HABACUC
Yi xochoneꞌn Habacuc tetz Ryos tan paj yi eꞌ cuꞌn juchul il yi eꞌ tetz tanum, yi eꞌ xonl Israel
1
1 Je yi xtxolbileꞌj yi talnak Kataj Ryos chi tul wutzicyꞌ taneꞌn tetz yi elsanl stziꞌ iꞌ yi na biꞌaj Habacuc. Na nin xochon iꞌ tetz Ryos. Nin je yi yol iꞌeꞌj:2 Kataj Ryos, iluꞌ inRyosil, ¿tonaꞌ nin tbituꞌ intziꞌ inkul tan quiꞌt tkꞌoluꞌ amaꞌl te eꞌchk takleꞌn cachiꞌ yi na bajij skaxoꞌl? Na at wiꞌnin ilcꞌol skaxoꞌl, wiꞌnin biyol nak ateꞌ. 3 Taꞌ, ¿mbi tzuntz na takꞌuꞌ amaꞌl tan bajijeꞌn yi eꞌchk takleꞌnaꞌtz yi chin cachiꞌ nin skaxoꞌl? Na chin xoꞌwbil nin, nin chin juntlen nin yi eꞌchk takleꞌnaꞌtz yi na bajij. Na at wiꞌnin eꞌ yi na chitzan tan xiteꞌn eꞌchk takleꞌn balaj. Ntin biyoꞌn cyaꞌn. Ntin oyintziꞌ tu wakꞌ ib na bajij ẍchixoꞌl. 4 Taꞌ, tan yi xtxolbilaꞌtz, yi na chitzan yi eꞌ wunak tan banleꞌn, qui na chitzan tan banleꞌn taneꞌn yi caꞌwluꞌ. Ej nin nchaꞌtz yi eꞌ pujul xtisyaꞌ, qui na chixom te yi mero bintzij, na na cyakꞌ amaꞌl scyetz yi eꞌ mal nak tan chitxꞌaconeꞌn scyeꞌj yi eꞌ balaj. Cyaꞌl jun na xom te yi ley.
Yi tlol Ryos tetz Habacuc yi at tulbil wiꞌnin eꞌchk il
5 Jiloneꞌn tzaj tzun Kataj Ryos, nintzun taltz scyetz yi eꞌ tetz tanum: “Ilwoknin mbi sbajok scyeꞌj yi eꞌ mas tnum yi najlcheꞌ tzixlajwok. Cxeleponwok yab teꞌj. Na te yi tiempaꞌtz sbajok jun chin xtxolbil waꞌn. Poro quil tzitocsaj, mpe nink tal junt wunak tzitetz. 6 Na je tzimbneꞌeꞌj: Swakꞌeꞌ amaꞌl scyetz yi eꞌ aj Babilonia tan chiyakꞌpeꞌn cyakil jilwutz wunak beneꞌn tziꞌn. Na qui na el chikꞌajab teꞌj jun, nin qui na chitaneꞌ tan xtxumleꞌn yi ẍeꞌn lchicambaj yi eꞌchk amaꞌl yi at beneꞌn tziꞌn, yi nkꞌeꞌtz cyetz. 7 Yi eꞌ aj Babiloniajaꞌtz, chin xoꞌwbil nin eꞌ. Nin chin juntlen nin yi eꞌchk takleꞌn yi na chitzan tan banleꞌn, na ntin yi cyetz chicaꞌwl na cyocsaj. Ntin na chixom te yi cyetz cyajbil. Na na cyocsaj quib nim tu cyajtzaꞌkl. 8 Ej nin yi cyetz chichej mas tcuꞌn na choꞌjkel swutz yi leopardo.a Nin mas xoꞌwbil chiwutz swutz yi eꞌ smaron txuc yi ateꞌ lakak amaꞌl tzꞌinunin tuꞌ. Chin joylaj nin na chisiteꞌt nil yi eꞌ aj Babilonia tib chichej tan chixiteꞌn chicontr. Choꞌn cunin na chiban chi na chiban eꞌ kuꞌs yi na ẍchꞌin chixicyꞌ yi na chisaj lajkeꞌl tan cambajeꞌn chiwaꞌ. 9 Quiꞌc nin jun takleꞌn yi quiꞌk na el cuꞌn cyaꞌn swutz. Nin tircuꞌn yi eꞌ wunak yi ateꞌ lakak amaꞌl kale na chicyꞌ cuꞌnt, na chixob scyetz. Nin wiꞌnin wunak na ben cyaꞌn pres. Qui ajlbeꞌn cyetz yi eꞌ pres, niꞌcuꞌn tu yi samlicyꞌ yi at stzi mar. 10 Qui na cyakꞌ chikꞌej yi eꞌ wiꞌtz ajcaw. Nin tzeꞌeꞌn tuꞌ na chiban scyeꞌj eꞌ caꞌp ajcaw. Cyaꞌl nin jun na xcyeꞌ tan makleꞌn chiwutz. Mpe ik jun chin wutzileꞌn tapij yi at solteꞌj jun tnum. Na ntin na chijoy puntil tan nojseꞌn txꞌotxꞌ solteꞌj yi tapij bantz chijeꞌn poneꞌn te chicontr. 11 Ej nin yi na chixcyeꞌ teꞌj jun tnum, jalcuꞌn na chicyꞌ teꞌj junt. Choꞌn na chiban chi na ban jun chin wutzileꞌn cyekꞌekꞌ. Nin yi chichamil yaꞌstzun chiryosil,” stzun Ryos bantz.
Yi xochoneꞌn junt tir Habacuc tetz Ryos tan paj yi mbi cuꞌn tal iꞌ tetz
12 Wajcaw, yi iluꞌ teruꞌ, iluꞌ yi wiꞌtz Ryos tul cyakil tiemp, jetz le xeꞌtzbil tzaj. Nin iluꞌ inRyosil. Nin yi iluꞌ teruꞌ, quiꞌc muꞌẍ tiluꞌ. Nin quil sotzuꞌ tetz ben kꞌej ben sak. Jun cuꞌn, iluꞌ colol wetz Taꞌ, ¿poro ẍeꞌn tzun ncheꞌ jeꞌ xtxaꞌoluꞌ yi eꞌ aj Babilonia tan kacawseꞌn? 13 ¿Ẍeꞌn ncuꞌ yi jun jilwutz wunakaꞌtz swutzuꞌ? Na yi iluꞌ teruꞌ Taꞌ, chin xan nin iluꞌ. Nin qui na tzatzinuꞌ te yi eꞌchk takleꞌn cachiꞌ yi na bajij, nin qui na pekꞌuꞌ scyeꞌj yi eꞌ juchul il. ¿Mbi tzuntz yi ntakꞌuꞌ amaꞌl scyetz yi eꞌ mal nakaꞌtz tan kabiyleꞌn? Wech na chin juchul il nin eꞌ skawutz ketz. Nin qui nin na taluꞌ jun yol scyetz tan makleꞌn chiwutz. 14 ¿Mbi tzuntz yi ntakꞌuꞌ amaꞌl scyetz yi eꞌ caldeyaꞌtz tan chitzꞌamleꞌn wunak chi eꞌ tuꞌk cay taneꞌn, nka chi eꞌ tuꞌk txuc yi quiꞌc ajcaw tan chiqꞌuicyꞌleꞌn? 15 Na yi eꞌ caldeyaꞌtz, wiꞌnin na chicawun squibaj eꞌchk mas nación. Nin na chicambaj eꞌchk mas tnum. Choꞌn na chiban chi na ban jun yaj yi na ben tan cayiꞌn yi na tcyꞌaj nin ansuel tu leb. Nin wiꞌnin na tzatzin iꞌ yi na txꞌamxij jun cꞌoloj cay taꞌn. Yaꞌstzun na chiban yi eꞌ caldeyaꞌtz yi na chicambaj jun cꞌoloj wunak. 16 Yi eꞌ aj cayinl na oc chimaꞌcl tetz chiryosil. Nchaꞌtz quitaneꞌn yi eꞌ caldeyaꞌtz, na na chipat chitxꞌixwatz tu insens swutz chimaꞌcl tetz oyintziꞌ. Na tan chimaꞌclaꞌtz na jaleꞌt chiriquil. 17 Wajcaw, ¿yaꞌtz ptzun loꞌ ẍchibneꞌ yi eꞌ caldeyaꞌtz skeꞌj ketz? ¿Kacupon nin poloꞌ tcꞌuꞌl chileb? ¿Stkꞌeꞌ ptzunuꞌ amaꞌl scyetz yi eꞌaꞌtz yi qui na el chikꞌajab te jun tan kabiyleꞌn cuꞌn?