SOFONÍAS
Txꞌolbil Xoꞌl Yi Liwreꞌj
Yi Sofonías ja aꞌtij te yi tiemp yi at tzaj Nahúm nin at eꞌ yi na cyal yi nchaꞌtz te yi tiemp yi taꞌteꞌn Habacuc (640—608 A.C.). Nin ja ban iꞌ taneꞌn yi munl chi jun elsanl stziꞌ Ryos te yi tiemp yi na cawun tzaj yi rey Josías.
Yi Sofonías na tzan iꞌ tan xtxoleꞌn yi txant tan tuleꞌn yi jun kꞌej yil ticyꞌsaj Ryos cꞌuꞌl scyeꞌj yi eꞌ yi qui xomcheꞌ te yi tetz tajbil. Yi jun tiempaꞌtz iꞌtz jun tiemp yil tzꞌoc Ryos tan pujleꞌn xtisyaꞌ, nin tan takꞌleꞌn chicaws tircuꞌn yi eꞌ wunak, nin tan xiteꞌn wiꞌnin eꞌchk tnum yi chin contr nin eꞌ scyeꞌj yi eꞌ aj Israel chi taneꞌn Gaza, Ascalón, Asdod tu Ecrón. Yi eꞌchk tnumaꞌtz eꞌ cuꞌn filistey, nin chiwisin quib tu Israel.
Poro nchaꞌtz ja tal iꞌ yi tzꞌul chan chicaws yi eꞌ aj Israel, na yi eꞌ cyetz chin juchul il nin eꞌ. Nchaꞌtz talnak yi tzꞌocopon Ryos tan nucꞌleꞌn junt tir yi chitnumil yi xitnak, yil tzꞌopon yi tiempil.
Yi liwreꞌj na tzaj wiꞌ tan jun chin kꞌajsbil yi na ẍchaj yi quil tzꞌel cuꞌn Israel swutz.
Yi Weklil Yi Liwreꞌj
Yi bajx wekl (Cap. 1:1–2:3) na jilon te yi kꞌejlal yil ẍchaj Ryos yi ẍchiꞌchbeꞌn cꞌuꞌl.
Yi caꞌp wekl (Cap. 2:4-15) na jilon te yi eꞌchk caws yi tzꞌul squibaj cyakil nación.
Yi toxeꞌn wekl (Cap. 3) na jilon te yi chicaws yi eꞌ aj Jerusalén tu yi ẍeꞌn cuꞌn sjalok junt tir chibanl.