍchꞌink eꞌchk chun tan ẍchajleꞌn yi xeꞌtok jun chin oyintziꞌ. Xitok eꞌchk tnum, yi tapij cuꞌn solteꞌj. Ej nin xitok eꞌchk torre yi nim wutz tkan, kale chicoloneꞌt quib yi eꞌ sanlar.
17 Nchaꞌtz je na tal Katajeꞌj: “Tzꞌopon eꞌchk il waꞌn ẍchiwutz wunak, nin niꞌcuꞌn ẍchibneꞌ chi ik eꞌ moyiꞌẍ, na ja chijuch quil tzinwutz. Tzꞌelpon kojij chiẍchꞌel chi na el kojij aꞌ. Nin tenajiꞌn cuꞌn sbneꞌ chiwankil, chi na ban xtxaꞌ cneꞌr yi junit muluj na ban,” chij Kataj.
18 Tul yi jun kꞌejlalaꞌtz yil ẍchaj tib yi ẍchiꞌchbeꞌn cꞌuꞌl Ryos, quil xcyeꞌ sakal nka oro tan chiclaxeꞌn wunak, na sotzok tircuꞌn yi eꞌchk takleꞌnaꞌtz tan yi ẍchiꞌchbeꞌn cꞌuꞌl Ryos yi niꞌcuꞌn tu kꞌakꞌ. Tzꞌocpon Kataj Ryos tan chixiteꞌn cuꞌn cyakil yi eꞌ wunak yi ateꞌ wi munt, tul jun ntziꞌ tkuj.