HABACUC
Txꞌolbil Xoꞌl Yi Liwreꞌj
Habacuc iꞌ jun elsanl stziꞌ Ryos tentz. Qui na tal yol Kataj yi naꞌ mmitzꞌeꞌt iꞌ, nka yi naꞌ scyetz eꞌ taj xtxuꞌ, ntin na tal yi iꞌ jun elsanl stziꞌ Ryos.
Yi biꞌaj Habacuc nkꞌeꞌtz chiyol yi eꞌ aj hebrey ma na iꞌtz chiyol yi eꞌ aj Babilonia.
Ja loꞌ stzꞌibxij yi liwreꞌj tan Habacuc 600 yob yi ntaxk itzꞌij Kajcaw Jesucristo. Nin ja bnix taꞌn te yi ntaxk chopon yi eꞌ aj Babilonia tan xiteꞌn cuꞌn yi tnum Jerusalén.
Te yi tiemp tetz Habacuc ateꞌt nin yi eꞌ elsanl stziꞌ Ryos yi na chibiꞌaj Nahúm, Sofonías, tu Jeremías.
Yi Weklil Yi Liwreꞌj
Yi bajx wekl (Cap. 1) na jilon te yi cob xochoꞌn yi mban Habacuc swutz Kataj te yi mbi tzuntz yi qui na oc il iꞌ tan makleꞌn chiwutz yi eꞌ tetz tanum yi chin juchul il nin eꞌ, ej nin yi mbitzuntz tzꞌocopon iꞌ tan chicawseꞌn cyakꞌun wunak yi chin mal nin eꞌ.
Yi caꞌp wekl (Cap. 2) na jilon te yi ẍeꞌn talol Ryos yi tajweꞌn tan jaleꞌn pasens Habacuc na tzꞌopon jun kꞌejlal yi sticyꞌsaj Ryos cꞌuꞌl scyeꞌj yi eꞌ malnakaꞌtz. Poro yi eꞌ balaj nak ilenin ẍchiclaxok tan tuꞌ yi na kꞌukeꞌ chicꞌuꞌl te iꞌ.
Yi toxeꞌn wekl (Cap. 3) na tal yi oración yi ntal Habacuc tan takꞌleꞌn yi tetz kꞌajsbil tetz Ryos nin yi toqueꞌn iꞌ tan talcheꞌn yi mbi sbneꞌ Ryos yil tzꞌult tzaj tan chicolpeꞌn yi eꞌ tetz tanum, nin tan takꞌleꞌn chicaws cyakil yi eꞌ juchul il.